ಸ್ತೋತ್ರಸಂಹಿತಾ ೩.೧ (ಸ್ವರಚಿತ ಸ್ತೋತ್ರಗಳು, ವಿವರಣೆ ಸಹಿತ)

 ಸುರಧೇನುಸ್ಸುರಾವಾಸಸ್ಸ್ವರ್ಪತಿರ್ವಿಶ್ವಮೋಹಕಃ |

ಪ್ರಾಣಪತಿಸ್ತ್ರಯೀರೂಪಶ್ಚೇಶ್ವರಃ ಕೌಸ್ತುಭಪ್ರಿಯಃ || ೨೯ || (೨೦೦) 

ಸುರಧೇನು ಕಾಮದುಘೆ ಶ್ರೀಹರಿ

ಸುರರ ವಾಂಛಿತವೀವ ದೇವನೆ

ವರದ ಕೃಷ್ಣನೆ ಸರ್ವದೇವಾತ್ಮಕನೆ ಪರಬೊಮ್ಮ |

ಪರಮಮಂಗಲರೂಪ ಸಂತತ

ಚರಮಗತಿದಾಯಕ ಪರಾತ್ಪರ

ಕರುಣವಾರಿಧಿ ರುಕ್ಮಿಣೀವಲ್ಲಭನೆ ಶ್ರೀಕೃಷ್ಣ || ೧೯೩ ||

ಸುರಾವಾಸನೆ ದೇವತಾಶ್ರಯ

ಸುರರ ಮೂಲನೆ ವಾಸುದೇವನೆ

ಸುರರೊಳತಿ ವಿಭವದಲಿ ಸಂನಿಧಿ ಹೊಂದಿರುವ ಕೃಷ್ಣ |

ಸುರರ ಸ್ವರ್ಲೋಕಾತ್ಮಕನೆ ಹರಿ

ಸುರವರದ ಪರಮಾತ್ಮ ಸುರನುತ

ಸುರರ ರೂಪಿಲಿ ಲೋಕ ಪಾಲಿಸುವಂತೆ ತೋರುವನೆ || ೧೯೪ ||

ದೇವಲೋಕದ ಪತಿಯೆ ಸ್ವರ್ಪತಿ

ಕಾವ ಮೂವತ್ಮೂರು ಕೋಟಿಯ

ದೇವನಿಕರವ ಲೋಕಧರ್ಮವ ದೇವ ಶ್ರೀಹರಿಯೆ |

ಭಾವಕೊಲಿವ ಮಹಾತ್ಮ ಸ್ವರ್ಗದ

ದೇವಲೋಕವ ಕಾಯ್ವ ಶ್ರೀಪತಿ

ಸಾವಿನಾಚೆಯ ಮುಕುತಿ ತೋರೆಮಗೆನುತ ಶರಣಾದೆ || ೧೯೫ ||

ವಿಶ್ವಮೋಹಕ ಕೃಷ್ಣದೇವನೆ

ವಿಶ್ವವನೆ ಮೋಹದೊಳು ಕೆಡಹಿದ

ವಿಶ್ವಮಾಯಾಲೋಲ ವಿಶ್ವದ ರೂಪ ಶ್ರೀಕೃಷ್ಣ |

ವಿಶ್ವಜನಮೋಹನನೆ ಮೋಹಿನಿ

ವಿಶ್ವದಸುರರ ಮೋಹಗೊಳಿಸಿಹೆ

ವಿಶ್ವನಾಥಸುಪುತ್ರ ಹರಿಹರನನ್ನು ಹೆತ್ತವನೆ || ೧೯೬ ||

ಪ್ರಾಣಪತಿ ಜಗಜೀವನನೆ ಹರಿ

ಕಾಣದಸುವಿಗು ಮೂಲಶಕ್ತಿಯೆ

ಪ್ರಾಣವ್ಯಾನೋದಾನಪಾನಸಮಾನ ಪಂಚಪತಿ |

ಪ್ರಾಣರೂಪನೆ ಮುಖ್ಯಪ್ರಾಣನೆ

ಪ್ರಾಣವಾಯುವಿನಧಿಪ ಕೃಷ್ಣನೆ

ಪ್ರಾಣನಂತರ್ಯಾಮಿ ಪಂಚಪ್ರಾಣ ಸಕಲರಿಗೆ || ೧೯೭ ||

ತ್ರಯೀರೂಪನೆ ವೇದರೂಪನೆ

ತ್ರಯೀನಾಮ ಋಗ್ಯಜುಸ್ಸಾಮನೆ

ತ್ರಯೀಶನೆ ಸಂಹಿತಾಬ್ರಾಹ್ಮಣರಣ್ಯಕೋಪನಿಷತ್ |

ತ್ರಯೀರೂಪಾಧಿದೈವನೆ ಹರಿ

ತ್ರಯೀತನುವಧಿಭೂತ ಕೃಷ್ಣನೆ

ತ್ರಯೀಕಾಯಧ್ಯಾತ್ಮ ತ್ರಿಗುಣಾತ್ಮಕ ಗುಣಾತೀತ || ೧೯೮ ||

ಈಶ್ವರನೆ ಸಕಲಕ್ಕು ಸೃಷ್ಟಿಯ

ನಶ್ವರದ ತೋರಿಕೆಯ ಮೂಲನೆ

ಪಶ್ವಾದಿ ಜೀವರನು ಕಾಯುವ ಸಗುಣ ಪರಬೊಮ್ಮ |

ವಿಶ್ವರೂಪನೆ ವಿಶ್ವಮೂಲನೆ

ವಿಶ್ವನಾಥನೆ ವಿಶ್ವನಾಶನೆ

ವಿಶ್ವಪಾಲಕ ವಿಶ್ವಕರ್ತನೆ ನಿರ್ಗುಣನೆ ಬೊಮ್ಮ || ೧೯೯ ||

ಕೌಸ್ತುಭಪ್ರಿಯ ಕೃಷ್ಣರೂಪನೆ

ಕೌಸ್ತುಭಾಖ್ಯ ಸುರತ್ನಧಾರನೆ

ಕೌಸ್ತುಭವ ಮಥನದಲಿ ಸಾಗರದಿಂದ ಪಡೆದವನೆ |

ಕೌಸ್ತುಭ ಕು ಭೂಮಿಯಲಿ ವ್ಯಾಪಕ

ಕುಸ್ತುಭವು ಸಾಗರವದರಲಿಹ

ಕುಸ್ತುಭನ ವಿಷ್ಣುವಿನ ರತ್ನವು ಕೃಷ್ಣಗತಿಪ್ರಿಯವು || ೨೦೦ ||

ಅಕ್ರೂರವರದಶ್ಚೈವ ಪ್ರಲಮ್ಬಾಸುರಭಞ್ಜನಃ|

ಉದ್ಧವಪ್ರಿಯನಾಥಶ್ಚ ಮಹೇನ್ದ್ರಗರ್ವಹಾರಕಃ||೩೦||(೨೦೪)

ಅಕ್ರೂರವರದಪ್ರಮೇಯನೆ

ವಿಕ್ರಮದಿ ದುಷ್ಟರನು ಗೆಲಿದನೆ

ಶಕ್ರವಂದಿತ ಕಂಸಮಂತ್ರಿಗೆ ವರವ ತಾನಿತ್ತ |

ಚಕ್ರಧಾರಿಯೆ ಕೃಷ್ಣ ಮಾಧವ

ವಕ್ರದಾರಿಯ ಸರಿಪಡಿಸುವವ

ನಕ್ರಹರ ಕರಿವರದ ಶ್ರೀಹರಿ ಶರಣು ಶರಣೆಂಬೆ ||  ೨೦೧ ||

ಪ್ರಲಂಬಾಸುರಭಂಜನನೆ ಹರಿ

ವಿಲಂಬವ ಮಾಡದಲೆ ದುಷ್ಟನ

ಪ್ರಲಂಬನ ಸಂಹರಿಸಿ ಬಾಲರ ರಕ್ಷಿಸಿದ ಕೃಷ್ಣ |

ಸ್ವಲಂಕೃತ ಬಾಲಕನ ವೇಷದಿ

ಪ್ರಲಂಬನು ಗೋಪಾಲಬಾಲರ-

-ನಲಂಬಿಸಿ ಬಂದಾಗ ನಿಗ್ರಹಿಸಿದವಗೆ ನಾ ಶರಣು || ೨೦೨ ||

ಉದ್ಧವಪ್ರಿಯನಾಥ ಕೃಷ್ಣನೆ

ಸಿದ್ಧಸಾಧ್ಯರನುದ್ಧರಿಸಿದನೆ

ಬುದ್ಧಿಮೂಲನೆ ಗೋಪವಂಶಜ ವಾಸುದೇವನೆಲಾ |

ಬದ್ಧವೈರಿಧ್ವಂಸಕಾರಕ

ಶುದ್ಧಭಕ್ತಶ್ರೇಯಕಾರಕ

ಬುದ್ಧಶುದ್ಧವಿಮುಕ್ತ ಸರ್ವಾಂತರ ಪರಬ್ರಹ್ಮ || ೨೦೩ ||

ಮಹೇಂದ್ರಗರ್ವಹಾರಕನೆ ಹರಿ

ಮಹೇಂದ್ರನ ಸುರಪತಿಯ ದರ್ಪವ

ಮಹೇಂದ್ರನ ಗರ್ವವನು ಮುರಿದಿಕ್ಕಿದನು ಶ್ರೀಕೃಷ್ಣ |

ಮಹೇಂದ್ರನು ಬಲುವರ್ಷ ಸುರಿಸಲು

ಮಹೇಂದ್ರನಿಗಿದಿರಾಗಿ ಗಿರಿಧರ

ಮಹೇಂದ್ರನ ಬಲ ಭಂಗಗೊಳಿಸಿದ ಗೋ-ಜನರ ಕಾಯ್ದ || ೨೦೪ ||

ರಾಧಾಪ್ರಿಯತಮಶ್ಶ್ರೀಮಾನ್ ರುಕ್ಮಿಣೀವಲ್ಲಭೇಶ್ವರಃ|

ನಾಥನಾಥಶ್ಚ ಶ್ರೀನಾಥೋ ಲಕ್ಷ್ಮೀನಾಥೋ ಹ್ಯನಾಥಪಃ||೩೧||(೨೧೧)

