ಸ್ತೋತ್ರಸಂಹಿತಾ ೪.೧ (ಸ್ವರಚಿತ ಸ್ತೋತ್ರಗಳು, ವಿವರಣೆ ಸಹಿತ)

 

4. ಶ್ರೀಭಗವತ್ತತ್ತ್ವರತ್ನಾಕರ ಭಾಗ ೨ (ಸ್ತೋತ್ರಸಂಹಿತಾ ೧)

ಪದ್ಮಾಕ್ಷಃ ಪದ್ಮನಾಭಶ್ಚ ಪದ್ಮಾಪತಿರಪಾಂಪತಿಃ।

ಪದ್ಮಪಾತ್ಪದ್ಮಹಸ್ತೋ ವೈ ಪದ್ಮನೇತ್ರೋಽಹ್ಯಯೋನಿಜಃ॥೫೬॥(೪೦೨)

ಪದ್ಮಾಕ್ಷನೆ ಪದುಮಕರಣನೆ

ಪದ್ಮ ತಾವರೆಯಂಥಯಿಂದ್ರಿಯ

ಸದ್ಮ ವೈಕುಂಠದಲಿ ನಾರಾಯಣನೆ ಶ್ರೀಕೃಷ್ಣ |

ಪದ್ಮಕೋಮಲ ಪದ್ಮವರ್ಣದ

ಪದ್ಮದಂತಿಹ ಮೂಗು ಕಿವಿಗಳು

ಪದ್ಮಲೋಚನ ರಸನ ಚರ್ಮವು ಕರ್ಮಕರಣಗಳೂ || ೩೯೫ ||

ಪದ್ಮನಾಭನೆ ಹೇ ಮುಕುಂದನೆ

ಪದ್ಮದಂತಿಹ ನಾಭಿ ಹೊಕ್ಕುಳ

ಪದ್ಮೆಯನು ಪೆತ್ತಂಥ ಶ್ರೀಪತಿ ಪದ್ಮವಲ್ಲಭನೆ |

ಪದ್ಮನಾಭಿಜ ವಿಧಿಯು ಬೊಮ್ಮನು

ಪದ್ಮನಾಭನ ಸುತನು ಧಾತೃವು

ಪದ್ಮಜನ ಪಿತ ಪದ್ಮಸ್ಥಿತೆಯರಸನೆ ಪರಾತ್ಮ ಹರಿ || ೩೯೬ ||

ಪದ್ಮಾಪತಿ ವಿಷ್ಣು ಕೃಷ್ಣನೆ

ಪದ್ಮೆ ಕಮಲೆಯ ಸಿರಿಯ ರಮಣನೆ

ಪದ್ಮನಾಭನೆ ಪದುಮನೇತ್ರನೆ ಲಕುಮಿವಲ್ಲಭನೆ |

ಸದ್ಮ ವೈಕುಂಠವು ಪರಾತ್ಮನೆ

ಛದ್ಮವೇಷದಿ ಕಾಲಕಾಲಕೆ

ಪದ್ಮೆಯರಸನೆ ವಿಷ್ಣು ನೀನವತರಿಸಿ ರಕ್ಷಿಸುವೆ || ೩೯೭ ||

ಕೇಶವನೆ ನೀನ್ ಅಪಾಂಪತಿಯಹು-

-ದಾ ಶರಧಿಯೊಳು ಪವಡಿಸಿಹೆಯೈ

ನಾಶರಹಿತನೆ ಶೇಷಶಯನನೆ ಹೇ ಜಲಾಧಿಪನೆ |

ಪಾಶವಂತನೆ ವರುಣರೂಪನೆ

ಕೋಶ ಪಂಚ ವಿದೂರ ನೀರಪ

ದೇಶಕಾಲಾತೀತ ಸರ್ವಾಧಾರ ಶ್ರೀಕೃಷ್ಣ || ೩೯೮ ||

ಹೇ ಮುಕುಂದನೆ ಪದ್ಮಪಾತ್ ಹರಿ

ಕಾಮಪಿತ ತಾವರೆಯ ಚರಣನೆ

ಕಮಲ ಕೋಮಲ ಪವಳವರ್ಣವು ಕೃಷ್ಣಪಾದವದು |

ವಿಮಲ ಚರಿತನೆ ಸುಮನಚೇಷ್ಟನೆ

ಕುಮತಿನಾಶನೆ ಸುಮತಿದಾತನೆ

ಕೋಮಲಾಂಗನೆ ಕಳೆದವಿದ್ಯೆಯ ಮುಕುತಿಯನ್ನೀಯೋ || ೩೯೯ ||

ಮಾಧವನೆ ಹೇ ಪದ್ಮಹಸ್ತನೆ

ಶ್ರೀಧವನೆ ಭೂಧವನೆ ಕೃಷ್ಣನೆ

ಹೇ ಧವಳಗಿರಿಪತಿಗೆ ಪ್ರೀಯನೆ ಕಮಲಕರ ಕೃಷ್ಣ |

ವೇಧಸನ ಪಿತ ಕಮಲ ಕೋಮಲ

ಶ್ರೀದ ಕರ ರಕ್ತೋತ್ಪಲದ ತೆರ

ನಾದಮೂರುತಿ ಭೇದ ಕಳೆ ನೀಡಾತ್ಮನಿಷ್ಠೆಯನು || ೪೦೦ ||

ಕೃಷ್ಣ ಮಾಧವ ಪದ್ಮನೇತ್ರನೆ

ಕೃಷ್ಣ ಕಮಲಾಕ್ಷನೆ ಮಹಾತ್ಮನೆ

ಕೃಷ್ಣ ಪದ್ಮದಳಾಯತಾಂಬಕ ಪದ್ಮನಯನ ಹರೇ |

ವಿಷ್ಣು ಕೋಮಲ ನೇತ್ರ ಲೋಕದಿ

ಜಿಷ್ಣು ಸುಂದರಚಕ್ಷು ಸಂತತ

ಕೃಷ್ಣ ಭಕ್ತಿಜ್ಞಾನವೈರಾಗ್ಯಗಳ ನೀಡೆಮಗೆ || ೪೦೧ ||

ಅಯೋನಿಜ ಹರಿ ಕೃಷ್ಣ ವಿಷ್ಣುವೆ

ಸುಯೋನಿಜರಾಂತರ್ಯಬಂಧುವೆ

ಕುಯೋನಿಜ ನಿಜಶತ್ರುವವತರಿಸಿರುವೆ ಸ್ವೇಚ್ಛೆಯಲಿ |

ಮಾಯೆ ನಿನ್ನಯಧೀನ ಕೃಷ್ಣನೆ

ಮಾಯೆಯನ್ನಾಶ್ರಯಿಸಿ ತೋರಿದೆ

ಮಾಯಿ ಲೋಕದಿ ಮಿಥ್ಯೆ ಸತ್ಯ ವಿವೇಕ ನೀಡೆಮಗೆ || ೪೦೨ ||

ಸಾಶನಾಧಿಪತಿಶ್ಚೈವಾನಶನಾಧಿಪತಿಶ್ಚ ಯಃ।

ಉರುಕ್ರಮೋ ವಿರಾಟ್ಪೂರ್ವಶ್ಚಾತ್ಮವಿಸ್ತಾರವಿಶ್ವಸೃತ್॥೫೭॥(೪೦೭)

ಸಾಶನಾಧಿಪತಿಯೆ ಕೃಷ್ಣನೆ

ಸಾಶನರು ಜೀವಿಗಳುವುಂಬರು

ಕೇಶವನು ಪ್ರಾಣಿಗಳ ನಾಯಕನಶನವುಂಬವರ |

ಅಶನವನ್ನವು ಜೀವ ಚಿತ್ತಕೆ-

-ಯಶನ ಜಲ ಪ್ರಾಣಕ್ಕೆ ಜೀವರ

ವಶನು ಕೃಷ್ಣನು ನೈಜ ಭಕ್ತರ ಕಪಟವಿರದವರ || ೪೦೩ ||

ಅನಶನಾಧಿಪತಿಯೆ ಕೃಷ್ಣನೆ-

-ಯನಶನರು ನಿರ್ಜೀವರುಣ್ಣರು

ಮನಸಿಜನ ಪಿತ ಕೃಷ್ಣ ಜಡರಧಿಪತಿಯು ತಾನಿಹನು |

ಮನದ ದೃಷ್ಟಿಯ ತೆರದಿ ಸೃಷ್ಟಿಯು

ಕನಸುಜಾಗ್ರತಸುಪ್ತಿ ಮೀರಿದ

ಹನುಮನಂತರ್ಯಾಮಿ ಜೀವದ ಜಡದಲೊಳಹೊರಗೆ || ೪೦೪ ||

ಉರುಕ್ರಮ ನೀ ವಾಸುದೇವನೆ-

-ಯುರುತರದ ವಿಸ್ತಾರ ಕ್ರಮಣವು

ಗುರುತರದ ಮೂರ್ಲೋಕ ಗಮನವು ಹೆಜ್ಜೆ ಮೂರರಲಿ |

ಉರುತರದಿ ಚೆನ್ನಾಗಿ ಕ್ರಮಿಸುವೆ

ಸರುವ ಲೋಕದಿ ಕ್ರಮವನರಿಯುತ

ಗರುವ ರಹಿತ ತ್ರಿವಿಕ್ರಮನೆ ವಾಮನನೆ ಶ್ರೀಕೃಷ್ಣ || ೪೦೫ ||

ವಿರಾಟ್-ಪೂರ್ವನೆ ದೇವ ಪರಬ್ರಹ್ಮನೆ

ವಿರಾಜಿಪ ಪರಮಾತ್ಮಜ್ಯೋತಿಯೆ

ವಿರಾಡ್ರೂಪನೆ ವಿರಾಣ್ಮೂಲನೆ ದೇವ ಶ್ರೀಕೃಷ್ಣ |

ವಿರಾಜನೆ ವೈಶಿಷ್ಟ್ಯಪೂರ್ಣನೆ

ವಿ-ರಾಡ್ ದೀಪ್ತಿಯೆ ಪರಮಪುರುಷನೆ

ವಿರಾಡ್ ಸೃಷ್ಟಿಗೆ ಕಾರಣನೆ ಪುರ ದೇಹದಲ್ಲಿಹನೆ || ೪೦೬ ||

ಆತ್ಮವಿಸ್ತಾರವಿಶ್ವಸೃತ್ ಹರಿ-

-ಯಾತ್ಮವನೆ ವಿಸ್ತರಿಸಿ ವಿಶ್ವವ-

-ನಾತ್ಮದಿಂ ಸೃಜಿಸಿದನು ಸಂಚರಿಸುತಿಹ ಸಂತತವು |

ಆತ್ಮನ್ "ಅತ ಸಾತತ್ಯ ಗಮನ " ವ-

-ದಾತ್ಮವಮೃತದ ವಾಹಿನಿಯು ತಾ-

-ನಾತ್ಮನಣುರೇಣವಲು ಚರಿಸುತ ಬೊಮ್ಮ ತಾ ಕೃಷ್ಣ || ೪೦೭ ||

ವಿರಾಜಾಧಿಪತಿಶ್ಚೈವ ವಸನ್ತಾಜ್ಯಶ್ಶರದ್ಧವಿಃ।

ಗ್ರೀಷ್ಮೇಧ್ಮೋ ಯಜ್ಞರೂಪಶ್ಚರ್ಷಿಸ್ಸಾಧ್ಯೋ ದೇವದುನ್ದುಭಿಃ॥೫೮॥(೪೧೫)

ವಿರಾಜಾಧಿಪತಿಯೆ ಕೃಷ್ಣನೆ

ವಿರಾಜನು ತಾ ವಿರಾಟ್ಪುರುಷನು

ವಿರಾಡ್ರೂಪನು ಪರಮಪುರುಷೋತ್ತಮನ ಸೃಷ್ಟಿಯಹೊ |

ವಿರಾಗವ ಭ-ಕ್ತಿಯನು ಜ್ಞಾನವ

ಸರಾಗದಿ ಕೊಡಿಸೆಮಗೆ ನಿತ್ಯವು

ಕುರಾಗದ್ವೇಷಗಳ ನೀಗಿಸು ಹೇ ಮಹಾವಿಷ್ಣೋ || ೪೦೮ ||

ವಸಂತಾಜ್ಯನೆ ಪರಬ್ರಹ್ಮನೆ

ವಸಂತರ್ತುವೇ ಹವ್ಯ ತುಪ್ಪವು

ವಸಂತದಿ ಯಾಗವನು ಮಾಡಿಸುತಿರುವ ಋತ್ವಿಜನೆ |

ವಸಂತಿ ಮದನೋತ್ಸವಗಳಹೊ

ವಸಂತಾಖ್ಯವು ಋತುವು ಚೈತ್ರದಿ

ವಸಂತವು ಘೃತವಾಜ್ಯ ಯಾವನಿಗಾತ ಶ್ರೀಕೃಷ್ಣ || ೪೦೯ ||

ಶರದ್ಧವಿ ಶರದ್ರುತುವು ಹವ್ಯವು

ಶರತ್ಕಾಲವದಾಶ್ವಯುಜದಲಿ

ಶರತ್ ಶೄ ಹಿಂಸೆಯದು ಕ್ರಿಮಿಕೀಟಾದಿ ಬಾಧೆಯದು |

ಶರತ್ಕಾಲವು ಕಾರ್ತಿಕದಿ ತಾ

ಸುರಾಧಿಪ ಹವಿಸನ್ನು ಶರತಿನ

ಪರಮಮಂಗಲ ಕೃಷ್ಣ ಸ್ವೀಕರಿಸುವನು ಪ್ರೀತಿಯಲಿ || ೪೧೦ ||

ಕೃಷ್ಣ ನೀ ಗ್ರೀಷ್ಮೇಧ್ಮ ಗ್ರೀಷ್ಮದಿ

ಕೃಷ್ಣ ನೀ ಋತುವಿನಲಿ ಗ್ರೀಷ್ಮದ

ಕೃಷ್ಣ ನೀನದನಿಂಧನವ ಮಾಡಿರುವೆ ಯಜ್ಞದಲಿ |

ಕೃಷ್ಣ ಗ್ರಸತೇ ರಸಗಳನು ತಾ

ಕೃಷ್ಣ ಕಾಷ್ಠವೆ ನಿನಗೆ ಗ್ರೀಷ್ಮವು

ಕೃಷ್ಣ ರಸ ಪರಮಾತ್ಮ ನಿರ್ಗುಣ ಬ್ರಹ್ಮ ಸದ್ವಿದ್ಯೆ || ೪೧೧ ||

ಯಜ್ಞರೂಪನೆ ಯಜ್ಞ ವಿಷ್ಣುವೆ

ಯಜ್ಞ ಹರಿ ತಾ ಯಜ್ಞ ಕೃಷ್ಣನೆ

ಯಜ್ಞದಗ್ನಿಯೆ ಕುಂಡ ಶಾಲೆಯೆ ಸಮಿಧೆಯಾಜ್ಯವು ತಾ |

ಯಜ್ಞದಂಗೋಪಾಂಗಮುಖ ಹರಿ

ಯಜ್ಞಕರ್ತನು ಯಜ್ಞಭೋಕ್ತನು

ಯಜ್ಞ ಋತ್ವಿಜ ಯಜ್ಞಫಲದಾತಾರ ಶ್ರೀಕೃಷ್ಣ || ೪೧೨ ||

ಋಷಿಯೆ ಕೃಷ್ಣನೆ ಸಕಲ ವೇದಕೆ

ಖುಷಿಯೆ ಸರ್ವದಾ ಸುಖಸ್ವರೂಪನೆ

ಶಶಿಯು ತಾರಾಮಂಡಲಕೆ ಶ್ರುತಿಯುಸಿರು ಶ್ರೀಕೃಷ್ಣ |

ಋಷಿಯು ದರ್ಶನದಿಂದ ಮಂತ್ರದ

ಋಷಿಯು ತಾನರ್ಥವನು ತಿಳಿಯಲು

ಋಷಿಯು ಪರಗತಿಯೆಡೆಗೆ ಪ್ರಾಪಕ ದೇವ ಗುರು ಕೃಷ್ಣ || ೪೧೩ ||

ಸಾಧ್ಯ ನೀ ಹರಿ ವಾಸುದೇವನೆ

ಬಾಧ್ಯ ಪೀಡಾಹರನೆ ಕೃಷ್ಣನೆ

ಭೇದ್ಯ ನಿಜಸಾಧಕರಿಗಾನಂದವನು ತೋರುವನೆ |

ಸಾಧ್ಯ ನೀ ಸಾಧಕರ ಭಕ್ತಿಗೆ

ಬೋಧ್ಯ ಜ್ಞಾನವೆ ಮನುಜರಿಗೆ ತಾನ-

-ಭೇದ್ಯನಾತ್ಮನು ಬೊಮ್ಮ ಸರ್ವರೊಳವಿತುಕೊಂಡಿರುವ || ೪೧೪ ||

ದೇವದುಂದುಭಿ ವಾಸುದೇವನೆ

ದೇವತೆಗಳಿಗೆ ಹರ್ಷಜನಕನೆ

ದೇವತೆಗಳುತ್ಸಾಹವರ್ಧಕ ಮೊಳಗು ಡಂಗುರವೆ |

ದೇವ ಬೆಳಗುವ ಧರ್ಮಜ್ಯೋತಿಯು

ದೇವ ಲೋಕದ ದಿಕ್ಕಿನಧಿಪರು

ದೇವತೆಗಳನು ಕಾಯ್ವ ಪರಮಾತ್ಮನೆ ನಿರಾಮಯನೆ || ೪೧೫ ||

ಸರ್ವಹುತ್ ಪೃಷದಾಜ್ಯಶ್ಚ ವಾಯವ್ಯಭೂತಕೃಚ್ಚ ಯಃ।

ಆರಣ್ಯಭೂತಕೃದ್ಗ್ರಾಮ್ಯಭೂತಕೃದ್ಭೂತಸಾರಥಿಃ ॥೫೯॥ (೪೨೧)

ಸರ್ವಹುತ್ ಸರ್ವವನು ಹೋಮಿಪ

ಸರ್ವ ಸೃಷ್ಟಿಯ ಸೃಷ್ಟಿಗರ್ಪಿಸಿ

ಸರ್ವ ಜೀವರ ಸುಖಕೆ ಜಡಪ್ರಕೃತಿಯನು ಸರಕಾಗಿ |

ಸರ್ವ ಲೋಕವ ಸೃಜಿಸಿ ಕೊಟ್ಟಿಹ

ಸರ್ವ ಸೌಕರ್ಯಗಳನಿತ್ತಿಹ

ಸರ್ವ ಜಗ ಕಾರಣನೆ ಕೃಷ್ಣನೆ ದೇವ ಪರಬೊಮ್ಮ || ೪೧೬ ||

ಕೃಷ್ಣ ನೀ ಪೃಷದಾಜ್ಯ ಸೃಷ್ಟಿಗೆ

ಕೃಷ್ಣ ಸೃಷ್ಟಿಯ ಯಜ್ಞಕಾಜ್ಯವು

ಕೃಷ್ಣ ಕೇವಲ ಕೇಶವನು ಕೈವಲ್ಯಮೂರುತಿಯೆ |

ಕೃಷ್ಣ ದಧಿಮಿಶ್ರಿತದ ಘೃತ ನೀ

ಕೃಷ್ಣ ನೀ ಸಕಲರಿಗೂ ಪ್ರಾಣನು

ಕೃಷ್ಣ ಯಜ್ಞನು ಯಜ್ಞದಾಜ್ಯವು ಹೇ ಮಹಾವಿಷ್ಣೋ || ೪೧೭ ||

ವಾಯವ್ಯಭೂತಕೃತ್ ಕೃಷ್ಣನೆ

ವಾಯುದೇವರ ಭುವರ್ಲೋಕದ

ವಾಯುವನ್ನುಸಿರಾಡುಂತಹ ಪಶುಗಳನು ಸೃಜಿಪ |

ವಾಯವ್ಯಭೂತವು ವಾಯುವೆಂಬುದು

ವಾಯುಜನಕನು ವಾಸುದೇವನು

ವಾಯು ಪ್ರಾಣನು ಪ್ರಾಣನಿಗು ಪ್ರಾಣ ಪರಮೇಶ || ೪೧೮ ||

ಆರಣ್ಯಭೂತಕೃತ್- ವಾಸುದೇವನೆ-

-ಯರಣ್ಯದ ನಿವಾಸಿ ಪಶುಗಳ

ವಿರಚಿಸಿದ ಸೃಜಿಸಿದನು ಸಿಂಹಾದಿಗಳ ವನದೊಳಗೆ |

ಪರಮಕರುಣಾಳುವೆ ಪರಾತ್ಪರ

ಚರಮಗತಿ ಕರುಣಿಪುದು ಭಕ್ತಗೆ

ವಿರಮಿಸದೆ ಧ್ಯಾನಿಸುವೆ ಚಿಂತಿಪೆ ಕೃಷ್ಣನನವರತ || ೪೧೯ ||

ಗ್ರಾಮ್ಯಭೂತಕೃತ್-ಅಚ್ಯುತನೆ ಹರಿ

ಗ್ರಾಮ್ಯ ನಾಡಿನ ಪ್ರಾಣಿಗಳ ತಾ

ಗ್ರಾಮ್ಯ ಸಾಕುಪ್ರಾಣಿಗಳ ಸೃಜಿಸಿಹನು ಪರಮಾತ್ಮ |

ರಮ್ಯವಾಗಿಹ ಸಾಧು ಪಶುಗಳ

ನಮ್ಯವಾಗಿಹ ಗೋಶುನಕಗಳ

ಕಾಮ್ಯವಾಗಿಹ ಪ್ರಾಣಿಸಂಪದ ಸೃಜಿಪ ಶ್ರೀಕೃಷ್ಣ || ೪೨೦ ||

ಭೂತಸಾರಥಿ ಪಾರ್ಥಸಾರಥಿ

ಜಾತವೆಲ್ಲಕು ಕೃಷ್ಣ ಸಾರಥಿ

ಕಾತರವ ಬಿಡು ಶರಣು ಪೊಗು ಪರಮಾತ್ಮತತ್ತ್ವವನು |

ಭೀತಿಯೇತಕೆ ಮರುಗದಿರು ನರ

ಮಾತಿನಲಿ ಕಾಲವನು ಕಳೆಯದೆ

ಮಾತಲೀಶ್ವರವಂದ್ಯ ಕೃಷ್ಣನ ನೆನೆಯೊ ಪ್ರೇಮದಲಿ || ೪೨೧ ||

ಋಕ್ಕರ್ತಾ ಸಾಮಕರ್ತಾ ಚ ಛನ್ದಃಕರ್ತಾ ಯಜುರ್ನಿಧಿಃ।

ಬ್ರಾಹ್ಮಣಾಸ್ಯೋ ಬ್ರಹ್ಮಮುಖಃ ಕ್ಷತ್ರಿಯಭುಜಸಂಯುತಃ ॥೬೦॥ (೪೨೮)

