ಸ್ತೋತ್ರಸಂಹಿತಾ ೩.೨ (ಸ್ವರಚಿತ ಸ್ತೋತ್ರಗಳು, ವಿವರಣೆ ಸಹಿತ)

 ಅನಘೋಽಪತಿರಾಲಮ್ಬಶ್ಚಾಘಹಾರೀ ಘನಾಘನಃ।

ಗುರುರ್ಲಘುಃ ಕೃಶಸ್ಸ್ಥೂಲಃ ಕೇವಲೋ ನಿರ್ಗುಣಶ್ಶಿವಃ॥೪೪॥(೩೧೧)

ಅನಘನಘರಹಿತನೆ ಮಹಾತ್ಮನೆ

ವಿನುತ ಪಾಪವಿದೂರ ಕೃಷ್ಣನೆ

ಮನೆಮನಗಳನು ಬೆಳಗುತಿರುವ ಮಹಾಮಹಿಮ ಹರಿ |

ಅನಘನಘಹರ ಪುಣ್ಯಪ್ರೇರಕ

ಸನುಮತದಿ ಸನ್ಮಾರ್ಗದರ್ಶಕ

ವನದಿ ಜಲಮಧ್ಯದಲಿ ಕಾಯುವ ದೇವ ಶ್ರೀಕೃಷ್ಣ || ೩೦೦ ||

ಅಪತಿಯಧಿಪತಿರಹಿತ ಕೃಷ್ಣನೆ

ಸಪತಿಗಳ ಪತಿ ಸಕಲಪತಿ ಹರಿ

ಭೂಪತಿಯೆ ಶ್ರೀಪತಿಯೆ ನಿನಗಾರಿಹರು ನಾಯಕರು |

ಕಪಟನಾಟಕಸೂತ್ರಧಾರಿಯೆ

ವಿಪದ ಕಳೆಯುತ ಸುಜನ ರಕ್ಷಕ

ಕುಪಥರನು ತರಿದಿಕ್ಕಿ ಧರ್ಮವ ಸ್ಥಾಪಿಸುವ ದೇವ || ೩೦೧ ||

ಆಲಂಬ ಸರ್ವಕು ಕೃಷ್ಣ ನೀನೇ

ಸಾಲಂಬರೆಲ್ಲರು ನಿನ್ನ ಹೊರತಿಲಿ

ವಿಲಂಬಿಸದಿವರನ್ನು ಕಾಯೈ ಹೇ ನಿರಾಲಂಬ |

ಕಲಂಕವ ತೊಳೆ ಸುಮತಿ ನೀಡೈ

ಸುಲಂಕೃತ ಹರಿಯಹಂಕೃತಿ ಕಳೆ

ಸುಲಂಬನೆ ಸುಜನರಿಗೆ ಧರ್ಮಾಲಂಬ ನಿಜಮೂರ್ತಿ || ೩೦೨ ||

ಕೃಷ್ಣ ನೀಯಘಹಾರಿಯಘ ಕಳೆ

ಕೃಷ್ಣ ಪಾಪವ ನಾಶಮಾಡುವೆ

ಕೃಷ್ಣ ದುರಿತವ ಹರಣಗೈಯುವೆ ಪುಣ್ಯಪಾಪಹನೆ |

ಕೃಷ್ಣ ಪುಣ್ಯದ ಬಂಧ ಕಳೆಯುವೆ

ಕೃಷ್ಣ ಪಾಪದ ಕರ್ಮ ಕಳೆಯುವೆ

ಕೃಷ್ಣ ಬ್ರಹ್ಮಾತ್ಮದ ಸುಬೋಧದವಿದ್ಯೆನಾಶಕನೆ || ೩೦೩ ||

ಘನಾಘನ ಹರಿ ಘನನು ಕೃಷ್ಣನ-

-ಘನನು ದ್ರವನಿಲರೂಪ ಶ್ರೀಹರಿ

ಘನವನಘನವಗೈವ ಮೂಕನ ವಾಕ್ಪಟುವ ಗೈವ |

ಘನವು ಸಚ್ಚಿತ್ಸುಖವು ಬ್ರಹ್ಮವ-

-ಘನವು ಮಾಯಾವಿದ್ಯೆರೂಪವು

ಘನಾಘನವಾತ್ಮನಾತ್ಮವು ಪರಬೊಮ್ಮ ಸದಸತ್ತು || ೩೦೪ ||

ಗುರು ಪರಾತ್ಪರ ಕೃಷ್ಣ ಲೋಕಕೆ

ಗುರುವು ಗೀತಾಚಾರ್ಯ ಸೃಷ್ಟಿಗೆ

ಗುರುವವಿದ್ಯಾತಮವ ಕಳೆದು ಜ್ಞಾನವನು ಕೊಡುವ |

ಉರುತರದ ವೇದಾಂತನಿಧಿ ಹರಿ

ಪರತರದಲಧ್ಯಾತ್ಮಬೋಧಕ

ಪರಮ ವೇದದ ಸಾರವೆಲ್ಲಕುವಧಿಕಭಾರ ಹರಿ || ೩೦೫ ||

ಲಘುವು ನೀನೇ ಹಗುರ ನೀನೇ

ಲಘುವು ಗಾಯತ್ರಸಾಮವು ಹರಿ

ಲಘುವು ತಾನಣು ಮಹತಿಯೆಲ್ಲವು ಶ್ರೀಪರಬ್ರಹ್ಮ |

ಲಘುತರದ ಮನವೀತಗಿಹುದೈ

ಲಗುಬಗೆಯ ಬದುಕಲ್ಲವೀತನ

ಲಘುತೆ ಗುರುತೆಗಳೆರಡ ಮೀರಿದಮೇಯ ಪರತತ್ತ್ವ || ೩೦೬ ||

ಕೃಶನು ಕೃಷ್ಣನು ಸ್ಥೌಲ್ಯರಹಿತನು

ಕೃಶಶರೀರಿಯು ಸೂಕ್ಷ್ಮತತ್ತ್ವವು

ಕೃಶತೆ ಸ್ಥೂಲತೆ ಮೀರಿರುವ ಪರಮಾತ್ಮ ಶ್ರೀಕೃಷ್ಣ |

ಕೃಶತನುವು ತೋರಿಕೆಯ ಸತ್ಯವು

ಕೃಶತನದಿ ಸಕಲರೊಳು ನಿಂತಿಹ

ಕೃಶತೆಯದು ಸ್ಥೂಲತೆಯ ತಾಳ್ವುದು ಜ್ಞಾನಭಕ್ತಿಯಲಿ || ೩೦೭ ||

ಸ್ಥೂಲನಂತೆಯೆ ತೋರ್ವ ಕೃಷ್ಣನೆ

ಸ್ಥೂಲತನುವದು ಮತ್ತೆ ಮಿಥ್ಯೆಯು

ಸ್ಥೂಲತನ ಸೂಕ್ಷತೆಗಳಾಚೆಯು ಬ್ರಹ್ಮತತ್ತ್ವವದು |

ಸ್ಥೂಲನಾದರು ಸ್ಥೂಲನಲ್ಲವು

ಸ್ಥೂಲತನ ತೋರಿಕೆಯ ಸತ್ಯವು

ಸ್ಥೂಲ ಬ್ರಹ್ಮಾಂಡದೊಳು ವ್ಯಾಪಿಸಿ ಕೃಷ್ಣ ಪರಬೊಮ್ಮ || ೩೦೮ ||

ಕೇವಲನೆ ಕೈವಲ್ಯರೂಪನೆ

ಕೇವಲವು ಪರಮಾತ್ಮರೂಪವು

ಕೇವಲಜ್ಞಾನದಲಿ ಕೇವಲರೂಪ ತಾನಹುದು |

ಕೇವಲಾತ್ಮಕ ಮುಕ್ತಿರೂಪನೆ

ಕೇವಲವು ತಾನಾತ್ಮಮಾತ್ರವು

ಕೇವಲವನಾತ್ಮಗಳ ಬಿಟ್ಟಿಹದೇಕ ಪರತತ್ತ್ವ || ೩೦೯ ||

ನಿರ್ಗುಣನೆ ಗುಣಹೀನ ಕೃಷ್ಣನೆ

ನಿರ್ಗುಣನೆ ತ್ರಿಗುಣಗಳ ಮೀರಿಹ

ನಿರ್ಗುಣನೆ ಸಾತ್ತ್ವಿಕವ ರಾಜಸ ತಾಮಸವ ಮೀರಿ |

ನಿರ್ಗುಣಾತ್ಮಕ ಬೊಮ್ಮರೂಪನೆ

ನಿರ್ಗುಣನೆ ನಾಮವನು ಮೀರಿಹ

ನಿರ್ಗುಣನೆ ರೂಪವನು ಮೀರಿಹ ಸಗುಣದಾಚೆಗಿನ ||೩೧೦ ||

ಶಿವನೆ ಮಂಗಲರೂಪ ಕೃಷ್ಣನೆ

ಶಿವನೆ ಶುಭಕಾರಕನೆ ಶ್ರೀಹರಿ

ಶಿವನೆ ಲಯಕರ ಹರನೆ ಪರಮಾನಂದ ಪರಮಾತ್ಮ |

ಶಿವನೆ ಸಕಲೇಂದ್ರಿಯಗಳ ವಶಿಯೆ

ಶಿವನಶುಭಹರನಷ್ಟಸಿದ್ಧಿಪ

ಶಿವ ಶಿವಾ ಮೂರ್ಲೋಕದಲಿ ಸಜ್ಜನರ ನೀ ಕಾಯೈ || ೩೧೧ ||

ಪರೇಶಃ ಪರಮೋತ್ಕೃಷ್ಟಃ ಪರಾಮೂರ್ತಿಃ ಪರಾಗತಿಃ।

ಪರಮಾಣುಃ ಪರಂಬ್ರಹ್ಮ ಪರಾವರಃ ಪರಾತ್ಪರಃ॥೪೫॥(೩೧೯)