ರಾಧಾಪ್ರಿಯತಮನೆ ಕೃಷ್ಣನೆ

ರಾಧೆಗತಿಪ್ರಿಯ ಪ್ರಕೃತಿಪುರುಷನೆ

ರಾಧೆಯಾರಾಧನೆಗೆ ತಾನೊಲಿದಿರುವ ಪರತತ್ತ್ವ |

ರಾಧೆ ಶಕ್ತಿಯು ಕೃಷ್ಣ ಪುರುಷನು

ರಾಧೆ ಕೃಷ್ಣನಭಿನ್ನ ಶಕ್ತಿಯು

ರಾಧೆ ಕೃಷ್ಣನ ಪ್ರೇಮಭಕ್ತಿಲಿ ವಶವ ಗೈದಿಹಳು || ೨೦೫ ||

ಶ್ರೀಮಾನ್ ಸಿರಿ ಲಕುಮಿಸಹಿತನೆ

ಶ್ರೀಯುತನೆ ಲಕ್ಷ್ಮೀಶ ಶ್ರೀಹರಿ

ಶ್ರೀಭೂಮಿಯರ ಪತಿಯೆ ನಾರಾಯಣ ಪರಬ್ರಹ್ಮ |

ಶ್ರೀಶ ಶ್ರೀಪತಿ ಶ್ರೀಪ ಶ್ರೀನಿಧಿ

ಶ್ರೀವರನೆ ಶ್ರೀಕೃಷ್ಣ ಶ್ರೀಧರ

ಶ್ರೀಧಾಮ ಶ್ರೀಲೋಲ ಶ್ರೀಕರ ಶ್ರೀರಮಣ ಶ್ರೀದ || ೨೦೬ ||

ರುಕ್ಮಿಣೀವಲ್ಲಭೇಶ್ವರ ಹರಿ

ರುಕ್ಮವರ್ಣೆಯ ಹೊನ್ನ ಬಣ್ಣದ

ರುಕ್ಮಿಸೋದರಿ ಭೀಷ್ಮಕಾತ್ಮಜೆ ಕಮಲೆ ವೈದರ್ಭೀ |

ರುಕ್ಮಿಣಿಯ ಪತಿ ಕೃಷ್ಣನೀಶ್ವರ

ರುಕ್ಮವಸ್ತ್ರನು ಪೀತದಂಬರ

ರುಕ್ಮಿಣೀಪತಿ ಲೋಕದೊಡೆಯನಗೆ ಶರಣು ಶ್ರೀಕೃಷ್ಣ || ೨೦೭ ||

ನಾಥನಾಥ ಜಗನ್ನಾಥ ಹರಿ

ನಾಥರಧಿಪತಿ ಲೋಕನಾಥನೆ

ನಾಥ ದೀನರನಾಥಬಂಧುವೆ ಭಕ್ತರಾಧೀನ |

ಭೂತಪತಿನೇಹಿಗನೆ ವಿಷ್ಣುವೆ

ಮಾತನಾಡದವನಿಗೆ ವಾಕ್ಪ್ರದ

ನಾಥ ರುಕ್ಮಿಣಿನಾಥ ಸದ್ಗುರುನಾಥ ಶ್ರೀನಾಥ || ೨೦೮ ||

ಶ್ರೀನಾಥ ಸಿರಿರಮಣ ಕೃಷ್ಣನೆ

ಶ್ರೀನಾಥ ಭೂಪತಿ ಜಗಪತಿಯೆ ಹರಿ

ಹೇ ನಾಥ ಮೂರ್ಲೋಕಕ್ಕೆ ನಾರದವಂದ್ಯ ನಾರಯಣ |

ಸನ್ನಾಥ ಯದುನಾಥ ಗೋಪತಿ

ತನ್ನಾಥ ತದ್ವಾಚ್ಯ ಬೊಮ್ಮನೆ

ಶಂನಾಥ ಮಂಗಲನಾಥ ದೇವ ದಯಾನಿಧಿಯೆ ಕೃಷ್ಣ || ೨೦೯ ||

ದೇವ ಲಕ್ಷ್ಮೀನಾಥ ವಿಷ್ಣುವೆ

ಕಾವ ಮೂಜಗವನ್ನು ನಿತ್ಯವು

ಸಾವ ಮೀರಿದ ಮುಕುತಿಯೀವ ಮಹಾತ್ಮ ಶ್ರೀಕೃಷ್ಣ |

ಭಾವಕೊಲಿವನೆ ಲಕುಮಿವರನೇ

ಮಾವ ಕಂಸಗೆ ಮೃತ್ಯು ದುಷ್ಟಗೆ

ನೋವ ಕಳೆ ಸಚ್ಚಿತ್ಸುಖದ ದರುಶನವ ನೀಡಯ್ಯ || ೨೧೦ ||

ಅನಾಥಪ ಹರಿ ಕೃಷ್ಣದೇವನೆ

ವಿನಾ ನಿನ್ನಾರಿಹರು ಲೋಕದಿ

ಸುನಾಥನು ನೀನನಾಥರಿಗೆನುತಾನು ಬಿನ್ನವಿಪೆ |

ಜನಾರ್ದನ ಜಗದೇಕನಾಥನೆ

ಸನಾತನ ನಿತ್ಯ ನೂತನ ಹರಿ

ವಿನಾ ನಿನ್ನಲುಗಾಡದೀ ತೃಣ ಕೂಡ ಜಗದೊಳಗೆ || ೨೧೧ ||

ನರಕಾಸುರಸಂಹರ್ತಾ ಸ್ತ್ರೀಬಂಧನವಿಮೋಚಕಃ|

ಮಾರಪಿತಸ್ಸ್ಮೇರಮುಖೋ ಹಾರತೂಣೀರಭೂಷಣಃ||೩೨||(೨೧೬)

ನರಕಾಸುರಸಂಹರ್ತ ಹರಿ

ನರಕನೆಂಬಸುರನು ಭುವಿಯ ಸುತ

ನರಕ ಭೌಮನು ಷೋಡಶದ ಸಾಸಿರದ ಷೋಡಶಿಯ |

ಸೆರೆಗೆ ನೂಕಿದ ಗಣವ ರಾಜ ಕು-

-ವರಿಯರನು ಬಿಡಿಸಿದನು ಕೃಷ್ಣನು

ಧರಣಿಯಂಶಜೆ ಸತ್ಯಭಾಮೆಯ ಕೂಡಿ ಸೆಣಸಾಡಿ || ೨೧೨ ||

ಸ್ತ್ರೀಬಂಧನವಿಮೋಚಕ ಹರಿ

ತಾ ಬಂದು ನರಕಾಸುರನ ವಶ-

  -ದಾ ಬಂಧನದಲಿದ್ದ ಷೋಡಶ ಕನ್ಯೆಸಾಸಿರವ |

ನೀ ಬಂಧು ದೀನರನು ಬಿಡಿಸಿದೆ

ಹೇ ಬಂಧ ಭವವನ್ನು ಕಳೆವನೆ

ಸ್ತ್ರೀಬಂಧ ನಿನಗಾಯ್ತಬಂಧವು ನರಕನಾಶನವು || ೨೧೩ ||

ಮಾರಪಿತ ಮನ್ಮಥನ ತಂದೆಯೆ 

ಮೂರು ಲೋಕಗಳೊಡೆಯ ಕೃಷ್ಣನೆ

ಪಾರುಗಾಣಿಸು ಭವದಿ ನಿನ್ನನುದಿನವು ಭಜಿಪರಿಗೆ |

ಮೇರೆ ಮೀರಿದ ಶಕ್ತಿ ನಿನ್ನದು

ಮಾರಮಣ ಮಾರಹರಮಿತ್ರನೆ

ಮಾರಣದಿ ಹೂರಣವ ತುಂಬುತ ಸೃಷ್ಟಿಸ್ಥಿತಿಗೈದೆ || ೨೧೪ ||

ಸ್ಮೇರಮುಖ ಸ್ಮಿತವದನ ಕೃಷ್ಣನೆ

ಚೋರಗುರು ಸುಂದರನೆ ಶ್ರೀಹರಿ

ಪಾರಮಾರ್ಥಿಕ ಜ್ಞಾನವಿತ್ತೆಮಗೀಯೊ ಕೈವಲ್ಯ |

ಕ್ರೂರ ಕರಣಾದಿಗಳ ತಡೆಹಿಡಿ

ಮಾರಪಿತ ಮಾರನನು ತಡೆಹಿಡಿ

ತೋರದಾತ್ಮವ ತೋರು ನೀನನುಭವದಿ ಶರಣಾದೆ || ೨೧೫ ||

ಹಾರತೂಣೀರಭೂಷಣ ಹರಿ

ಹಾರ ಬತ್ತಳಿಕೆಗಳ ಧರಿಸಿಹ

ನಾರಯಣ ಶಾರ್ಙ್ಗಧರ ಕೇಶವ ಮಾಧವನೆ ಕೃಷ್ಣ |

ಸಾರಸರ್ವನೆ ಮೇರುತುಲ್ಯನೆ

ಸಾರಸಾಂಬಕ ಚಾರುಭೂಷಣ

ಕಾರುಣಿಕ ಪರಮಾತ್ಮ ಶ್ರೀಧರ ದೇವ ಪರಬೊಮ್ಮ || ೨೧೬ ||

ಶಮ್ಭುಪ್ರಿಯಶ್ಚ ಸಾನನ್ದೋ ಬ್ರಹ್ಮಾನನ್ದೋ ವಿಧಿಸ್ತುತಃ|

ಶಙ್ಖಧಾರೀ ಯಮಶ್ಶಾರ್ಙ್ಗೀ ರಾಘವೋ ರವಿವಂಶಜಃ||೩೩||(೨೨೫)

