ದೇವೀರಕ್ಷಾಸ್ತೋತ್ರಮ್

ದೇವೀರಕ್ಷಾಸ್ತೋತ್ರಮ್

ಧ್ಯಾನಮ್

(ಶಾರ್ದೂಲವಿಕ್ರೀಡಿತವೃತ್ತಮ್)

ಯಾ ದೇವೀ ವಿಧಿವಿಷ್ಣುರುದ್ರಜನನೀ ಜಾಯಾಸ್ವರೂಪಾ ಚ ಯಾ

ತೇಷಾಂ ಶಕ್ತಿಪ್ರದಾಯಿನೀ ಭಗವತೀ ಮಾತಾ ಜಗದ್ಧಾರಿಣೀ |

ಯಾಮಾಹುರ್ನಿಖಿಲಪ್ರಜಾಸ್ತುತಿಪರಾಮಾತೇತಿ ವಿಜ್ಞಾನಿನ:

ಸಾ ನೋ ರಕ್ಷತು ದೇವದೇವವಿನುತಾ ಭುಕ್ತಿಪ್ರದಾ ಮುಕ್ತಿದಾ ||

ಇತಿ ಧ್ಯಾನಮ್

(ಅನುಷ್ಟುಭ್ ವೃತ್ತಮ್)