ಪರೇಶನೆ ಪರಮೇಶ ಕೃಷ್ಣನೆ

ಪರೇಶ್ವರ ಪ್ರಕೃತೀಶ ಕೃಷ್ಣನೆ

ಪರಾಪತಿ ಪರತತ್ತ್ವ ರಾಧಾರಮಣ ಶ್ರೀಕೃಷ್ಣ |

ಪರಾತ್ಮಕ ಪ್ರಕೃತಿಸ್ಥ ಶ್ರೀಹರಿ

ಪರಾಧಿಪ ಶ್ರೇಷ್ಠಕ್ಕೆ ಶ್ರೇಷ್ಠನು

ಪರಾತ್ಪರ ಪರಮೇಶ್ವರನೆ ಪರಬೊಮ್ಮ ಶ್ರೀಕೃಷ್ಣ || ೩೧೨ ||

ಪರಮೋತ್ಕೃಷ್ಟ ದೇವ ಕೃಷ್ಣನೆ

ಪರಮ ಶ್ರೇಷ್ಠನು ಸರ್ವಶ್ರೇಷ್ಠನು

ಪರಮನುತ್ಕೃಷ್ಟನೂ ಶ್ರೀಹರಿ ಪರತಮನು ಬೊಮ್ಮ |

ಪರಮಜ್ಯೋತಿಯು ಪರಮಸತ್ಯವು

ಪರಮಧ್ಯಾತವ್ಯನು ಪರಾಪರ

ಪರಮಹಂಸನು ಪರಮತತ್ತ್ವವು ಬೊಮ್ಮ ಸರ್ವಾತ್ಮ || ೩೧೩ ||

ಪರಾಮೂರ್ತಿಯೆ ವಾಸುದೇವನೆ

ಪರಾಶಕ್ತಿಯ ಮೂರ್ತರೂಪನೆ

ಪರಬ್ರಹ್ಮವೆ ಮೂರ್ತಿವೆತ್ತಂತಿಹನೆ ಶ್ರೀಕೃಷ್ಣ |

ಪರಮನಿರ್ಗುಣ ಸಗುಣನಾಗುತ

ಪರಮಸತ್ತ್ವದ ಮೂರ್ತಿಯಾಗುತ

ಪರಮಧರ್ಮವ ರಕ್ಷಿಸಿದ ದುಷ್ಟರನು ಶಿಕ್ಷಿಸುತ || ೩೧೪ ||

ಪರಾಗತಿ ಪರಗತಿಯೆ ಶ್ರೀಹರಿ

ಪರಮಗತಿ ಮುಕುತಿಪ್ರದನೆ ಹರಿ

ಚರಮಗತಿ ಮೋಕ್ಷಸ್ವರೂಪನೆ ಸರ್ವರೊಳಗಿಹನೆ |

ಪರಮ ವೈಕುಂಠನೆ ಸದಾ ಶಿವ

ವರದಮೂರ್ತಿಯೆ ತನ್ನ ಭಕುತಗೆ

ಗುರುವೆ ಪತಿ ಜಗದೀಶನಚ್ಯುತನುರು ತ್ರಿವಿಕ್ರಮನೆ || ೩೧೫ ||

ಪರಮಾಣುವೆ ಪರಬ್ರಹ್ಮವೆ

ಪರಮಸೂಕ್ಷ್ಮನೆ ಕಣದೊಳಿರುವನೆ

ಪರಮಬೃಹದಾಕೃತಿಯೆ ಸರ್ವವನಾವರಿಸುವವನೆ |

ಕರಣ ಕಾರಣ ಹರಣ ಮರಣನೆ

ಚರಣರಜಕಣಪಾವನನೆ ಹರಿ

ವಿರಳ ಸಾಂದ್ರನೆ ಕರುಣ ನಿಷ್ಠುರ ದೇವ ನಾರಯಣ || ೩೧೬ ||

ಪರಂ ಬ್ರಹ್ಮನೆ ಪರಬ್ರಹ್ಮನೆ

ಪರಮಪದ ಸರ್ವಾತ್ಮ ಬೊಮ್ಮನೆ

ಪರಂಪರೆಯಾದಿಯೆ ಮಹಾತ್ಮನೆ ಸರ್ವಮೂಲ ಗುರೋ |

ಪರಮದೇವನೆ ಪರಮಕಾರಣ

ಪರನಿಹಪರಗಳಿಂಗೆ ಪರಗತಿ

ಪರಮಮಂಗಲರೂಪ ಪರಮೇಶ್ವರನೆ ಶ್ರೀಕೃಷ್ಣ || ೩೧೭ ||

ಪರಾವರ ಪರನವರನವನೇ

ಪರನು ಶ್ರೇಷ್ಠನು ತಾ ಕನಿಷ್ಠನು

ಪರನವರನವ ಮಧ್ಯಮನು ಸಹ ಸರ್ವಲೋಕಮಯ |

ಜರಾಮರಣವಿವರ್ಜಿತನು ಸಿರಿ-

-ಯರಸ ಮೂಜಗದೊಡೆಯ ಸದ್ಗುರು

ಮೂರುಲೋಕದ ಸಕಲವೂ ಪರಬೊಮ್ಮ ತಾನಯ್ಯ || ೩೧೮ ||

ಪರಾತ್ಪರ ಪರಮೇಶ ಕೃಷ್ಣನೆ

ಪರಕು ಪರ ಸರ್ವಾಧಿಪತಿ ಗುರು

ಪರಾಪ್ರಕೃತಿಯಧಿಪತಿಯೆ ಚೇತನಶಕ್ತಿ ಜಡಜಗಕೆ |

ಪರಮಶಂಕರ ಪರಮಶುಭಕರ

ಪರಮಸತ್ತ್ವನೆ ಪರಮಚಿತ್ತನೆ

ಪರಮಸುಖರೂಪನೆ ಪರಾತ್ಪರ ಸಚ್ಚಿದಾನಂದ || ೩೧೯ ||

ಪರಂಜ್ಯೋತಿಃ ಪರಂಧಾಮ ಪರಮೇಶಃ ಪರಾಪರಃ।

ಪರಾಶಕ್ತಿಪ್ರಿಯೋಽಪಾರೋ ಪಾರದಃ ಪ್ರಣವಸ್ತಥಾ॥೪೬॥(೩೨೭)