ಋಕ್ಕರ್ತನೆ ಋಕ್ಕುಗಳ ಹರಿ

ಋಕ್ಕರ್ತನೆ ಸೃಜಿಸಿದನು ತಾ

ಋಕ್ಕುಗಳ ಸಂಹಿತೆಯನಾದಿಯಲೀಶನುಸಿರಿದನು |

ಹಕ್ಕು ತಾನುಪನೀತ ವಟುವಿಗೆ

ಕಕ್ಕುಲಿಸದಿರು ವೇದಸಾರವ-

-ನಕ್ಕರೆಯಲುಸುರಿಹನು ಸಕಲರಿಗಾಗಿ ಹರಿ ತಾನು || ೪೨೨ ||

ಸಾಮಕರ್ತನೆ ಸಾಮಪ್ರೀಯನೆ

ಸಾಮಗಾನಕೆ ಬೇಗನೊಲಿವನೆ

ಸಾಮದಲಿ ಕಾಯ್ವವನೆ ಲೋಕವ ಕೃಷ್ಣ ಶ್ರೀಕೃಷ್ಣ |

ಸೋಮಸುಂದರ ಗೀತಪ್ರೀಯನೆ

ಸೋಮಶೇಖರಮಿತ್ರ ಕೇಶವ

ನೇಮ ಸುಜ್ಞಾನಗಳ ಕರುಣಿಸು ಭಾಮೆಯಧಿಪತಿಯೆ || ೪೨೩ ||

ಛಂದಃಕರ್ತಾ ದೇವ ಕೃಷ್ಣನೆ

ಛಂದಗಳ ಕಾರಣನೆ ಚಂದ್ರನೆ

ಮಂದಹಸಿತಾನನೆ ಕರುಣಾಪಾಂಗ ಶ್ರೀಕೃಷ್ಣ |

ಚಂದಗಾಣಿಪ ವಾಙ್ಮಯವ ತಾ

ಚಂದಗಾಣಿಪ ಗೇಯ ರೂಪಕ

ಸಂದರಾನನನಿಂದಿರಾಮಂದಿರನೆ ಶ್ರೀಕೃಷ್ಣ || ೪೨೪ ||

ಯಜುರ್ನಿಧಿ ಯಜು-ರುವೇದದ ಪತಿ

ಯಜುಸ್ಸುಗಳಿಗೆ ಮೂಲಕಾರಣ

ಯಜುರ್ವೇದವ ಯಜ್ಞಕಾಗಿಯೆ ವಿರಚಿಸಿದನೊಲಿದು |

ಯಜುರ್ಗದ್ಯವು ನಿಗದವೆಂಬರು

ಯಜುವ ಹೊರತಾ ಪದ್ಯ ಋಚೆ ತಾ

ಭಜಿಪೆ ವೇದಾತ್ಮಕ ಪುರಾಣೈಕೇಶ ಪೂರುಷನ || ೪೨೫ ||

ಬ್ರಾಹ್ಮಣಾಸ್ಯನೆ ಬ್ರಾಹ್ಮಮುಖವಿಹ

ಬ್ರಾಹ್ಮಣಪ್ರಿಯ ವಿಷ್ಣು ಕೃಷ್ಣನೆ

ಬ್ರಾಹ್ಮವಿಜ್ಞಾನವನು ಬೆಳಗಿದ ಶಂಕರಾತ್ಮಕನೆ |

ಬ್ರಹ್ಮವಿಜ್ಞಾನವದು ಶ್ರೇಷ್ಠವು

ಬ್ರಾಹ್ಮಗುಣಕರ್ಮಗಳು ಸಾತ್ತ್ವಿಕ

ಬ್ರಹ್ಮತತ್ತ್ವವನರಿತ ಬ್ರಹ್ಮವೆ ಕೃಷ್ಣ ತಾನಯ್ಯ || ೪೨೬ ||

ಬ್ರಹ್ಮಮುಖ ಪರಬೊಮ್ಮವದನನೆ

ಬ್ರಹ್ಮ ವೇದವು ಬ್ರಾಹ್ಮಣನು ಸಹ

ಬ್ರಹ್ಮ ತಪತತ್ತ್ವಗಳು ಕೇಶವ ಬೊಮ್ಮಮೊಗ ತಾನೈ |

ಬ್ರಹ್ಮ ವಿಧಿ ತಾ ಸೃಷ್ಟಿಕರ್ತನು

ಬ್ರಹ್ಮ ಪ್ರಜೆಗಳ ಪತಿಯು ಕೃಷ್ಣನು

ಬ್ರಹ್ಮವೇ ಮುಖವಾಗಿರುವ ಹರಿ ಕೃಷ್ಣ ಪರಬೊಮ್ಮ || ೪೨೭ ||

ಕ್ಷತ್ರಿಯಭುಜಸಂಯುತನೆ ಹರಿ

ಕ್ಷತ್ರಿಯರ ಸ್ವ-ಬಾಹು ಮಾಡಿಹ

ಕ್ಷತ್ರಿಯರ ಕಾಯ್ವಂತ ಶಕ್ತಿಯೆ ಕೃಷ್ಣ ಪರಬೊಮ್ಮ |

ಕ್ಷಾತ್ರತೇಜನೆ ಕ್ಷಾತ್ರವೀರ್ಯನೆ

ಕ್ಷಾತ್ರಗುಣಸಂಪನ್ನ ಶ್ರೀಹರಿ

ಕ್ಷಾತ್ರಬ್ರಾಹ್ಮಸುತೇಜದಿಂದಲಿ ಧರ್ಮ ರಕ್ಷಿಪನು || ೪೨೮ ||

ವೃನ್ದಾವನಸುಸಞ್ಚಾರೀ ಸಂಸಾರಾರ್ಣವತಾರಕಃ।

ಮುಕುನ್ದೋಽರಿಷ್ಟಹಾರೀ ಚ ವೃಷಭಾಸುರಮಾರಕಃ॥೬೧॥(೪೩೩)

ವೃಂದಾವನಸುಸಂಚಾರಿಯೆ

ವೃಂದೆಯರ ವೃಂದದಲಿ ಚರಿಸುತ

ವೃಂದಾವನ ಯಮುನೆ ತೀರದಿ ರಾಸವಾಡಿದನೆ |

ವೃಂದ ಗೋಪಿಯರಂದು ಕೃಷ್ಣನು

ನಂದನಂದನನಾನಂದದಲಿ

ಮಂದ ಮಂದದ ಹಸಿತದಲಿ ತಾನಂದು ನರ್ತಿಸಿದ || ೪೨೯ ||

ಸಂಸಾರಾರ್ಣವತಾರಕನೆ ಹರಿ

ಸಂಸಾರಸಾ-ಗರವ ದಾಟಿಸು

ಸಂಸರಣ ಜನಿ ಮರಣವೆಂಬಿದ ಕಳೆದು ಮುಕ್ತಿ ಕೊಡು |

ಅಂಶ ನಾವೈ ಪೂರ್ಣ ನೀನೈ

ಕಂಸಬುದ್ಧಿಯ ಕಳೆಯೆ ಪೂರ್ಣತೆ

ಹಂಸಪಥ ದೊರಕುವುದು ಸದ್ಯೋಮುಕ್ತಿ ಶ್ರೀಕೃಷ್ಣ || ೪೩೦ ||

ಮುಕುಂದನೆ ಶ್ರೀಕೃಷ್ಣದೇವನೆ

ಮುಕುವ ಮುಕುತಿಯ ದಾತೃ ಕೃಷ್ಣನೆ

ಮುಕುತಿ ಭಕುತಿಯ ಶಕುತಿ ಯುಕುತಿಯ ನೀಡಿ ನೀ ಸಲಹು |

ಮುಕುತಿರೂಪನೆ ಮುಕುತಿಧಾಮನೆ

ಮುಕುತಿದಾತಾರನೆ ಮಹಾತ್ಮನೆ

ಮುಕುಂದನೆ ಮಾಧವನೆ ಕೇಶವ ರಕ್ಷಿಸನವರತ || ೪೩೧ ||

ಅರಿಷ್ಟಹಾರಿ ನೀ ಕೃಷ್ಣನೆ-

-ಯರಿಷ್ಟಗಳನು ಪರಿಹರಿಪ ಹರಿ

ಬರಿ ಪ್ರಚಾರಕ್ಕೊಲಿಯದವನಾಚಾರಸುವಿಚಾರ |

ವಿರಿಂಚಿಯ ಪಿತನರಿಷ್ಟನೇಮಿ

ಪರಮಕರುಣಾಸಾಗರನೆ ಗುರು

ಚರಮಗತಿದಾತಾರ ವಿಘ್ನನಿವಾರಕನೆ ಕೃಷ್ಣ || ೪೩೨ ||

ವೃಷಭಾಸುರಮಾರಕನೆ ಹರಿ

ವೃಷಭವೆತ್ತಿನ ರೂಪದಸುರನ

ವೃಷಭದೈತ್ಯನ ಕೊಂದ ರಾಧಾಕೃಷ್ಣ ಪರಮಾತ್ಮ |

ವೃಷಭ ಧರ್ಮದ ರೂಪ ಶಿವನಿಗೆ

ವೃಷಭನಂದದಿ ಕಪಟವಾಡಿದ

ವೃಷಭರೂಪಿನ ದುಷ್ಟ ಕಪಟಿಯ ಕೊಂದನಾ ಹರಿಯು || ೪೩೩ ||

ಬಕಹಾ ಚ ಪ್ರಲಮ್ಬಘ್ನೋ ದಯಾಲುರಘಭಞ್ಜನಃ।

ವ್ರಜಕ್ರೀಡೋ ವ್ರಜೇಶಶ್ಚ ವ್ರಜಬಾಲಾಪ್ರಿಯಸ್ಸುಹೃತ್॥೬೨॥(೪೪೧)

ಬಕಹಾ ಬಕದೈತ್ಯಹರ ಹರಿ

ಬಕದ ಕೊಕ್ಕರೆ ರೂಪಿನಸುರನ

ಬಕಾಸುರನನು ಕೊಂದ ಕಂಸಪ್ರೇಷಿತನ ಕೃಷ್ಣ |

ಬಕವು ವಂಕಿಸುತಿಹುದು ವಕ್ರದಿ

ಬಕವು ಕುಟಿಲದ ಗತಿಯನುಳ್ಳದು

ಬಕನ ದುಷ್ಟನ ಸಂಹರಿಸಿದನು ವಾಸುದೇವ ಹರಿ || ೪೩೪ ||

ಪ್ರಲಂಬಘ್ನನೆ ಕೃಷ್ಣದೇವನೆ

ಪ್ರಲಂಬನ ದುಷ್ಟಸುರದೈತ್ಯನ

ವಿಲಂಬಿಸದೆಲೆ ಕೊಂದ ದೇವಕಿತನಯ ಶ್ರೀಕೃಷ್ಣ |

ಪ್ರಲಂಬನು ಬಲು ದೀರ್ಘದೇಹನು

ಪ್ರಲಂಬನು ದನುಪುತ್ರ ದೈತ್ಯನು

ಪ್ರಲಂಬನು ನರವಧ್ಯ ನರರೂಪಿಂದ ಹರಿ ಕೊಂದ || ೪೩೫ ||

ದಯಾಲುವೆ ಹರಿ ಕೃಷ್ಣ ಕೇಶವ

ದಯಾನಿಧಿ ಕರುಣೆಯ ಪಯೋಧಿಯೆ

ದಯಾಯುಕ್ತನೆ ದಯವ ತೋರುವ ಸಕಲ ಸೃಷ್ಟಿಯಲಿ |

ಭಯಾಭಯಗಳನೀವ ಶ್ರೀಹರಿ

ಜಯಾಪಜಯಗಳನ್ನು ಮೀರಿಹ

ಹಯಾನನ ದ್ವೈಪಾಯನನೆ ನಾರಾಯಣನೆ ಕೃಷ್ಣ || ೪೩೬ ||

ಅಘಭಂಜನ ಹರಿಯೆ ಕೃಷ್ಣನೆ

ಭಗವಂತನೆ ಪಾಪನಾಶಕ

ನಗನಾಣ್ಯಗಳಾಚೆಗಿನ ಪರಮಾತ್ಮಸುಖರೂಪ |

ಬಗೆ ಬಗೆಯ ಲೌಕಿಕದ ಮಾಯೆಯ

ಲಗು ಬಗೆಯ ಜಂಜಡದ ಬದುಕನು

ಖಗವಾಹನನೆ ದಾಟಿಸೈ ಮುಕುತಿಯನು ಶ್ರೀಪತಿಯೆ || ೪೩೭ ||

ವ್ರಜಕ್ರೀಡನೆ ವಾಸುದೇವನೆ

ವ್ರಜವು ಮಂಡಲ ಗೋಪಿಯರ ತಾ

ವ್ರಜದಿ ರಾಸಕ್ರೀಡೆಯಾಡಿದ ಯಮುನೆಯಾ ತಟದಿ |

ವ್ರಜ ಸಮೂಹವು ಕ್ರೀಡೆಯಾಟವು

ಭಜಿಪರೊಡನಾಡುವನು ಕೃಷ್ಣನು

ವ್ರಜವು ಕೃಷ್ಣಪ್ರೇಮಿಭಕುತರ ಗುಂಪು ಪ್ರಸ್ತುತದಿ || ೪೩೮ ||

ವ್ರಜೇಶನೆ ಶ್ರೀಕೃಷ್ಣ ಮಾಧವ

ಬ್ರಜೇಶನು "ವಬಯೋರಭೇದಃ"

ವಿಭೂಷಿತ ಗೋಪಿಯರ ಮಂಡಲದಲ್ಲಿ ರಾಧೇಶ |

ವ್ರಜದ ಪತಿ ಗೋಪಿಯರ ಹರಿ ತಾ

ಸಜೆ ರಹಿತ ಸ್ವಾತಂತ್ರ್ಯವಲ್ಲಿದೆ

ಭಜಿಪರಿಗೆ ಮುಕುತಿಯಲಿ ಭಕುತಿಯಲಿಹುದು ಸ್ವಾತಂತ್ರ್ಯ || ೪೩೯ ||

ವ್ರಜಬಾಲಾಪ್ರಿಯನೆ ಕೃಷ್ಣನೆ

ವ್ರಜಮಂಡಲಬಾಲೆ ರಾಧೆಯು

ವ್ರಜದಿ ಕೃಷ್ಣನ ಪ್ರಿಯತಮೆಯು ತಾ ಪ್ರಕೃತಿಶಕ್ತಿಯಹೋ |

ವಿಜಯಸಖ ವ್ರಜಕ್ರೀಡ ಕೃಷ್ಣನೆ

ವಿಜಯಶೀಲನೆ ವಾಜಿವದನನೆ

ಭಜಿಪ ಪ್ರೇಮೀಭಕುತಜನಮಾನಸದಿ ನೆಲೆಸಿಹನೆ || ೪೪೦ ||

ಸುಹೃತ್ ಕೃಷ್ಣನೆ ನೈಜಭಕುತರ

ಸುಹೃತ್ ಸುಂದರ ಹೃದಯವಿರುವನೆ

ಸುಹೃತ್ ಸುಂದರ ಮನದ ಕೃಷ್ಣನೆ ಭಕುತಸನ್ಮಿತ್ರ |

ಸಹೃದಯನೆ ನಿಜಪ್ರೇಮಿಭಕುತರ

ಸುಹೃದಮೇಯನೆ ಸರ್ವಹೃದಯನೆ

ಸುಹೃಚ್ಛ್ರೀಕೃಷ್ಣನು ಪರಾತ್ಪರ ವಾಸುದೇವ ಹರಿ || ೪೪೧ ||

ಮಧುಪುರೇಶ್ವರಶ್ಶ್ಯಾಮೋ ಯದುಪೋ ಯಾದವಾಗ್ರಣೀಃ।

ಕಲಿಕಲ್ಮಷಹಾರೀ ಚ ರಾಮಕೃಷ್ಣಮಹಾಪ್ರಭುಃ॥೬೩॥(೪೪೭)