ಶಂಭುಪ್ರಿಯನೆ ಕೃಷ್ಣ ವಿಷ್ಣುವೆ

ನಂಬಿದವರನು ಕಾಯುತಿರುವನೆ

ಬೆಂಬಿಡದೆ ನೂರ್ಕಾಲ ರಕ್ಷಿಸಿ ಮುಕ್ತಿಬೋಧಪ್ರದ |

ಶಂಭು ಶಂ ಮಂಗಳಕೆ ಕಾರಣ

ಶಂ ಭವತಿ ಹರನಿಂದ ಕೃಷ್ಣನು

ಶಂಭುಮಿತ್ರನು ಪ್ರಿಯನು ಕೇಶವ ಶಿವನುತನೆ ಹರಿಯೆ || ೨೧೭ ||

ಸಾನಂದನೇ ಶ್ರೀಕೃಷ್ಣದೇವನೆ

ಸ್ವಾನಂದರೂಪ ಪರಬ್ರಹ್ಮನೆ

ಹೇ ನಂದನಂದನ ಚಿದಾನಂದ ಸದಾನಂದನಿಧೇ |

ಸಾನಂದ ತಾನಂದ ಸಹಿತನೆ

ಶ್ರೀನಂದ ಸಿರಿರಮಣ ವಿಷ್ಣುವೆ

ಭಾನಂದ ಸುಜ್ಞಾನಾತ್ಮರಮಣ ಸಚ್ಚಿತ್ಸುಖ ಪರಾನಂದ || ೨೧೮ ||

ಬ್ರಹ್ಮಾನಂದ ಭೂಮಾನಂದ

ಬ್ರಹ್ಮ ಬೃಂಹಣ ವಿಸ್ತರಾತ್ಮನೆ

ಬ್ರಹ್ಮ ನಿತ್ಯಾನಂದ ಪರಮಾನಂದ ಸಚ್ಚಿತ್ಕ |

ಬ್ರಹ್ಮ ಬೃಹದಿದು ಬ್ರಹ್ಮ ಮಹದಿದು

ಬ್ರಹ್ಮಾನಂದ ಮಹದಾನಂದ

ಬ್ರಹ್ಮ ಬೃಹದಾನಂದ ಕೃಷ್ಣನೆ ಸಚ್ಚಿದಾನಂದ || ೨೧೯ ||

ವಿಧಿಸ್ತುತ ಹರಿ ಬೊಮ್ಮನುತ ಹೇ

ವಿಧಾತಪ್ರಿಯ ಬೊಮ್ಮಪಿತ ಹರಿ

ಸುಧಾಸಾಗರ ವಿಧಾಯಕ ಶ್ರೀಕೃಷ್ಣ ನಾರಯಣ |

ಆದಿಯಲಿ ಸ್ತುತಿಸುವನು ಬೊಮ್ಮನ-

-ನಾದಿದೇವನ ನಡುವೆ ಕೊನೆಯೊಳು

ಬೋಧ ನೀಡೈ ಕ್ಷೇಮ ನೀಡೈ ಯೋಗ ನೀಡೆಂದು || ೨೨೦ ||

ಶಂಖಧಾರೀ ಪಾಂಚಜನ್ಯವ

ಶಂಖದೈತ್ಯನ ಪಂಚಜನನನು

ಶಂಕೆಯಿಲ್ಲದೆ ಕೊಂದು ಧರಿಸುತ ಶಂಖಧರನಾದೆ |

ಶಂಖ ಶಂ-ಕರವರಿಭಯಂಕರ

ಪಂಖ ಶಿಷ್ಟರ ತಂಪು ಮಾಡುವ

ಶಂಖ ದುಷ್ಟರ ಗರ್ಭನಾಶಕ ಕೃಷ್ಣಕರದೊಳಗೆ || ೨೨೧ ||

ಯಮನೆ ನೀ ಹರಿ ನಿಯಮ ನೀನೇ

ಯಮ ನಿಯಮಗಳ ನಿಯತಿ ನೀನೇ

ಯಮನ ನಿಯಮನ ಫಲಾಫಲಗಳ ನೀನೆ ಶ್ರೀಕೃಷ್ಣ |

ಸುಮನ ಸಹಮನ ಜವನ ರೂಪನ

ಕುಮನ ಹನನನ ಘನಮಹಿಮನನು

ವಿಮನವಿರದಮಿತಾದರದಿ ಯಮನಿಯಮದಲಿ ನುತಿಪೆ || ೨೨೨ ||

ಧನುವು ಶಾರ್ಙ್ಗವು ಹರಿಯೆ ಶಾರ್ಙ್ಗೀ

ಧನುವ ಧರಿಸುತ ಶಾರ್ಙ್ಗಪಾಣೀ

ದನುಜಮರ್ದನ ದುಷ್ಟಶಿಕ್ಷಣ ಶಿಷ್ಟರಕ್ಷಣಕೆ |

ಜನುಮ ಕೃಷ್ಣನ ಸೇವೆಗೈಯಲು

ವಿನುತ ಸೇವಿತ ಪಾದಪದುಮನು

ಜನುಮ ಜನುಮದಿ ಸೇವೆಗೈಯುವ ಭಾಗ್ಯ ಕೊಡಲೆಮಗೆ || ೨೨೩ ||

ರಾಘವನೆ ರಘುವಂಶಜನೆ ಹರಿ

ನಾಗಶಯನನೆ ಭಾಗವತಪ್ರಿಯ

ಸಾಗರದಿ ಮಲಗಿರುವ ಶ್ರೀಮನ್ನಾದಿನಾರಯಣ |

ತೂಗಿ ಪಾಡುವೆ ಬಾಲಕೃಷ್ಣನೆ

ಯೋಗಿಧ್ಯೇಯನೆ ಸಾಗಿ ಬಾರೈ

ರೋಗದೂರನೆ ವಿಹಗವಾಹನ ಕೃಷ್ಣ ಹೇ ವಿಷ್ಣೋ || ೨೨೪ ||

ರವಿವಂಶಜಾತ್ಮಕ ರಾಮ ಶ್ರೀಹರಿ

ಸವೆಸಿದೆಯ ಜೀವನವ ವನದಲಿ

ಭವವ ಕಳೆ ಸಂಭವಿಸು ಕಲಿಯಲಿ ದುಷ್ಟಶಿಕ್ಷಣಕೆ |

ಕವಿಯ ಹೃದಯಜ ಸಂತಹೃಜ್ಜನೆ

ಸವಿವ ಲೌಕಿಕ ಜೀವರೂಪನೆ

ರವಿಯ ವಂಶದಿ ಜನಿಸಿದಂಥ ಮಹಾನುಭಾವ ಹರಿ || ೨೨೫ ||

ಮಧುಪಣ್ಡಿತಸೇವ್ಯಶ್ಚೇಶಾನಶ್ಚ ಯದುವಂಶಜಃ|

ಭಕ್ತಿವೇದಾನ್ತವನ್ದ್ಯಶ್ಚ ಶ್ರೀಮದ್ಭಾಗವತಾಮೃತಃ||೩೪||(೨೩೦)

ಮಧುಪಂಡಿತಸೇವ್ಯ ಕೃಷ್ಣನೆ

ಮಾಧವಪ್ರಿಯಭಕ್ತಸೇವಿತ

ಮಧುವ ತವ ಚರಣಕಮಲದಲಿಹನರಿತಿರುವ ಜ್ಞಾನಿ |

ಮಧುಪಂಡಿತನು ಭಕ್ತಿಮಾರ್ಗದಿ

ಮಾಧವನ ಹರೆ ಕೃಷ್ಣ ಮಾರ್ಗದಿ

ಸಾದರದಿ ಭಜಿಸುತ್ತ ಕೃಷ್ಣಪ್ರಜ್ಞೆ ಪಡೆದಿಹನು || ೨೨೬ ||

ಈಶಾನ ತವ ಚರಣ ಪಿಡಿವೆನು

ಸಾಶನರ ನಿರಶನರ ಪತಿ ಹರಿ

ಪಾಶ ಹರಿದೊಗೆ ಜನನ ಮರಣದ ಮುಕ್ತಿ ದಯಮಾಡು |

ಈಶ ನೀ ಜಗಕೆಲ್ಲ ಕೃಷ್ಣನೆ

-ಯೀಶಾನ ರೂಪಿನಲಿ ದಿಕ್ಪತಿ

ಪಾಶ ಮಾಯೆಯ, ಪತಿಯು ಸಹ, ಕೈಮುಗಿದು ಶರಣಾದೆ || ೨೨೭ ||

ಯದುವಂಶಜನೆ ಯಾದವನೆ ಹರಿ

ಯದುಮಹಾರಾಜಾನ್ವಯಕೆ ಸಿರಿ

ಯದುಪತಿಯೆ ಯದುಪಾಲಕನೆ ಗೋಪಾಲ ಶ್ರೀಕೃಷ್ಣ |

ಯಾದವಾಗ್ರಣಿ ಯಾದಸಾಂಪತಿ

ಯಾದಿಗಟ್ಟಲೆ ಕನ್ನೆಯರಸನೆ

ಮೋದಬೋಧಸದಮಲರೂಪನೆ ಸಚ್ಚಿದಾನಂದ || ೨೨೮ ||

ಭಕ್ತಿವೇದಾಂತವಂದ್ಯನೆ ಹರಿ

ಭಕ್ತಿದಾತನೆ ಭಕ್ತಿವಶ್ಯನೆ

ಭಕ್ತಿಸಾಧನನಿರತ ಸಾಧುಗಳಿಂದ ಪೂಜಿತನೆ |

ಭಕ್ತಿರೂಪನೆ ಭಕ್ತಪ್ರೀಯನೆ

ಭಕ್ತಿಯಲಿ ವೇದಾಂತಿಗೊಲಿದನೆ

ಭಕ್ತಿವೇದಾಂತಾಪ್ತ ಕೃಷ್ಣಪ್ರಜ್ಞೆ ವಿಶ್ವಾತ್ಮ || ೨೨೯ ||

ಶ್ರೀಮದ್ಭಾಗವತಾಮೃತನೆ ಹರಿ

ಶ್ರೀಮಹಾನುಭವಾತ್ಮ ಕೃಷ್ಣನೆ

ಕಾಮಪಿತ ಭಾಗವತರೂಪದಿ ನಿತ್ಯ ನೆಲೆಸಿಹನೆ |

ಭೂಮ ಭಾಗವತಾಮೃತನೆ ಹರಿ

ಸಾಮ ಭಗವಾನ್ ಕೃಷ್ಣಚಂದಿರ

ಸೋಮಸುಂದರ ದೇವ ರಕ್ಷಿಸು ನಮ್ಮನನವರತ || ೨೩೦ ||

ಸತ್ಯಸನ್ಧಶ್ಚ ಸತ್ತ್ವಸ್ಥೋ ಸತ್ತ್ವದಸ್ಸಾತ್ವತಾಂ ಪತಿಃ|

ಸದ್ಗುಣಾಢ್ಯಸ್ಸದಾಚಾರಸ್ಸನ್ಮಾರ್ಗೋ ಮಾರ್ಗದರ್ಶಕಃ||೩೫||(೨೩೮)