ಪರಂಜ್ಯೋತಿಯೆ ಪರಮಪ್ರಭೆ ಹರಿ

ಪರಮತೇಜಃಪುಂಜ ಕೃಷ್ಣನೆ

ಪರಮಗುರು ಪರಮಾತ್ಮ ಸರ್ವಕು ಮೂಲ ಬೆಳಕು ಹರಿ |

ಪರಂಜ್ಯೋತಿಯ ಮುಂದೆ ರವಿಶಶಿ

ಕಿರಣ ನಕ್ಷತ್ರಾಗ್ನಿ ಬೆಳಗದು

ಪರಂಜ್ಯೋತಿಯೆ ಮೂಲ ಸೂರ್ಯಾದಿಗಳು ಬೆಳಗಲಿಕೆ || ೩೨೦ ||

ಪರಂಧಾಮನೆ ಪರಮಧಾಮನೆ

ಪರಮಜ್ಯೋತಿಯೆ ಪುಣ್ಯಲೋಕನೆ

ಪರಗತಿಯ ದಾಯಕನೆ ವಿಷ್ಣುವೆ ಕೇಶವನೆ ಶಿವನೆ |

ಪರತರನೆ ಪರತಮನೆ ಕೃಷ್ಣನೆ

ಪರಮಕಾರುಣಿಕಾತ್ಮ ಶ್ರೀಹರಿ

ಪರಂಧಾಮ ವಿಕುಂಠಪುರ ವೈಕುಂಠ ಶ್ರೀಹರಿಯೆ || ೩೨೧ ||

ಪರಮೇಶನೆ ಮಹಾವಿಷ್ಣುವೆ

ಪರಮಪತಿ ಜಗಕೆಲ್ಲ ಕೃಷ್ಣನೆ

ಚರಣಕೊಂದಿಪೆ ಸಗುಣಪರಮೇಶ್ವರಗೆ ನಿರ್ಗುಣಗೆ |

ಪರನು ಮಾಯೆಯುಪಾಧಿಯೀಶ್ವರ

ಪರನವಿದ್ಯೆಯುಪಾಧಿ ಜೀವನು

ಪರನುಪಾಧಿಯ ರಹಿತ ನಿರ್ಗುಣ ಮೂಲದಲಿ ಬೊಮ್ಮ || ೩೨೨ ||

ಪರಾಪರ ಪರಮಾತ್ಮ ಬೊಮ್ಮನು

ಚರಾಚರಗುರು ವಾಸುದೇವನು

ಪರಬ್ರಹ್ಮಾಪರಬ್ರಹ್ಮನು ಕಾರ್ಯಕಾರಣನು |

ಪರನು ಕಾರಣನಪರ ಕಾರ್ಯನು

ಪರನು ನಿರ್ಗುಣನಪರ ಸಗುಣನು

ಪರನಾತ್ಮ ಸೂತ್ರಾತ್ಮನಪರ ಹಿರಣ್ಯಗರ್ಭನೆಲ || ೩೨೩ ||

ಪರಾಶಕ್ತಿಪ್ರಿಯನೆ ದೇವನೆ

ಪರಮಪುರುಷನೆ ಶಕ್ತಿರೂಪನೆ

ಪರಾಶಕ್ತಿಸ್ವರೂಪಿಣಿಯ ರಾಧೆಯ ಮನೋಹರನೆ |

ಪರಮಪುರುಷೋತ್ತಮನೆ ಪ್ರಕೃತಿಪ

ಪರಾದೇವತೆರಮಣ ಕೃಷ್ಣನೆ

ಪರಾತ್ಮನೆ ಪರಮಾತ್ಮ ಪರಬೊಮ್ಮನೆ ಪರೇಶ್ವರನೆ || ೩೨೪ ||

ಅಪಾರನೆ ದಡರಹಿತ ಸಾಗರ-

-ನಪಾಯವ ಭವಸಾಗರದ ನೀ-

-ನುಪಾಯದಿ ಕಳೆಯಾತ್ಮವಿದ್ಯೆಯ ನೀಡಿ ಭಕುತರಿಗೆ |

ಸಿಪಾಯಿಗಳಧ್ಯಾತ್ಮ ಮಾರ್ಗದ

ಸುಪಾ-ಯಚತು-ಷ್ಟಯವ ಕರುಣಿಸು-

-ತಪಾಯವನಜ್ಞಾನತಮ ಹರಿಸಯ್ಯ ಶ್ರೀಕೃಷ್ಣ || ೩೨೫ ||

ಪಾರದನೆ ಪಾರಪ್ರದಾಯಕ

ಪಾರ ಮೋಕ್ಷವು ಮೋಕ್ಷದಾಯಕ

ಪಾರ ಭವಸಾಗರದ ಮತ್ತೊಂದೆಡೆಯ ತಟವಹುದು |

ಪಾರುಗಾಣಿಸು ಪಾರದನೆ ಹರಿ

ಮಾರುಹೋಗದ ತೆರದಿ ಮಾಯೆಗೆ

ಮೂರುದಿನದೀ ಬಾಳ ಸಾರ್ಥಕಗೊಳಿಸು ಪರಮಾತ್ಮ || ೩೨೬ ||

ಪ್ರಣವ ಕೃಷ್ಣನೆ ಪ್ರಕೃಷ್ಟನೆ ನವ

ಪ್ರಣತಿ ನಿನಗಿದೊ ಶ್ರೇಷ್ಠ ನೂತನ

ಪ್ರಣವವೋಂಕಾರವದು ನೀನೆಲ ಹರಿಃ ಓಂ ತತ್ಸತ್ |

ಪ್ರಣವ ಪ್ರಾಣವು ಪ್ರಣವ ಜೀವವು

ಪ್ರಣವವಾತ್ಮವು ಪ್ರಣವ ಮೂಲವು

ಪ್ರಣವವಾಚ್ಯನೆ ಪ್ರಣವರೂಪನೆ ಪ್ರಣವಧನು ಕೃಷ್ಣ || ೩೨೭ ||

ಪಿತೃರೂಪಶ್ಚ ಪೀಯೂಷಂ ಪೀತಾಂಬರಸುಶೋಭಿತಃ।

ಪುಣ್ಯಲೋಕಸ್ತು ಪೂರ್ವೇಶಃ ಪಣ್ಡಿತಃ ಪೈತೃಕಃ ಪತಿಃ॥೪೭॥(೩೩೫)

ಪಿತೃರೂಪನೆ ಪೂರ್ವಜನೆ ಹರಿ

ಪಿತೃವು ಲೋಕದ ಸಕಲರಿಗೆ ಹರಿ

ಪಿತೃವಿನನುಗ್ರಹ ಸಕಲ ಸಂತತಿವೃದ್ಧಿಗಾಸರೆಯು |

ಪಿತೃ ಪಿತಾಮಹ ನೀನೆ ಕೃಷ್ಣನೆ

ಪಿತೃವು ಲೋಕದಲಿರುವ ಜೀವರ 

ಪಿತೃವು ತಂದೆಯು ಜನಕ ಪಿತ ಹರಿ ಬೊಮ್ಮ ಪರಮೇಶ || ೩೨೮ ||

ಹರಿಯೆ ನೀ ಪೀಯೂಷ ಸಕಲಕು

ಪರಮಮಂಗಲ ಸುಧೆಯು ಸೃಷ್ಟಿಗೆ

ಬರಿಯ ಸುರಸುಧೆಯಲ್ಲ ಮೋಕ್ಷಾಮೃತನು ಹೇ ಕೃಷ್ಣ |

ಹರಿಯ ಭಕ್ತಿಯು ಗಿಣ್ಣುಹಾಲದು

ಗುರಿಯ ಸೇರಲು ಮೊದಲ ಪೌಷ್ಟಿಕ

ಸರಿಯು ನಿನಗಾರಿಹರು ಪರಮೇಶ್ವರನೆ ಪರಬೊಮ್ಮ || ೩೨೯ ||

ಪೀತಾಂಬರಸುಶೋಭಿತ ಹರಿ

ಪೀತ ಹಳದಿಯ ರೇಷ್ಮೆ ಪಟ್ಟೆಯ

ಖ್ಯಾತ ಹರಿ ಧರಿಸುತ್ತ ಶೋಭಿಸುತಿರುವ ಶ್ರೀಕೃಷ್ಣ |

ವಾತಸಂಭವಪ್ರೀಯ ರಾಘವ

ಭೀತ ಭಕುತರ ಪಾಲಿಪನು ಹರಿ

ನೂತನದಿ ದ್ವಾರಕೆಯ ಕಟ್ಟಿದ ಗಟ್ಟಿಗನು ಕೃಷ್ಣ || ೩೩೦ ||

ಕೃಷ್ಣ ನೀ ಪು-ಣ್ಯಲೋಕವೆ ಹರಿ

ವಿಷ್ಣು ವೈಕುಂಠದಲಿ ಶ್ರೀಹರಿ

ಕೃಷ್ಣ ಗೋಲೋಕದಲಿ ಕ್ಷೀರಾಬ್ಧಿಯಲಿ ನಾರಯಣ |

ಕೃಷ್ಣ ಬೊಮ್ಮನು ಸತ್ಯಲೋಕದಿ

ಕೃಷ್ಣ ಶಿವ ಕೈಲಾಸಲೋಕದಿ

ಕೃಷ್ಣ ದೇವಿಯು ಮಣಿದ್ವೀಪದಿ ಪುಣ್ಯಲೋಕ ಹರಿ || ೩೩೧ ||

ವಾಸುದೇವನೆ ನೀನು ಪೂರ್ವೇ-

-ಶಾ ಸುಜನರಕ್ಷಕನೆ ಕೃಷ್ಣನೆ

ರಾಸು ಕಾವನೆ ಸೂಸಿ ಭಜಿಪರ ಕಾಯುವನೆ ಕೃಷ್ಣ |

ವಾಸುದೇವನೆ ಮೊದಲ ನಾಯಕ

ವಾಸುದೇವನೆ ಹಿಂದಿನಧಿಪತಿ

ವಾಸುದೇವನೆ ಪೂರ್ವದಿಕ್ಕಿನ ಪತಿಯೆ ದೇವೇಂದ್ರ || ೩೩೨ ||

ಪಂಡಿತನೆ ಸುಜ್ಞಾನಿ ಮುಕ್ತನೆ

ಪಂಡ ಮುಕುತಿಯ ಜ್ಞಾನವಿರುವನೆ

ಪಾಂಡುರಂಗನೆ ಪಂಡರಾಪುರನಾಯಕನೆ ಕೃಷ್ಣ |

ಪಾಂಡವಪ್ರಿಯ ನರನಾರಾಯಣ

ಪಂಡಿತಪ್ರಿಯ ಪಂಡಿತರ ಗುರು

ಪುಂಡರನು ತರಿದಿಕ್ಕಿ ಭೂಭಾರವನು ಕಳೆಯುವನು || ೩೩೩ ||

ಕೃಷ್ಣ ಪೈತೃಕ ಪಿತೃಸಂಬಂಧಿಯು

ಕೃಷ್ಣ ಪಿತೃಗಳನುದ್ಧರಿಪ ಗುರು

ಕೃಷ್ಣ ಪೂರ್ವಜರನುಗ್ರಹ ನಮಗೀವ ಕರುಣೆಯಲಿ |

ಕೃಷ್ಣ ದಾಯಪ್ರಸಾದ ಪೈತೃಕ

ಕೃಷ್ಣ ದಾಯದ ಭಾಗ ಪೈತೃಕ

ಕೃಷ್ಣ ಪೈತೃಕವೀವ ಪ್ರೇಮದಿ ಗಳಿಸಿ ಧನ್ಯತೆಯ || ೩೩೪ ||

ಪತಿಯೆ ಮೂರ್ಲೋಕಕ್ಕೆ ಕೃಷ್ಣನು

ಸತಿಯು ಸೃಷ್ಟಿಯು ವಾಸುದೇವನ

ಮಿತಿಯದಿಲ್ಲವು ದೇವದೇವಗೆ ಮಿತಿಯ ಮೀರಿಹನು |

ಖತಿಯ ಗೊಳದಿರು ಕೃಷ್ಣ ಕಾವನು

ಮತಿಯ ಕೊಡು ಪರಮಾತ್ಮತಿಳಿವಿಗೆ

ಗತಿಯವನೆ ಸಕಲರಿಗು ಮುಕುತಿಪ್ರದಾತ ಪರಬೊಮ್ಮ || ೩೩೫ ||

ಫಲರೂಪಃ ಫಾಲವಾಸೋಽನನ್ತಶೀರ್ಷಶ್ಚ ಪೂರುಷಃ।

ಅನನ್ತಾಕ್ಷೋಽಗ್ನಿರೂಪಶ್ಚಾನನ್ತಪಾದಸ್ತ್ರಿವಿಕ್ರಮಃ॥೪೮॥(೩೪೩)