ಮಧುಪುರೇಶ್ವರ ಕೃಷ್ಣದೇವನೆ

ಮಧುರೆಯಲಿ ತಾನವತರಿಸಿದನೆ

ಮಧುರೆ ಪುರದಧಿಪನೆ ಮಹಾತ್ಮನೆ ಕಂಸಸಂಹಾರಿ |

ಮಧುರೆ ಪಟ್ಟಣನಾಥ ಕೃಷ್ಣನೆ

ಮಧುರೆಪುರಪಾವನನೆ ಶ್ರೀಹರಿ

ಮಧುರಹೃದಯನೆ ಮಧುರಕಾಯನೆ ಸರ್ವಮಧುರ ಹರಿ || ೪೪೨ ||

ಶ್ಯಾಮ ನೀಲದ ಮೇಘವರ್ಣನೆ

ಸೋಮಸುಂದರ ಕೃಷ್ಣವರ್ಣನೆ

ಭಾಮ ಸಹಿತದಿ ಪೊರೆಯೊ ಲೋಕದ ಸುಜನರನು ಸತತ |

ನೇಮ ನಿಷ್ಠೆಯ ಕಾಯೊ ಸಕಲರ

ಕಾಮ ದುರ್ಗುಣ ಸಾಯುವಂದದಿ

ಶ್ರೀಮಹಾಲಕುಮಿಪತಿ ರುಕ್ಮಿಣಿಯರಸ ಶ್ರೀಕೃಷ್ಣ || ೪೪೩ ||

ಯದುಪ ಯಾದವಕುಲದ ರಾಯನೆ

ಯದುಮಹಾರಾಜನ ಕುಲೋದ್ಭವ

ಯದುಕುಲಕೆ ಮುಕುಟಮಣಿ ಕೃಷ್ಣನು ದೇವ ಪರಬೊಮ್ಮ |

ಮುದುಕಯುವಕರ ಬಾಲಶಿಶುಗಳ 

ಹದಿಹರೆಯ ಸ್ತ್ರೀಪುರುಷರಖಿಲರ

ಪದುಮನಾಭನು ಪೂಜ್ಯ ಬಂಧು ಸದಾತ್ಮಕನೆ ಕೃಷ್ಣ || ೪೪೪ ||

ಯಾದವಾಗ್ರಣಿ ವಾಸುದೇವನೆ

ಸಾದರದಿ ಭಕುತರನು ಕಾವನೆ

ಮೋದಬೋಧಪ್ರದನೆ ಮಾಧವ ರಕ್ಷಿಸನವರತ |

ಯದುಕುಲಜರಲಿ ಶ್ರೇಷ್ಠರತ್ನವೆ

ಪದವಿ ಬಯಸದ ಪದುಮಪಾದನೆ

ಸದಯಹೃದಯನೆ ಮುದದಿ ಭಜಿಸುವೆ ಕೃಷ್ಣ ತವ ಚರಣ || ೪೪೫ ||

ಕಲಿಕಲ್ಮಷಹಾರಿ ಕೃಷ್ಣನೆ

ಕಲಿಯುಗದಿ ತವ ನಾಮವಘಹರ

ಕಲಿಮಲವ ಕಳೆಯುವುದು ಸಂತತ ನಾಮಕೀರ್ತನೆಯು |

ಕುಲದ ಜಾತಿಯ ಮತದ ಧರ್ಮದ

ಮಲವ ಕಳೆಯುವ ಕಾಮಧೇನುವು

ಕಲುಷಹರ ಕಲಿಯುಗದ ಕಲ್ಪಲತೇಶ ಶ್ರೀಕೃಷ್ಣ || ೪೪೬ ||

ರಾಮಕೃಷ್ಣಮಹಾಪ್ರಭುವೆ ಹರಿ

ಕಾಮಪಿತ ರಾಮಾವತಾರಿಯೆ

ಕಾಮಹರಸಖ ಕೃಷ್ಣ ಲೋಕೈಕೇಶ್ವರನೆ ಪ್ರಭುವೆ |

ರಾಮಕೃಷ್ಣನೆ ಪರಮಹಂಸನೆ

ಸೋಮವದನನೆ ಸಾಮಪ್ರೀಯನೆ

ನಾಮಕೀರ್ತನಪ್ರಿಯನೆ ಕಲಿಮಲಹರನೆ ಪರಮಾತ್ಮ || ೪೪೭ ||

ಗೋಪತಿಶ್ಚ ರಮಾನಾಥಃ ಕ್ಷೀರಸಾಗರಸನ್ನಿಧಿಃ।

ವೃಷಾಕಪಿರ್ದೇವಪೂಜ್ಯಃ ಕಲಾನನ್ತಃ ಪ್ರತಾಪವಾನ್॥೬೪॥(೪೫೪)

ಗೋಪತಿಯೆ ಭೂಪತಿಯೆ ಕೃಷ್ಣನೆ

ಗೋಪತಿಯು ಕರಣೇಶ ಕಿರಣಪ

ಗೋಪ ವಾಕ್ಪತಿ ಧೇನುಪತಿ ಗೋವಿಂದ ಗೋಪಾಲ |

ಗೋಪ ಜ್ಞಾನದ ಪತಿಯು ಶರಪತಿ

ಗೋಪ ಜಲಪತಿ ಸ್ವರ್ಪತಿಯ ಪತಿ

ಗೋಪ ಪಶುಪತಿಪತಿಯು ದಿಕ್ಪತಿ ನೇತ್ರಪತಿ ಕೃಷ್ಣ || ೪೪೮ ||

ರಮಾನಾಥನೆ ಲಕುಮಿವಲ್ಲಭ

ರಮಯತಿ ಪ್ರಸನ್ನವದನೆಯು

ರಮಿಸುವಳು ವಿಷ್ಣುವನು ಕ್ಷೀರಾಬ್ಧಿಯೊಳು ಸೇವಿಪಳು |

ರಮಾದೇವಿಯ ರಮಣ ವಿಷ್ಣುವು

ರಮಾವಲ್ಲಭ ರುಕ್ಮಿಣೀಶನು

ರಮಿಸುವನು ರಮೆಯೊಡನೆ ಲೋಕದಿ ಸುಖವ ತೋರುವನು || ೪೪೯ ||

ಕ್ಷೀರಸಾಗರಸಂನಿಧಿಯೆ ಹರಿ

ಕ್ಷೀರಸಾಗರ ಪಾಲ್ಗಡಲು ತಾ 

ವಾರಿಧಿಯು ಹರಿಸಂನಿಧಾನವು ಶೇಷಪರ್ಯಂಕ |

ನೀರಜಾಕ್ಷಿಯ ಸೇವೆ ಪಡೆಯುತ 

ಮೂರು ಲೋಕವ ಪಾಲಿಸುವ ಹರಿ 

ಕೋರಿದವರಿಗೆ ಸಲಿಸುವನು ಕೋರಿಕೆಗಳನು ಕೃಷ್ಣ || ೪೫೦ ||

ವೃಷಾಕಪಿ ಹರಿ ವಾಸುದೇವನೆ

ವೃಷವು ಧರ್ಮವು ವೃಷಭರೂಪವು

ವೃಷಾಕಪಿ ಧರ್ಮವನು ರಕ್ಷಿಸುವಂಥ ಶ್ರೀಕೃಷ್ಣ |

ವೃಷಾಕಪಿ ಹರರೂಪಿ ಕೃಷ್ಣನು

ವೃಷಭವಾಹನ ಧರ್ಮಪಾಲಕ

ವೃಷದ ರೂಪದಿ ವರ್ಷಿಸುವ ಧರ್ಮವನು ಲೋಕದಲಿ || ೪೫೧ ||

ದೇವಪೂಜ್ಯನೆ ದೇವದೇವನೆ

ದೇವದೇವತೆಗಳ ನಿಯಾಮಕ

ದೇವತಾತ್ಮನು ಜೀವರಾತ್ಮನು ಸಕಲ ಲೋಕಾತ್ಮಾ |

ಸಾವ ಮೀರಿದ ಶಕ್ತಿ ಧರ್ಮದ

ಭಾವಕೊಲಿಯುವ ಶುದ್ಧಸತ್ತ್ವನೆ

ಜೀವಭಾವವ ಕಳೆದು ಬ್ರಹ್ಮಾತ್ಮವಗತಿಯ ನೀಡು || ೪೫೨ ||

ಕಲಾನಂತನೆ ದೇವ ಕೃಷ್ಣನೆ

ಕಲೆಗಳಗಣಿತ ನಿನಗೆ ಬೊಮ್ಮನೆ

ಕಲಾನಿಧಿ ನಿಷ್ಕಲನು ಸಕಲನು ಸಗುಣನಿರ್ಗುಣನು |

ಕಲಾವಿದ ಕಲೆಗಳಿಗೆ ಕಾರಣ

ಮಲಾಪಹ ಕಲಿಯುಗದಿ ಪಾಪದ

ಸಲಹು ಸುಜನರ ಜಗದಿ ಭಕ್ತಿಜ್ಞಾನಧರ್ಮಗಳ || ೪೫೩ ||

ಪ್ರತಾಪವಾನ್ ಹರಿ ಕೃಷ್ಣ ಜಗದಲಿ

ಪ್ರತಾಪಗಳಿಗೆ ಮೂಲಕಾರಣ

ಪ್ರಕೃಷ್ಟದಿ ಶತ್ರುಗಳಿಗಿವ ತಾಪವನು ನೀಡುವನು |

ಪ್ರತಾಪವು ಹರಿ ನಿನ್ನದೇ ನಿಜ

ಕುತಾಪವು ಬರಿ ನನ್ನದೇ ದಿಟ

ಸುತಾಪದಿ ಲೋಕವನು ರವಿಯಂತವನ ಮಾಡುತಿಹೆ || ೪೫೪ ||

ಪ್ರಜಾಪತಿಪತಿಶ್ಶೌರಿಸ್ಸಹಸ್ರವದನಃ ಕ್ರತುಃ।

ದೇಹೀ ಧೇನುಪತಿರ್ದಾತಾ ದೇವಾಂಶಯಾದವಾವೃತಃ॥೬೫॥(೪೬೨)

ಪ್ರಜಾಪತಿಪತಿ ವಾಸುದೇವನೆ

ಪ್ರಜಾಪತಿ ವಿಧಿ ವಿಧಿಪತಿಯು ಹರಿ

ಪ್ರಜೆಗಳಧಿಪತಿಜನಕ ನಾರಾಯಣನೆ ಶ್ರೀಕೃಷ್ಣ |

ಪ್ರಜಾಪತಿ ಸೃಷ್ಟಿಯನು ಗೈವನು

ಪ್ರಜಾಸಂಪದವಾತನಿಂದಲೆ

ಪ್ರಜಾಪತಿಗಳ ಪಿತನು ಪರಮಾತ್ಮನು ಪರಬ್ರಹ್ಮ || ೪೫೫ ||

ಶೌರಿ ಶೂರನ ವಂಶಜನೆ ಹರಿ

ಶೌರಿ ಶೌರ್ಯಪ್ರತಾಪಶಾಲಿಯೆ

ಹರಿಯೆ ಕೃಷ್ಣನೆ ವಾಸುದೇವನೆ ದೇವಕೀತನಯ |

ಕ್ರೂರಿ ಕಂಸನ ಸಂಹರಿಸಿದನೆ

ಭಾರಿ ದೈತ್ಯರು ಶೈಶವದಿ ಹತ

ತೋರಿಕೊಡೊ ಬ್ರಹ್ಮಾತ್ಮಜ್ಞಾನವ ಸಚ್ಚಿದಾನಂದ || ೪೫೬ ||

ಸಹಸ್ರವದನನೆ ವಿರಾಜಿಪ

ಸಹಸ್ರವು ಸಾಸಿರವನಂತವು

ಸಹಸ್ರವು ಮುಖವನಂತವು ಜಗದೊಳಗಿರುವ ಸಕಲ |

ಮಹತ್ತಮದ ವಿರಾಡ್ರೂಪನೆ

ಬಹುವಿಧದ ವದನಗಳು ನಿನ್ನವೆ

ಸಹಕರಿಸು ಮುಕುತಿಯನು ತಿಳಿಯಲು ಲೋಕದಾದಿಗುರೋ || ೪೫೭ ||

ಕ್ರತುವೆ ಯಜ್ಞವೆ ವಾಸುದೇವನೆ

ಕ್ರತುವೆ ಸಪ್ತರ್ಷಿಗಳಲೋರ್ವನೆ

ಕ್ರತುವೆ ಕರ್ದಮಪುತ್ರಿಕ್ರಿಯೆವಲ್ಲಭನೆ ಪರಮಾತ್ಮ |

ಕ್ರತುವೆ ಪಿತ ನೀ ವಾಲಖಿಲ್ಯರ

ಕ್ರತುವೆ ಯಾಗವು ಕಾಲಕಾಲಕೆ

ಕ್ರತುವೆ ತ್ಯಾಗವು ಸೇವೆ ಸಹಕಾರಗಳು ನಮ್ಮೊಳಗೆ || ೪೫೮ ||

ದೇಹೀ ದೇಹವ ಧರಿಸಿ ತೋರ್ವನೆ

ದೇಹೀ ದೇಹಾಕೃತಿಯ ಜೀವನೆ

ದೇಹೀ ದೇಹದೊ-ಳಗಿರುವಾತ್ಮನೆ ಸರ್ವರಾತ್ಮ ಹರಿ |

ದೇಹ ನಿನ್ನದು ದೇಹಿ ನೀನೆಯು

ದೇಹ ದೇಹಿಗಳೆರಡು ನೀನೆಯು

ದೇಹದೊಳಹೊರಗಿರುವ ತತ್ತ್ವವೆ ನೀನು ಶ್ರೀಕೃಷ್ಣ || ೪೫೯ ||

ಧೇನುಪತಿ ನೀ ಹರಿಯೆ ಕೃಷ್ಣನೆ

ಧೇನು ಗೋವುಗಳೊಡೆಯ ಶೌರಿಯೆ

ಸಾನುರಾಗದಿ ಕಾದೆ ಗೋವ್ಗಳ ಗೋಪ ಗೋಪಿಯರ |

ಭಾನುಮಂಡಲದೊಳಗಿರುವ ಹರಿ

ನಾನು ನನ್ನವರೆಂಬುದನು ತೊಡೆ

ಧೇನುಮಂಡಲಮಧ್ಯಗನೆ ಶ್ರೀಕೃಷ್ಣ ಗೋಪಾಲ || ೪೬೦ ||

ದಾತಾ ದಾನಶೀಲ ಕೃಷ್ಣನೆ

ದಾತ ನೀ ಸರ್ವಕ್ಕು ಶ್ರೀಹರಿ

ಸೂತ್ರಧಾರಿಯು, ನಾವು ಸಕಲರು ಪಾತ್ರಧಾರಿಗಳು |

ಪಾತಕವ ಕಳೆ ಬಾಲಕೃಷ್ಣನೆ

ಹೇತು ನೀನಖಿಲಾಂಡಕೋಟಿಗೆ

ಮಾತು ನಿನ್ನದು ಪಾತು ಮಾಂ ಸರ್ವದನೆ ಶ್ರೀಕೃಷ್ಣ || ೪೬೧ ||

ದೇವಾಂಶಯಾ-ದವಾವೃತನೆ ಹರಿ

ದೇವತೆಗಳಂಶಾಂಶ ಯಾದವ

ನಿವಹದಿಂದೊಡಗೂಡಿರುವ ಯದುವರನೆ ಶ್ರೀಕೃಷ್ಣ |

ದೇವಕಾರ್ಯಕೆ ಧರ್ಮಕಾರ್ಯಕೆ

ಭಾವಕೊಲಿಯುವ ದೇವ ಬಂದಿಹ

ಸಾವ ಕಳೆದಮೃತತ್ತ್ವದರಿವನ್ನೀವ ಕೇಶವನೆ || ೪೬೨ ||

ವೈಶ್ಯೋರುಶ್ಶೂದ್ರಪಾದಶ್ಚ ಮಥುರಾಪುರಪಾಲಕಃ।

ಚನ್ದ್ರಮನಾ ಅರ್ಕಚಕ್ಷುರಗ್ನೀನ್ದ್ರಾನನಯಜ್ಞಪಃ ॥೬೬॥(೪೬೯)

ವೈಶ್ಯೋರುವೆ ತೊಡೆಯೆ ವೈಶ್ಯನು

ವೈಶ್ಯವರ್ಣವು ದೇವನೂರದು

ಕಶ್ಯಪಾದಿಗಳಿಂದ ಸೃಷ್ಟಿಯು ಬೊಮ್ಮ ಚೈತನ್ಯ |

ವೈಶ್ಯ ಕೃಷಿ ಗೋರಕ್ಷೆ ವಣಿಜನು

ವೈಶ್ಯಧರ್ಮವದೊಂದು ಪಾದವು

ವೈಶ್ಯಶೂದ್ರಕ್ಷಾತ್ರಬ್ರಾಹ್ಮಗಳೆಂಬ ನಾಲ್ಕರಲಿ || ೪೬೩ ||

ಶೂದ್ರಪಾದನೆ ಕೃಷ್ಣದೇವನೆ

ಶೂದ್ರವರ್ಣವು ನಿನ್ನ ಚರಣವು

ಶೂದ್ರ ಶೋಕಾಕುಲನು ನಿತ್ಯವು ಕಷ್ಟನಷ್ಟದಲಿ |

ಶೂದ್ರ ಪರಿಚರ್ಯಾತ್ಮಕರ್ಮನು

ಶೂದ್ರನಜ್ಞಾನದಲಿ ಬೇವನು

ಶೂದ್ರಪಾದನು ದೇವ ಸಕಲರು ಪೂಜಿಸುವ ಪಾದ || ೪೬೪ ||

ಮಥುರಾಪುರಪಾಲಕನೆ ಹರಿ

ಮಥುರೆ ನಗರವ ಪಾಲಿಸುವ ಹರಿ

ಮಥುರೆಯಲಿ ಪುಟ್ಟಿದನು ದುಷ್ಟರಸರನು ತರಿದ ಹರಿ |

ಮಥುರನಾಥನನುಗ್ರಸೇನನ

ಸುತನು ಕಂಸನು ಪಿತನ ಬಂಧಿಸಿ

ಪಥವ ಬದಲಿಸಲಾಗ ದುಷ್ಟನ ಮಥಿಸಿದನು ಕೃಷ್ಣ || ೪೬೫ ||

ಚಂದ್ರಮನ ಹರಿ ಕೃಷ್ಣದೇವನೆ

ಚಂದ್ರನೀತನ ಮನವು ಚಂದವು

ಚಂದದಿಂದಲಿ ಲೋಕಕಾಹ್ಲಾದವನು ಕರುಣಿಪನು |

ಮಂದಹಸಿತನು ಸುಂದರಾಂಗನು

ಚಂದ್ರಶೇಖರಸಖನು ಕೃಷ್ಣನು

ಚಂದ್ರರೂಪದಿ ಜೀವಮನಕಾಹ್ಲಾದ ನೀಡುತಿಹ || ೪೬೬ ||

ಅರ್ಕಚಕ್ಷುವೆ ವಾಸುದೇವನೆ-

-ಯರ್ಕ ಸೂರ್ಯನೆ ಕೃಷ್ಣನೇತ್ರವು

ಕರ್ಕ ಮಕರದಿ ದಕ್ಷಿಣೋತ್ತರ ಪಥದಿ ಸಂಚರಿಪ |

ಅರ್ಕನರ್ಚ್ಯನು ಲೋಕಪೂಜ್ಯನು

ಶರ್ಕರದ ತೆರ ಜೀವಜೀವನು-

-ವರ್ಕನೆಕ್ಕಪ್ರಿಯನು ರವಿರೂಪಿನಲಿ ಸಾಕ್ಷಿ ಹರಿ || ೪೬೭ ||

ಅಗ್ನೀಂದ್ರಾನನ ದೇವ ಕೃಷ್ಣನೆ-

-ಯಗ್ನಿಯಿಂದ್ರರೆ ಬಾಯಿ ಮುಖ ತವ

ಭಗ್ನವಾಗದ ಯಜ್ಞದಗ್ನಿಯ ತನುವಿನಿಂ ತಿಂಬ |

ಅಗ್ನಿಯಧಿಪತಿ ಶಕ್ರ ಸುರಪತಿ

ವಿಘ್ನಹರ ತೇಜಸ್ವಿ ಲೋಕಪ

ಮಗ್ನವಾಗಿಹ ಸೃಷ್ಟಿರಕ್ಷೆಲಿ ಸುರಪರೂಪಿನಲಿ || ೪೬೮ ||

ಯಜ್ಞಪನೆ ಶ್ರೀಕೃಷ್ಣ ದೇವನೆ

ಯಜ್ಞ ಯಾಗ ಕ್ರತುಗಳಧಿಪತಿ

ಯಜ್ಞರೂಪನೆ ಯಜ್ಞಪಾಲಕ ಯಜ್ಞಫಲದಾತ |

ಯಜ್ಞ ವಿಷ್ಣುವು ಯಜನ ವಿಷ್ಣುವು

ಯಜ್ಞ ಯಾಜನ ದೇವ ನೀ ಹರಿ

ಯಜ್ಞಪತಿ ಪಿತ ಯಾಜಕನೆ ಪರಬೊಮ್ಮ ಸರ್ವಾತ್ಮನ್ || ೪೬೯ ||

ಪವನಮೂಲಸಪ್ರಾಣೋಽನ್ತರಿಕ್ಷನಾಭಿಮಣ್ಡಲಃ।

ಶೀರ್ಷಜಾತದ್ಯುಲೋಕಶ್ಚ ಭೂಮಿಪಾಚ್ಛ್ರೋತ್ರದಿಕ್ತನುಃ॥೬೭॥(೪೭೪)