ಸತ್ಯಸಂಧನೆ ಕೃಷ್ಣದೇವನೆ

ಸತ್ಯವನು ಕಾಯಲಿಕೆ ಲೋಕದಿ

ಸತ್ಯನಿಜರೂಪವನು ತೋರಿದೆ ಬೋಧಿಸಿದೆ ನರಗೆ |

ಸತ್ಯದನುಸಂಧಾನಿ ನಿತ್ಯವು

ಸತ್ಯಬಂಧನದಲ್ಲಿ ಬದುಕಿದೆ

ಸತ್ಯಸಂಕಲ್ಪಾತ್ಮಕನೆ ಹರಿ ಸಲಹು ಸಂತತದಿ || ೨೩೧ ||

ಸತ್ತ್ವಸ್ಥ ಹರಿ ಸತ್ತ್ವಗುಣಧಾಮನೆ

ಸತ್ತ್ವ ಜಗದಸ್ತಿತ್ವ ಸತ್ತೆಯು

ಸತ್ತ್ವ ಸಾರವು ಚಿತ್ತಸ್ಥ ಹರಿ ವಾಸುದೇವನೆಲಾ |

ಸತ್ತ್ವಶುದ್ಧಿಯ ನೀಡು ಭಕ್ತಗೆ

ಸತ್ತ್ವಗುಣವನು ನೀಡು ಜ್ಞಾನಿಗೆ

ಸತ್ತ್ವ ಸಚ್ಚಿತ್ಸುಖಸ್ವರೂಪನೆ ಸಚ್ಚಿದಾನಂದ || ೨೩೨ ||

ಸತ್ತ್ವದನೆ ಸತ್ತ್ವವನು ನೀಡುವಿ

ಸತ್ತ್ವ ನಿನ್ನದೆ ಸತ್ತ್ವ ನೀನೆಲೆ

ಸತ್ತು ಹುಟ್ಟುವುದನ್ನು ಹೋಗಿಸು ಸಾತ್ವತರ ಪತಿಯೆ |

ಸತ್ತ್ವವಸ್ತಿತ್ವವದು ಸರ್ವಕು

ಸತ್ತ್ವ ಚಿತ್ತವು ನಿಖಿಲ ಜೀವರ

ಸತ್ತ್ವ ನೀಡುತ ಪೋಷಿಸುವ ಹರಿ ಕೃಷ್ಣ ಪರಮಾತ್ಮ || ೨೩೩ ||

ಸಾತ್ವತಾಂಪತಿ ಸಾತ್ತ್ವತರ ಪತಿ

ಸಾತ್ತ್ವತರ ಯಾದವರ ನಾಯಕ

ಸಾತ್ವತರ ಕುಲಪಾವನನೆ ಹರಿ ಕೃಷ್ಣ ಪರಮಾತ್ಮ |

ಸತ್ತ್ವಗುಣಸಂಪನ್ನ ವಿಷ್ಣುವೆ

ಸಾತ್ವತನ ಕುಲದಲ್ಲಿ ಜನಿಸಿದೆ

ಸತ್ತ್ವ ತತ್ತ್ವ ಜಗತ್ತ್ವ ಪರಮಾತ್ಮತ್ವ ನಿನಗಿಹುದು || ೨೩೪ ||

ಸದ್ಗುಣಾಢ್ಯನೆ ಸಜ್ಜನರ ದೊರೆ

ಮದ್ಗುಣವ ಪೊರೆ ದುರ್ಗುಣವ ಕಳೆ

ಮದ್ಗುಣದಿ ಲೋಕಹಿತ ಕಾಪಿಡುವಂತೆ ಪ್ರೇರಕನೆ |

ಸದ್ಗುಣಗಳಿಂ ಶ್ರೇಷ್ಠನಾಗಿಹೆ

ಸದ್ಗುಣಗಳನು ನೀಡು ಸಂತತ

ಸದ್ಗುಣಾಢ್ಯ ಗುಣಾಢ್ಯನಾಢ್ಯನು ದೇವದೇವ ಹರಿ || ೨೩೫ ||

ಸದಾಚಾರನೆ ಕೃಷ್ಣ ಶ್ರೀಹರಿ

ಸದಾ ಸಚ್ಚರಿತನು ಮಹಾತ್ಮನು

ಸದಾ ಚರಿಪನುಮಾತ್ಮರೂಪಿಲಿ ಸ್ಥಾಣುವಾಗಿರುವ |

ವಿಧಾಯಕ ಹರಿ ಸಕಲ ಲೋಕಕೆ

ಮುದಾತ್ಮಕ ಮದರಹಿತ ಕೃಷ್ಣನೆ

ವಿದಾಯವ ದೌಷ್ಟ್ಯಕ್ಕೆ ನೀಡೆಲೆ ವಾಸುದೇವ ಹರಿ || ೨೩೬ ||

ಸನ್ಮಾರ್ಗ ಹರಿ ಕೃಷ್ಣ ದೇವನೆ

ಸನ್ಮಾರ್ಗರೂಪನೆ ನಿಖಿಲ ಜೀವಕೆ

ಸನ್ಮಾರ್ಗ ಸದ್ಗತಿ ಸದಯನನೆ ನಾರಾಯಣನೆ ದೇವ |

ಸನ್ಮಾರ್ಗ ತೋರುವ ಮೋಕ್ಷಧಾಮನೆ

ಸನ್ಮನವ ಸಂತತವು ಕರುಣಿಸು

ಸನ್ಮತವ ಲೋಕದಲಿ ಹಬ್ಬಿಸಿ ಶಾಂತಿ ಕಾಪಾಡು || ೨೩೭ ||

ಮಾರ್ಗದರ್ಶಕ ಕೃಷ್ಣದೇವನೆ

ಮಾರ್ಗ ನಿನ್ನದೆ ಮಾರ್ಗ ನೀನೇ

ಮಾರ್ಗ ತೋರುವ ಹೇ ಮಹಾತ್ಮನೆ ಧೀಪ್ರಚೋದಕನೆ |

ಮಾರ್ಗ ಮುಕ್ತಿಯ ಭಕ್ತಿಶಕ್ತಿಯ

ಮಾರ್ಗ ಜ್ಞಾನವಿರಕ್ತಿಭುಕ್ತಿಯ

ಮಾರ್ಗ ತೋರೈ ದೇವದೇವನೆ ಸಲಹು ಸಕಲರನು || ೨೩೮ ||

ವಿದ್ಯಾವಾನಮಿತಾದ್ಯಶ್ಚ ಸದುದ್ಯಮಪ್ರದಃ ಪರಃ|

ಪ್ರದ್ಯೋತಶ್ಚಾತ್ಮವಿದ್ಯಶ್ಚ ವಿದ್ಯುತ್ಪ್ರಭಾಸಮನ್ವಿತಃ||೩೬||(೨೪೬)

ವಿದ್ಯಾವಾನ್ ಶ್ರೀಕೃಷ್ಣದೇವನೆ

ವಿದ್ಯಾಯುತನೆ ಬ್ರಹ್ಮನಿಷ್ಠನೆ

ವಿದ್ಯಾಧಿಪನೆ ಬ್ರಹ್ಮವಿದ್ಯೋಪದೇಶಕ ಕೃಷ್ಣ |

ವಿದ್ಯೆಯೀವನೆ ವಿದ್ಯೆರೂಪನೆ

ವಿದ್ಯೆಯುಳ್ಳವರಧಿಪ ಶ್ರೀಹರಿ

ವಿದ್ಯೆನೀಡುವ ಗುರುಗಳಿಗೆ ಗುರು ಹೇ ಜಗದ್ಗುರುವೆ || ೨೩೯ ||

ಅಮಿತನೇ ಹರಿ ಕೃಷ್ಣದೇವನೆ

ಸಮಿತನಲ್ಲವು ಮಿತಿಯ ರಹಿತನೆ

ಕುಮತಿದೂರನಸೀಮನತಿಸೀಮನೆಲ ನಿಸ್ಸೀಮ |

ಅಮತಿಗಳನುದ್ಧರಿಪ ಮತಿದನೆ

ವಿಮತಿಗಳ ಸರಿಹೊಂದಿಸುವ ಹರಿ

-ಯಮಿತ ಮಿತಿಗಳವಡದಮೇಯನೆಯಪ್ರಮೇಯ ಹರಿ || ೨೪೦ ||

ಆದ್ಯದೇವನೆ ಮೊದಲ ತತ್ತ್ವವೆ

ಬಾಧ್ಯನಲ್ಲವು ಸಕಲರಿಂದಲು

ಸಾಧ್ಯ ಸಾಧಕಪ್ರೇರಕನೆ ಹರಿ ದೇವ ಪರಮಾತ್ಮ |

ಆದ್ಯತೆಯು ನಿನಗಿಹುದು ಸರ್ವದಿ

ಸಾಧ್ಯತೆಯು ಸಕಲಾಪ್ತಿ ಕರುಣದಿ

ವೇದ್ಯ ವೇದಾಂತಾದಿಶಾಸ್ತ್ರಗಳಿಂದ ಶ್ರೀಕೃಷ್ಣ || ೨೪೧ ||

ಸದುದ್ಯಮಪ್ರದನೆ ಕೃಷ್ಣನೆ

ಸದುದ್ಯೋಗವ ತೋರ್ವ ದೇವನೆ

ವಿದುರವಂದ್ಯನೆ ಸತ್ಕರ್ಮದಲಿ ಪ್ರೇರಿಪನೆ ಹರಿಯೆ |

ಕದಾಚಿತ್ ಕಷ್ಟವನು ಕಂಡರೆ

ಸದಾ ಹರಿಚಿತ್ತವಿದು ತಿಳಿಯುತ

ಮುದದಿ ತವಸೇವೆಯವೊಲದ ಪರಿಹರಿಸು ಭಕ್ತಿಯಲಿ || ೨೪೨ ||

ಪರನೆ ಶ್ರೇಷ್ಠನೆ ಸಕಲದಾಚೆಯ

ಪರಮತತ್ತ್ವನೆ ಜೀವನೊಳಗಿಹ

ಪರಮಶಕ್ತಿಯೆ ಚರಮಗತಿ ಪರಮಾತ್ಮ ಪರಬೊಮ್ಮ |

ಹರನ ರೂಪದಿ ಲಯವ ಗೈಯುತ

ಹರಿಯ ರೂಪದಿ ಪಾಲಿಸುತಲಿಹ

ತ್ವರಿತ ಸೃಷ್ಟಿಲಿ ಬೊಮ್ಮನಾಗುವ ದೇವ ಪರಮೇಶ || ೨೪೩ ||

ಕೃಷ್ಣ ನೀ ಪ್ರದ್ಯೋತನಹುದೈ

ಕೃಷ್ಣನುರುತರ ಬೆಳಗುತಿರುವನು

ಕೃಷ್ಣ ಪರಮಜ್ಯೋತಿ ಸಕಲವ ಬೆಳಗಿ ತೋರುವನು |

ಕೃಷ್ಣ ವಿಷ್ಣುವು ವಿಶ್ವವ್ಯಾಪಕ

ಕೃಷ್ಣ ಶಿವ ಹೃದಯದಲಿ ಬೆಳಗುವ

ಕೃಷ್ಣ ಬೊಮ್ಮನು ಬೃಂಹಣದಿ ಸರ್ಗವನು ವಿಸ್ತರಿಸಿ || ೨೪೪ ||

ಆತ್ಮವಿದ್ಯನೆ ಕೃಷ್ಣದೇವನೆ

-ಯಾತ್ಮರೂಪನೆ ಸೃಷ್ಟಿರೂಪನೆ

-ಯಾತ್ಮವಿದ್ಯಾರೂಪ ಪರಮಾತ್ಮಾತ್ಮ ಪರಬೊಮ್ಮ |

ಆತ್ಮನೇಕನನೇಕರಹಿತನು-

-ಮಾತ್ಮಜ್ಞಾನವು ಮುಕ್ತಿದಾಯಕ-

-ವಾತ್ಮರೂಪವೆ ನಮ್ಮದೆಲ್ಲವು ಬೋಧಿಸಿದ ಕೃಷ್ಣ || ೨೪೫ ||

ವಿದ್ಯುತ್ಪ್ರಭಾಸಮನ್ವಿತ ಹರಿ

ವಿದ್ಯುತ್ತಿನ ಜ್ಯೋತಿಯಂತಿಹ

ವಿದ್ಯುತಿಯು ವಿಶಿಷ್ಟ ದ್ಯುತಿ ಸರ್ವಕ್ಕು ಮೂಲದ್ಯುತಿ |

ವಿದ್ಯುದಾದಿಗಳಲ್ಲಿ ಬೆಳಗವು

ವಿದ್ಯೆಯೊಂದೇ ಜ್ಯೋತಿರೂಪವು

ವಿದ್ಯೆ ಮಿಂಚಿನ ತೆರದಿ ತೋರಿಯು ತೋರದಿಹುದಿಲ್ಲಿ || ೨೪೬ ||

ಭಯಕೃದ್ಭಯಹಾರೀ ಚ ‍ವಿಘ್ನಕೃದ್ವಿಘ್ನಹಾರಕಃ|

ಅನಾದಿರ್ಬ್ರಹ್ಮಚಾರೀ ಚ ಧರ್ಮಾಧರ್ಮವಿವರ್ಜಿತಃ||೩೭||(೨೫೩)