ಫಲರೂಪನೆ ಕೃಷ್ಣದೇವನೆ 

ಫಲನು ಯಜ್ಞಕೆ ಸಕಲ ಕರ್ಮಕೆ

ಫಲವ ನೀಡುವ ದೇವ ಫಲರೂಪಾತ್ಮಕನೆ ಹರಿಯೆ |

ಫಲಿತ ನೀ ಫಲಕಾರಣನು ನೀ

ಫಲಕಾರಕನು ಫಲದಾಯಕನು ಹರಿ

ಫಲವೆ ನೀ ಪರಮಾತ್ಮ ಗತಿಯಿನ್ನಾರು ಲೋಕದಲಿ || ೩೩೬ ||

ಫಾಲವಾಸನೆ ಹಣೆಯ ಚಕ್ರದಿ

ಭಾಲದೇಶದಲಾಜ್ಞೆಚಕ್ರದಿ

ಮಾಲೆ ಧರಿಸಿಹ ಕೃಷ್ಣ ನಿಂತಾಜ್ಞೆಯನು ಮಾಡುತಿಹ |

ಬಾಲಕೃಷ್ಣನೆ ಸಕಲರಧಿಪತಿ

ಫಾಲನೇತ್ರನ ಸಖನೆ ಕೃಷ್ಣನೆ

ಕಾಲಪುರುಷನೆ ಕಾಲಕಾಲನೆ ಕೃಷ್ಣ ಶ್ರೀಕೃಷ್ಣ || ೩೩೭ ||

ದೇವ ಕೃಷ್ಣನನಂತಶೀರ್ಷನೆ

ಭಾವಕೊಲಿವನೆ ವಿರಾಟ್ಪುರುಷನೆ

ಜೀವರೊಡೆಯನೆ ವಿಶ್ವರೂಪನೆ ಹೇ ಸಹಸ್ರಾಕ್ಷ |

ಕಾವ ಸಕಲರ ಶಿರಗಳಾತನ-

-ವಾವನಿಹ ಪರಮಾತ್ಮನಿಗೆ ಸಮ-

-ನೀವ ನಿಜಭಕುತರಿಗೆ ಮುಕುತಿಯ ಶ್ರೀ ಜನಾರ್ದನನು || ೩೩೮ ||

ಪೂರುಷನೆ ಪೂರ್ವದಲೆ ನೆಲೆಸಿಹ

ಸಾರುವತ್ರಿಕ ಪರಮಸತ್ಯನೆ

ಪೂರುಷನು ತಾ ದೇಹಪುರಿಯೊಳು ನಿತ್ಯ ವಾಸಿಸುವ |

ಮಾರುವೇಷದಿ ಸೃಷ್ಟಿರೂಪನೆ

ಪಾರುಗಾಣಿಸು ಕೃಷ್ಣದೇವನೆ

ಕಾರುಣಿಕ ಪರಮಾತ್ಮ ಸುಜನರ ರಕ್ಷಿಸನವರತ || ೩೩೯ ||

ಅನಂತಾಕ್ಷನಸಂಖ್ಯನೇತ್ರನೆ-

-ಯನಂತಾಸನನಂತಕರಮನೆ-

-ಯನಂತನೆಯಂ-ತರಹಿತನೆ ಹರಿ ವಾಸುದೇವ ವಿಭೋ |

ಅನಂ-ತಶಯನನನಂತ-ಶಕ್ತಿ-

-ಯನಂತಜ್ಞಾನನಂತಪ್ರಭ-

-ನನಂತವಿರಕ್ತ್ಯನಂತಪ್ರೇಮನಂತಾನಂತ || ೩೪೦ ||

ಅಗ್ನಿರೂಪನೆ ಬೆಂಕಿಯಂತಿಹ-

-ನಗ್ನಿಯನಲನೆ ಜ್ಯೋತಿರೂಪನೆ-

-ಯಗ್ನಿಯವಮನು ವಿಷ್ಣುವುತ್ತಮ ದ್ವಾದಶಾದಿತ್ಯ |

ಅಗ್ನಿ ಯಜ್ಞದಿ ಮತ್ತೆ ಜಠರದಿ-

-ಯಗ್ನಿ ಜೀವರ ದೇಹತಾಪದಿ-

-ಯಗ್ನಿ ಪ್ರಾಣನು ಚಿತ್ತ ಕರಣಗಳಧಿಪ ಶ್ರೀಕೃಷ್ಣ || ೩೪೧ ||

ಕೃಷ್ಣ ನೀನನಂತಪಾದನೆ

ವಿಷ್ಣು ನೀನಸಂಖ್ಯಚರಣನೆ

ಜಿಷ್ಣು ಸಕಲರ ಪಾದ ನಿನ್ನದೆ ವಿಶ್ವದಾಧಾರ |

ಕೃಷ್ಣ ನಿನ್ನಯ ಪಾದ ಭೂಮಿ ಸ-

-ಹಿಷ್ಣು ಜೀವರ ಪಾಪ ಸಹಿಸುವೆ

ವಿಷ್ಣು ಶಿವ ವಿಧಿ ಶಕ್ತಿಯಾಗಿಹ ತತ್ತ್ವ ಪರಬೊಮ್ಮ || ೩೪೨ ||

ತ್ರಿವಿಕ್ರಮ ತ್ರಿಜಗವನು ಕ್ರಮಿಸಿದ

ಹವಿಷ್ಪತಿ ಮೂರ್ಹೆಜ್ಜೆಯಳೆದಿಹ

ಭವಿಷ್ಯದ ಭೂತದ ಪ್ರಸಕ್ತದ ನಾಯಕನೆ ಕೃಷ್ಣ |

ತ್ರಿವಿಕ್ರಮನುರುಕ್ರಮನೆ ವಾಮನ

ಸವಿಸ್ತರ ಬ್ರಹ್ಮಾಂಡ ಧರಿಸಿಹ

ಕವಿ ಬ್ರಹ್ಮ ಮಹಾಪರಾಕ್ರಮಿ ವಿಶ್ವವ್ಯಾಪಕನೆ || ೩೪೩ ||

ಮಹೇನ್ದ್ರೋ ಮಘವಾ ರುದ್ರೋ ಮಹಾವೀರೋ ಮಹೋರಗಃ।

ಮನ್ದರೋದ್ಧಾರಕೋ ಮನ್ದಶ್ಚಾಽಽಮುಖಂ ಮನ್ದಮಾರುತಃ॥೪೯॥(೩೫೨)