ಪವನಮೂಲಸಪ್ರಾಣನೆ

ಪವನ ಪ್ರಾಣವಾಯುಮೂಲನೆ

ಪವನ ಪುನಾತಿ ಪಾವನಕು ಪಾವನನು ಮೂಲನಿಲ |

ಪವನರೂಪನೆ ಪ್ರಾಣರೂಪನೆ

ಭವನ ರೂಪನೆ ಭಾವರೂಪನೆ

ಜವನ ರೂಪನೆ ಜಾವರೂಪನೆ ಸಕಲ ಶ್ರೀಕೃಷ್ಣ || ೪೭೦ ||

ಅಂತರಿಕ್ಷ-ನಾಭಿಮಂಡಲ-

-ವಂತರಿಕ್ಷವು ಹರಿಯ ನಾಭಿಯು

ಸಂತರರಿತಿಹರಿದನು ನಭವಿಡಿ ಕೃಷ್ಣನಾಭಿಯದು |

ಹಂತಕರ ಸದೆಬಡಿಯಲೋಸುಗ

ಹೊಂತಕಾರಿಯ ತೆರದಿ ಬಂದಿಹ-

-ನಂತಕಾಂತಕನಂತಮಹಿಮನು ತಾನು ಶ್ರೀಕೃಷ್ಣ || ೪೭೧ ||

ಶೀರ್ಷಜಾತದ್ಯುಲೋಕನು ಹರಿ

ಶೀರ್ಷ ಶಿರದಿಂ ದೇವಲೋಕವು

ಶೀರ್ಷ ಹರಿ ತಲೆಯಿಂದ ಬಂತೈ ಪುಣ್ಯ ಸ್ವರ್ಲೋಕ |

ಹರ್ಷಕಾರಕ ಹರ್ಷರೂಪಿನ

ಹರ್ಷಮಯ ಸುರಲೋಕವುದಿಸಿತು

ಕರ್ಷಣಾತ್ಮಕ ಕೃಷ್ಣಶಿರದಿಂ ನಮಿಪೆನನವರತ || ೪೭೨ ||

ಭೂಮಿಪಾತ್ ಪೃಥ್ವಿಯೇ ಪಾದವು

ಭೂಮಿ ಶ್ರೀಕೃಷ್ಣನಿಗೆ ಚರಣವು

ಭೂಮಿರೂಪದಿ ನಮಗೆ ಹರಿಪಾದಗಳ ದರ್ಶನವು |

ಕಾಮಿತಾರ್ಥವನೀವ ಕೃಷ್ಣನು

ಭೂಮಿಹಿತ ಕಾಯ್ವವರ ಕಾಯ್ವನು

ಭೂಮಿಪತಿ ಶ್ರೀಪತಿಯು ಲಕ್ಷ್ಮೀವರನು ಶ್ರೀಹರಿಯು || ೪೭೩ ||

ಶ್ರೋತ್ರದಿಕ್ತನು ವಾಸುದೇವನೆ

ಶ್ರೋತ್ರ ಕಿವಿಗಳೆ ದಿಕ್ಕುಗಳು ದಶ

ಸೂತ್ರಧಾರನ ದೇವ ಕೃಷ್ಣನ ಕಿವಿಗಳೇ ದಿಕ್ಕು |

ಪಾತ್ರಧಾರಿಗಳಿವರು ಜೀವರು

ಶಾಸ್ತ್ರವೇದ್ಯನು ಸರ್ವರೊಳಗಿಹ

ಸ್ತೋತ್ರಯೋಗ್ಯನು ನಮ್ಮ ಮೂಲಸ್ವರೂಪ ಪರಬೊಮ್ಮ || ೪೭೪ ||

ಸಾನ್ತಜೀವತ್ವಮಾಪನ್ನಾನನ್ತಪೂರುಷಭಾಸುರಃ।

ಆದ್ಯಧರ್ಮಪಿತಾ ಚೈವ ಭಾಯುತೋ ಭಾಪ್ರದಾಯಕಃ॥೬೮॥(೪೭೮)

ಸಾಂತಜೀವತ್ವಮಾಪನ್ನಾ-

-ನಂತಪೂರುಷಭಾಸುರನೆ ಹರಿ-

-ಯಂತ್ಯವಿಹ ಜೀವತ್ವ ಪಡೆದಿತ ಸ್ವಂತದಿಚ್ಛೆಯಲಿ |

ಅಂತವಿರದಿಹನಂತಪುರುಷನೆ

ಕಂತುಪಿತ ಸ್ಫಾಟಿಕನೆ ವೀರನೆ

ಸಂತಹೃದಯನೆ ಹಂತಕಾಂತಕ ದೇವ ಶ್ರೀಕೃಷ್ಣ || ೪೭೫ ||

ಆದ್ಯಧರ್ಮಪಿತಾ ಕೃಷ್ಣನೆ

-ಯಾದ್ಯ ಮೊದಲಿನ ಧರ್ಮಜನಕನು

ಪಾದ್ಯವರ್ಘ್ಯವನಿತ್ತು ಪೂಜಿಪೆ ಧರ್ಮಕಾರಣನ |

ಆದ್ಯ ಮುಖ್ಯ ಪ್ರಶಸ್ತ ಧರ್ಮವು

ವೇದ್ಯ ವೇದಾಂತದಲಿ ಜಗಪಿತ

ಸಾಧ್ಯ ಭಕ್ತಿವಿರಕ್ತಿಜ್ಞಾನದಿ ದೇವ ಶ್ರೀಕೃಷ್ಣ || ೪೭೬ ||

ಭಾಯುತನೆ ಬೆಳ-ಕು ಸಹಿತನೆ ಹರಿ

ಭಾಯುತನು ಬೋ-ಧಾತ್ಮಜ್ಯೋತಿಯು

ಕಾಯುವುದು ಭಾ-ರತರ ಸಂತತ ದೇವ ಶ್ರೀಕೃಷ್ಣ |

ಆಯುರಾರೋಗ್ಯೈಸಿರಿಯ ಬಲು-

-ಪಾಯಭಕುತಿಯ ಮುಕುತಿ ಶಕುತಿಯ

ತಾಯ ತೆರದಲಿ ಕರುಣಿಪುದು ಸುಜನರ್ಗೆ ಸಂತತವು || ೪೭೭ ||

ಭಾಪ್ರದಾಯಕ ಭಾನುರೂಪನೆ

ಭಾಪ್ರದಾನಿಪ ಜ್ಞಾನದಾತನೆ

ಭಾಪ್ರದನು ಹರಿ ನಾರಯಣ ಸುರವ್ರಾತಪೂಜ್ಯನಹೋ |

ಸಾಂಪ್ರದಾಯಿಕ ಕರ್ಮಠರ ತಾ

ಭಾಪ್ರದಾನಿಸಿ ಜ್ಞಾನವೀಯುತ

ಸುಪ್ರಸನ್ನನೆ ಕೃಷ್ಣ ಜೀವನ್ಮುಕ್ತಿ ನೀಡಯ್ಯ || ೪೭೮ ||

ಆದಿತ್ಯವರ್ಣಸಂಶೋಭ್ಯೋ ನಾನಾನಾಮಾತ್ಮಕೋ ಹರಃ।

ಧಾತಾರ್ಚಿತಾದ್ಯಪಾದಶ್ಚ ಶಕ್ರಪೂಜಿತಪಾವನಃ॥೬೯॥(೪೮೩)

ಆದಿತ್ಯವರ್ಣಸಂಶೋಭ್ಯ ಹರಿ-

-ಯಾದಿತ್ಯ ರವಿಯಂಥ ಹೊನ್ನಿನ

ಕಾದಿರುವ ಬಣ್ಣದಲಿ ಶೋಭಿಪ ದೇವ ಶ್ರೀಕೃಷ್ಣ |

ಮಾಧವನೆ ಪೀತಾಂಬರನೆ ಹರಿ

ಪಾದಕೊಂದಿಪೆ ದೇವ ಬೊಮ್ಮನೆ

ಸಾಧಕರಿಗೀಯಯ್ಯ ಜೀವನ್ಮುಕ್ತಿಜ್ಞಾನವನು || ೪೭೯ ||

ನಾನಾನಾಮಾತ್ಮಕನೆ ಕೃಷ್ಣನೆ

ನಾನಾ ವಿಧದ ಹೆಸರಿರುವವನೆ

ಶ್ರೀನಾರಾಯಣನೆ ಕೇಶವ ವಾಸುದೇವ ಹರಿ |

ಶ್ರೀನಾಥನೆ ಪರಬ್ರಹ್ಮನೆ

ನಾನಾವತಾರಧಾರಿ ದೇವನೆ

ಮಾನ ಕಾಯೈ ಸುಜನ ಭಕುತರ ಜ್ಞಾನ ನೀಡಯ್ಯ || ೪೮೦ ||

ಹರನೆ ಶಂಕರರೂಪಿ ಕೃಷ್ಣನೆ

ಪರನೆ ರುದ್ರಸ್ವರೂಪಿ ಶ್ರೀಹರಿ

ಗುರುವೆ ದಕ್ಷಿಣಾಮೂರ್ತಿ ಪರಮೇಶ್ವರನೆ ಪರಬೊಮ್ಮ |

ಪರಶಿವನೆ ಪರಮಾತ್ಮ ಮಾಧವ

ಕರಿವರದ ಗೋವಿಂದ ಶ್ರೀಪತಿ

ಪರಮಮಂಗಲರೂಪ ಸರ್ವಾತ್ಮಕನೆ ನಾರಯಣ || ೪೮೧ ||

ಧಾತಾರ್ಚಿತಾದ್ಯಪಾದ ಕೃಷ್ಣನೆ

ಧಾತ ಬೊಮ್ಮನು ಪೂಜಿಸಿಹ ಪದ

ಹೇತು ಸರ್ವಕು ಪುಣ್ಯಚರಣಕೆ ಶರಣು ಶರಣೆಂಬೆ |

ಯಾತುಧಾನರ ವೈರಿ ವಿಷ್ಣುವೆ

ಪಾತು ಸಕಲರ ನಿನ್ನ ಭಕುತರ

ನೀತಿವಂತನೆ ಕಾಯೊ ಸುಜನರ ಮುಕುತಿಯೊದಗಿಸು ನೀ || ೪೮೨ ||

ಶಕ್ರಪೂಜಿತಪಾವನನೆ ಹರಿ

ಶಕ್ರ ಶತಕ್ರತು ಸುರಪಪೂಜ್ಯನೆ

ನಕ್ರಹರ ಪಾವನನೆ ಸಕಲರ ಪಾಪಹರ ಕೃಷ್ಣ |

ಶುಕ್ರಶಿಷ್ಯರ ವೈರಿ ಮಾಧವ-

-ನಕ್ರೂರಗೊಲಿದಿರುವ ಕೃಷ್ಣ ತ್ರಿ-

-ವಿಕ್ರಮನೆ ಸುರಪತಿಸುಪೂಜಿತ ಪಾದಪದ್ಮಯುತ || ೪೮೩ ||

ಯಜ್ಞಧರ್ಮಪ್ರತಿಷ್ಠಶ್ಚ ಯಜ್ಞಧರ್ಮಪ್ರವರ್ತಕಃ।

ಯಜ್ಞಧರ್ಮಸುಕೃಚ್ಚೈವ ಯಜ್ಞಾಗ್ನಿರ್ಯಜ್ಞಪೂರುಷಃ॥೭೦॥(೪೮೮)

ಯಜ್ಞಧರ್ಮಪ್ರತಿಷ್ಠನೆ ಹರಿ

ಯಜ್ಞಧರ್ಮದಿ ನೆಲೆಸಿರುವವನೆ

ಯಜ್ಞ ಸೇವಾ ಯಾಗ ಜಪ ಯೋಗಾದಿ ಸುಜ್ಞಾನ |

ಯಜ್ಞಧರ್ಮವು ತ್ಯಾಗ ಸೇವೆಯು

ಯಜ್ಞ ಜನತಾದೇವಸೇವೆಯು

ಯಜ್ಞಧರ್ಮದಿ ಸೃಷ್ಟಿ ನಿಂತಿದೆ ಯಜ್ಞಸ್ಥಿತ ಕೃಷ್ಣ || ೪೮೪ ||

ಯಜ್ಞಧರ್ಮಪ್ರವರ್ತಕನೆ ಹರಿ

ಸುಜ್ಞ ಸರ್ವಜ್ಞಾತ್ಮ ಕೃಷ್ಣನೆ

ಯಜ್ಞಧರ್ಮವ ಲೋಕದಲಿ ನಡೆಸುವನೆ ಪರಮಾತ್ಮ |

ವಿಜ್ಞರಾತ್ಮನು ಯಜ್ಞಪುರುಷನು

ಯಜ್ಞ ಚಾಗಾದಿಗಳ ಕಾರಣ-

-ನಜ್ಞರಿಗೆ ಸುಜ್ಞಾನ ಕರುಣಿಸಿ ಕಾಯೊ ಶ್ರೀಕೃಷ್ಣ ||೪೮೫ ||

ಯಜ್ಞಧರ್ಮಸುಕೃತ್ ಕೃಷ್ಣನೆ

ಯಜ್ಞಧರ್ಮವ ಚರಿಪ ವಿಹಿತದಿ

ಸುಜ್ಞಹೃದಯಗನಜ್ಞರೊಳಗಿಹ ವ್ಯಕ್ತನವ್ಯಕ್ತ |

ಅಜ್ಞಸುಜ್ಞರ ವಿಶೇಷಜ್ಞರ

ಯಜ್ಞರೂಪದಿ ನಡೆಸುವಾ ಸರ್-

-ವಜ್ಞಮೂರುತಿ ಕೃಷ್ಣ ಸಲಹೈ ನಮ್ಮನನವರತ || ೪೮೬ ||

ಯಜ್ಞಾಗ್ನಿಯೆ ವಾಸುದೇವನೆ

ಯಜ್ಞದಲಿ ಸುಡುವಂಥ ವಹ್ನಿಯೆ

ಯಜ್ಞಹವಿಯನು ಸುರರಿಗೊಯ್ಯುವ ಹವ್ಯವಾಹನನೆ |

ಯಜ್ಞದಗ್ನಿಯೆ ದೇವವದನನೆ

ಯಜ್ಞಕರ್ತರಿಗಿಷ್ಟವೀವನೆ

ಯಜ್ಞದನಲನೆ ಯಜ್ಞ ಪೂರೈಸುವ ಮಹಾಮಹಿಮ || ೪೮೭ ||

ಯಜ್ಞಪೂರುಷ ದೇವ ಕೃಷ್ಣನೆ

ಯಜ್ಞಪುರುಷನೆ ಯಜ್ಞಸ್ಥಿತ ಹರಿ

ಯಜ್ಞದೊಳಹೊರಗಿರುವ ಪರಮಾತ್ಮನೆ ಪರಬ್ರಹ್ಮ |

ಯಜ್ಞ ಸುರತರ್ಪಣವು ಸುರರಿಂ

ಯಜ್ಞದಿಂ ಮಳೆ ಬೆಳೆಯು ಲೋಕಕೆ

ಯಜ್ಞಪೂರುಷನಿಂದ ನೆಮ್ಮದಿ ಶಾಂತಿ ಸಂಪದವು || ೪೮೮ ||

ಬಹುಧಾಜಾಯಮಾನಶ್ಚಾಜಾಯಮಾನೋ ಜಗತ್ಪತಿಃ।

ಜಗದ್ಯೋನಿಶ್ಚ ಹ್ರೀಭರ್ತಾ ಶ್ರೀಭರ್ತಾ ದಿವಿಜೇಶ್ವರಃ॥೭೧॥(೪೯೫)

ಬಹುಧಾಜಾಯಮಾನನೇ ಹರಿ

ಬಹು ವಿಧಗಳವತಾರ ತಾಳುತ

ಬಹುವಿಧದಿ ಸೃಷ್ಟಿಯಲಿ ತೋರುತ ಜನಿಸುವನು ಕೃಷ್ಣ |

ಬಹುವದೇಕ ಬ್ರಹ್ಮತತ್ತ್ವವು

ಬಹು ತೆರದಿ ತೋರುವುದು ಮಿಥ್ಯೆಯು

ಬಹುವಿಧದ ಪೆಸರಿಂದ ರೂಪಗಳಿಂದ ತೋರ್ವ ಹರಿ || ೪೮೯ ||

ಅಜಾ-ಯಮಾನ ಶ್ರೀಕೃಷ್ಣನೀ-

-ನಜನು ಜನಿಸದ ಬೊಮ್ಮ ತತ್ತ್ವವು

ಪ್ರಜೆಯ ತೆರದಲಿ ಹುಸಿಯ ತೋರಿಕೆ ನೀನ-ಜರಮರಣ |

ಅಜೇಯನು ನೀ ಸದಾ ವಿಜಯಿಯು

ಪ್ರಜಾರಂಜಕ ಜನುಮರಹಿತನು

ಜನಿಸಿದಂತೆಯೆ ತೋರುತಿರುವವ ಶುದ್ಧ ಪರಬೊಮ್ಮ || ೪೯೦ ||

ಜಗತ್ಪತಿ ಶ್ರೀಕೃಷ್ಣದೇವನೆ

ಜಗದ ನಾಯಕನೊಡೆಯನಧಿಪತಿ

ಭಗವದವತಾರವದು ಪೂರ್ಣವು ಕೃಷ್ಣರೂಪವದು |

ಜಗದ ಪತಿ ಜಗನ್ನಾಥ ಕೇಶವ

ಜಗದೊಡೆಯ ಪರಬೊಮ್ಮನೀಶ್ವರ

ಮಗುವುತನದಲೆ ಲೀಲೆ ತೋರಿದನೀ ಮಹಾಮಹಿಮ || ೪೯೧ ||

ಜಗದ್ಯೋನಿಯೆ ವಾಸುದೇವನೆ

ಜಗದ ಮೂಲನೆ ಕಾರಣನೆ ಹರಿ

ಜಗದ ರೂಪದಿ ತೋರಿಕೊಂಡ ಪರಾತ್ಪರಾತ್ಮ ನಮೋ |

ಖಗವೆ ವಾಹನ ಮಗನು ಮನ್ಮಥ

ಸಿಗದು ತವ ಕೃಪೆ ಕಪಟಿಮಂದಿಗೆ

ಮುಗುಧ ಭಕುತಿಗೆ ಶುದ್ಧಜ್ಞಾನಕೆ ವಶನು ಶ್ರೀಕೃಷ್ಣ || ೪೯೨ ||

ಹ್ರೀಭರ್ತಾ ಲ-ಜ್ಜೆಯಧಿಪತಿ ಹರಿ

ಶೋಭನಾಂಗಿಯು ಲಜ್ಜಾದೇವಿಯು

ನೀ ಭಕುತವರದಾತ್ಮ ಹ್ರೀಪತಿ ಶ್ರೀಪತಿಯೆ ಪುರುಷ |

ನಾಭಿ ಗಗನವು ಪಾದ ಭೂಮಿಯು

ಹೇ ಭಿಷಗ್ವರ ಭವದ ರೋಗಕೆ

ಸಾಭಿಲಾಷರಿಗಿಷ್ಟದನು ನಿಷ್ಕಾಮರಿಗೆ ಮುಕುತಿ || ೪೯೩ ||

ಶ್ರೀಭರ್ತಾ ಸಿರಿವಲ್ಲಭನೆ ಹರಿ

ಶ್ರೀಭಗವತಿಯು ಲಕುಮಿದೇವಿಯು

ತಾ ಭಕುತೆಯನು ವರುಣಸುತೆಯನು ವರಿಸಿದನು ವಿಷ್ಣು |

ಶೋಭಿಸುವ ಸಿರಿಗೊಡತಿ ಮಾಧವಿ

ನೀ ಭಕುತರನು ಪೊರೆವ ಶ್ರೀಪತಿ

ಲಾಭಕಾರಣೆರಮಣ ನಾರಾಯಣನೆ ಶ್ರೀಕೃಷ್ಣ || ೪೯೪ ||

ದಿವಿಜೇಶ್ವರನೆ ವಾಸುದೇವನೆ

ದಿವಿಜರಧಿಪತಿ ನೀನೆ ಸುರಪತಿ

ದಿವಿಯು ಸ್ವರ್ಗವು ದಿವಿಜರಮರರು ಪುಣ್ಯಜೀವಿಗಳು |

ದಿವಿಜ ದಿವಿಯಲಿ ಜನಿಸಿದವ ಸುರ

ಭುವಿಯ ಸಕಲವ ಕಾವರಮರರು

ದಿವಿಜರೊಡೆಯನ ನಾಥ ಲಕ್ಷ್ಮೀನಾಥ ಶ್ರೀಹರಿಯು || ೪೯೫ ||

ಪವಿತ್ರಃ ಪಾಪಹಾರೀ ಚ ಫಲೀ ಪದ್ಮಮುಖಃ ಪುರಮ್।

ಅಮೃತವಾಗಮೃತವಪುರಮೃತಾತ್ಮಕರೂಪದಃ॥೭೨॥(೫೦೩)