ಭಯಕೃದಚ್ಯುತ ಭಯವನೀವನೆ

ಭಯವ ದೌಷ್ಟ್ಯಕೆ ಹಿತಕಭಯವನು

ಭಯಂಕರ ಭಯಕಾರಣನೆ ಭಯಕಾರಕನೆ ಕೃಷ್ಣ |

ಭಯದ ಭೀತಿಯ ದುಷ್ಟರಿಗೆ ತಾ

ಭಯದ ಭೀತಿಯ ಕೆಟ್ಟ ಕರ್ಮಿಗೆ

ಭಯದ ಶಿಕ್ಷಣವಿತ್ತು, ಶಿಷ್ಟರ ರಕ್ಷಿಸುವೆ ನೀನು || ೨೪೭ ||

ಭಯಹಾರೀ ಭಯದ ನಾಶಕ

ಭಯವಿದೂರನೆ ಶಿಷ್ಟರಿಗೆ ನೀ

ಭಯವ ತೊಲಗಿಸಿ ಧರ್ಮಕರ್ಮವ ನಡೆಸುವಾ ಕೃಷ್ಣ |

ಭಯವಧರ್ಮದ ಭಯವ ದುಷ್ಟರ

ಭಯವ ವಿಘ್ನದ ಕಳೆದು ಸುಜನರ

ಭಯನಿವಾರಿಸಿ ಲೋಕ ರಕ್ಷಿಪ ಕೃಷ್ಣ ಪರಮಾತ್ಮ || ೨೪೮ ||

ವಿಘ್ನಕೃತ್ ಕೃಷ್ಣನೇ ದೇವನೆ

ವಿಘ್ನ ನೀಡುವೆ ದುಷ್ಟ ಕರ್ಮಕೆ

ವಿಘ್ನ ನೀಡುವೆ ದುರ್ಜನರಿಗಿದು ಸತ್ಯ ಲೋಕದಲಿ |

ವಿಘ್ನಕಾರಕ ವಿಘ್ನಕಾರಣ

ವಿಘ್ನನಾಯಕ ವಿಘ್ನದಧಿಪತಿ

ವಿಘ್ನಕೃಂತನ ವಿಘ್ನನಾಶಕ ಕೃಷ್ಣ ಕಾಪಾಡು || ೨೪೯ ||

ವಿಘ್ನಹಾರಕ ವಿಘ್ನನಾಶಕ

ವಿಘ್ನಗಳ ಕಳೆ ಸುಜನಭಕ್ತರ

ವಿಘ್ನ ಕಳೆ ಧರ್ಮವನು ರಕ್ಷಿಸುವಂಥ ಮಾರ್ಗದಲಿ |

ವಿಘ್ನಹರಣನೆ ವಿಘ್ನಮಾಲಿಯೆ

ವಿಘ್ನಭೂಷಣ ವಿಘ್ನಮಾರಣ

ವಿಘ್ನ ತಂದಧಮರನು ತರಿ ಸುಜನರನು ಕಾಯಯ್ಯ || ೨೫೦ ||

ಅನಾದಿಯೆ ನೀನಾದಿರಹಿತನೆ

ವಿನಾದಿಯೆ ಶ್ರೀಕೃಷ್ಣದೇವನೆ

-ಯನಾದಿತ್ವವೆ ಮಧ್ಯವಂತವಿರಹಿತನೆ ಕೃಷ್ಣ |

ವಿನಾ ನಿನ್ನನು ಸೃಷ್ಟಿಯಿಲ್ಲವು

ವಿನಾ ನಿನ್ನನು ಸ್ಥಿತಿಯದಿಲ್ಲವು

ವಿನಾ ನಿನ್ನನು ಲಯವದಿಲ್ಲವು ನೀನೇ ಸರ್ವಾತ್ಮಾ || ೨೫೧ ||

ಬ್ರಹ್ಮಚಾರೀ ಬ್ರಹ್ಮನಿಷ್ಠನೆ

ಬ್ರಹ್ಮತತ್ತ್ವದಿ ನೆಲಿಸಿರುವವನೆ

ಬ್ರಹ್ಮವೇ ಬ್ರಹ್ಮೋಪದೇಶವ ಮಾಡಿದಂಥವನೆ |

ಬ್ರಹ್ಮಚರ್ಯದಿ ಸೋಳಸಾಸಿರ

ಬ್ರಹ್ಮಚರ್ಯದಿಯಷ್ಟಮಹಿಷ್ಯರ

ಬ್ರಹ್ಮಚರ್ಯದಿ ನಿಷ್ಠ ಕೃಷ್ಣನು ಗೂಢ ಬಹುಜನಕೆ || ೨೫೨ ||

ಧರ್ಮಾಧರ್ಮವಿವರ್ಜಿತನೆ ಹರಿ

ಧರ್ಮರೂಪನಧರ್ಮರೂಪನೆ

ಧರ್ಮಾಧರ್ಮವಿದೂರಕಾರಣ ದೇವ ಶ್ರೀಕೃಷ್ಣ |

ಧರ್ಮಮರ್ಮವಧರ್ಮಮರ್ಮವ

ಧರ್ಮಕರ್ಮವಧರ್ಮಕರ್ಮವ

ಮರ್ಮವರಿತದ ಮೀರಿದಗೆ ಶ್ರೀಕೃಷ್ಣನಿಗೆ ಶರಣು || ೨೫೩ ||

ಜಗದ್ಗುರುಶ್ಚಕ್ರಧಾರೀ ಶಙ್ಖಪದ್ಮಗದಾಧರಃ|

ಶ್ರೀವತ್ಸಾಙ್ಕಶ್ಚತುರ್ವೇದಶ್ಶ್ರುತಿಸ್ಮೃತಿಪುರಾಣಧೃತ್||೩೮||(೨೫೯)

ಜಗದ್ಗುರು ಶ್ರೀಕೃಷ್ಣದೇವನೆ

ಜಗಕೆ ಗೀತೆಯ ಬೋಧಿಸಿರುವನೆ

ಖಗದಿ ಚರಿಪನೆ ಮೃಗಧರಾಪ್ತನೆ ನಗುತ ಹರಸುವನೆ |

ಬಗೆ ಬಗೆಯ ಹಾರಸುಶೋಭಿತ

ಜಗದವಿದ್ಯಾತಮವ ಸರಿಸುವ

ಸೊಗದ ಬ್ರಹ್ಮಜ್ಞಾನ ತೋರಿದನಾದಿಗುರು ಜಗಕೆ || ೨೫೪ ||

ಚಕ್ರಧಾರೀ ಕಾಲಚಕ್ರವ

ನಕ್ರಹರ ಸುದರ್ಶನಾಖ್ಯವ

ವಿಕ್ರಮದಿ ಶತ್ರುಗಳ ತರಿಯುವ ವಿಷ್ಣು ಶ್ರೀಚಕ್ರ |

ಸಕ್ರಮದಿ ಪಿಡಿದಿರುವ ಕರದಲಿ

-ಯಾಕ್ರಮಿಪ ದುಷ್ಟರನು ಕೊಲ್ಲುವ

-ನೀ ಕ್ರಮದ ಚಕ್ರಾಯುಧವು ಬೇರಿಲ್ಲ ಮಾಯೆಯದು || ೨೫೫ ||

ಶಂಖಪದ್ಮಗದಾಧರನೆ ಹರಿ

ಕಿಂಕರರ ಕಾವಂಥ ಕಣ್ಮಣಿ

ಬಿಂಕ ತೋರದೆ ಭಜಿಸಿ ಧ್ಯಾನಿಸಿ ದೇವದೇವನನು |

ಶಂಖ ಪಾಂಚಜನ್ಯನಾಮಕ

ಪಂಕಜವು ಲಕುಮಿಯ ಸ್ವರೂಪವು

ಬಿಂಕ ಕೌಮೋದಕಿಯು ಗದೆಯದು ನೀ ಚತುರ್ಭುಜನು || ೨೫೬ ||

ಶ್ರೀವತ್ಸಾಂಕ ದೇವ ವಿಷ್ಣುವೆ

ಶ್ರೀವತ್ಸಲಾಂಛನವೆದೆಯೊಳಿರುವನೆ

ಶ್ರೀವತ್ಸ ಶ್ರೀದೇವಿಯನು ಹೃದಯದಿ ಧರಿಸಿಕೊಂಡಿಹನೆ |

ದೇವನೆದೆಯಲಿ ದಿವ್ಯಮಣಿಯದು

ದೇವನೆದೆಯಲಿಯಿರುವ ಶ್ವೇತರೋ-

-ಮಾವಲಿಯದನ್ಯರಿಗೆಯಿರದಿಹ ಮಹಾಪುರುಷಸಂಜ್ಞೆ || ೨೫೭ ||

ಚತುರ್ವೇದನೆ ಕೃಷ್ಣದೇವನೆ

ಚತುರ ಚಾತುರ್ಯಾತ್ಮ ಶ್ರೀಹರಿ

-ಯತುಲವೇದಸ್ವರೂಪ ಸಾಮಾಥರ್ವ ಋಗ್ಯಜುವು |

ಹಿತವು ಲೋಕಕೆ ಧರ್ಮಮೂಲವು

ಗೀತಶಿಲ್ಪವು ಪದ್ಯಗದ್ಯವು

ಮಾತುಮೀರಿದಲೌಕಿಕವನಿಷ್ಟಹರವಿಷ್ಟಪ್ರದ || ೨೫೮ ||

ಶ್ರುತಿಸ್ಮೃತಿಪುರಾಣಧೃತ ಹರಿ

ಶ್ರುತಿಯು ವೇದವು ಸ್ಮೃತಿಯು ಶಾಸ್ತ್ರವು

ಮತಿಗೆ ಹಿತವೀಯುವ ಪುರಾಣವು ಮೂರನೆಯ ಮಜಲು |

ಮತಿಯು ಪೌರಾಣಿಕವನೊಪ್ಪದೆ

ಸ್ಮೃತಿಯನೊಪ್ಪದ ಧರ್ಮಸೂಕ್ಷ್ಮಕೆ

ಶ್ರುತಿಯದಂತ್ಯಪ್ರಮಾಣ ಮೂರರ ಧರಿಸಿಹನು ಕೃಷ್ಣ || ೨೫೯ ||

ನನ್ದಗೋಪಕುಮಾರಶ್ಚ ಗೋಪೀವಸ್ತ್ರಾಪಹಾರಕಃ|

ವಸುದೇವಾತ್ಮಜಶ್ಶ್ರೀಜಿದ್ದ್ರೌಪದೀವಸ್ತ್ರದಾಯಕಃ||೩೯||(೨೬೪)