ಮಹೇಂದ್ರನೆ ಸುರಪತಿಯೆ ಕೃಷ್ಣನೆ

ಮಹೇಂದ್ರನೆ ಬೃಹದಿಂದ್ರದೇವನೆ

ಗುಹೇಂದ್ರನೆ ಪರಮೇಶನಿಂದ್ರಿಯಪತಿಯೆ ದೇವೇಂದ್ರ |

ಮಹೇಂದ್ರನೆ ಶತಮಖನುಪೇಂದ್ರನೆ

ಮಹೇಂದ್ರನೆ ಕರಣಕ್ಕು ಕರಣನೆ

ಗುಹೇಂದ್ರನೆ ಹೃದಯದೊಳು ನೆಲೆಸಿಹ ಸರ್ವವ್ಯಾಪಕನೆ || ೩೪೪ ||

ಮಘವಾ ಮೇಘಕಾರಕನೆ ಹರಿ-

-ಯಘವ ಕಳೆವ ಸುರೇಶ ಕೃಷ್ಣನೆ

ಮಘವಾನಿಂದ್ರ ವರ್ಷಕಾರಕ ದೇವ ನಾರಯಣ |

ಮಘವಾ ಮಹಿಮ ಪೂಜ್ಯ ದೇವನೆ-

-ಯಘವಿರಹಿತನೆಯಘವಿನಾಶಕ

ಮಘವಾನಮಿತತೇಜ ಪರಬೊಮ್ಮನೆ ಸದಾ ಶಿವನೆ || ೩೪೫ ||

ರುದ್ರ ಪರಶಿವಮೂರ್ತಿ ಕೃಷ್ಣನೆ

ಭದ್ರ ಮಂಗಲಕಾರಕನೆ ಹರಿ

ಕ್ಷುದ್ರರುಪಟಳ ಲಯಿಸಿ ಭಕ್ತರ ಶ್ರದ್ಧೆಯಲಿ ಕಾವ |

ವಿದ್ರವಿಪನಾರ್ತರನು ಕಾಣುತ

ರುದ್ರ ದೈವೀವೈದ್ಯ ಭವದಲಿ

ರುದ್ರನೋಂಕಾರಾದಿಶ್ರುತಿಮೂಲಾತ್ಮ ಶ್ರೀಕೃಷ್ಣ || ೩೪೬ ||

ಮಹಾವೀರನೆ ಶೂರ ಧೀರನೆ

ಗುಹಾಂತರ ಪರಮಾತ್ಮ ವಿಶ್ವಗ

ಮಹಾತ್ಮನೆ ಬಹುಬಲನೆ ಸರ್ವೇಶ್ವರ ನಿಯಾಮಕನೆ |

ಮಹಾವೀರನೆ ಜೈನಸಾಧುವೆ

ಮಹಾವೀರನೆ ಕೃಷ್ಣ ಬೊಮ್ಮನೆ

ಮಹಾವೀರ ಪರಾಕ್ರಮಿಯೆ ಜಗದೀಶ ನಾರಯಣ || ೩೪೭ ||

ಮಹೋರಗ ಜಗ ಧರಿಸಿರುವ ಹರಿ

ಮಹೋರಗನಾ-ದಿಶೇಷನು ತಾ

ಮಹೋತ್ಪಾತಗಳಿಂದ ಲೋಕವ ರಕ್ಷಿಸುವ ಸ್ವಾಮಿ |

ಮಹೋನ್ನತ ಪದವಿಯಲಿ ನಿಂತಿಹ

ಮಹೋರಗ ಮಹಿಮಾಯುತನೆ ಹರಿ

ಮಹೋತ್ತಮನಘ ಸುಡುವ ವಿಷಧರ ಕೃಷ್ಣ ಪರಬೊಮ್ಮ || ೩೪೮ ||

ಮಂದರೋದ್ಧಾರಕನೆ ಕೃಷ್ಣನೆ

ಮಂದರಾಚಲವೆತ್ತಿ ಕೂರ್ಮನು

ಮಂದಗಮನನು ಮೂಲಕೂರ್ಮನು ವಿಷ್ಣು ನಾರಯಣ |

ಮಂದರವ ಮಥನವನು ಮಾಡಿಯೆ

ಮಂದದಲಿ ಸಾಗರವ ಕಡೆದರು

ಮಂದರವ ಕೂರ್ಮಾವತಾರಿಯು ತೇಲಿಸಿದನೆತ್ತಿ || ೩೪೯ ||

ಮಂದ ಶನಿ ಮಂ-ದಗತಿಯಿರುವನೆ

ಮಂದಿರದಿ ನೆಲೆಗೊಂಡ ಗ್ರಹ ತಾ

ಮುಂದೆ ಸುಖವೀಯುವನು ಪಾಪವ ಮುಗಿಸಿ ಸಕಲರಿಗೆ |

ಮಂದಗತಿಯಿಂ ಮಂದನೆನಿಸಿದ

ಮಂದಚರ ಶನಿರೂಪಿ ಕೃಷ್ಣನು

ಮಂದಬುದ್ಧಿಯ ಕಳೆದು ಸತ್ಪ್ರೇರಣೆಯ ನೀಡಯ್ಯ || ೩೫೦ ||

ಆಮುಖನೆ ಪ್ರ-ಸ್ತಾವನೆಯೆ ಹರಿ

ನೀ ಮುಖವು ಸಕಲರಿಗೆ ಲೋಕದಿ

ಹೇ ಮುಖ್ಯಪ್ರಾಣಪ್ರೀಯನೆ ಹೇ ಪರಾತ್ಪರನೆ |

ಶ್ರೀಮುಖನೆ ಕ್ರಿಯೆಗಳಿಗೆ ಕಾರಣ

ನೀ ಮುಖ್ಯ ಪೀಠಿಕೆಯು ಸಕಲಕೆ

ನೀ ಮುಂದೆ ನಾವ್ ಹಿಂದೆ ನಡೆವುದು ನಿನ್ನ ಸಂಕಲ್ಪ || ೩೫೧ ||

ಮಂದಮಾ-ರುತ ಕೃಷ್ಣ ಶ್ರೀಹರಿ

ಸುಂದರೇಕ್ಷಣ ಸುಂದರಾನನ

ಮಂದದಲಿ ಬೀಸುತ್ತ ಹಿತಗೊಡುವಂತ ವಾಯುವು ನೀ |

ಮುಂದೆ ನೀನಿಹೆ ಹಿಂದೆ ನೀನಿಹೆ

ಮಂದ ಗಂಧದ ವಾಹ ವಾಯು ಸು-

-ಗಂಧ ಬೀರುತ ಕಾಯೊ ಸುಜನರ ಸತ್ಪಥದಿ ನಡೆಸೋ || ೩೫೨ ||

ಮಾಙ್ಗಲ್ಯೋ ಮಙ್ಗಲಾಕಾರೋ ಮಿತ್ರಂ ಮಿತ್ರೋಽಮಿತಾಕ್ಷರಃ।

ಮೀರಾನಾಥೋ ಮಿತ್ರಪಾಲೋ ಮುಖ್ಯಪ್ರಾಣಶ್ಚ ಮೂರ್ತಿಮಾನ್॥ ೫೦॥(೩೬೧)