ಪವಿತ್ರನೆ ಶ್ರೀಕೃಷ್ಣ ದೇವನೆ

ಪವನ ಪಾವನ ಪೂಯಮಾನನು

ಪವಿತ್ರಿತಗೊಳಿಸುವನು ಸಕಲರ ಭಕ್ತ ಸುಜನರನು |

ಪವಿ ಪುನಾತಿಯು ಪಾವಕನು ತಾ

ಪವಿಯ ತ್ರಾಣನು ರಕ್ಷಕನು ಹರಿ

ಪವಿತ್ರನು ಶುಚಿ ಶುದ್ಧ ಪುಣ್ಯನು ದೇವ ಪರಬೊಮ್ಮ || ೪೯೬ ||

ಪಾಪಹಾರೀ ಪಾಪನಾಶಕ

ಪಾಪಗಳನಪಹರಿಸು ಶ್ರೀಹರಿ

ಪಾಪತಾಪಹರ ಪ್ರತಾಪವು ನಿನ್ನಲಿಹುದಯ್ಯ |

ಕೋಪ ಬಿಡು ಬಡಪಾಯಿಯಲಿ ನೀ

ಶಾಪ ತಡೆ ನಿಜಭಕುತರಲಿ ಹರಿ

ಹೇ ಪರಾತ್ಮನೆ ವಾಸುದೇವನೆ ದುರಿತಹರ ಹರಿಯೆ || ೪೯೭ ||

ಫಲೀ ಫಲವುಳ್ಳವನೆ ಕೃಷ್ಣನು

ಫಲಸ್ವರೂಪಿಯು ಫಲಪ್ರದಾತೃವು

ಫಲದ ನಿಧಿ ಕರ್ಮಗಳ ಸಕಲರ ಸರ್ವಕಾಲದಲಿ |

ಪಾಲಿಸುವ ಪರಮೇಶ ಫಲದನು

ಕಾಲ ಕಾಲಕೆ ಫಲವನೀವನು

ಕಾಲನಿರ್ಣಯಿಸುವನು ಪುಣ್ಯಕು ಪಾಪಫಲಗಳಿಗೂ || ೪೯೮ ||

ಪದ್ಮಮುಖ ಶ್ರೀಕೃಷ್ಣದೇವನೆ

ಪದ್ಮ ತಾವರೆಯಂತೆ ಸುಂದರ

ಪದ್ಮವದನನೆ ಸದ್ಮ ವೈಕುಂಠದಲಿ ಶ್ರೀಹರಿಯೆ |

ಛದ್ಮವೇಷದಿ ಸೃಷ್ಟಿ ತೋರ್ವನೆ

ಪದ್ಮಸುಂದರ ಜಲಪ್ರಫುಲ್ಲಿತ

ಸದ್ಮ ನಿನ್ನದು ನಾವು ನಿನ್ನವರೆಂಬುದನು ತಿಳುಹು || ೪೯೯ ||

ಪುರವೆ ದೇಹವೆ ಕೃಷ್ಣದೇವನು

ಪುರವು ಪ್ರೀತಿಗೆ ಯೋಗ್ಯವಹುದಿದು

ಪುರವು ತುಂಬಿರುವುದಿದು ಪುರುಷೋತ್ತಮನ ತತ್ತ್ವದಲಿ |

ಪರಮ ಪುರುಷನು ಬೊಮ್ಮನಾತ್ಮನು

ಪುರದ ಹೊರಗೊಳಗಿಹನು ಸಂತತ-

-ವಿರದ ಸ್ಥಾನವದಿಲ್ಲ ಪರಬೊಮ್ಮಾತ್ಮ ನಾವಹುದು || ೫೦೦ ||

ಅಮೃತವಾಕ್ ಶ್ರೀಕೃಷ್ಣದೇವನು

ಸ್ವಮೃತವಾಣಿಯು ಜಗದ್ಗುರುಕ್ತಿಯ-

-ದಮೃತವಚನವು ಗೀತೆಯುಪದೇಶಿಸಿದ ಕೃಷ್ಣನದು |

ಅಮೃತ ಮೃತಿಯಿರದಂಥ ಶಾಶ್ವತ-

-ವಮೃತವಮರವು ಕೃಷ್ಣಬೋಧನೆ-

-ಯಮೃತರಸಧಾರೆಯಲಿ ಮಿಂದು ಪುನೀತರಾಗೋಣ || ೫೦೧ ||

ಅಮೃತವಪು ಹರಿ ವಾಸುದೇವನೆ

ವಿಮೃತ ಮರಣಾತೀತ ದಿವ್ಯವ-

-ದಮೃತಕಾಯವು ಕೃಷ್ಣ ನಿನ್ನದು ದೈವಿಕವು ತನುವು |

ಅಮೃತ ಮೃತಿವಿರಹಿತವು ವಿಮೃತವು

ಸ್ವಮೃತ ಸುಂದರವಮೃತದೇಹವ-

-ದಮೃತತತ್ತ್ವಕೆ ನಮ್ಮನೊಯ್ಯುವ ಗುರುವೆ ಶ್ರೀಕೃಷ್ಣ || ೫೦೨ ||

ಅಮೃತಾತ್ಮಕರೂಪದನೆ ಹರಿ-

-ಯಮೃತಾತ್ಮಸ್ವರೂಪಬೋಧಕ-

-ನಮೃತಾತ್ಮಕರೂಪದರ್ಶಕ ಜಗದ್ಗುರು ಕೃಷ್ಣ |

ಅಮೃತವಾತ್ಮವು ಬ್ರಹ್ಮವದುವೇ

ವಿಮೃತತತ್ತ್ವವು ನಮ್ಮ ಮೂಲವು

ಸ್ವಮೃತರಿಹೆ ನಾವ್ ದೇಹಮನಗಳ ಮೀರಿರುವ ತತ್ತ್ವ || ೫೦೩ ||

ಸುಧಾಮ್ಬುಧಿಸ್ಸುಧೀಶಶ್ಚ ವಸುಧಾಧಿಪತಿಸ್ಸುಧೀಃ।

ಗಙ್ಗಾಚರಣಸುದ್ವನ್ದ್ವೋ ಗಣ್ಡಕೀಸ್ಥಶಿಲಾಸ್ಥಿತಃ॥೭೩॥(೫೦೯)

ಸುಧಾಂಬುಧಿಯೆ ವಾಸುದೇವನೆ

ಸುಧೆಯ ಸಾಗರನಮೃತ ತವನಿಧಿ

ವಿಧಿಯ ಜನಕನೆ ಪದುಮನಾಭನೆ ಹರಿಯೆ ಕೇಶವನೆ |

ಸುಧೆಯು ಸುಂದರತರದಿ ಧರಿಪುದು

ಸುಧೆಯದಮರತ್ವವನು ಕೊಡುವುದು

ಭೋಧವಾತ್ಮದ ಸುಧೆಯು ನಾರಾಯಣನ ಪರಬೊಮ್ಮ || ೫೦೪ ||

ಸುಧೀಶನೆ ಶ್ರೀಕೃಷ್ಣದೇವನೆ

ಸು-ಧೀಶಕ್ತಿಯ ಮೂಲಕಾರಣ

ಸುಧೀಶನು ತಾನುರುತರದ ಬುದ್ಧಿಯ ಪತೀಶ್ವರನು |

ಸುಧೀರನು ಹರಿ ಸುಧೆಯ ಪತಿ ತಾ

ವಿಧೀಶನು ಪರಬೊಮ್ಮ ಮಾಧವ

ಸದಾಶಿವಪ್ರಿಯ ದಿತಿಜವೈರಿಯೆ ಹೇ ಮಹಾವಿಷ್ಣೋ || ೫೦೫ ||

ವಸುಧಾಧಿಪತಿಯೆ ಕೃಷ್ಣನೆ

ವಸುಧೆ ಭೂಮಿಯು ಭೂಪತಿಯು ಹರಿ

ವಸುವ ಸಂಪದವನ್ನು ಧರಿಸಿಹ ಧರಣಿರಮಣ ಹರೇ |

ವಸುವು ಸಿರಿ ಸಿರಿಪತಿಯು ವಿಷ್ಣುವು

ವಸುಧೆ ಶ್ರೀಧರೆ ಪೃಥ್ವಿಪತಿ ಹರಿ-

-ಯಸುವ ಕಾಯೈ ಜ್ಞಾನಭಕುತಿವಿರಾಗ ನೀಡುತಲಿ || ೫೦೬ ||

ಸುಧೀ ಸುಂದರ ಬುದ್ಧಿಶಾಲಿಯೆ

ಸು-ಧೀ ಪಂಡಿತ ತ್ರಿಕಾಲಜ್ಞನೆ

ಸುಧೀ ಸರ್ವಜ್ಞಾತ್ಮ ಬೊಮ್ಮನೆ ದೇವ ಶ್ರೀಕೃಷ್ಣ |

ಪದಾಂಬುಜಕೆರಗುತಲಿ ಬೇಡುವೆ

ಮದಾಪಹ ಮುದದಾಯಕನೆ ಹರಿ

ಪ್ರದಾನಿಸು ಬ್ರಹ್ಮಾತ್ಮನಿಷ್ಠೆಯನವಗತಿಯ ಗತಿಯ || ೫೦೭ ||

ಗಂಗಾಚರಣಸುದ್ವಂದ್ವ ಹರಿ

ಗಂಗಾಜನಕ ಪರಮಪಾವನ

ಗಂಗೆಯುದಿಸಿತು ನಿನ್ನ ಪದದ್ವಯದಿಂದ ನಾರಯಣ |

ಭಂಗವಾಗದು ಲಿಂಗದೇಹವು

ಭಂಗವಾಗದವಿದ್ಯೆಯಿಂದಲಿ

ಗಂಗಾಪಿತನೆ ಕಳೆದವಿದ್ಯೆಯ ಮುಕುತಿ ಸದ್ಯದಲೇ || ೫೦೮ ||

ಗಂಡಕೀಸ್ಥ-ಶಿಲಾಸ್ಥಿತನೆ ಹರಿ

ಗಂಡಕೀಶಿಲೆ ಶಾಲಗ್ರಾಮವು

ಗಂಡಕೀನದಿಯಲ್ಲಿನೀ ಶಿಲೆ ನಿನ್ನ ಸಂನಿಧಿಯು |

ಗಂಡಕಿಯು ನೇಪಾಳದಲ್ಲಿದೆ

ಗಂಡಕಿಯು ವರಪಾವನಾತ್ಮಕಿ

ಚಂಡಪಾಪಹರಾತ್ಮಕವು ತವ ಶಿಲೆಯು ನದಿಯೊಳಗೆ || ೫೦೯ ||

ಶಾಲಗ್ರಾವಶಿಲಾಮೂರ್ತಿಸ್ಸಾಲಿಗ್ರಾಮಪ್ರಪೂಜಿತಃ।

ಉಡುಪೀಶಸ್ಸುಮಧ್ವೇಶೋ ಗುರುವಾತಪುರೀಶ್ವರಃ॥೭೪॥(೫೧೪)

ಶಾಲಗ್ರಾವಶಿಲಾಮೂರ್ತಿಯೆ

ಸಾಲಿಗ್ರಾಮಶಿಲೆಯೆ ಕೃಷ್ಣನು

ಮಾಲಿಕನು ಶಿಲೆಯಲ್ಲು ಮರಳಲು ಮಣ್ಣಲಿರುತಿಹನು |

ಮೂಲಬಲ ಸರ್ವರಿಗು ಲೋಕಕೆ

ಬಾಲಕೃಷ್ಣನು ಸರ್ವಪೂಜ್ಯನು

ಭಾಲಲೋಚನಪ್ರೀಯ ರಕ್ಷಿಸು ನಮ್ಮನನವರತ || ೫೧೦ ||

ಸಾಲಿಗ್ರಾಮಪ್ರಪೂಜಿತ ಹರಿ

ಸಾಲಿಗ್ರಾಮಶಿಲೆಯ ರೂಪದಿ

ಸಾಲಿಗ್ರಾಮದಿ ಕೃಷ್ಣಸಂನಿಧಿಯನ್ನು ಪೂಜಿಪರು |

ಪಾಲಿಸಲು ಚೆನ್ನಾಗಿ ಪೂಜಿತ

ಸೋಲಿಸದೆ ರಕ್ಷಿಸಲು ನಮ್ಮನು

ಗಾಳಿ ನೀರಾಹಾರ ಶುದ್ಧಿಗಳೀಯೊ ಪರಮಾತ್ಮ || ೫೧೧ ||

ಉಡುಪೀಶನೆ ಕೃಷ್ಣದೇವನೆ-

ಯುಡುಪತಿಯ ಚಂದಿರನ ತಪದಿಳೆ-

-ಯುಡುಪಿಯಾಯಿತು ಚಂದ್ರಮೌಳೀಶ್ವರನ ವರದಿಂದ |

ಉಡುಪಿಯಲಿ ಮಧ್ವರಿಂ ಸ್ಥಾಪಿತ-

-ನುಡುಪಿಯೀಶನು ಬಾಲಕೃಷ್ಣನು

ಪಡುಗಡಲ ತೀರದಲಿ ನೆಲೆಸುತ ಸಕಲರನು ಪೊರೆವ || ೫೧೨ ||

ಸುಮಧ್ವೇಶನೆ ಮಧ್ವರೊಡೆಯನೆ

ಸುಮನಸರ ಕಾಯುವನೆ ಕೃಷ್ಣನೆ-

-ಯಮಲಗುಣಧಾಮನೆ ಪರಾತ್ಪರ ರುಕ್ಮಿಣೀರಮಣ |

ಅಮಿತ ಖ್ಯಾತಿ ಪೂರ್ಣಪ್ರಜ್ಞರು

ಸುಮನದಿಂ ಜನರುನ್ನತಿಗೆ ದ್ವೈತವ

ವಿಮಲ ಭಕುತಿಯ ತಿಳುಹಿದರು ಮಧ್ವೇಶ ವಿಠ್ಠಲನ || ೫೧೩ ||

ಗುರುವಾತಪುರೀಶ್ವರನೆ ಹರಿ

ಗುರುವಾಯುಪುರದಲ್ಲಿ ನೆಲೆಸಿಹ

ಗುರು ಬೃಹಸ್ಪತಿದೇವ ಕೃಷ್ಣನ ಸಂನಿಧಿಯ ಕ್ಷೇತ್ರ |

ಗುರುವು ಲೋಕಕೆ ಗೀತೆ ಪೇಳಿದ

ಗುರುವು ಸುರರಿಗೆ ತಾ ಬೃಹಸ್ಪತಿ

ಗುರು-ವಾಯುಗಳ ಪುರದಿ ಸ್ಥಾಪಿತ ದೇವ ಶ್ರೀಕೃಷ್ಣ || ೫೧೪ ||

ಪೆರುವಾಯಿಪುರಸ್ಥಸ್ಸನ್ತಾನಗೋಪಾಲನಾಮಕಃ।

ಬನಾರಿಪುರವಾಸೀ ಚ ಗೋಪಾಲಕೃಷ್ಣನಾಮಕಃ॥೭೫॥(೫೧೮)

ಪೆರುವಾಯಿಪುರಸ್ಥನೆ ಹರಿ

ಗುರುವೆ ಮೂರ್ಲೋಕಕ್ಕೆ ಕೃಷ್ಣನೆ-

-ಯಿರುವೆ ಗೋಪಾಲಸ್ವರೂಪದಿ ನೀಡಿ ಸಂತಾನ |

ಕರುವ ತೆರದಲಿ ಕಾದೆಯಡಿವಾಯ್-

-ಲಿರುವ ಹವ್ಯಕ ಮನೆತನವ ನೀ

ಬರುವ ತೊಂದರೆ ನೀಗಿ ಸಂತತಿಯಿತ್ತು ಕರುಣಿಸಿದೆ || ೫೧೫ ||

ಸಂತಾನಗೋಪಾ-ಲನಾಮಕ ಹರಿ

ಚಿಂತೆ ಕಳೆದಡ್ವಾಯಿವಿಪ್ರರ

ಸಂತತಿಯ ನೀನಿತ್ತು ರಕ್ಷಿಸಿದ್ಯಲ್ಲೊ ಹೇ ಕೃಷ್ಣ |

ಮುಂದೆ ಬರುವಂತಿಪ್ಪ ಸಂಕಟ

ನಿಂದು ಕಳೆಯುತ ಸುಖ ಸಮೃದ್ಧಿಯ

ಬಂದು ನೀನೀಯುತಲಿ ರಕ್ಷಿಸು ಸರ್ವರನವರತ || ೫೧೬ ||

ಬನಾರಿಪುರವಾಸಿ ಕೃಷ್ಣನೆ

ವಿನಾ ನಿನ್ನನು ತೃಣವದಲುಗದು

ಸನಾತನ ಸಂತಾನವೀಯುತ ಕಾದೆ ಭಕುತರನು |

ವಿನೂತನ ಮಂದಿರವ ಕಟ್ಟಿಸಿ

ಜನಾರ್ದನನಾರ್ತರನು ಪೊರೆಯುತ

ಸುನಾಭನೆ ಪ-ದ್ಮನಾಭನೆ ಹರಿ ಕಾಯೊ ಸಂತತವು || ೫೧೭ ||

ಗೋಪಾಲಕೃ-ಷ್ಣ-ನಾಮಕ ಹರಿ

ನೀ ಪಾಲಿಸಿಹೆ ಕನ್ಯಾನ ಸನಿಹದ

ಕಾಪಾಡಿರುವೆ ಬನಾರಿಮಂದಿರದಲ್ಲಿ ನೆಲೆಯಾಗಿ |

ಗೋಪ ಗೋವ್ಗಳ ಪಾಲಿಸುತ ನೀ

ಗೋಪ ಭೂಪ ಸುಜ್ಞಾನಪತಿ ಹರಿ

ಗೋಪನಿಂದ್ರಿಯಪತಿ ಹೃಷೀಕೇಶನೆ ಪರಾತ್ಪರನೆ || ೫೧೮ ||

ವಿಠ್ಠಲಪುರಸಂಸ್ಥಶ್ಚ ಪಾಣ್ಡುರಙ್ಗಸುವಿಠ್ಠಲಃ।

ತಿರುಪತ್ಯಾಖ್ಯಕ್ಷೇತ್ರಸ್ಥೋ ವೇಙ್ಕಟಾಖ್ಯೋ ಮಹಾಧನಃ॥೭೬॥(೫೨೩)

ವಿಠ್ಠಲಪುರಸಂಸ್ಥ ವಿಠಲನೆ

ವಿಠ್ಠಲನೆ ಮಂದಿರದಿ ಸ್ಥಾಪಿತ-

-ನಿಟ್ಟಿಗೆಯ ಮೇಲಿರುತ ಭಕುತನ ಕಾದೆ ತ್ರೀಭಂಗಿ |

ಇಟ್ಟ ಪ್ರೀತಿಯ ಬಿಡದೆ ಪಿತರನು

ಬಿಟ್ಟಗಲದೆಯೆ ಸೇವಿಸುತ್ತಿಹ

ಪುಟ್ಟ ಪಂಢರಿಯನ್ನು ಕಾದೆಯ ಪಾಂಡುರಂಗ ಹರೇ || ೫೧೯ ||

ಪಾಂಡುರಂಗಸುವಿಠ್ಠಲನೆ ಹರಿ

ಪಂಢರಿಯ ಕಾಯ್ದಂಥ ಕೃಷ್ಣನೆ

ಪಾಂಡು ಬಿಳಿರಂಗಿನ ಸುವಿಠ್ಠಲ ಕಾಯೊ ಕರುಣಾಳು |

ಪುಂಡರೀಕಾಕ್ಷನೆ ಮಹಾತ್ಮನೆ

ಪಂಢರಿಯ ಪಿತೃಭಕ್ತಿಗೊಲಿದಿಹೆ

ಪಾಂಡುರಂಗನೆ ವಿಠ್ಠಲನೆ ಪರಮಾತ್ಮ ಶ್ರೀಕೃಷ್ಣ || ೫೨೦ ||

ತಿರುಪತ್ಯಾಖ್ಯಕ್ಷೇತ್ರಸ್ಥ ಹರಿ

ತಿರುಮಲೆಯ ಮೇಲಿರುವ ವೇಂಕಟ

ತಿರುಪತಿಯ ತಿಮ್ಮಪ್ಪ ಶೇಷಿಯೆ ತಿರುಮಲೇಶ್ವರನೆ |

ಉರುತರದ ಕಲಿಯುಗದ ಪುಣ್ಯವು

ಪರಮಮಂಗಲ ಶ್ರೀನಿವಾಸನ

ವರದೆ ಪದ್ಮಾವತೀಸಹಿತದ ಕ್ಷೇತ್ರವಾಸಿ ಹರೇ || ೫೨೧ ||

ವೇಂಕಟಾಖ್ಯನೆ ಮಹಾವಿಷ್ಣುವೆ

ಸಂಕಟವ ಪರಿಹರಿಪ ಕೃಷ್ಣನೆ

ಕಿಂಕರರ ಕಾಯುತಿಹ ಕೇಶವ ಕಲಿವರದ ಹರಿಯೆ |

ಮಂಕರನು ಪಂಡಿತರ ಮಾಡುವ

ಮೂಕರನು ವಾಗ್ಮಿಗಳ ಮಾಡುವ

ಶಂಕರನ ಸನ್ಮಿತ್ರನಳಿಯನಾಕಾಶರಾಯನಿಗೆ || ೫೨೨ ||

ಮಹಾಧನ ತಿಮ್ಮಪ್ಪ ವೇಂಕಟ

ಮಹಾಮಹಿಮನೆ ಶ್ರೀನಿವಾಸನೆ

ಮಹಾಧನಿಕನೆ ಕಲಿಯುಗದಿ ಸಾಲವನು ತೀರಿಸುತ |

ಮಹಾನಾಟಕ ಸೂತ್ರಧಾರಿಯೆ

ಮಹಾದೇವಪ್ರೀಯ ಕೃಷ್ಣನೆ

ಮಹಾಪಾಪವಿನಾಶಕರ ಸಿರಿಲೋಲ ಶ್ರೀಹರಿಯೆ || ೫೨೩ ||

ಪಣ್ಢರಾಪುರದೇಶಸ್ಥಃ ಪಾಣ್ಡುರಙ್ಗಮಹಾಪ್ರಭುಃ।

ನವನಗರದೇಶೇಶಶ್ಶ್ರೀರಾಮಚನ್ದ್ರರೂಪವಾನ್॥೭೭॥(೫೨೭)