ನಂದಗೋಪಕುಮಾರ ಕೃಷ್ಣನೆ

ಮಂದಹಸಿತಾನನನೆ ನಂದನ

ಕಂದ ಗೋವಿಂದನೆ ಮುಕುಂದನೆ ಗೋಪತನಯ ಹರೇ |

ಸುಂದರಾಂಗನೆ ಗೋವ ಪಾಲಿಪ

ನಂದಗೋಪನ ಕುವರ ಯಶೋದೆ

ನಂದನನೆ ದೇವಕೀವಸುದೇವಾತ್ಮಜನೆ ಕಾಯೋ || ೨೬೦ ||

ಗೋಪೀವಸ್ತ್ರಾಪಹಾರಕನೆ ಹರಿ

ಗೋಪಿಯರ ಬಟ್ಟೆಯನು ಕದ್ದೆಯ

ಗೋಪಿಯರು ನದಿಯಲ್ಲಿ ಮಜ್ಜನಗೈವ ವೇಳೆಯಲಿ |

ಹೇ ಪಿತನೆ ನಗ್ನದಲಿ ಸ್ನಾನವ

ಗೋಪಿಯರು ಮಾಡಿದರೆ ಪಾಠವ

ಕಾಪಿನಲಿ ಲೋಕಕ್ಕೆ ಮಾಡಿದೆ ಶಾಸ್ತ್ರಬೋಧನೆಯ || ೨೬೧ ||

ವಸುದೇವಾತ್ಮಜನೆ ಶೌರಿಯೆ

ವಸುದೇವದೇವಕಿಯ ಸುತನೆ

ವಾಸವಾಗಿಹ ಸಕಲರೊಳು ತಾ ವಾಸುದೇವ ಹರಿ |

ವಸುದೇವ ಕಶ್ಯಪನಂಶ ಹಿಂದಿನ

ಜಸವಡೆದ ವರ ನೀಡಿದಂತೆಯೆ

ಪೊಸತು ಜನ್ಮವನಾಂತು ಭೂಭಾರವನು ಕಳೆದಿಕ್ಕಿ || ೨೬೨ ||

ಶ್ರೀಜಿತನೆ ಸಿರಿಯರಸ ಲಕ್ಷ್ಮೀ

ವಿಜಯ ಸಾಗರಮಥನಕಾಲದಿ

ವಾಜಿಮುಖ ಕಚ್ಛಪನೃಸಿಂಹನೆ ವ್ಯಾಸ ಧನ್ವಂತ್ರಿ |

ಹೇ ಜಿತೇಂದ್ರಿಯ ಹೃಷೀಕೇಶನೆ

ಸೋಜಿಗದ ಸೃಷ್ಟಿಯನು ಹೂಡಿದೆ

ಗಾಜಿನಂತೆಯೆ ಪಾರದರ್ಶಕ ಬದುಕ ನೀ ತೋರ್ದೆ || ೨೬೩ ||

ದ್ರೌಪದೀವಸ್ತ್ರದಾಯಕ ಹರಿ

-ಯಾಪತ್ತಿಗೆಯಾರ್ತಮೊರೆಗೆ

ಭೂಪ ಕೌರವಸಭೆಯ ದುಶ್ಶಾಸನನು ಸೀರೆಯನು |

ದ್ರೌಪದಿಯನವಮಾನಗೈಯಲು

ತಾಪನಾಶಕ ಕೃಷ್ಣ ಹರಸಿದ

ದ್ರೌಪದಿಯ ಭಕ್ತಿಯಲಿ ಕರಗುತಲಕ್ಷಯಾಂಬರವ || ೨೬೪ ||

ಕ್ಷತ್ರಾನ್ತಕೋ ಭಾರ್ಗವಶ್ಚ ವೇದವ್ಯಾಸೋ ಮಹಾಮತಿಃ|

ಹಲಾಯುಧಶ್ಚ ವಿಕ್ರಾನ್ತಸ್ಸವಿತಾ ನನ್ದನೋ ಮಹಾನ್||೪೦||(೨೭೩)

ಕ್ಷತ್ರಾಂತಕನೆ ದೇವ ಕೃಷ್ಣನೆ

ಕ್ಷತ್ರಿಯರಲಿ ದುಷ್ಟರನು ತರಿದಿಹೆ

ಕ್ಷಾತ್ರತೇಜದಿ ಜಾಮದಗ್ನಿಯರೂಪ ತಾಳುತಲಿ |

ಕ್ಷಾತ್ರ ರಾಜರು ದುಷ್ಟರಾಗಿರೆ

ಪಾತ್ರತೆಯ ರಹಿತರನು ಮಡುಹಿದೆ

ಗಾತ್ರತ್ರಾಣನೆ ಪಾತ್ರತ್ರಾಣನೆ ಗೋತ್ರತ್ರಾಣನೆಲ || ೨೬೫ ||

ಭಾರ್ಗವನೆ ಭೃಗುವಂಶಜನೆ ಹರಿ

ಭರ್ಗಶಿಷ್ಯನೆ ರೇಣುಕಾಸುತ

ಸರ್ಗಮಾರಕ ದುಷ್ಟರಾಜರ ತರಿದು ಜಗದೊಳಗೆ |

ಸ್ವರ್ಗ ಮಾಡಿದೆ ಭೂಸುರರ ನೀ

ಸರ್ಗಗೈದಿಯೆ ವರುಣಭಾಗವ

ದುರ್ಗಮದ ತಪಗೈದು ಭಾವೀಗೋತ್ರಪತಿಯಪ್ಪೆ || ೨೬೬ ||

ವೇದವ್ಯಾಸನೆ ವಿಷ್ಣುರೂಪನೆ

ವೇದಗಳ ವಿಂಗಡಣೆ ಮಾಡಿದೆ

ವೇದವೇಕವನೇಕವಾದುವು ಶಾಖೆಯುಪಶಾಖೆ |

ಭೇದರೂಪಿಲಿ ನಾಲ್ಕು ವೇದವ

ಕಾದೆ ನಾಲ್ವರು ಶಿಷ್ಯರೂಪಿಲಿ

ಪಾದಕೊಂದಿಪೆ ಬಾದರಾಯಣ ಕೃಷ್ಣ ದ್ವೀಪಜನೆ || ೨೬೭ ||

ಮಹಾಮತಿ ಹರಿ ಕೃಷ್ಣ ಕೇಶವ

ಮಹಾಬುದ್ಧಿಯೆ ಧೀಪ್ರಚೋದಕ

ಮಹಾಮಹಿಮನೆ ಸರ್ವಮತಿ ನೀ ಸರ್ವರೊಳಗಿರುವೆ |

ಸಹಾಯವು ನಿನದಿರಲಿ ಸುಜನರ

ಮಹಾಸತ್ಕರ್ಮಗಳ ಯಜ್ಞಕೆ

ಮಹಾಮಾಯಿಯೆ ಮಹಾದೇವಪ್ರಿಯನೆ ನಾರಯಣ || ೨೬೮ ||

ಹಲಾಯುಧ ಬಲರಾಮ ಹಲಧರ

ಹಲವು ನೇಗಿಲು ಶಸ್ತ್ರವಿವನಿಗೆ

ಬಲನು ಶೇಷಾಂಶದಲಿ ನಾರಾಯಣನ ಶೇಷಾಂಶ |

ಬಲನು ರೋಹಿಣಿತನಯ ಕೃಷ್ಣಗೆ

ಬಲನು ತಾನಗ್ರಜನು ರಾಜನು

ಹಲಾಯುಧ ಬಲರಾಮ ಚಕ್ರಾಯುಧನೆ ಶ್ರೀಕೃಷ್ಣ || ೨೬೯ ||

ವಿಕ್ರಾಂತ ಹರಿ ಕ್ರಮಿಸಿಹ ವಿಶೇಷದಿ

ವಿ-ಕ್ರಮನು ತ್ರಿಜಗದೊಳು ವಾಮನ

ಸಕ್ರಮಿಸಿ ವಿಕ್ರಮದ ಬಲಿನಿಗ್ರಹವ ಗೈದಿಹನು |

ಪ್ರಕ್ರಮವು ಕಾಲೋಚಿತವು ಹರಿ

-ಯಕ್ರಮವ ನಿಗ್ರಹಿಸಿ ಸುಸ್ಥಿತಿ

ಸಕ್ರಮಮವ ಗೈದಿಹನು ಭಕುತನ ಬಾಗಿಲನು ಕಾಯ್ದ || ೨೭೦ ||

ಸವಿತಾ ಪ್ರಸವಿತೃವು ಸಕಲಕು

ಸವಿವ ಸಕಲವ ಸೃಜಿಪ ಭೋಗಿಪ

ಸವಿತೃನಾರಾಯಣನ ರೂಪದಿ ಜಗವ ಬೆಳಗುವನು |

ಕವಿದ ಕತ್ತಲೆ ದೂಡುವನು ಹರಿ

ಹವಿಷವುಣ್ಣುವ ದೇವತಾತ್ಮನು

ಭವಿತಭೂತಭವತ್ಪ್ರಕಾಶಕ ತ್ರಿಕಾಲಾತೀತ || ೨೭೧ ||

ನಂದನನೆ ಗೋವಿಂದ ಕೃಷ್ಣನೆ

ನಂದಯತಿ ನಂದತಿಯು ಹರಿಯಾ-

-ನಂದಸಚ್ಚಿದ್ಘನನು ಪರಮಾನಂದ ಸುಂದರನು |

ಮಂದಹಸಿತನಾನಂದ ಕೊಡುವನು

ಬೆಂದ ಧಾನ್ಯದಲನ್ನಬ್ರಹ್ಮನು

ಮುಂದೆ ಗತಿ ನೀ ಕೃಷ್ಣ ವಿಷ್ಣು ಮಹೇಶ್ವರನ ಕಾಯೋ || ೨೭೨ ||

ಮಹಾನ್ ದೊಡ್ಡವನೆಲ್ಲಕಿಂತಲು

ಮಹಾತತ್ತ್ವವದಾತ್ಮಬ್ರಹ್ಮವು

ಮಹಾನಾರಾಯಣನು ವಿಷ್ಣುವು ಮಹೇಶ್ವರನು ಕೃಷ್ಣ |

ಮಹತ್ತತತ್ತ್ವನು ಸಕಲತತ್ತ್ವಕು

ಮಹಾಮೂಲನು ಮಹಿಮ ಪೂಜ್ಯನು

ಮಹಾಪುರುಷನು ಸರ್ವರಂತರ್ಯಾಮಿ ತತ್ತ್ವಮಸಿ || ೨೭೩ ||

ಋಷ‌‌‌‍ಭಃ ಕಪಿಲೋ ಜಿಷ್ಣುಃ ಕೃಷ್ಣದ್ವೈಪಾಯನೋ ವಿಭುಃ।

ಬುಧಪ್ರಿಯೋ ಬುದ್ಧಿರೂಪೋ ಬುದ್ಧಿದಾತಾ ಧನಪ್ರದಃ॥೪೧॥(೨೮೨)