ಮಾಂಗಲ್ಯನೆ ಮಂಗಲನೆ ಹಿತ

ಮಂಗಲತಮ ಮಂಗಲಾಕರ

ಮಂಗಲಾತ್ಮಕ ಹರಿಯೆ ಕೃಷ್ಣನೆ ದೇವ ಪರಬೊಮ್ಮ |

ಮಂಗಲತನುವೆ ಮಂಗಲಕರನೆ

ಸಂಗವರ್ಜಿತನಖಿಲಲೋಕದಿ

ಕಂಗಳಿಗೆ ತೋರಯ್ಯ ನಾರಾಯಣನೆ ಶ್ರೀಕೃಷ್ಣ || ೩೫೩ ||

ಮಂಗಲಾಕಾರನೆ ಮಹಾತ್ಮನೆ

ಭಂಗಗೊಳಿಸೈ ಲಿಂಗದೇಹವ

ಸಂಗ ನೀಗುತ ಹಂಗ ತೊರೆಯಿಸೊ ಮಂಗಲಾತ್ಮಕನೆ |

ಅಂಗಜನ ಪಿತ ಕೃಷ್ಣದೇವನೆ

ಸಿಂಗರಿಸಿದಂತಿಹ ಮಹಾತ್ಮನೆ

ಮಂಗಲಾಕೃತಿ ಮಂಗಲಸ್ವರೂಪ ಪರಬೊಮ್ಮ || ೩೫೪ ||

ಮಿತ್ರ ಸಖ ಸಜ್ಜನರ ಪೊರೆವನೆ

ಸೂತ್ರ ಧರ್ಮಕೆ ಕೃಷ್ಣಮಾತ್ರನು

ಪಾತ್ರ ಪೂಜೆಗೆ ಪ್ರೇಮಭಕ್ತಿಗೆ ವಾಸುದೇವನೆಲ |

ಸತ್ರ ವೈರಾಗ್ಯದ ಸುಭಕ್ತಿಯ

ಮಿತ್ರ ಪಾರ್ಥನ ಧರ್ಮಪಕ್ಷದ

ಮಿತ್ರ ರುದ್ರನ ಪಿತನು ಬೊಮ್ಮನ ಹೇ ಪರಬ್ರಹ್ಮ || ೩೫೫ ||

ಮಿತ್ರ ಸೂರ್ಯನೆ ರವಿಯೆ ಭಾನುವೆ

ಮಿತ್ರ ಭಾಸ್ಕರ ಹೇ ಸವಿತೃವೆ

ಮಿತ್ರ ನಾರಾಯಣನೆ ಭರ್ಗನೆ ಕೃಷ್ಣ ಸಲಹಯ್ಯ |

ಚಿತ್ರತರದ ವಿಚಿತ್ರ ಸೃಷ್ಟಿಯ

ಸತ್ರದೊಲು ಸೃಜಿಸುತ್ತ ರಕ್ಷಿಸಿ

ಮಿತ್ರ ತಾ ಲಯಗೊಳಿಪ ಸರ್ವವ ಹೇ ಪರಬ್ರಹ್ಮ || ೩೫೬ ||

ಅಮಿತಾಕ್ಷರನೆ ಹರಿ ಕೃಷ್ಣ ವಿಷ್ಣುವೆ

ಸಮಿತನಲ್ಲವನಮಿತನಕ್ಷರ

ನಮಿತ ಮಿತಿರಹಿತಾತ್ಮನಕ್ಷರ ನಾಶವಿಲ್ಲದವ |

ಕುಮತಿಗಳಿಗೊಲಿಯದವ ಕೃಷ್ಣನು

ಸುಮತಿಗೊಲಿಯುವ ನಿತ್ಯ ಶುದ್ಧನು

ವಿಮನ ಮಾಡದೆ ಸುಮನದಿಂದಲಿ ಭಜಿಸು ದೇವನನು || ೩೫೭ ||

ಮೀರಾನಾಥನೆ ಗೋಪ ಕೃಷ್ಣನೆ

ಮೀರಾಬಾಯಿಗೊಲಿದ ದೇವನೆ

ಮೇರೆ ಮೀರಿದ ಪ್ರೇಮಭಕ್ತಿಗೆ ಕರಗಿದನು ಕೃಷ್ಣ |

ಮೇರಾ ಗಿರಿಧರನಾಥನೆಂದರೆ

ಮೂರುಲೋಕದ ಪತಿಯು ಬಂದನು

ಸಾರಿದನು ಪರಮಾತ್ಮಪ್ರೇಮವು ಸಕಲಕತಿಶಯವು || ೩೫೮ ||

ಮಿತ್ರಪಾಲನೆ ಸಖರ ಕಾವನೆ

ಮಿತ್ರಮಿತ್ರನೆ ವಾಸುದೇವನೆ

ಮಿತ್ರಭಾವದ ಭಕುತಿಗೊಲಿದನು ನರಗೆ ಶ್ರೀಕೃಷ್ಣ |

ಸತ್ರರಕ್ಷಕ ಸಖ್ಯಭಕ್ತರ

ಮಿತ್ರನುದ್ಧವಸಖನು ಕೃಷ್ಣನು

ಮಿತ್ರಭಾವದಿ ಕಾಣಿ ಪರಮಾತ್ಮನನು ತಮ್ಮೊಳಗೇ || ೩೫೯ ||

ಮುಖ್ಯಪ್ರಾಣನೆ ಪ್ರಾಣವಾಯುವೆ

ಮುಖ್ಯ ಸಕಲರ ಪ್ರಾಣ ಕಾವನೆ

ಮುಖ್ಯ ಪಂಚಪ್ರಾಣಗಳಲಿ ಪ್ರಾಣ ಶ್ರೀಕೃಷ್ಣ |

ಸಖ್ಯ ಸಕಲರ ದೇಹಗಳಿಗಿದೆ

ಪ್ರಖ್ಯಾತನಾಗಿಹನು ಪ್ರಾಣನು

ಮುಖ್ಯಪ್ರಾಣನು ಜೀವರುಸಿರಾಗಿಹನು ಶ್ರೀಕೃಷ್ಣ || ೩೬೦ ||

ಮೂರ್ತಿಮಾನ್ ಶ್ರೀಕೃಷ್ಣದೇವನೆ

ಮೂರ್ತಿವೆತ್ತಿಹ ಪರಬ್ರಹ್ಮವೆ

ಮೂರ್ತರೂಪದಿ ತೋರ್ವಮೂರ್ತಸ್ವರೂಪ ಪರತತ್ತ್ವ |

ಮೂರ್ತಿ ಕೃಷ್ಣನ ವಾಸುದೇವನ

ಸ್ಫೂರ್ತಿ ಲೋಕಕೆ ಜೀವಜಡರಿಗೆ

ಕೀರ್ತಿ ನಿನ್ನದೆ ಮೂರು ಲೋಕದಿ ಸಕಲರಾತ್ಮನು ನೀ || ೩೬೧ ||

ಆಶ್ಚರ್ಯೋ ಮೃಡಮೃದ್ರೂಪೋ ಲೋಕಮೇಖಲಸೂತ್ರಧೃತ್।

ಮೇದಿನೀಪತಿರಾರಾಧ್ಯೋ ಮೈತ್ರೀಕಲಹನಾಯಕಃ॥೫೧॥(೩೬೮)

ಆಶ್ಚರ್ಯ ಕೃಷ್ಣನೆ ಪರಬ್ರಹ್ಮನೆ

ನಿಶ್ಚಲಾತ್ಮರಿಗೊಲಿವ ದೇವನೆ

ದುಶ್ಚರಿತೆಗಳ ಕಳೆ ಸುಚರಿತವ ಬೆಳೆಸು ನಮ್ಮೊಳಗೆ |

ಪಶ್ಚಿಮದ ಸಂಸ್ಕೃತಿಯ ನೀ ಕಳೆ

ಪಶ್ಚಿಮಾಪರ ವಿಶ್ವಧರ್ಮವ

ನಿಶ್ಚಿತದಿ ಜಗಕೆಲ್ಲ ಪಸರಿಸಿ ಶಾಂತಿ ಬೆಳಗಿಸೆಲೊ || ೩೬೨ ||

(ಆಃ + ಚರ್ಯ— ಆಹಾ ಎನ್ನುವಂತಹ ಅದ್ಭುತವೂ ಅಚ್ಚರಿ ಹುಟ್ಟಿಸುವುದೂ ಆದ ಚರಿತೆ / ಚರ್ಯೆ ಯಾವನದೋ ಅಂತಹ ಭಗವಂತನೇ ಆಶ್ಚರ್ಯರೂಪನು. "ಆಶ್ಚರ್ಯೋ ವಕ್ತಾ…"—ಗೀತೆ.)

ಮೃಡನೆ ಮೃಡಯತಿ ಸುಖವನೀವನೆ

ಮೃಡನೆ ರುದ್ರನೆ ಸುಖಸ್ವರೂಪನೆ

ಬಿಡದೆ ಕಾಯೈ ಶಿವನ ರೂಪವನಾಂತ ಶ್ರೀಕೃಷ್ಣ |

ಒಡಲೊಳಗೆ ಮೂರ್ಲೋಕ ಧರಿಸಿದ

ಕಡಲಶಯನನೆ ಪರಬ್ರಹ್ಮನೆ

ಕಡೆಗಣಿಸದೆಯೆ ನಿನ್ನ ಭಕ್ತರನುದ್ಧರಿಸು ದೇವ || ೩೬೩ ||

ಮೃದ್ರೂಪ ಹರಿ ಪೃಥ್ವಿರೂಪನೆ

ಸದ್ರೂಪ ನೀ ಜಗಕೆಲ್ಲ ಭೂಪತಿ

ಚಿದ್ರೂಪನೇ ಕೃಷ್ಣ ಸುಖತನು ಸಚ್ಚಿದಾನಂದ |

ಮದ್ರೂಪ ನೀ ಜಗದಾದಿಬೊಮ್ಮನು

ವಿದ್ರೋಹಿಗಳ ಶಿಕ್ಷಿಸುವ ಹರಿ

ನಿದ್ರೆ ಕಳೆ ಸುಜ್ಞಾನದೆಚ್ಚರ ಮಾಡಿಸೈ ಜಗಕೆ || ೩೬೪ ||

ಲೋಕಮೇಖಲಸೂತ್ರಧೃತ ಹರಿ

ಲೋಕ ರಕ್ಷಿಪ ಕಟಿಯ ಸೂತ್ರವ

ಲೋಕಕಟಿಸೂತ್ರವನೆ ಧರಿಸಿದ ವಿಶ್ವರೂಪ ಹರಿ |

ನಾಕ ನರಕ ಭುವಾದಿ ರೂಪನೆ

ಪಾಕಶಾಸನವಂದ್ಯ ಕೃಷ್ಣನೆ

ಕಾಕುಜನಮರ್ದನನೆ ಸುಜನರ ಕಾಯೊ ಗೋವಿಂದ || ೩೬೫ ||

ಮೇದಿನೀಪತಿ ಕೃಷ್ಣ ಶ್ರೀಪತಿ

ಮೇದಿನಿಯ ನಿರ್ಮಿಸಿದ ಮಧುಹರ

ಮೋದದಿಂದಲಿ ಕೈಟಭಾಂತಕ ಕಠಿಣ ಪರ್ವತವ |

ನಾದಮೂರುತಿ ಬೋಧಕೀರುತಿ

ವೇದಸೇವಿತ ಪಾದಪದ್ಮನೆ

ಮಾಧವನೆ ಪರಮೇಶ್ವರನೆ ಭವ ಕಳೆದು ಮುಕುತಿ ಕೊಡು || ೩೬೬ ||

ಆರಾಧ್ಯ ದೇವನೆ ಸರ್ವರಿಗು ತಾ-

-ನಾರಾಧನೆಗೆ ಯೋಗ್ಯಾತ್ಮ ಕೃಷ್ಣನೆ

ಸಾರತಮ ವೈಕುಂಠ ಸರ್ವಾತ್ಮನೆ ಪರಬ್ರಹ್ಮ |

ಕಾರಣನೆ ಜಗಕೆಲ್ಲ ಸಂತತ

ಪಾರುಗಾಣಿಸು ಭವಸಮುದ್ರದ

ಕಾರುಣಿಕ ಪರಮಾತ್ಮ ನಿನ್ನಾರಾಧನೆಯ ಮಾಳ್ಪೆ || ೩೬೭ ||

ಮೈತ್ರೀಕಲಹನಾಯಕನೆ ಹರಿ

ಮೈತ್ರಿಕಾರಕ ಕಲಹಕಾರಕ

ಮೈತ್ರಿ ಭಗವದ್ಭಕ್ತರೊಳು ನೀ ಕರುಣಿಸೈ ಕೃಷ್ಣ |

ಮಿತ್ರ ನೀನೊಲಿದಿರುವೆ ಪಾರ್ಥಗೆ

ಮಿತ್ರ ನೀನು ಸುಧಾಮವರ್ಯಗೆ

ಮೈತ್ರಿ ಕರುಣಿಸು ಸರ್ವರೊಳು ಕಲಹವನು ಪರಿಹರಿಸು || ೩೬೮ ||

ಮೋಹನಾಙ್ಗೋ ಮೋಕ್ಷರೂಪೋ ಮೋಹನಾಶನವಿಗ್ರಹಃ।

ಅಕಾರಾದಿಕ್ಷಕಾರಾನ್ತಸರ್ವವರ್ಣಪರಿಷ್ಟುತಃ॥೫೨॥(೩೭೨)