ಪಂಢರಾಪುರದೇಶಸ್ಥ ಹರಿ

ಪಂಢರಾಪುರದೊಳಗೆ ನೆಲೆಸಿಹ

ಪಂಡರಿಗೆ ತಾನೊಲಿದು ನಿಂತ ತ್ರಿಭಂಗಿ ಶ್ರೀಕೃಷ್ಣ |

ಪಂಢರಾಪುರ ಮಹಾರಾಷ್ಟ್ರದಿ

ಕಂಡೆ ಕರ್ಣಾಟಕದಲುತ್ತರ

ದಂಡೆಯಾಚೆಗೆ ಪಾಂಡುರಂಗನ ಸಂನಿಧಾನವನು || ೫೨೪ ||

ಪಾಂಡುರಂಗಮಹಾಪ್ರಭುವೆ ಹರಿ

ಪಾಂಡು ಬಿಳಿಬಣ್ಣದಲಿ ರಂಗಲಿ

ಪಾಂಡವಾಪ್ತನು ಲೋಕದೊಡೆಯನು ಬೆಳಗುತಿಹನಿಲ್ಲಿ |

ಪಂಡರಾಪುರ ದಿವ್ಯಕ್ಷೇತ್ರದಿ

ಪಿಂಡ-ಬ್ರಹ್ಮಾಂಡಾಧಿಪತಿ ವಿಭು

ಕಂಡುಬರುವನು ಕಾಯಲೆಮ್ಮನು ನಿತ್ಯ ಶ್ರೀಕೃಷ್ಣ || ೫೨೫ ||

ನವನಗರದೇಶೇಶ ರಾಮನು

ನವವು ಹೊಸನಗರಾಖ್ಯ ಪುರವದು

ಭವದ ತಾರಕ ರಾಮಚಂದ್ರನ ರೂಪದಲಿ ಕೃಷ್ಣ |

ಶಿವನ ಸಹಿತಲಿ ರಾಘವೇಶ್ವರ

ನವಯತಿಗಳಿಂ ಪೂಜೆ ಪಡೆಯುವ

ಹವನಮುಖ್ಯರ ಗುರುಸಹಿತ ಶ್ರೀಕೃಷ್ಣಗಭಿನಮಿಪೆ || ೫೨೬ ||

ಶ್ರೀರಾಮಚಂದ್ರರೂಪವಾನ್ ಹರಿ

ಶ್ರೀರಾಮಚಂದ್ರನ ರೂಪ ಧರಿಸಿಹ

ಶ್ರೀರಾಮಸತಿ ಸೀತೆ ಲಕುಮಿಯು ರಾಮ ಚಂದ್ರನಿಭ |

ಶ್ರೀರಾಮ ರಂಜಿಸುತಿರುವ ಲೋಕವ

ಶ್ರೀರಾಮ ಕೃಷ್ಣನೆ ಹರಿಯೆ ವಿಷ್ಣುವೆ

ಶ್ರೀರಾಮ ಮಾಧವ ಪಾಲಿಸೀ ಜಗ ಸಕಲವನು ಸತತ || ೫೨೭ ||

ಗೋವರ್ಧನಪುರೀಶಶ್ಚ ಜಗನ್ನಾಥೋಽಮರಪ್ರಭುಃ।

ನಾನಾಪುಣ್ಯಕ್ಷೇತ್ರವಾಸಸ್ತೀರ್ಥಾವಾಸೋಽತಿಪಾವನಃ॥೭೮॥(೫೩೩)

ಗೋವರ್ಧನಪುರೀಶನೆ ಹರಿ

ಗೋವರ್ಧನಪುರಿಯ ನಾಥನೆ

ಗೋವರ್ಧನ ಕೀರುತಿಯೆ ಹರಿ ಕೃಷ್ಣಮೂರುತಿಯೆ |

ಗೋವ ಕಾವನೆ ಭಾವಕೊಲಿವನೆ

ನೋವ ಕಳೆವನೆ ಸಾವ ಗೆಲಿದನೆ

ಬೇವ ಮನಕಾನಂದವೀಯುತ ಕಾವ ಪರಮಾತ್ಮ || ೫೨೮ ||

ಜಗನ್ನಾಥನೆ ಕೃಷ್ಣದೇವನೆ

ಜಗಕೆ ನಾಯಕ ಪರಮ ಸಾತ್ತ್ವಿಕ

ಭಗವತಿಯ ಭಗವಾನ ಭಾರತಜನ್ಮ ಭಗವಂತ |

ಸೋಗು ಜನಗಳ ಮೆಚ್ಚದಿರುವನೆ

ಭಾಗವತರಿಗೆ ತಾನೊಲಿಯುವನೆ

ವೇಗದಿಂ ಮುಕುತಿಯನು ನೀಡುವ ಭಕುತಬಂಧು ಹರಿ || ೫೨೯ ||

ಅಮರಪ್ರಭು ಮರಣರಹಿತನೆ

ಸಮರದಲಿ ಧರ್ಮಕ್ಕೆ ಜಯದನೆ

ಸುಮನಸರ ಕಾಯುವನೆ ವಿಷ್ಣುವೆ ದೇವ ನಾರಯಣ |

ಕುಮತಿಗಳ ಶಿಕ್ಷಕನೆ ನರಹರಿ

ಸುಮತಿಗಳ ರಕ್ಷಕನೆ ಶ್ರೀಹರಿ

ಸುಮನದಿಂದಲೆ ಭಜಿಸುವರ ಕಾಯಯ್ಯ ಕರುಣಾಳು || ೫೩೦ ||

ನಾನಾಪುಣ್ಯಕ್ಷೇತ್ರವಾಸನೆ

ಸಾನುರಾಗದಿ ಭಕುತಗೊಲಿವನೆ

ಭಾನುತೇಜನೆ ಜ್ಞಾನಭಾಸ್ಕರ ಕೃಷ್ಣ ಶ್ರೀಕೃಷ್ಣ |

ನಾನು ನನ್ನವರೆಂಬ ಭಾವವ

ತಾನು ಸುಟ್ಟೊದಗಿಪನು ಜ್ಞಾನವ

ಮಾನುಷಾಕೃತಿ ದೇವ ಪರಬೊಮ್ಮನೆ ಪರಾತ್ಪರನೆ || ೫೩೧ ||

ತೀರ್ಥಾವಾಸನೆ ಕೃಷ್ಣದೇವನೆ

ತೀರ್ಥಕ್ಷೇತ್ರಗಳಲ್ಲಿ ನೆಲೆಸಿಹ

ಪಾರ್ಥಸಾರಥಿ ಕೃಷ್ಣ ಪುಣ್ಯದ ಪಾಪನಾಶಕರ |

ಸಾರ್ಥಕದ ಬದುಕೀವೆ ಭಕುತರ

ಕರ್ತ ಭೋಕ್ತನೆ ನೀನು ಸುಮ್ಮನೆ

ಮರ್ತ್ಯ ತಾ ನೆಪಮಾತ್ರ ಸರ್ವಕು ಮೂಲಕಾರಣ ನೀ || ೫೩೨ ||

ಅತಿಪಾವನನೆ ದೇವ ಕೃಷ್ಣನೆ

ಖತಿಯ ಕಳೆಯುತಲಭಯ ನೀಡುತ

ಮತಿಯ ಶುದ್ಧಿಯ ಗೈಯಲೆನ್ನುತ ಹರಿಯ ಬೇಡುವೆನು |

ಪತಿತಪಾವನ ಸಕಲವಂದಿತ

ಮತಿಗೆ ನಿಲುಕದ ಬೊಮ್ಮತತ್ತ್ವವೆ

ಪತಿಯೆ ಲೋಕಕೆ ಸರ್ವರಾತ್ಮನೆ ಜೀವಬಂಧು ಹರಿ || ೫೩೩ ||

ಮಹಾಶಕ್ತಿರ್ಮಹಾತೃಪ್ತಿರ್ಮಹಾಭುಕ್ತಿರ್ಮಹಾತಪಾಃ।

ಮಹಾನನ್ದೋ ದೀನಬನ್ಧುರ್ಬನ್ಧಮೋಕ್ಷಪ್ರದಾಯಕಃ॥೭೯॥(೫೪೦)

ಮಹಾಶಕ್ತಿಯೆ ಮಹಾನ್ ಬಲಯುತ

ಮಹಾನ್ ಸಾಮರ್ಥ್ಯದಿಂ ಸಹಿತನು

ಮಹಾತ್ಮನು ಶ್ರೀಕೃಷ್ಣ ಬ್ರಹ್ಮಜ್ಞಾನಿಯವತಾರ |

ಮಹಾಬಲಯುತ ಶಕ್ತಿ ನಿನ್ನದೆ

ಮಹಾಬಲಸಖ ಯುಕ್ತಿ ನಿನ್ನದೆ

ಮಹಾನಂದಸ್ವರೂಪ ಮಾಧವ ಸಚ್ಚಿದಾನಂದ || ೫೩೪ ||

ಮಹಾತೃಪ್ತಿಯೆ ಸರ್ವತೃಪ್ತಿಯೆ

ಮಹಾಮಹಿಮನೆ ಭೂಮತೃಪ್ತನೆ

ಮಹಾಲೀಲನೆ ಸಕಲರಲಿರುವ ತೃಪ್ತಿ ಶ್ರೀಕೃಷ್ಣ |

ಮಹಾಧೀಶನೆ ತೃಪ್ತಿನಿಧಿ ಹರಿ

ಮಹಾತ್ಮನೆ ತೃಪ್ತಿಪ್ರದನೆ ಹರಿ

ಮಹಾನಿಧಿ ತೃಪ್ತಿಗಳ ಮೂಲನೆ ಯಶೋದಾನಂದ || ೫೩೫ ||

ಮಹಾಭುಕ್ತಿಯೆ ಸರ್ವಭಕ್ಷಕ

ಮಹಾಗ್ರಾಸನೆಯೆಲ್ಲ ನುಂಗುವ

ಮಹಾಭುಕ್ತನೆ ನಿಖಿಲಜಗವನು ಧರಿಸಿರುವ ಕೃಷ್ಣ |

ಮಹಾಬ್ರಹ್ಮಾಂ-ಡ ಭಾಂಡೋದರ

ಮಹಾನಾರಾಯಣನೆ ಶ್ರೀಹರಿ

ಮಹಾತ್ಮಾತ್ಮನೆ ಸರ್ವರಾತ್ಮನೆ ದೇವ ಪರಬೊಮ್ಮ || ೫೩೬ ||

ಮಹಾತಪಾಃ ಕಡುತಪಸ್ವಿಯೆ

ಮಹಾಕಠೋ-ರ ತಪವ ಗೈವನೆ

ಮಹಾಸೃಷ್ಟಿಯ ಸ್ಥಿತಿಯ ಪ್ರಳಯವ ತಪದ ಬಲದಿಂದ |

ಸುಹಾರನೆ ಸುಂದರನೆ ಕೃಷ್ಣನೆ

ವಿಹಾರನೆ ಯುಮುನಾ ಕಿನಾರೆಯ

ಪ್ರಹಾರಕ ದುಷ್ಟರಿಗೆ ಸುಜನರ ಪೊರೆವ ವರ ನೀಡಿ || ೫೩೭ ||

ಮಹಾನಂದನೆ ಪರಾನಂದನೆ

ಮಹಾಬಂಧುವೆ ಸರ್ವಬಂಧುವೆ

ಮಹಾಸಿಂಧುವೆ ಬಿಂದುನಿಧಿ ಹೇ ಸಚ್ಚಿದಾನಂದ |

ಮಹಾಕಾರುಣಿ ಚಿತ್ಸುಖಾತ್ಮನೆ

ಮಹಾಸಿದ್ಧನೆ ಸಿದ್ಧರಾಜನೆ

ಮಹಾಮತಿ ಸರ್ವಜ್ಞ ಪರಮಾನಂದ ಶ್ರೀಕೃಷ್ಣ || ೫೩೮ ||

ದೀನಬಂಧುವೆ ಕೃಪಾಸಿಂಧುವೆ

ದೀನರನು ರಕ್ಷಿಸುವ ದೇವನೆ

ದೀನಪಾಲಕ ವಾಸುದೇವನೆ ರುಕ್ಮಿಣೀಕೃಷ್ಣ |

ಮಾನ ಕಾವನೆ ಭಕ್ತರನು ತಾ

ಹೀನರನು ದಂಡಿಸುವ ಕೇಶವ

ಸಾನುರಾಗದಿ ಭಜಿಪೆ ಪರಬೊಮ್ಮನ ಪರಾತ್ಪರನ || ೫೩೯ ||

ಬಂಧಮೋಕ್ಷ-ಪ್ರದಾಯಕ ಹರಿ

ಬಂಧನವ ಕಳೆದಿಕ್ಕಿ ಮೋಕ್ಷವ

ನಿಂದು ಕರುಣಿಪನಾತ್ಮವಿಜ್ಞಾನವನು ಬೋಧಿಸುತ |

ಮಂದಮತಿ ಬಂಧಿತನು ಮಾಯೆಲಿ

ಬಿಂದುವನು ಸಿಂಧುವನೆ ಗೈಯಲು

ಚಂದದಿಂದಲಿ ಸುಂದರಾಂಗನ ಹರಿಯ ಭಜಿಸೋಣ || ೫೪೦ ||

ವೇದನಿಧಿಶ್ಚ ವೇದೇಶೋ ವೇದವೇದಾಙ್ಗಪಾರಗಃ।

ವೇದಾನ್ತಪ್ರತಿಪಾದ್ಯಶ್ಚ ವೇದವೇದ್ಯಶ್ಚ ವೇದವಿತ್॥೮೦॥(೫೪೬)

ವೇದನಿಧಿ ಶ್ರುತಿಗಳ ಸ್ವರೂಪನೆ

ವೇದಮೂಲನೆ ವೇದಕಾರಣ

ವೇದಪುರುಷನೆ ವೇದವೇದಾಂತಾದಿ ಪ್ರತಿಪಾದ್ಯ |

ಬಾದರಾಯಣರೂಪಿ ಕೃಷ್ಣನೆ

ವಾದಿರಾಜನೆ ಬಾಧೆ ಕಳೆವನೆ

ಸಾಧಕರಿಗೀಯುವನೆ ಜೀವನ್ಮುಕ್ತಿಬೋಧವನು || ೫೪೧ ||

ವೇದೇಶನೆ ವೇದದೊಡೆಯನೆ

ವೇದವೇ ನಿನ್ನುಸಿರು ಕೃಷ್ಣನೆ

ವೇದವುದಿಸಿತು ಮೊದಲು ಪರಮಾತ್ಮನಿಂ ಧಾತೃವಿನೊಳ್ |

ವೇದವಾತ್ಮವು ನಿನ್ನ ನೀನದ-

-ರಾದರಕೆ ಪಾತ್ರನೂ ಸನ್ನುತ

ಮೋದಬೋಧವದಿರವು ನೀನಹೆ ಸಚ್ಚಿದಾನಂದ || ೫೪೨ ||

ವೇದವೇದಾಂಗಪಾರಗನೆ ಹರಿ

ಪಾದಕೊಂದಿಪೆ ಕೃಷ್ಣ ನಿನ್ನಯ

ಮಾಧವನೆ ಗೋವಿಂದ ಕೇಶವನಾದಿನಾರಯಣ |

ನಾದಬ್ರಹ್ಮ ಪರಾತ್ಪರನೆ ಹರಿ

ಛಂದ ಜ್ಯೋತಿಷ ಶಿಕ್ಷೆ ಕಲ್ಪದ

ಬೋಧಪೂರ್ಣನೆ ನಿರುಕ್ತಜ್ಞನೆ ವ್ಯಾಕರಣಪಟುವೆ || ೫೪೩ ||

ವೇದಾಂತಪ್ರತಿಪಾದ್ಯ ಕೃಷ್ಣನೆ

ವೇದಾಂತದಲ್ಲಿಹ ಪರಬ್ರಹ್ಮವೆ

ವಾದಿರಾಜನೆ ವೇದವಂದ್ಯನೆ ವೇದಸಾರನಿವ |

ವೇದದಂತ್ಯವದುಪನಿಷತ್ತುಗ-

-ಳಾದಿಯಂತ್ಯವು ಮಧ್ಯವೆಲ್ಲವು

ಸಾದರದಿ ಚಿಂತಿಪೆವು ನಿತ್ಯಾನಿತ್ಯಗಳ ನಿತ್ಯ || ೫೪೪ ||

ವೇದವೇದ್ಯನೆ ವಾಸುದೇವನೆ

ವೇದದಿಂದರಿವುದು ಯಥಾರ್ಥವು

ಬಂಧ ಕಳೆವುದು ಮುಕ್ತಿಯರಿವುದು ನಿನ್ನ ಬೋಧ ಸಹ |

ಕಾದದಲೆ ಮೋದದಲೆ ಸೇವೆಲಿ

ಪಾದ ಹಾಕದೆ ಶ್ರವಣ ಮನನದಿ

ಸಾಧನೆಯ ಗೈದಲ್ಲಿ ವೇದದ ಬೋಧ ನಮಗಹುದು || ೫೪೫ ||

ವೇದವಿತ್ ಶ್ರುತಿಗಳನು ತಿಳಿದನೆ

ವೇದ ಬಲ್ಲವ ವೇದ ಬೋಧಿಪ

ವೇದಮೂಲನೆ ವಾದದೂರನೆ ಭಕ್ತಿಜ್ಞಾನಪ್ರದ |

ಮಾಧವನೆ ಮಾನಸದಿ ಧ್ಯಾನಿಪೆ

ಮೋದದಿಂ ಪರತತ್ತ್ವ ಬೊಮ್ಮವ

ಸಾಧುವಂದಿತ ತಮವ ಕಳೆ ಸುಜ್ಞಾನ ನೀಡುತಲಿ ||೫೪೬ ||

ನಿಗಮಾಗಮರೂಪಶ್ಚ ವೇದಾಗಮ್ಯಃ ಪುರುಷ್ಟುತಃ।

ಏಕಾಕ್ಷರೋ ವ್ಯಕ್ತರೂಪಃ ಪುರುಹೂತಃ ಪುರೋಹಿತಃ॥೮೧॥(೫೫೩)