ಹೇ ಮಹಾವಿಷ್ಣುವೇ ಋಷಭನೆ

ಹೇ ಮಹಿಮನದ್ಯಾತ್ಮಬೋಧಕ

ಹೇ ಮಹಾವೈರಾಗ್ಯಮೂರ್ತಿಯೆ ಭಾಗವತಪ್ರೋಕ್ತ |

ಧಾಮ ಜ್ಞಾನದ, ಋಷಿಯೆ ಋಷಭನೆ

ನೀ ಮಹಿಮ ಸ್ವಾರೋಚಿಷದಿ ಕೃತ

ಜನ್ಮ ನಾಭೀರಾಜಸುತ ಜಡಭರತಪಿತ ಹರಿಯೆ || ೨೭೪ ||

ಕಪಿಲಮುನಿ ಸಾಂಖ್ಯವನು ಬೋಧಿಸಿ

ಗುಪಿತ ಜ್ಞಾನವ ಭಕುತಿ ಯೋಗವ 

ಸ್ಥಾಪಿಸಲು ಬೋಧಿಸಿದ ಮಾತೆಗೆ ದೇವಹೂತಿಗೆ ತಾ |

ಕಪಿಲ ಸಿದ್ಧನು ಕರ್ದಮನ ಸುತ

ಜಪಿಸಿಯಿಪ್ಪತ್ತೈದು ತತ್ತ್ವವ

ವಪನಗೈದನು ಸಾಂಖ್ಯದರ್ಶನಬೀಜ ಜಗದೊಳಗೆ || ೨೭೫ ||

ಜಿಷ್ಣು ಜಯಿಸುವ ವಿಷ್ಣು ವಿಕ್ರಮಿ

ವಿಷ್ಣು ಶಾಶ್ವತನಾಗ್ಯನಂತನು

ಕೃಷ್ಣ ಗೋವ್ಗಳ ಹೃದಯವರಿಯುತ ಮತ್ತೆ ಗೋವಿಂದ |

ಜಿಷ್ಣುವರ್ಜುನ ಪಾಂಡವರಲಿಹ

ಜಿಷ್ಣು ವಿಷ್ಣು ಜಯಿಷ್ಣು ಜೇತೃವು

ಕೃಷ್ಣ ನೀ ಶಾಶ್ವತದಿ ಜಯಶೀಲನು ಸರುವಶಕ್ತ || ೨೭೬ ||

ಕೃಷ್ಣದ್ವೈಪಾಯನನೆ ವ್ಯಾಸನೆ

ಕೃಷ್ಣನಂಕಿತ ದ್ವೀಪದಾಶ್ರಯ

ಕೃಷ್ಣ ವೇದ-ವ್ಯಾಸನಷ್ಟಾದಶಪುರಾಣಕೃತ್ |

ಕೃಷ್ಣ ಪಾರಾಶರ್ಯ ಬಾದರಿ

ಕೃಷ್ಣ ಸತ್ಯವತೀಜ ಕುರುಕುಲ

ಕೃಷ್ಣ ರಕ್ಷಕ ನೂರು ಕೌರವಭ್ರೂಣ ಘೃತಭಾಂಡ || ೨೭೭ ||

ವಿಭು ವಿಶೇಷದಿ ಸರ್ವಗತ ಹರಿ

ಪ್ರಭುವು ಮೂರ್ಲೋಕಕ್ಕೆ ಕೃಷ್ಣನು

ವಿಭುವು ಶಂಕರ ಬೊಮ್ಮ ವಿಷ್ಣುವು ಸಕಲರಾಂತರನು |

ವಿಭುವು ನಿತ್ಯನು ಸರ್ವಪೂಜ್ಯನು

ವಿಭು ಸಕಲ ಸಾಕಾರಲೋಕವು

ವಿಭುವು ಕಾಲನು ವ್ಯಾಪಕನು ದೃಢ ಪರಮಮಹಿಮಯುತ || ೨೭೮ ||

ಬುಧಪ್ರಿಯ ಹರಿ ಬುಧಗ್ರಹಪ್ರಿಯ

ಬುಧನ ದೇವತೆ ವಿಷ್ಣು ಕೃಷ್ಣನು

ಬುಧನ ಪೀಡೆಯು ನಾಶ ವಿಷ್ಣುವೆ ನಿನ್ನ ದಯದಿಂದ |

ಬಧಿರನಿಗೆ ಶ್ರವಣೇಂದ್ರಿಯವ ಕೊಡು–

-ವಧಿಕಮಹಿಮನೆ ಜ್ಞಾನಿಯಾತ್ಮ ವಿ-

-ಬುಧರ ಪ್ರಿಯ ಬಹುಜನರ ಪ್ರಿಯ ಬ್ರಾಹ್ಮಣನ ಪೂಜಿಪನೆ || ೨೭೯ ||

ಬುದ್ಧಿರೂಪ ವಿಶುದ್ಧಿರೂಪನೆ

ಬುದ್ಧಿಯಿವ ಸಕಲರಲು ನೆಲೆಸಿಹ

ಬುದ್ಧಿಪ್ರೇರಕ ಬುದ್ಧ ಬದ್ಧರ ಮುಕ್ತಿಗೊಳಿಸುವನೆ |

ಬುದ್ಧಿಶಕ್ತಿಯು ಕೃಷ್ಣ ನೀನೇ

ಸಿದ್ಧಿ ಸಕಲವು ದೇವದೇವ ಪ್ರ-

-ಸಿದ್ಧನಾತ್ಮನು ಬೊಮ್ಮ ಸಕಲರ ಹೃದಯದೊಳಹೊರಗೆ || ೨೮೦ ||

ಬುದ್ಧಿದಾತನೆ ಹರಿ ಸಕಲರಿಗೆ

ಬುದ್ಧಿ ಕೊಡುವನು ಶುದ್ಧಿ ಕೊಡುವನು

ಸಿದ್ಧಿ ಕೊಡುವನು ಜೀವಕರ್ಮದ ಫಲಸ್ವರೂಪದಲಿ |

ಬುದ್ಧಿ ದೇಹಕೆಯಾತ್ಮ ಕೊಡುವನು

ಬದ್ಧ ಜೀವನು ತಾನು ಬ್ರಹ್ಮವು

ಬುದ್ಧಿ ಸಿದ್ಧಿಗೆ ಸಾಕ್ಷಿ ಸರ್ವಾಂತರನು ಪರಬೊಮ್ಮ || ೨೮೧ ||

ಧನಪ್ರದ ಹರಿ ಶ್ರೀಪತಿಯು ತಾ

ಧನವ ಸಂಪದವೀವ ಕರುಣದಿ

ಜನವ ವಿದ್ಯೆಯ ಗುಣವ ಭಕ್ತಿಯ ನಿಖಿಲ ಸಂಪದವ |

ಧನವದಾರೋಗ್ಯಾದಿ ಶಾಂತಿಯು

ಧನವು ಬುದ್ಧಿಯು ಶುದ್ಧಿ ಜ್ಞಾನವು

ಧನವು ವೈರಾಗ್ಯಾದಿ ಸಕಲವು ಕೃಷ್ಣದಯೆಯಿಂದ || ೨೮೨ ||

ಸಕಲಗ್ರಹನಾಥಶ್ಚ ಸರಸೀರುಹಲೋಚನಃ।

ಸರಸಸ್ಸಾರಸಸ್ಸೀರಸ್ಸುರಸ್ಸುರವರಸ್ಸ್ವರಾಟ್॥೪೨॥(೨೯೦)