ಮೋಹನಾಂಗನೆ ಸರ್ವಮೋಹನ

ಮೋಹಗೊಳಿಸುತ ಸಕಲ ಲೋಕವ

ಮೋಹನನೆ ನೀ ದುಷ್ಟಶಿಷ್ಟರ ಸೆಳೆದು ನಿನ್ನೆಡೆಗೆ |

ಮೋಹದಲಿ ದುಷ್ಟರನು ಕೆಡಹುವೆ

ಮೋಹದಲಿ ಶಿಷ್ಟರಿಗೆ ಕರುಣಿಪೆ

ಮೋಹ ನಿನ್ನೊಳು ಶಿಷ್ಟರುದ್ಧಾರಕ್ಕೆ ರಹದಾರಿ || ೩೬೯ ||

ಮೋಕ್ಷರೂಪನೆ ವಾಸುದೇವನೆ

ಮೋಕ್ಷದಾಯಕ ಮೋಕ್ಷಧಾಮನೆ

ಮೋಕ್ಷವಿಜ್ಞಾನವನು ನೀಡುವ ಕೃಷ್ಣ ಪರಮಾತ್ಮ |

ಮೋಕ್ಷಪದ ಭವಮುಕ್ತಿಕಾರಣ

ಮೋಕ್ಷಕಾರಣ ಮೋಕ್ಷನಾಯಕ

ಮೋಕ್ಷ ಸರ್ವಾಂತರನು ಜೀವರ ಮೂಲನಿಜರೂಪ || ೩೭೦ ||

ಮೋಹನಾಶನವಿಗ್ರಹನೆ ಹರಿ

ಮೋಹ ಕಳೆವ ಮುಮುಕ್ಷುಗಳ ನಿಜ

ಮೋಹ ಬೆಳೆಸುವನಾತ್ಮವಿಜ್ಞಾನದೊಳು ಮೋಕ್ಷದೊಳು |

ಮೋಹ ಲೌಕಿಕ ಮೋಹ ವಿತ್ತದ

ಮೋಹ ಪತ್ನೀಸುತರ ಭೂಮಿಯ

ಮೋಹ ಕಳೆಯುವ ಮೂರ್ತಿ ಕೃಷ್ಣನು ಭಕ್ತರುದ್ಧರ್ತಾ || ೩೭೧ ||

ಅಕಾರಾದಿ-ಕ್ಷಕಾರಾಂತ-

ಸರ್ವವರ್ಣಪರಿಷ್ಟುತನೆ ಹರಿ

ಸಕಾರಣನಖಿಲಕ್ಕು ಸರ್ವಾಕ್ಷರಗಳಿಂ ಸ್ತುತನೆ |

ವಿಕಾರವ ಕಳೆ ಸುಕಾರವ ಬೆಳೆ

ಪ್ರಕಾರಾಕಾರಗಳ ನೀಗಿ ನಿ-

-ರಾಕಾರ ಪ-ರಾತ್ಮನೊಲು ಸರ್ವಾತ್ಮತ್ವ ತಿಳುಹಯ್ಯ || ೩೭೨ || 

ಮೌಢ್ಯನಾಶಕೃದೇಕಾತ್ಮಾ ವಿಶ್ವಾತ್ಮಾ ವಿಶ್ವರೂಪಧೃತ್।

ಸರ್ವಾತ್ಮಾ ಸರ್ವಭೂತಾತ್ಮಾ ಪರಮಾತ್ಮಾಽಽತ್ಮನಿಗ್ರಹೀ॥೫೩॥(೩೮೦)

ಕೃಷ್ಣ ನೀನೇ ಮೌಢ್ಯನಾಶಕೃತ್ 

ಕೃಷ್ಣ ಮೂಢತೆ ಕಳೆಯುವವ ನೀ

ಕೃಷ್ಣಭಕ್ತರಜ್ಞಾನಮೌಢ್ಯವ ಕಳೆದು ಸುಜ್ಞಾನ |

ಕೃಷ್ಣ ನೀಡಯ್ಯಾತ್ಮಜ್ಞಾನವ

ಕೃಷ್ಣವಿದ್ಯೆಯ ಕಳೆಯೊ ಭಕ್ತರ

ಕೃಷ್ಣ ನಿನ್ನಾಶ್ರಯಿಸಿದವರನು ಕಾಯೊ ಕರುಣಾಳು || ೩೭೩ ||

ಕೃಷ್ಣ ನೀನ್ ಏಕಾತ್ಮ ಸರ್ವರ

ವಿಷ್ಣು ನೀ ವಿಶ್ವಾತ್ಮ ಲೋಕದ

ಜಿಷ್ಣು ನೀ ಸಾಗರದ ನೀರಿನ ತೆರದಿ ಸರ್ವಗತ |

ಕೃಷ್ಣ ನೀ ಬ್ರಹ್ಮಾತ್ಮ ಮೂಲದಿ

ವಿಷ್ಣು ನೀನೀ ಸೃಷ್ಟಿರೂಪದಿ

ಜಿಷ್ಣು ತೋರುವೆ ಮಾಯೆಯನು ವೈವಿಧ್ಯ ಮಿಥ್ಯೆಯನು || ೩೭೪ ||

ದೇವ ನೀ ವಿಶ್ವಾತ್ಮ ವಿಶ್ವವ

ಕಾವ ಮೂಲಾಧಾರ ಬೊಮ್ಮನು

ಸಾವ ಮೀರಿದ ಕೃಷ್ಣ ವಿಷ್ಣುವೆ ಹೇ ಸದಾ ಶಿವನೆ |

ನೋವ ಮರೆಸುವ ನಲಿವ ತೋರುವ

ಭಾವಕೊಲಿಯುವ ನಮ್ಮೊಳಾತ್ಮನು

ಶ್ರೀವನಿತೆಯರಸನು ಮಹಾತ್ಮನು ಸರ್ವರೊಳಹೊರಗು || ೩೭೫ ||

ವಿಶ್ವರೂಪಧೃತ್ ಕೃಷ್ಣದೇವನೆ 

ವಿಶ್ವರೂಪವ ಧರಿಸಿ ನಿಂತಿಹೆ

ವಿಶ್ವದಾಕಾರದಲಿ ತೋರುವ ವಿಶ್ವಮೂರುತಿಯೆ |

ವಿಶ್ವ ನಶ್ವರ ಮಿಥ್ಯೆ ಲೌಕಿಕ

ಶಾಶ್ವತವು ಪರಬೊಮ್ಮ ನೀನೇ

ನಶ್ವರದಿ ಪರಮಾರ್ಥಬುದ್ಧಿಯ ಬಿಟ್ಟು ಮೇಲೇಳಿ || ೩೭೬ ||

ಸರ್ವಾತ್ಮ ನೀನೇ ವಾಸುದೇವನೆ

ಶರ್ವಾತ್ಮ ಬೊಮ್ಮನು ವಿಷ್ಣು ಶಕ್ತಿಯು

ಪರ್ವ ಹೃದಯದ ಕಳೆದು ಸಂಶಯ ಮುಕ್ತಿಬೋಧ ಕೊಡು |

ಉರ್ವಿಯೊಳು ಪೆಸರಾಂತ ಶ್ರೀಹರಿ

ಸರ್ವರಂತರ್ಯಾಮಿ ಸರ್ವನೆ

ಜೀವದೇವಜಗದ್ಭೇದಾತೀತ ನಾವಹುದು || ೩೭೭ ||

ಹರಿಯೆ ಸರ್ವಭೂತಾತ್ಮ ನಿತ್ಯನೆ

ಸರಿಯೆ ಭಕ್ತರ ಕಾಯದಿರ್ಪುದು

ಕರಿಯೆ ಕರೆಯಲು ಮಕರವಂ ತರಿದ್ಯಲ್ಲೊ ಪರಮಾತ್ಮ |

ಪರಿಯೆ ಸರ್ವ ಚರಾಚರಂಗಳ

ಹರಿಯೆ ಪಂಚಮಹಾದಿಭೂತದ

ಹಿರಿಯ ಮೂಲನೆಯಂತರಾತ್ಮನೆ ಸಚ್ಚಿದಾನಂದ || ೩೭೮ ||

ಪರಮಾತ್ಮಾ ಶ್ರೇಷ್ಠನಾತ್ಮನು

ಪರಮ ಶಕ್ತಿಯು ಸಕಲ ಜೀವರ

ಪರಮನಾತ್ಮನು ಪಾರ್ವತೀಪ ರಮೇಶ್ವರನು ತಾನು |

ವರದೆ ವಾಣಿಯ ಪತಿಯು ಬೊಮ್ಮನು

ಸರುವ ದೇವತೆಗಳೊಳಗಾತ್ಮನು

ಕರುಣಿಸೈ ಬ್ರಹ್ಮಾತ್ಮಜ್ಞಾನಾನುಭವನಿಷ್ಠೆಯನು || ೩೭೯ ||

ವಾಸುದೇವನೆಯಾತ್ಮನಿಗ್ರಹಿ

ವಾಸುದೇವನೆ ಲೋಕನಿಗ್ರಹಿ

ವಾಸುದೇವನೆ ಸರ್ವರಂತರ್ಯಾಮಿ ಜಗದೀಶ |

ಈಸು ದಿನ ಭಜಿಸಿಹೆನು ನಿನ್ನನು

ಸಾಸಿರಸ್ವರೂಪ ಶ್ರೀಹರಿ

ಶೇಷಶಯನನೆ ಚಿತ್ತಕರಣಂಗಳನು ನಿಗ್ರಹಿಸು || ೩೮೦ ||

ಕೇಶವೋಽಧೋಕ್ಷಜಃ ಪೃಥ್ವೀಪತಿಃ ಕಾರುಣ್ಯಮೂರ್ತಿಮಾನ್।

ಭೂತೋಽವ್ಯಕ್ತೋಽಮೃತೇಶಶ್ಚ ಭವದ್ಭವ್ಯಭಯಾಪಹಃ॥೫೪॥(೩೮೮)