ನಿಗಮಾಗಮರೂಪ ಕೃಷ್ಣನೆ

ನಿಗಮ ನಿರ್ಗತ ಋಷಿಗಳಿಂ ಶ್ರುತಿ

ನಿಗಮಿಸಿತು ಪರಮಾತ್ಮಧ್ಯಾನದಿಯಂತರಂಗದಲಿ |

ಆಗಮವದಾಗತವು ಶಿವನಿಂ

ನಿರ್ಗಮಿಸಿತದು ಗಿರಿಜೆ ಕರ್ಣಕೆ

ಬೇಗನೊಪ್ಪಿದ ಹರಿಯು ನಿಗಮಾಗಮವು ನೀ ಕೃಷ್ಣ || ೫೪೭ ||

ವೇದಾಗಮ್ಯನೆ ವಾಸುದೇವನೆ

ವೇದಗಳಿಗವ ನಿಲುಕದಿಹ ಹರಿ

ವಾದಕೊಲಿಯನು ಭೇದ ಕಾಣನು ಮಾಧವನು ಕೃಷ್ಣ |

ವೇದ ಯಜ್ಞಾಧ್ಯಯನ ತಪದಿಂ

ಸಾಧುವಂದಿತನೊಲಿಯ ಭಾವಜ

ಮಾಧವನು ಬರಿ ಭಕ್ತಿಬೋಧವಿರಕ್ತಿಗೊಲಿಯುವನು || ೫೪೮ ||

ಪುರುಷ್ಟುತ ಹರಿ ವಾಸುದೇವನೆ

ಪುರು ಸ್ತುತ ಬಹುವಾಗಿ ಶಂಸಿತ

ಕರುಣವಾರಿಧಿ ಸರ್ವಜನರಿಂದಲು ತ್ರಿಲೋಕದಲಿ |

ವರುಣವಾಯುಗಳಿಂದ ಸೇವಿತ

ಸರುವ ಕಾಲಪ್ರದೇಶವ್ಯಾಪಕ

ಗರುವದೂರ ಸದಾ ವಿನೋದಪ್ರಿಯನೆ ಶ್ರೀಕೃಷ್ಣ || ೫೪೯ ||

ಏಕಾಕ್ಷರನೆಯೊಂದಕ್ಷರನೆ

ಪ್ರಣವವಾಚ್ಯನೆಯಾದಿಯಕ್ಷರ-

-ವಕಾರನೆ ಹರಿ ವಿಷ್ಣು ಕೇಶವನಚ್ಯುತಾನಂತ |

ಸಕಾರಣ ತಾ ಸರ್ವ ಸೃಷ್ಟಿಗೆ

ವಿಕಾರವ ಹೊಂದದಿಹ ತತ್ತ್ವವೆ

ಪ್ರಕಾರಾಂತರವಾಗಿ ತೋರುವ ಸಚ್ಚಿದಾನಂದ || ೫೫೦ ||

ವ್ಯಕ್ತರೂಪನೆ ವಾಸುದೇವನೆ

ವ್ಯಕ್ತಸೃಷ್ಟಿಲಿ ವಾಸವಾಗಿಹ

ಮುಕ್ತನವ್ಯಕ್ತನು ಸ್ವರೂಪದಿ ಮೂಲ ಪರಬೊಮ್ಮ |

ಸಕ್ತನಂತವ ತೋರಿಕೊಳುತಿಹ

ಸಕ್ತಿರಹಿತನು ಮುಕ್ತನೀತನು

ಭಕ್ತಗೊಲಿವನು ಜ್ಞಾನಿಯಾತ್ಮನು ಕೃಷ್ಣ ಪರಮಾತ್ಮ || ೫೫೧ ||

ಪುರುಹೂತನೆ ಮೊದಲು ಕರೆಯುವೆ

ಪುರುವೆ ಪೂರ್ಣನೆ ಜಗವ ತುಂಬಿಹೆ

ಪುರುವೆ ಪೂರ್ವದಿ ಮೊದಲೆ ಕರೆಯಲ್ಪಡುವೆ ಹೋಮದಲಿ |

ಪರಮಮಂಗಲರೂಪ ಕೃಷ್ಣನೆ

ವರದ ದೇವನೆ ವಾಸುದೇವನೆ

ಕರವ ಮುಗಿಯುತ ಶಿರವ ಬಾಗುತ ನಮಿಸಿ ಶರಣಾದೆ || ೫೫೨ ||

ಪುರೋಹಿತ ಪುರ ಹಿತವ ಕಾವನೆ

ಪುರವೆ ದೇಹವು ಮೊದಲ ರಕ್ಷಕ

ಪರಮಹಿತಕಾರಕನೆ ಗುರು ಯಾಜಕನೆ ಋತ್ವಿಜನೆ |

ಚರಮಗತಿದಾಯಕನೆ ಮೋಕ್ಷದ

ಕರಿಯ ಕಾಯ್ದನೆ ನಕ್ರಹರ ಹರಿ

ಶೌರಿ ಕೃಷ್ಣನೆ ವಾಸುದೇವನೆ ದೇವಕೀತನಯ || ೫೫೩ ||

ಪರಾವರವಿಸೃಷ್ಟಾರೋ ಮಙ್ಗಲಸ್ಸದಸತ್ಪರಃ।

ಜಿತಕಾಮೋ ಜಿತಾಘಶ್ಚ ಜಿತಾರಿರಪರಾಜಿತಃ॥೮೨॥(೫೬೦)

ಪರಾವರ-ವಿಸೃಷ್ಟಾರನೆ

ಪರವನುಚ್ಚವನವರ ನೀಚವ-

-ನರೆಗಳಿಗೆಯಲಿ ಸೃಜಿಪ ತನ್ನ ವಿಶೇಷ ಬಲದಿಂದ |

ಪರನು ತಾನಪರನೂ ಕೃಷ್ಣನೆ

ಕರುಣವಾರಿಧಿ ವಿಶ್ವಪಾಲಕ

ವರದ ಶಂಕರ ಪ್ರಲಯಕಾರಕರೆಲ್ಲ ತ್ವದ್ರೂಪ || ೫೫೪ ||

ಮಂಗಲನೆ ಮಂಗಲಸ್ವರೂಪನೆ

ಸಂಗವರ್ಜಿತ ಶಂಕರನೆ ಹರಿ

ಮಂಗಳಾಂಗನೆ ಮಂಗಲದ ಮಂಗಲದ ನಿಧಿಯೆ |

ಅಂಗರಹಿತ ನಿರಾಕೃತಿಯೆ ಹರಿ-

-ಯಂಗಸಹಿತತೆ ತಾಳುವನು ತಾ-

-ನಂಗಜನ ಪಿತ ದುಷ್ಟಭಂಗ ವಿಹಂಗ ಪರಮಾತ್ಮ || ೫೫೫ ||

ಸದಸತ್ಪರ ವಾಸುದೇವನೆ

ಸದಮಲವು ಜಗಸತ್ತೆ ಕಾರಣ-

-ಸದಾಖ್ಯವವ್ಯಕ್ತವದು ಪ್ರಕೃತಿಯು ಪುರುಷ ಪರತಮನು |

ಪದವದಾತ್ಮವು ಸರ್ವಹೃದಯವು

ಸದುಮ ಸರ್ವರೊಳೆಂಬ ಸತ್ಯವ

ಪದುಮನಾಭನ ಶರಣು ಪೊಗುವೆನು ದೇವಕೀಸುತನ || ೫೫೬ ||

ಜಿತಕಾಮನೆ ಬಯಕೆ ಮೀರ್ದನೆ

ಜಿತನು ಜಯಶೀಲನು ಬಯಕೆಗಳ

ಹತವ ಮಾಡಿಹನಾಪ್ತಕಾಮನು ಪೂರ್ಣಕಾಮ ಹರಿ |

ವಿತತ ಬ್ರಹ್ಮಾಂಡವನೆ ಧರಿಸಿಹ

ಹಿತವ ಕಾಯುವ ಸರ್ವಸೃಷ್ಟಿಯ

ಮಿತದಿ ಬಳಸುವ ಭೋಗ್ಯಗಳ ಪರಮಾತ್ಮಗರ್ಪಿಸುತ || ೫೫೭ ||

ಜಿತಾಘನೆಯಘ ಪಾಪ ಗೆದ್ದವ

ಜಿತನು ಪಾಪವನೆಂದು ಮಾಡನು

ಹಿತನು ಮೂರ್ಲೋಕಕ್ಕೆ ಸಕಲವ ಧಾರೆಯೆರೆಯುವನು |

ಪಿತನು ಸರ್ವರ ಜತನದಿಂದಲಿ

ಮತಿಯ ನಿಲಿಸಿರಿ ಕೃಷ್ಣರೂಪದಿ

ಖತಿಯ ಕಳೆಯುತ ನಿರ್ಗುಣವ ಕಡೆಗೈದುವಿರಿ ದಿಟವು || ೫೫೮ ||

ಜಿತಾರಿಯೆ ಹರಿ ವೈರಿನಾಶಕ

ಜಿತನು ಗೆದ್ದಿಹನರಿಸಮೂಹವ

ಪಿತನು ಬೊಮ್ಮಗೆ ಹಿತನು ಲೋಕಕೆ ಖತಿಯ ಬಿಡಿರೆಲ್ಲ |

ಮತಿಯ ಮಾಡಿರಿ ಮನುಜರೆಲ್ಲರು

ಮಿತದ ನರತೆಯ ಮೀರಿ ದಿವ್ಯತೆ

ಪತನರಹಿತದ ಬ್ರಹ್ಮತೆಯ ತಾನರಿಯಿರಿಂದೆನುವೆ || ೫೫೯ ||

ಅಪರಾಜಿತ ಹರಿಯೆ ಕೃಷ್ಣನೆ-

-ಯಪರಾಜಿತ ಪರಾಜಯವಿರ-

-ದಪರತತ್ತ್ವವೆ ಸರ್ವದಾ ಜಯಶೀಲ ದೇವ ಹರಿ |

ತಾಪಹರ ಪರಮೇಶ್ವರನೆ ಸಂ-

-ತಾಪಹರ ಶ್ರೀವಾಸುದೇವನೆ

ಪಾಪಹರ ಹರಿ ಕೇಶವನೆ ನಾರಾಯಣನೆ ಗುರುವೆ || ೫೬೦ ||

ಜಿತೇನ್ದ್ರಿಯೋ ಜಿತಕ್ಲೇಶೋ ಜಿತಾತ್ಮಾ ಗರುಡಧ್ವಜಃ।

ಶುಚಿಶ್ಶಾನ್ತಸ್ಸುದಾನ್ತಶ್ಚಾದಮ್ಭೋ ದಮ್ಭಹರಶ್ಶಶೀ॥೮೩॥(೫೭೦)

ಜಿತೇಂದ್ರಿಯ ದೇವ ಕೃಷ್ಣನೆ

ಜಿತನೆ ಕರಣಂಗಳನು ಗೆದ್ದನೆ

ಹಿತನೆ ತಾನಿಂದ್ರಿಯಗಳನು ನಿಯಮಿಸಿ ಹೃಷೀಕೇಶ |

ಪತಿತಪಾವನ ಜೀವಕರಣವ

ಮಿತಿಯಲಿಟ್ಟಿಹ ಕರಣಪತಿ ಹರಿ

ಸತಿಯ ಪಾಲಿಸಿದಂಥ ಯತಿ ವರ ಬ್ರಹ್ಮನಿಷ್ಠ ನಿಜ || ೫೬೧ ||

ಜಿತಕ್ಲೇಶನೆ ದುಃಖ ಗೆದ್ದನೆ

ಪಿತನೆ ಲೋಕಕೆ ರುಕ್ಮಿಣೀಶನೆ

ಜತನದಿಂದಲಿ ಲೋಕವನು ಧರ್ಮವನು ಕಾಯುವನೆ |

ಸುತನು ಮದನನು ಸೃಷ್ಟಿಕಾರಕ

ಹಿತನು ಧರ್ಮದಿ ನಡೆವವರಿಗವ

ಮತವು ಶುದ್ಧಾದ್ವೈತಭಕ್ತಿವಿರಕ್ತಿಬೋಧಗಳು || ೫೬೨ ||

ಕೃಷ್ಣ ನೀನೆ ಜಿತಾತ್ಮ ಸಂತತ

ಕೃಷ್ಣ ನಿನ್ನನೆ ನೀನು ಗೆದ್ದಿಹೆ

ಕೃಷ್ಣ ಜಗವನೆ ಗೆದ್ದು ಸರ್ವಾತ್ಮತ್ವ ಪಡೆದಿರುವೆ |

ಕೃಷ್ಣನಿಂದ್ರಿಯಪ್ರಾಣಜಿತ ಹರಿ

ಕೃಷ್ಣನಂತಃಕರಣದಧಿಪತಿ

ಕೃಷ್ಣ ನೀನಿಲ್ಲದಿರೆ ಶೂನ್ಯವು ಸಕಲ ಸೃಷ್ಟಿಯಿದು || ೫೬೩ ||

ಗರುಡಧ್ವಜ ಹರಿಯೆ ಕೃಷ್ಣನೆ

ಗರುಡ ಕಶ್ಯಪವಿನತೆ-ತನಯನು

ಗರುವ ರಹಿತನು ಗರುತ ರೆಕ್ಕೆಗಳಿಂದ ಡಯಿಸುವನು |

ಗರುಡನುಡ್ಡಯನವನು ಮಾಡುವ

ಮರಣರಹಿತಮೃತತ್ವಕೊಯ್ಯುವ

ಪರಮಶ್ರುತಿಗಭಿಮಾನಿದೇವತೆ ಹರಿಯ ವಾಹನವು || ೫೬೪ ||

ಶುಚಿಯು ಶ್ರೀಕೃಷ್ಣನು ಪರಾತ್ಪರ

ಶುಚಿಯದಗ್ನಿಯು ಶೋಕಕಾರಣ

ಶುಚಿಯು ಸುಡುವನು ಸಕಲದುರಿತಂಗಳನು ಸಂತತವು |

ಶುಚಿಯು ಪಾವಕ ಶುಚಿಗೊಳಿಸುವನು

ಶುಚಿಯದಜ್ಞಾನವನು ಸುಡುವುದು

ಶುಚಿಯ ರೂಪಿಲಿ ತೋರ್ವ ಜ್ಞಾನಾನಲನೆ ಶ್ರೀಕೃಷ್ಣ || ೫೬೫ ||

ಶಾಂತ ಕೃಷ್ಣನೆ ಶಾಂತರೂಪನೆ

ಶಾಂತಿಯಿಂ ಮನ ಶಮನಗೊಳಿಸಿ ಪ್ರ-

-ಶಾಂತಮಾನಸನಾಗಿ ಭಕುತರಿಗೀವ ಶಾಂತಿಯನು |

ಶಾಂತ ಚಿತ್ತನು ಶಾಂತವದನನು

ಶಾಂತಚೇಷ್ಟನು ಬ್ರಹ್ಮರೂಪನು

ಶಾಂತಿರಕ್ಷಕ ವಿಶ್ವಶಾಂತಿಗೆ ನಾವು ಬೇಡುವೆವು || ೫೬೬ ||

ಸುದಾಂತನೆ ಹರಿ ವಾಸುದೇವನೆ

ಸುದಾಂತನು ಸರಿಯಾದ ದಮಯುತ

ಮದವಿರಹಿತನು ಕರಣನಿಗ್ರಹಿ ಶ್ರೀಹೃಷೀಕೇಶ |

ಸದಾ ತಾನಿಂದ್ರಿಯವ ದಮನಿಸಿ

ಪದವನಚ್ಯುತವನ್ನು ಪಡೆದಿಹ

ಸದಮಲಾತ್ಮಕ ಗುರುವೆ ಕೃಷ್ಣನೆ ಸಚ್ಚಿದಾನಂದ || ೫೬೭ ||

ಅದಂಭನೆ ದಂಭಾದಿ ರಹಿತನೆ

ಸದಂಭರಿಗೊಲಿಯದ ಮಹಾತ್ಮನೆ

ಕುದಂಭವ ದರ್ಪವನು ತಾಳದ ಸದಾನಂದ ಹರಿ |

ಕದಂಬವ ನಿಜಭಕ್ತಗಡಣವ-

 -ನದಂಭದಿ ತಾ ಪೊರೆಯುತಿರುವನು

ಚಿದಂಬರದಲಿ ಯೋಗಿಗಳಿಗನವರತ ತೋರುವನು || ೫೬೮ ||

ದಂಭಹರ ಜಂಭವನು ಕಳೆಯುವ

ಕುಂಭಸಂಭವವರದ ರಾಮನೆ

ಶುಂಭದೈತ್ಯಾದಿಗಳ ಮರ್ದನ ದೇವಿ ಸುಕುಮಾರ |

ದಂಭವನು ಕಳೆ ದೇವ ಕೃಷ್ಣನೆ

ಜಂಭಹಂಕಾರಾದಿಗಳ ಕಳೆ

ತುಂಬಲಾರದ ಮುಕುತಿಯಮಿತವನಿತ್ತು ರಕ್ಷಿಪುದು || ೫೬೯ ||

ಶಶಿಯ ರೂಪದಿ ಹರ್ಷಕಾರಕ

ಖುಷಿಯ ಕೊಡುತಿಹ ನಿಖಿಲ ಲೋಕಕೆ

ನಿಶೆಯ ಕಾಲದಿ ಪೌರ್ಣಮಿಯ ಚಂದಿರನ ರೂಪಿನಲಿ |

ವಶವ ಮಾಡಿಹನಖಿಲ ಲೋಕವ

ಶಿಶುಸ್ವರೂಪದಿ ಲೀಲೆ ತೋರಿದ

ಪಶುಗಳನು ಕಾಯ್ದಂಥ ಗೋಪಾಲಕನೆ ಶ್ರೀಕೃಷ್ಣ || ೫೭೦ ||

ಚರಾಚರಗುರುರ್ವೇದಸ್ಸರ್ವಶಾಸ್ತ್ರಕೃದವ್ಯಯಃ।

ವೃಷ್ಣಿವಂಶೋದ್ಭವೋ ಭಾವೋ ಭವತಾಪನಿವಾರಕಃ॥೮೪॥(೫೭೭)

ಚರಾಚರಗುರು ಕೃಷ್ಣದೇವನೆ

ಚರವು ಚರಿಪುದು ಜೀವ ಚೇತನ

ಚರರಹಿತವಚರವದು ಜಡವದು ಜೀವಜಡಗುರು ನೀ |

ಸ್ಥಿರವು ಸ್ಥಾವರವಚರ ಗಿರಿವನ

ಚರವು ಜಂಗಮ ನರಮೃಗಾದಿಯು

ಪರಮಗುರು ಲೋಕಕ್ಕೆ ಪರಮಾತ್ಮನು ಮಹಾತತ್ತ್ವ || ೫೭೧ ||

ವೇದ ಕೃಷ್ಣನೆ ಜ್ಞಾನ ಕೃಷ್ಣನೆ

ಭೇದರಹಿತದ್ವೈತ ಕೃಷ್ಣನೆ

ವಾದದೂರನೆ ವೇದವಂದ್ಯನೆ ನಾದಮೂರುತಿಯೆ |

ಸಾದರದಿ ಸ್ವಾಧ್ಯಾಯ ಮಾಳ್ಪೆವು

ವೇದ ಶಾಸ್ತ್ರ ಪುರಾಣ ಸ್ಮೃತಿಗಳ

ಮೋದವೀಯುತ ಸಲಹು ಲೋಕವ ಸತ್ಯ ಧರ್ಮಗಳ || ೫೭೨ ||

ಸರ್ವಶಾಸ್ತ್ರಕೃತ್ ಶ್ರೀಕೃಷ್ಣನೆ

ಸರ್ವ ಶಾಸ್ತ್ರಕು ಮೂಲ ಶ್ರೀಹರಿ

ಸರ್ವ ಶಾಸ್ತ್ರಸ್ವರೂಪ ಶಾಸ್ತ್ರಾಧಾರ ಸರ್ವಜ್ಞ |

ಸರ್ವ ಶಾಸ್ತ್ರವ ಬೋಧಿಸಿರುವನೆ

ಸರ್ವ ಶಾಸ್ತ್ರವ ಬರೆಸಿರುವವನೆ

ಸರ್ವ ಶಾಸ್ತ್ರವ ಪ್ರಚುರಪಡಿಸುತ ಲೋಕ ಕಾಯ್ವವನೆ || ೫೭೩ ||

ಅವ್ಯಯನೆ ವ್ಯಯರಹಿತ ಕೃಷ್ಣನೆ-

-ಯವ್ಯಯನೆ ಖರ್ಚಾಗದುಳಿವನೆ-

-ಯವ್ಯಯನೆ ಪರಮಾತ್ಮನಕ್ಷಯನಮೃತನಜರಮರ |

ನವ್ಯನವ ಪ್ರಾಚೀನನಹುದೈ

ಭವ್ಯನೂ ಪ್ರಸ್ತುತನು ತಾನೈ

ಹವ್ಯ ಕವ್ಯವ ನಡೆಸಿ ಲೋಕವ ಕಾವ ಜಗದೀಶ || ೫೭೪ ||

ವೃಷ್ಣಿವಂಶೋದ್ಭವನೆ ಕೃಷ್ಣನೆ

ವೃಷ್ಣಿಗಳ ಕುಲದಲ್ಲಿ ಜನಿಸಿಹೆ

ವೃಷ್ಣಿವಂಶಪ್ರದೀಪ ಭಗವಾನ್ ಪೂರ್ಣ ರೂಪದಲಿ |

ವಿಷ್ಣುವವತರಿಸಿಹನು ವೃಷ್ಣಿಲಿ

ಕೃಷ್ಣ ವಸುದೇವಾತ್ಮಜನು ಹರಿ

ವೃಷ್ಣಿವಂಶದಿ ತಾನವತರಿಸಿ ಕುಲವ ಬೆಳಗಿದನು || ೫೭೫ ||

ಭಾವ ರೂಪನೆ ವಾಸುದೇವನೆ

ಭಾವಜನ ಪಿತ ಭಾವಕೊಲಿವನೆ

ಭಾವ ಸತ್ತೆಯದಾತ್ಮತತ್ತ್ವವು ಸರ್ವವ್ಯಾಪಕವು |

ದೇವ ನರ ಪಶು ಪಕ್ಷಿ ರೂಪದಿ

ಠಾವ ತುಂಬುತ ಸೃಜಿಸಿ ಲಯಿಸುತ

ಕಾವ ಪರಮೇಶ್ವರನೆ ಪರಬೊಮ್ಮನೆ ನಿಯಾಮಕನೆ || ೫೭೬ ||

ಭವತಾಪನಿವಾರಕನೆ ಹರಿ

ಭವದ ಲೋಕದ ದುಃಖ ಕಳೆವನು

ಜವನ ಬಾಧೆಯ ಕಳೆದು ಮುಕ್ತಿಯನೀವ ಸರ್ವಜ್ಞ |

ಭವ ನಿರಂತರ ವಿಷ್ಣುಮಾಯೆಯು

ಭವವನಾದಿಯದಂತ ಜ್ಞಾನದಿ

ಭವನಿವಾರಣವಾತ್ಮನಿಷ್ಠತೆಯದನು ನೀಡಯ್ಯ || ೫೭೭ ||

ಯದುವಂಶಾವತಾರಶ್ಚ ಭೂತಭೃದ್ಭೂತಭಾವನಃ।

ಅಮೃತತ್ವಪ್ರದೋ ಮೃತ್ಯುಪ್ರದಾಯಕೋ ವ್ರಜೇಶ್ವರಃ॥೮೫॥(೫೮೩)