ಸಕಲಗ್ರಹನಾಥನೆ ಮಹೇಶ್ವರ

ಸಕಲ ಗ್ರಹಗಳಿಗೊಡೆಯ ಕೃಷ್ಣನೆ

ಸಕಲ ಗ್ರಹಬಲ ನೀನೆ ದೇವನೆ ಸರಸಿಜಾಕ್ಷ ಹರಿ |

ಸಕಲ ಕಲವಂಶಾತ್ಮಕನು ಸಕಲನು

ಸಕಲ ಗ್ರಹ ಗ್ರಹಣದಲಿ ಜೀವರ

ಸಕಲ ಗತಿವಡೆವಂಥ ಗ್ರಹಫಲದಾತ ಶ್ರೀಕೃಷ್ಣ || ೨೮೩ ||

ಸರಸೀರುಹಲೋಚನನೆ ಹರಿ

ಸರಸಿಯಲಿಯಾರೋಹಿಸಿದ ಸುಮ

ಸರಸಿಜದವೊಲು ನೇತ್ರ ಸುಂದರ ದೇವ ಶ್ರೀಕೃಷ್ಣ |

ಸರಸಿಜಾಂಬಕ ಪದ್ಮನಯನನೆ

ಸರಸಿಜೋದ್ಭವಪಿತನೆ ಕಮಲಪ

ಸರಸಿಜಾಸನೆರಮಣ ಸಲಹುಗೆ ಸುಜನಸಂಕುಲವ || ೨೮೪ ||

ಸರಸ ನೀ ರಸಸಹಿತ ಕೃಷ್ಣನೆ

ಸುರಸ ನೀ ಸರ್ವಕ್ಕು ಸೃಷ್ಟಿಯ

ವಿರಸನಾಶನ ಸರಸಕಾರಣ ಸಮರಸನೆ ಕೃಷ್ಣ |

ಪರ ಸನಾತನ ರಸವು ತತ್ತ್ವವು

ವರ ಪುರಾತನ ಪುರುಷ ಶ್ರೀಹರಿ

ಸರ-ಸಹಿತ ಸರಸ-ಹಿತಕಾರಕ ದೇವ ಸರ್ವೇಶ || ೨೮೫ ||

ಸಾರಸನೆಯರಸಾತ್ಮಕನೆ ಹರಿ

ಸಾರ ಸತ್ತ್ವನೆ ಚಂದ್ರಮನೆ ಹರಿ

ಸಾರಸದಲಾಕ್ಷನೆ ಜಲಾಧಿಪ ನೀರಶಯನ ಹರಿ |

ಸರಸಭಾವನೆ ಸರಸಿಭವ ಹರಿ

ಸುರಸಿಕನೆ ಜಲರೂಪಿ, ಸರಸಿಜ

ಸಾರಸಾತ್ಮಕ ಸರ್ವಸಾರನೆ ದೇವ ಪರಬೊಮ್ಮ || ೨೮೬ ||

ಸೀರ ಕೃಷ್ಣನೆ ನೇಗಿಲಿನ ತನು

ವೀರ ಭೂಮಿಯನುಳುವ ಹಲತನು

ಸೀರಪಾಣಿಯ ತಮ್ಮ ಬಲರಾಮಾನುಜನೆ ಕೃಷ್ಣ |

ಸೀರರೂಪಿಲಿಯನ್ನವೀವನೆ

ಸೀರರೂಪಿಲಿ ವೃಷಭಸಹಗತಿ

ಕ್ಷೀರವಾರಿಧಿಶಯನ ಶೇಷನ ಮೇಲೆ ಮಲಗಿಹನೆ || ೨೮೭ ||

ಸುರನೆ ಕೃಷ್ಣನೆ ಹರಿಯೆ ವಿಷ್ಣುವೆ

ಸುರನು ಸುಷ್ಠು ರಾತ್ಯಭೀಷ್ಟವ

ಸುರನು ಬೇಡಿದ ವರವನೀವನು ದೇವದೇವ ಹರಿ |

ಸುರನೆ ಸುಂದರ ಬೆಳಗುದೀಪ್ತಿಯು

ಸುರನು ತಾನೈಶ್ವರ್ಯವಂತನು

ಸುರನದಿತಿಕಶ್ಯಪರ ಸೂನುವು ವಿಷ್ಣು ಶ್ರೀಕೃಷ್ಣ || ೨೮೮ ||

ಸುರವರನೆ ತಾನಮರಶ್ರೇಷ್ಠನೆ

ಸುರರ ಗಡಣಕೆ ನಾಯಕನೆ ಹರಿ

ಸುರರೊಳುನ್ನತ ದೇವದೇವನೆ ತಾನುಪೇಂದ್ರನೆಲ |

ಸುರರೊಳವರನು ವಾಮನನು ಮಿಗೆ

ಸುರರೊಳಮಿತಪ್ರತಾಪಶಾಲಿಯು

ಸುರರ ಕಾವನೆ ಸುರರೊಳಧಿಕನೆ ಹೇ ಪರಂಜ್ಯೋತಿ || ೨೮೯ ||

ಸ್ವರಾಟ್ ಕೃಷ್ಣನೆ ಸ್ವಯಂ ಬೆಳಗುವ

ಸ್ವರಾಜನೆ ತಾ ವಿರಾಜನೆ ಹರಿ

ಸ್ವರಾಡಧಿಪತಿ ಸಕಲ ಸೃಷ್ಟಿಗೆ ದೇವ ಪರಮೇಶ |

ವಿರಾಜಿಸುತಿಹ ದಿವ್ಯಜ್ಯೋತಿಯೆ

ಸುರಾಸುರರಿಂ ವಂದ್ಯಪಾದನೆ

ಸುರನರೋರಗದೈತ್ಯಕಿನ್ನರಪೂಜ್ಯ ಶ್ರೀಕೃಷ್ಣ || ೨೯೦ ||

ಸೂರ್ಯಸ್ಸೃಷ್ಟಿಪತಿಸ್ಸೇವಾಪ್ರಿಯಸ್ಸೈಕತಪುಣ್ಡ್ರಕಃ।

ಸೋಮಸ್ಸೋಮಪ್ರಿಯಸ್ಸೌತಿಸ್ಸಂಪದೇಶೋ ಮಹೀಶ್ವರಃ॥೪೩॥(೨೯೯)

ಸೂರ್ಯರೂಪಿಯೆ ದೇವಕೃಷ್ಣನೆ

ಸೂರ್ಯ ಸರಿವನು ಗಗನಮಾರ್ಗದಿ

ಸೂರ್ಯ ಕರ್ಮಪ್ರೇರಕನು ಜಗದಲ್ಲಿ ನೀ ಸಾಕ್ಷಿ |

ಸೂರ್ಯದೇವನು ಸೃಷ್ಟಿಕಾರಣ

ಸೂರ್ಯನೇ ಪಾಲಿಪನು ಲಯಿಸುವ

ಸೂರ್ಯನಂತರ್ಯಾಮಿ ನಾರಾಯಣನೆ ಗಾಯತ್ರೀ || ೨೯೧ ||

ಸೃಷ್ಟಿಪತಿ ಪರಮಾತ್ಮ ಕೃಷ್ಣನೆ

ಸೃಷ್ಟಿಯೆಲ್ಲದರಧಿಪತಿಯು ತಾ

ಸೃಷ್ಟಿಗೀಶನು ಸೃಷ್ಟಿಕಾರಕ ಸೃಷ್ಟಿಪಾಲಕನು |

ದೃಷ್ಟಿ ಪೂರ್ಣವು ಸಕಲವರಿತಿಹ

ಸೃಷ್ಟಿಮಾಯೆಯ ನಾಟಕವ ತಾ

ಸೃಷ್ಟಿಸಿದವೊಲು ತೋರುತಿರುವನು ಬ್ರಹ್ಮವದೆ ಸತ್ಯ || ೨೯೨ ||

ಸೇವಾಪ್ರಿಯನೆ ಸೇವಕರ ಪ್ರಿಯ

ಸೇವೆ ಮಾಡುವ ಭಕ್ತಸೇವಕ

ಸೇವೆಯನು ಪ್ರೀತಿಯಲಿ ಕೊಳ್ಳುವ ದೇವ ಶ್ರೀಕೃಷ್ಣ |

ಸೇವೆಗೊಲಿದಿಹನಾ ಸುಧಾಮನ

ಸೇವೆಗೊಲಿದಿಹ ಪಾಂಡುಸುತರಿಗೆ

ಸೇವ್ಯಸೇವಕಭಾವರಹಿತನೆ ಹೇ ಪರಬ್ರಹ್ಮ || ೨೯೩ ||

ಸೈಕತಪುಂಡ್ರಕನೆ ರಾಮನೆ

ಸಿಕತ ಮರಳಲಿ ಸೇವೆ ಗೈದಿಹ

ಮಿಕವದಳಿಲಿಗೆ ಸೇತುಬಂಧದಿ ಮೂರು ನಾಮವನು |

ಅಕಟಕಟ ಪ್ರೇಮದಲಿ ಗೀರಿದೆ

ಸಕಲವಲ್ಲಭ ರಾಮ ಕೃಷ್ಣನೆ

ವಿಕಲರಿಗು ಸಕಲವನು ನೀಡುವ ಹೇ ದಯಾಸಿಂಧು || ೨೯೪ ||

ಸೋಮ ಸೋಮಲತಾರಸಾಮೃತ

ಸೋಮ ಚಂದಿರ ಸುಂದರಾಂಗನೆ

ಸೋಮ ಶಕ್ತಿಯ ಸಹಿತ ಪುರುಷನೆ ಹೇ ಪರಬ್ರಹ್ಮ |

ಸೋಮವಾನಂದಾಬ್ಧಿ ಸಂತತ

ಸೋಮನಮೃತಾಂಶುವೆ ಸುಖಪ್ರದ

ಸೋಮಶಂಕರಪ್ರಿಯನೆ ಸಾಮಪ್ರಿಯನೆ ಶ್ರೀಕೃಷ್ಣ || ೨೯೫ ||

ಸೋಮಪ್ರಿಯನೆ ರುದ್ರಸಖ ಹರಿ

ಸೋಮನುಮೆಸಹಿತದಲಿ ಶಂಕರ

ಸೋಮಪ್ರಿಯ ಹರನಾತ್ಮ ಹರನಿಜಭಕ್ತ ಹೇ ಕೃಷ್ಣ |

ಸೋಮರಸಪ್ರಿಯ ಸೋಮಕ್ರತುಪತಿ

ಸೋಮಸುಂದರನುಡುಪತಿಯ ತಪ

ಕಾಮನೆಗೆ ತಾನೊಲಿದು ದಕ್ಷನ ಶಾಪ ಕಳೆದವನೆ || ೨೯೬ ||

ಸೌತಿ ಸೂತಮಹರ್ಷಿಪುತ್ರನೆ

ಸೌತಿರೂಪಿಲಿ ಬೋಧಿಸಿದ ಹರಿ

ಸೌತಿಯಾಗಿ ಪುರಾಣವಿತಿಹಾಸಾದಿ ಸಕಲವನು |

ಸೌತಿಯುಗ್ರಶ್ರವನು ಕಲಿಯಲಿ

ಸೌತಿ ರೋಮಹರ್ಷಣಿಯ ಪುತ್ರನು

ಸೌತಿ ನೈಮಿಷವನದಿ ಶೌನಕಮುಖ್ಯರಿಗೆ ಕೃಷ್ಣ || ೨೯೭ ||

ಸಂಪದೇಶನೆ ಸಂಪದಧಿಪತಿ

ಸಂಪದವು ಸಿರಿ ಲಕುಮಿ ತಾ ಪತಿ

ಸೊಂಪಿನಲಿ ಸಂಪದವನೀವನು ಕೃಷ್ಣ ಹೇ ವಿಷ್ಣೋ |

ಸಂಪದವು ನೂರಾರು ರೂಪವು

ಪೆಂಪು ಧನ ಕನಕ ಪ್ರವಿದ್ಯೆಯು

ತಂಪುಮನ ಭಕ್ತಿಯ ವಿರಕ್ತಿಯ ಪತಿಯೆ ಶ್ರೀಕೃಷ್ಣ || ೨೯೮ ||

ಮಹೀಶ್ವರ ಹರಿ ಭೂಮಿವಲ್ಲಭ

ಮಹಿಯು ಪೂಜ್ಯವು ಕೃಷ್ಣ ಗೋಪತಿ

ಸಹಿತ ಲಕುಮಿಯ ಮಹಿಯ ಶ್ರೀಹರಿ ಲೋಕಪತಿ ತಾನು |

ಅಹಿಶಯನ ಹರಿ ಮಹಿಯ ಕಾವನೆ

ಮಹಿಯನೆತ್ತುತ ಕೊಂದ ದೈತ್ಯನ

ಮಹಿ ರಸಾತಲದಿಂದ ಸುಸ್ಥಿತಿವಡೆಯೆ ವಾರಾಹಿ || ೨೯೯ ||