ಕೇಶವನೆ ಕೇಶಿಯನು ಕೊಂದನೆ

ಕೇಶ ಸುಂದರ ಶಿರದೊಳಿರ್ಪನೆ

ಕೇಶ ಕ ಬ್ರಹ್ಮನನು ತಾನೀಶ್ವರನ ವಶಗೊಳಿಸಿ |

ಕೇಶವನು ಕೇ ಜಲದಿ ಶಯನಿಸಿ

ಕೇಶವನು ದೇಹಕ್ಕು ಕರಣಗ-

-ಳೀಶನಾಗಿಹ ಕೃಷ್ಣ ಜೀವಾತ್ಮನು ಹೃಷೀಕೇಶ || ೩೮೧ ||

ಅಧೋಕ್ಷಜ ಹರಿಯಧೋದ್ವಾರಜ

ವಿಧಿಯನೊಳ ಪರಿಕಿಸುತ ವಿಷ್ಣುವು

ಹಾದಿಗಾಣದೆ ಕೊನೆಗೆ ಪಾಯುದ್ವಾರದಲಿ ಬಂದ |

ಪದುಮನಾಭನು ಪದುಮಜನ ಪಿತ

ಪದುಮೆ ರಮಣನು ಪದುಮನೇತ್ರನು

ವಿಧಿಯಧೋಕ್ಷಜ ವಿಷ್ಣು ಕೃಷ್ಣನೆ ಸಚ್ಚಿದಾನಂದ || ೩೮೨ ||

ಹರಿಯೆ ಪೃಥ್ವೀಪತಿಯೆ ಕೃಷ್ಣನೆ

ಸಿರಿಯ ವಲ್ಲಭ ಧರಣಿರಮಣನೆ

ಕರಿಯ ಕಾಯ್ದನೆ ಬರಿಯ ಮೊರೆಗಾರ್ತಾಪ್ತ ರಕ್ಷಕನೆ |

ಧರಣಿಯಾಪತ್ತನ್ನು ಕಳೆವನೆ

ದುರುಳ ಹಿರಣ್ಯಾಕ್ಷನ್ನ ಕೊಂದನೆ

ವರದ ವಾರಾಹಾಕೃತಿಯೆ ಭೂಕಕ್ಷೆ ಕಾಯ್ದವನೆ || ೩೮೩ ||

ಕರುಣೆಯಾ ವಿಗ್ರಹನೆ ಕೃಷ್ಣನೆ

ಕರವ ಪಿಡಿಯುತ ಮುಕುತಿಗೊಯ್ವನೆ

ಗುರುವೆ ಕಾರುಣ್ಯಮೂರ್ತಿಮಾನ್ ಹರಿಯೆ ಪರಮಾತ್ಮ |

ಮರುಳೆ ಮನುಜನ್ಮವನು ಕೆಡಿಸದೆ

ದುರುಳ ಚಿತ್ತಾದಿಗಳ ಗುಡಿಸುತ

ತರುಣ, ಕೃಷ್ಣನ ಸರ್ವರೊಳಗಿಹ, ಚಿಂತಿಸನವರತ || ೩೮೪ ||

ಭೂತ ನೀನೆ ಚರಾಚರನೆ ಹರಿ

ಭೂತಿ ನಿನ್ನದೆ ಸೃಷ್ಟಿಗೋಚರ

ಮಾತಿಗೊಲಿಯದ ಮಹಿಮ ಕೃಷ್ಣನೆ ಹೇ ಪರಾತ್ಪರನೆ |

ಖ್ಯಾತ ಸಕಲಸ್ಥಿತನೆ ಬೊಮ್ಮನೆ

ಹೇತು ಸರ್ವಕು ನಾಥ ನಿತ್ಯನೆ

ಭೂತನಾಥನೆ ಭೂತರೂಪನೆ ಸಕಲಭೂತಸ್ಥ || ೩೮೫ ||

 ಕೃಷ್ಣ ನೀನ್-ಅವ್ಯಕ್ತ ತೋರದೆ

ಕೃಷ್ಣ ನಿಲುಕನು ಕರಣಗಳಿಗಹೊ

ಕೃಷ್ಣನವ್ಯಕ್ತನು ಪರಬ್ರ-ಹ್ಮನು ಪರಾತ್ಪರನು |

ಕೃಷ್ಣ ತೋರಿದ ಕೃಷ್ಣರೂಪದಿ

ಕೃಷ್ಣ ತೋರಿದ ಸೃಷ್ಟಿರೂಪದಿ

ಕೃಷ್ಣ ಸರ್ವಾತ್ಮನು ಮಹಾತ್ಮನು ಸಚ್ಚಿದಾನಂದ || ೩೮೬ ||

ಅಮೃತೇಶ ಹರಿಯಮೃತಾಧಿಪತಿ ನೀ-

-ನಮೃತ ಮೃತವಾಗದಿಹ ತತ್ತ್ವವು

ಸ್ವಮೃತವಜರಮರನಣುವಣು ಮಹದಾತ್ಮ ನಿರ್ಗುಣವು |

ಅಮೃತ ಮೋಕ್ಷವು ಮೋಕ್ಷದಧಿಪತಿ-

-ಯಮೃತ ತತ್ತ್ವಸ್ವರೂಪ ಕೃಷ್ಣನು

ಸ್ವಮೃತ ಸ್ವಾಂತರ ಸಕಲರಂತರ ಸಚ್ಚಿದಾನಂದ || ೩೮೭ ||

ಭವದ್-ಭವ್ಯ-ಭಯಾಪಹ ಹರಿ

ಭವತಿ ನಡೆಯುತ್ತಿರುವ ಭಯ ಹರ

ಭವಿತ ಭವ್ಯ ಭವಿಷ್ಯ ಭಯ ಹರ

(ಭವದ ಭಯಗಳನಪಹರಿಸುವನೆ) ಕೃಷ್ಣ ಪರಬೊಮ್ಮ |

ಭಾವಜನ ಪಿತ ಭವದ ತಾರಕ

ಭಾವಜಾರಿಯ ಸಖನೆ ಭಾವನ

ಭಾವಕೊಲಿಯುವ ಹರಿಯೆ ಕೇಶವನಾದಿನಾರಯಣ || ೩೮೮ ||

ಅಮೃತಾಂಶೂದ್ಭವೋ ದಿವ್ಯೋ ವಿಶ್ವೈಕಪಾದರೂಪಧೃತ್।

ದಿವಾಮೃತತ್ರಿಪಾದಶ್ಚ ತ್ರಿಪಾದೂರ್ಧ್ವೈಕಪಾದಸೃತ್॥೫೫॥(೩೯೪)

ಕೃಷ್ಣನಮೃತಾಂಶೂದ್ಭವನೆ ಹರಿ

ಕೃಷ್ಣನಮೃತದ ಕಿರಣಸಂಭವ

ಕೃಷ್ಣ ಬೆಳದಿಂಗಳಲಿ ಪುಟ್ಟಿದನಮೃತಸೂರ್ಯನಲಿ |

ಕೃಷ್ಣ ಚೆಲ್ಲಿದನಮೃತ ಕಿರಣವ

ಕೃಷ್ಣ ಪೂರೈಸಿದನು ಬಯಕೆಯ

ಕೃಷ್ಣ ಭಕ್ತರ ಕಷ್ಟ ಪರಿಹರಿಸಿದನು ಪ್ರೇಮದಲಿ || ೩೮೯ ||

ದಿವ್ಯ ರೂಪನೆ ಭವ್ಯ ತೇಜನೆ

ನವ್ಯ ಸವ್ಯಪಸವ್ಯ ಸರ್ವನೆ

ಹವ್ಯ ಕವ್ಯವ ಗೊಂಬ ನಾರಾಯಣನೆ ಶ್ರೀಕೃಷ್ಣ |

ದಿವ್ಯತೆಯ ಸಾಕಾರಮೂರ್ತಿಯು

ದಿವ್ಯ ದೀಪ್ತಿಯು ಪರಂಜ್ಯೋತಿಯು

ದಿವ್ಯ ಕ್ರೀಡಾಜಿಗೀಷುವು ಕಾಂತ್ಯಾದಿ ವ್ಯವಹಾರಿ || ೩೯೦ ||

ವಿಶ್ವೈಕಪಾ-ದರೂಪಧೃತ್ ಹರಿ

ವಿಶ್ವವೆಲ್ಲವದೊಂದು ಪಾದವು

ವಿಶ್ವ ಪರಮಾತ್ಮನಲಿ ನಾಲ್ಕರಲೊಂದು ಭಾಗವದು |

ವಿಶ್ವ ಕೃಷ್ಣನ ಪಾದ ಸಕಲವು

ಶಾಶ್ವತವು ಮೂಲದಲಿ ಪಾದವು

ನಶ್ವರವು ತೋರಿಕೆಯ ಸೃಷ್ಟಿಯು ಕೃಷ್ಣ ಪರಬೊಮ್ಮ || ೩೯೧ ||

ದಿವಾಮೃತತ್ರಿಪಾದನೆ ಹರಿ

ದಿವಿಯಲಿರುವುದು ಮೂರು ಪಾದವು

ದಿವಿಯು ದೇವರ ಲೋಕ ಮುಕ್ಕಾಲಿಹುದು ಪರಬೊಮ್ಮ |

ದಿವಿಯು ಮೃತಿರಹಿತವದು ಧಾಮವು

ಭುವಿಯು ಮರ್ತ್ಯವು ಮಿಥ್ಯ ತೋರಿಕೆ

ದಿವಿಭುವಿಗಳಾಚೆಗಿನ ಸತ್ಯವೆ ಸಚ್ಚಿದಾನಂದ || ೩೯೨ ||

ತ್ರಿಪಾತ್ ಕೃಷ್ಣನೆ ವಾಸುದೇವನೆ

ತ್ರಿಪಾದಗಳವನೈಸಿರಿಯು ನಿಜ-

-ವುಪಾಧಿಗಳಿಲ್ಲದಿಹ ಪರತತ್ತ್ವವದು ಪರಬೊಮ್ಮ |

ತ್ರಿಪಾದನು ಹರಿ ವೇದ ಮೂರರ

ತ್ರಿಪಾದನು ಗಾಯತ್ರಿಯಲಿ ತಾ

ತ್ರಿಪಾದನು ಪ್ರಣವದಲಿ ನಾಡಿಗಳಲ್ಲಿ ತ್ರಿಗುಣದಲಿ || ೩೯೩ ||

ಕೃಷ್ಣ ತಾನ್-ಊರ್ಧ್ವೈಕಪಾದಸೃತ್

ಕೃಷ್ಣ ವಿಷ್ಣುವಿನೊಂದು ಪಾದದಿ

ಕೃಷ್ಣ ಸಂಚರಿಸಿದನು ಲೋಕದಿ ದುಷ್ಟಶಿಕ್ಷಣಕೆ |

ಕೃಷ್ಣ ಚರಿಪನು ಸುಷುಮ್ನೆಯ ತೆರ

ಕೃಷ್ಣಗತಿ ತಾನೂರ್ಧ್ವದಿಶೆಯೊಳು

ಕೃಷ್ಣನನು ನಂಬಿದರೆ ಪರಗತಿ, ಪತನವಿರದವಗೆ || ೩೯೪ ||