ಯದುವಂಶಾವತಾರ ಕೃಷ್ಣನೆ

ಯದುಮಹಾರಾಜನ ಸುವಂಶಜ

ಪದುಮನಾಭನು ಯಾದವೇಶ್ವರ ವಾಸುದೇವ ಹರಿ |

ಪದವಿ ಬಯಸದ ಮಧುಕುಲಜ ಹರಿ

ಮದುವೆಯಾದನು ಸೋಳ ಸಾಸಿರ

ವದನ ತೋರೈ ಮುಕುತಿ ನೀಡೈ ದೇವಕೀತನಯ || ೫೭೮ ||

ಭೂತಭೃತ್ ಭೂತಗಳ ಭರಿಸಿಹ

ಭೂತಪಂಚಕವೀಚರಾಚರ

ವ್ರಾತವೆಲ್ಲವ ಧರಿಸಿ ಜಗಭಾಂಡೋದರನೆ ಹರಿಯು |

ಮಾತ ಲಾಲಿಸು ಜಾತವೇದನೆ

ಸೋತ ಧರ್ಮಿಗಳನ್ನು ಕಾವನೆ

ಪಾತಕಗಳಪಹರಿಸಿ ರಕ್ಷಿಸು ನಾಥ ಶ್ರೀಕೃಷ್ಣ || ೫೭೯ ||

ಭೂತಭಾವನ ವಾಸುದೇವನೆ

ಭೂತಗಳ ಹೊರಗೊಳಗೆ ನಿಂತಿಹ

ಭೂತಪಂಚಕಮೂಲ ನಾರಾಯಣನೆ ಶ್ರೀಕೃಷ್ಣ |

ಭೂತಸೃಷ್ಟಿಯನೆಲ್ಲ ಸೃಜಿಸುವ

ಜಾತವೆಲ್ಲವ ಸಲಹಿ ಪೋಷಿಪ

ಹೇತು ಲಯ ನಿಗ್ರಹವನುಗ್ರಹ ಪಂಚಕೃತ್ಯಗಳ || ೫೮೦ ||

ಅಮೃತತ್ವಪ್ರದನೆ ಕೃಷ್ಣನೆ

ಸ್ವಮೃತತತ್ತ್ವಪ್ರಬೋಧದನೆ ಹರಿ-

-ಯಮೃತ ನೀ ಮೃತಿಯಿರದ ತತ್ತ್ವವೆ ಸರ್ವರೊಳಗಿರುವ |

ಅಮೃತವಾತ್ಮವದದುವೆ ಬ್ರಹ್ಮವ-

-ದಮೃತ ಶಾಶ್ವತ ನಿತ್ಯ ಸತ್ಯವ-

-ದಮೃತ ನೀ ತಿಳಿಯೆಂಬ ಗೀತೆಯ ನುಡಿದ ಶ್ರೀಕೃಷ್ಣ || ೫೮೧ ||

ಮೃತ್ಯುಪ್ರದಾಯಕ ಹರನೆ ಕೃಷ್ಣನು

ಮೃತ್ಯು ನೀಡುವ ಕಾಲಕಾಲಕೆ

ಮೃತ್ಯುದೇವತೆರೂಪಿನಲಿ ಯಮ ತಾನೆ ಪರಮಾತ್ಮ |

ಸತ್ಯ ಧರ್ಮಕೆ ಪುಣ್ಯ ಪಾಪಕೆ

ಮೃತ್ಯು ನೀಡುವ ತಕ್ಕ ಲೋಕವ

ಮೃತ್ಯು ಜನಿ ಸ್ಥಿತಿ ಮೂರರೊಡೆಯನೆ ಕೃಷ್ಣಮೂರುತಿಯೆ || ೫೮೨ ||

ವ್ರಜೇಶ್ವರ ಗೋಪವ್ರಜ ನಾಯಕ

ವ್ರಜ ಸಮೂಹವು ಗೋಪಬಾಲರ

ವ್ರಜದ ಪತಿ ಗೋಪತಿಯು ಕೃಷ್ಣನು ರಾಸವಲ್ಲಭನು |

ಭಜಿಪೆವನುದಿನ ಬಾಲಕೃಷ್ಣನ

ಭಜಿಪ ಭಕ್ತರ ಕಾಯೊ ಕೃಷ್ಣನೆ

ವ್ರಜಕೆ ವಂದಿಪೆ ಕೃಷ್ಣಸಖರಿಗೆ ಪುಣ್ಯವೆಷ್ಟಿಹುದೋ || ೫೮೩ ||

ಮಾಯಾನರ ಆತ್ತಚಕ್ರೋ ಮಾನುಷೀಪಾರ್ಥಿವಾಶ್ರಯಃ।

ಮುಷ್ಟಿಕಘ್ನಶ್ಚ ಕೇಶಿಘ್ನಶ್ಚಾಣೂರಪ್ರಾಣಹಾರಕಃ॥೮೬॥(೫೮೯)

ಮಾಯಾನರ ವಾಸುದೇವನೆ

ಮಾಯೆಯಿಂ ನರರೂಪ ಧರಿಸಿದೆ

ಮಾಯೆ ಪ್ರಕೃತಿಯು ಮಾಯಿ ನೀ ಪರಮೇಶ್ವರನೆ ಕೃಷ್ಣ |

ಕಾಯ ಮಾನುಷ ಪಾಂಚಭೌತಿಕ

ಮಾಯೆಯತಿಮಾನುಷವು ದೈವವು

ಸಾಯದಮೃತತ್ವಸ್ವರೂಪದ ಜ್ಞಾನಮೂರುತಿಯೆ || ೫೮೪ ||

ಆತ್ತಚಕ್ರನೆ ದೇವ ಕೃಷ್ಣನೆ

ಕತ್ತ ಕತ್ತರಿಸಲ್ಕೆ ಚಕ್ರಿಯೆ

ಮತ್ತೆ ದುಷ್ಟರ ಕೊಂದು ಧರ್ಮವ ಸ್ಥಾಪಿಸಿದೆ ಹರಿಯೆ |

ಆತ್ತ ಪಿಡಿದಿಹೆಯಾ ಸುದರ್ಶನ

ಸುತ್ತ ಸುತ್ತುವ ಕಾಲಚಕ್ರವ

ಮತ್ತೆ ಶ್ರೀಚಕ್ರವದ ಪಿಡಿಯುತ ಭೀಷ್ಮಗೊಲಿದಿಹೆಯ || ೫೮೫ ||

ಮಾನುಷೀಪಾರ್ಥಿವಾಶ್ರಯ ಹರಿ

ಮಾನುಷಾಕೃತಿ ಪೃಥ್ವಿಯೊಳು ನೀ

ಸಾನುರಾಗದಿ ಶಿಷ್ಟರಕ್ಷಣೆಗಾಗಿ ಧರಿಸಿರುವೆ |

ಏನು ಫಲವದನರಿಯದಿದ್ದರೆ

ಮಾನವನ ಜನ್ಮವದು ವ್ಯರ್ಥವು

ವೇಣುಲೋಲನ ಬರಿಯ ನರನೆಂದರಿಯದಿರು ಮನುಜ || ೫೮೬ ||

ಮುಷ್ಟಿಕಘ್ನನೆ ಕೃಷ್ಣ ನೀನೆಲ

ಮುಷ್ಟಿಕಾಸುರನನ್ನು ನಿನ್ನಯ

ಮುಷ್ಟಿಯಿಂದಲೆ ಕೊಂದೆ ಮಥುರೆಯ ಕಂಸನರಮನೆಲಿ |

ಸೃಷ್ಟಿಗೀಶನೆ ಧರ್ಮಸ್ಥಾಪಕ-

-ನಿಷ್ಟು ಮಾತ್ರವ ಪೇಳಬಲ್ಲೆನು

ಮುಷ್ಟಿಯವಲಕ್ಕಿಯನು ಕೊಟ್ಟರು ಕಾವ ಶ್ರೀಕೃಷ್ಣ || ೫೮೭ ||

ಕೇಶಿಘ್ನ ಹರಿ ವಾಸುದೇವನೆ

ಕೇಶಿದೈತ್ಯನ ಕೊಂದ ಲೀಲನೆ

ಕೇಶವನೆ ವಸುದೇವಸುತ ಹರಿ ದೇವಕೀತನಯ |

ಆಶೆಗಳ ಕಳೆ ಮುಕುತಿ ನೀ ಕೊಡು

ಭಾಷೆ ತಪ್ಪದೆ ಭಕುತರಿಗೆ ಹರಿ-

-ದಾಸರಿಗೆ ಸುಜ್ಞಾನಭಕ್ತಿವಿರಕ್ತಿ ಕರುಣಿಪುದು || ೫೮೮ ||

ಚಾಣೂರಪ್ರಾಣಹಾರಕನೆ ಹರಿ

ಚಾಣೂರಮುಷ್ಟಿಕರ ಕೊಂದೆಯ

ವೇಣುಕರ ಶ್ರೀಕೃಷ್ಣ ಮಥುರೆಲಿ ಮುಷ್ಟಿಕಾಳಗದಿ |

ಕಾಣದಂತೆಯೆ ದೇವನೆಂಬುದ

ಮಾಣದಂತೆಯೆ ಧರ್ಮವನು ತಾ

ಗೋಣ ಮುರಿದೆಯ ಜಟ್ಟಿಗಳ ಕಂಸಾಖ್ಯನಾಳುಗಳ || ೫೮೯ ||

ಮೈನ್ದದ್ವಿವಿಧಸಂಹರ್ತಾ ಬಾಣಾಸುರಪ್ರಣಾಶಕಃ।

ಭೌಮಹನ್ತಾ ಯದುಶ್ರೇಷ್ಠೋ ಬಲೀ ಬಲವತಾಂ ವರಃ॥೮೭॥(೫೯೫)

ಮೈಂದ-ದ್ವಿವಿದಸಂಹರ್ತ ಹರಿ

ಮೈಂದ ದ್ವಿವಿದ ಕಂಸ ಶಾಂಬರು

ಸಂದರಾ ಹರಿಯಿಂದ ಮಥುರೆಲಿ ದುಷ್ಟ ದಾನವರು |

ಇಂದಿರೇಶನ ಕಂದ ಕೃಷ್ಣನ

ಮಂದಹಸಿತನ ಸುಂದರಾಂಗನ

ಚಂದದಿಂದಲಿ ನುತಿಪೆನಾನಂದವನು ಪಡೆಯುತಲಿ || ೫೯೦ ||

ಬಾಣಾಸುರ-ಪ್ರಣಾಶಕ ಹರಿ

ಬಾಣನಸುರನು ಶೈವಮುಖ್ಯನು

ಕಾಣದಂತೆಯೆ ಸಾಸಿರದ ಭುಜವಿದ್ದ ಶಿವಸಿದ್ಧ |

ಬಾಣ ಕೃಷ್ಣರ ಕದನ ನಡೆಯಲು

ಜಾಣನನಿರುದ್ಧನುಷೆಯೊಂದಿಗೆ

ಪಾಣಿಗ್ರಹಿಸಿದ ಹರಿಹರರನುಗ್ರಹವ ತಾ ಪಡೆದ || ೫೯೧ ||

ಭೌಮಹಂತಾ ವಾಸುದೇವನೆ

ಭೂಮಿಸುತ ನರಕನನು ಕೊಂದಿಹೆ

ಭೂಮಿಯಂಶಜೆ ಸತ್ಯಭಾಮಾದೇವಿಯೊಡಗೂಡಿ |

ನಾಮ ನರಕವು ನೇಮ ನರಕವು

ಹೋಮವಿಲ್ಲವು ಕಾಮವೆಲ್ಲವು

ಶ್ಯಾಮ ಷೋಡಶ ಸಾಸಿರದ ಕುವರಿಯರ ರಕ್ಷಿಸಿದ || ೫೯೨ ||

ಯದುಶ್ರೇಷ್ಠನೆ ದೇವ ಕೃಷ್ಣನೆ

ಯಾದವಾನ್ವಯಭೂಷಣನೆ ಹರಿ

ಯದುಮಹಾರಾಜನ ಕುಲದಿ ತಾನವತರಿಸಿದನು ವಿಷ್ಣು |

ಯದುಕುಲದಿ ಪರಬ್ರಹ್ಮ ಪುಟ್ಟಿದ

ಯದುಜನರ ಭಾಗ್ಯವದು ಸಂತತ

ಯದುಕುಲೇಶನ ರುಕ್ಮಿಣೀಶನ ಭಜಿಸಿ ಸುಖ ಹೊಂದಿ || ೫೯೩ ||

ಬಲೀ ಬಲವಿಹುದಿವಗೆ ಕೃಷ್ಣಗೆ

ಬಲಿಯ ಮೆಟ್ಟಿದ ಪಾದ ವಾಮನ

ಬಲವದಖಿಲಸೃಷ್ಟಿಗಧಿಕವು ಸೃಷ್ಟಿಕರ್ತನದು |

ಒಲವಿನಿಂದಲಿ ಕಾಲ ತ್ರಿಭುವನ

ಬಲುಹಿನಿಂದಲಿ ದುಷ್ಟನಿಗ್ರಹ

ಸಲಹು ಶಿಷ್ಟರ ಧರ್ಮರಕ್ಷಕ ಮುಕುತಿಯನ್ನೀಯೋ || ೫೯೪ ||

ಬಲವತಾಂ ವರ ಕೃಷ್ಣದೇವನೆ

ಬಲಯುತರಲತಿಶಯಿಯು ಲೋಕದಿ

ಹಲವು ತೆರದೀಕ್ಷಿಸುವ ಲೋಕವ ಸರ್ವರೂಪಿ ಹರಿ |

ನಲವಿನಿಂ ಭಕುತರನು ಕಾಯುವ

ಗೆಲುವಿನಿಂ ಸಜ್ಜನರ ರಕ್ಷಿಪ

ಬಲುಹಿನಿಂ ದುಷ್ಟರನು ಶಿಕ್ಷಿಪ ಲೋಕಪಾಲಕನು || ೫೯೫ ||

ಮಾಗಧಾದ್ಯಸುರದ್ವೇಷೀ ಕೌಮೋದಕೀಗದಾಯುಧಃ।

ಸಙ್ಕರ್ಷಣಾನುಜಶ್ಶನ್ತಮೇಶೋಙ್ಕಾರಸುವಿಗ್ರಹಃ॥೮೮॥(೬೦೧)

ಮಾಗಧಾದ್ಯಸುರದ್ವೇಷೀ

ಮಾಗಧಾದಿಗಳಿಂಗೆ ಶತ್ರುವು

ಶ್ರೀಗರುಡವಾಹನನೆ ಕೃಷ್ಣನೆ ದೇವಕೀಸುತನೆ |

ನಾಗಶಯನನೆ ದುಷ್ಟಶಿಕ್ಷಕ

ಬೇಗ ಶಿಶುಪಾಲಾದಿಗಳ ಮಿಗೆ

ಮಾಗದವರನು ಮಾಗಿಸಿದ ಶಿಕ್ಷಣವ ನೀಡುತಲಿ || ೫೯೬ ||

ಕೌಮೋದಕೀಗದಾಯುಧ ಹರಿ

ಕೌಮೋದಕೀ ನಾಮ ಗದೆಯನು

ಕಾಮಪಿತನಾಯುಧದ ರೂಪಿಲಿ ಧರಿಸಿಹನು ಕೃಷ್ಣ |

ಸಾಮಪ್ರೀಯನೆ ಸೋಮಸುಂದರ

ಭಾಮೆಯರಸೆ ನಾಮಪಾವನ

ನೇಮದಿಂದಲಿ ಭಜಿಸಿ ಸಂತತ ಧನ್ಯರಾಗಲಿಕೆ || ೫೯೭ ||

ಸಂಕರ್ಷಣಾನುಜನೆ ಕೃಷ್ಣನೆ

ಸಂಕರ್ಷಣನು ಬಲರಾಮ ಶೇಷನು

ಸಂ ಕರ್ಷಣ ಶಕ್ತಿಯಿಂ ಬ್ರಹ್ಮಾಂಡ ಧರಿಸಿಹನು |

ಸಂಕರುಷಣನ ಮೇಲೆ ಮಲಗಿಹ

ಬಿಂಕವಿರದಿಹ ವಿಷ್ಣುದೇವನೆ

ಸಂಕರುಷಣನ ತಮ್ಮ ಕೃಷ್ಣನೆ ಸಚ್ಚಿದಾನಂದ || ೫೯೮ ||

ಶಂ-ತಮನೆ ಮಂಗಲತಮನೆ ಹರಿ

ಹಂತಕರ ಹಂತಕನೆ ಕೃಷ್ಣನೆ

ಕಂತುಪಿತ ಶಂಕರನ ಸಖ ನಾರಾಯಣನೆ ಕೃಷ್ಣ |

ಅಂತಕಾಂತಕ ದುಷ್ಟರಂತಕ

ಚಿಂತೆ ಕಳೆಯುವ ಚಿನ್ಮಯನೆ ಹರಿ

ಕಂತುರಹಿತದಿ ಪೂರ್ಣಭಕ್ತಿಯಲಿವನ ಭಜಿಸೋಣ || ೫೯೯ ||

ಈಶನೊಡೆಯನು ಸಕಲ ಸೃಷ್ಟಿಗೆ-

-ಯೀಶ ಕರ್ಮಕೆ ಫಲಕೆ ಕಾಲಕೆ-

-ಯೀಶ ಸರ್ವರೊಳಗಿರುವಂತಹ ಹೇ ಪರಬ್ರಹ್ಮ |

ಪಾಶ ಕಳೆಯೆಲೊ ಲೋಕಬಂಧದ

ನಾಶ ಮಾಡೆಲೋ ನೀಯವಿದ್ಯೆಯ

ಕೇಶವನೆ ಮಾಧವನೆ ನಾರಾಯಣನೆ ಪರಮೇಶ || ೬೦೦ ||

ಓಂಕಾರ-ಸುವಿಗ್ರಹನೆ ಹರಿ-

-ಯೋಂಕಾರಸ್ವರೂಪ ಕೃಷ್ಣನೆ-

-ಯೋಂಕಾರನೆ ಕಾರ್ಯಬ್ರಹ್ಮನೆಯಪರಬೊಮ್ಮನಿವ |

ಝೇಂಕಾರವದೋಂಕಾರದಿ

ಹೂಂಕರಿಸುತ ಸೇರಿ ಹೋಗಲು

ಸಾಂಕರ್ಯತೆಯಿರದ ಕಾರಣಬ್ರಹ್ಮ ಪರಬೊಮ್ಮ || ೬೦೧ ||