ಮಹಾಸರಸ್ವತೀರೂಪೇ ವಿದ್ಯಾಬುದ್ಧಿಪ್ರದಾಯಿನಿ |

ತ್ವಾಮಹಂ ಶಾರದೇ ವಂದೇ ವಾಕ್ಸಿದ್ಧ್ಯರ್ಥಂ ಕವಿತ್ವದೇ ||೧||

ಅಂಬಾ ನ: ಪಾತು ವಾಗ್ದೇವೀ ಭಾರತೀ ಸುರಭಾರತೀ |

ದಾಯಾನ್ನೋ ಜ್ಞಾನವೈರಾಗ್ಯೇ ಬ್ರಹ್ಮಜಾಯಾ ಸರಸ್ವತೀ ||೨||

ವೇದಶಾಸ್ತ್ರಪುರಾಣಾನಾಂ ತಾತ್ಪರ್ಯಂ ದರ್ಶಯತ್ವಜಾ |

ನಾಶಯತ್ವಜ್ಞಾನರಾತ್ರಿಂ ಜ್ಞಾನಜ್ಯೋತಿಂ ತನೋತು ನ: ||೩||

ಮಹಾಲಕ್ಷ್ಮೀಸ್ವರೂಪೇ ತ್ವಂ ಮಹಾಸಂಪತ್ಪ್ರದಾಯಿನಿ |

ಮಹಾದೇವಿ ನಮಸ್ತುಭ್ಯಂ ವಿಷ್ಣುವಕ್ಷಸ್ಥಲಸ್ಥಿತೇ ||೪||

ಹೇ ರಮಾ ಹೇ ಪದ್ಮಸಂಸ್ಥೇ ಪದ್ಮಪತ್ರಾಯತೇಕ್ಷಣೇ |

ಕಮಲೇ ಕಮಲಹಸ್ತೇ ತ್ವಮಲಕ್ಷ್ಮೀಂ ನಾಶಯಾಶು ನ: ||೫||

ಮಹಿಷಮರ್ದಿನಿರೂಪಾ ಚ ಮೂಕಾಂಬಿಕಾ ಜನಾರ್ದನೀ |

ಪಾತು ನೋ ವಿಷ್ಣುಪತ್ನೀ ಸಾ ವೈಷ್ಣವೀ ಕಷ್ಟಹಾರಿಣೀ ||೬||

ಮಹಾಕಾಲೀ ಮಹಾಗೌರೀ ಮಹಾಪ್ರಲಯರೂಪಿಣೀ |

ಶಾಂಭವೀ ರುದ್ರಪತ್ನೀ ಚ ದುಷ್ಟಸಂಹಾರಕಾರಿಣೀ ||೭||

ಉಮಾ ಹೈಮವತೀ ದುರ್ಗಾ ಮಹಾದುರ್ಗತಿಹಾರಿಣೀ |

ಭವಾನೀ ಸ್ಕನ್ದಮಾತಾ ಸಾ ಗಣೇಶೋತ್ಪತ್ತಿಕಾರಿಣೀ ||೮||

ರೌದ್ರೀ ಮಾಹೇಶ್ವರೀ ಮಾಯಾ ಯೋಗಮಾಯಾ ಸನಾತನಾ |

ಆದಿಶಕ್ತಿರ್ಜಗನ್ಮಾತಾ ಪಾತು ನ: ಪಾಪನಾಶಿನೀ ||೯||

ಗಾಯತ್ರೀ ವೇದಮಾತಾ ವೈ ಛಂದಸಾಂ ಜನನೀ ಪರಾ |

ಗಾಯನ್ತಾನ್ ಪಾತು ವಿಶ್ವೇಶೀ ಗಯಾನ್ ತ್ರಾತು ದಿನೇಶ್ವರೀ ||೧೦||

ವಿಶ್ವಾಮಿತ್ರೇಣ ದೃಷ್ಟಾ ಸಾ ವಿಪ್ರೋದ್ಧಾರಕರೀ ಶುಭಾ |

ಸಂಧ್ಯಾದೇವೀ ಚ ಸಾವಿತ್ರೀ ಪಂಚಶೀರ್ಷಾ ಸರಸ್ವತೀ ||೧೧||

ಅಗ್ನಿಮುಖಾ ಬ್ರಹ್ಮಾಶಿರಾ ವಿಷ್ಣುಹೃಚ್ಛಂಕರ: ಶಿಖಾ |

ಅಸ್ಯಾ: ಪೃಥ್ವೀ ಚ ಯೋನಿರ್ವೈ ಪಂಚಪ್ರಾಣಾ ಗಯಾಶ್ಚ ವೈ ||೧೨||

ಸಾಂಖ್ಯಾಯನಸಗೋತ್ರಾ ಚ ತ್ರಿಪಾದಾ ಶ್ವೇತವರ್ಣಿಕಾ |

ಚತುರ್ವಿಂಶತ್ಯಕ್ಷರಾ ಷಟ್ಕುಕ್ಷೀ ಬ್ರಹ್ಮಪದಪ್ರದಾ ||೧೩||

ಶೀರ್ಷಂ ಪಾತು ಜಗನ್ಮಾತಾ ಭಾಲಂ ಬಾಲಸರಸ್ವತೀ |

ಪಾರ್ವತೀ ಪಾತು ನೇತ್ರೇ ಚ ವಿಶ್ವೇಶ್ವರಪ್ರಿಯಾ ಶ್ರುತೀ ||೧೪||

ಪ್ರಾಣೇಶೀ ನಾಸಿಕಾಂ ಪಾತು ವದನಂ ಸುಂದರಾನನಾ |

ಜಿಹ್ವಾಮವತು ವಾಗ್ದೇವೀ ರಸನಾಮವತು ರಾಧಿಕಾ ||೧೫||

ಶಿತಿಕಂಠಾ ಪಾತು ಕಂಠಂ ಗ್ರೀವಾಂ ಪಾತು ಸದಾಶಿವಾ |

ಸ್ಕಂಧೌ ಪಾತು ಸ್ಕಂದಮಾತಾ ಭುಜೌ ದುಷ್ಟವಿಭಂಜಿನೀ ||೧೬||

ಇಕ್ಷುಚಾಪಧರಾ ಹಸ್ತೌ ವಿಷ್ಣುವಕ್ಷಸ್ಥಿತಾ ಹೃದಮ್ |

ಮಧ್ಯಂ ನಾರಾಯಣೀ ಪಾತು ನಾಭಿಂ ಪದ್ಮಪ್ರಿಯಾऽವತು ||೧೭||

ಕಾತ್ಯಾಯನೀ ಕಟೀ ಪಾತು ಸಕ್ಥಿನೀ ಶಕ್ತಿರೂಪಿಣೀ |

ಶಿವವಾಮೋರುಪೀಠಸ್ಥಾ ಪಾತೂರೂ ಜಗದಂಬಿಕಾ ||೧೮||

ಜಾನುನೀ ಜಾಹ್ನವೀ ಪಾತು ಜಂಘೇऽಘಕುಲಹಾರಿಣೀ |

ಸಮಾಧಿವರದಾ ಪಾದೌ ಮನಶ್ಶಾಂತಾ ಚ ರಕ್ಷತು ||೧೯||

ಇಂದ್ರಿಯಾಣಿ ತು ದಾಂತಾ ವೈ ಧಿಯೋ ಮಾ ನ: ಪ್ರಚೋದಯಾತ್ |

ಚಿತ್ತಶುದ್ಧಿಂ ಚಿನ್ಮಯೀ ಚ ತನೋತು ಮಂಗಲಪ್ರದಾ ||೨೦||

ಅಹಂಭಾವಂ ದೇಹಭಾವಮಪಾಕರೋತು ನಿರ್ಮಮಾ |

ಆತ್ಮಭಾವಂ ಬ್ರಹ್ಮಭಾವಮನುಗೃಹ್ಣಾತು ಶಾರದಾ ||೨೧||

ಪಾತ್ವಶೇಷಶರೀರಂ ಸಾ ಶೀರ್ಯಮಾಣಂ ದಿನೇ ದಿನೇ |

ಯಾವಚ್ಚ ಜೀವನ್ಮುಕ್ತಸ್ಸ್ಯಾಂ ತಾವತ್ತ್ವಂ ಸುಸ್ಥಿರಾ ಭವ ||೨೨||

ಜರಾರೋಗಾದಿಭಿರ್ನಿತ್ಯಂ ಪಾಹಿ ಹೇ ಜಗದಂಬಿಕೇ |

ಸನ್ಮಾರ್ಗಸ್ಥಿತಭಕ್ತಾನಾಂ ಸರ್ವವಿಘ್ನನಿವಾರಿಣೀ ||೨೩||

ಜನನೀ ಜನ್ಮದಾತ್ರೀ ಚ ಜಾಹ್ನವೀ ಚ ಜನಾರ್ದನೀ |

ಜನ್ಮಸಂಸಾರಬಂಧಾನ್ವೈ ಮೋಕ್ತ್ವಾऽನಂದಂ ಪ್ರದಾತು ಮೇ ||೨೪||

ಲೋಕಕಲ್ಯಾಣಕರ್ಮಾಣಿ ಕಾರಯಸ್ವ ಮಯಾಂಬಿಕೇ |

ತ್ವದುಪಕರಣರೂಪೇಣ ತ್ವತ್ಕಾರ್ಯಾಣಿ ಮಹೇಶ್ವರಿ ||೨೫||

ಮಹಾಲಕ್ಷ್ಮೀ ಮಹಾಗೌರೀ ಗಾಯತ್ರೀ ಚ ಸರಸ್ವತೀ |

ಆದಿಶಕ್ತಿ: ಪಾತು ಭಕ್ತಾನ್ ಪ್ರಪನ್ನಾಂಶ್ಚ ದಿನೇ ದಿನೇ ||೨೬||

ಶಕ್ತ್ಯೈ ದಿವ್ಯಸ್ವರೂಪಾಯೈ ಚಂದ್ರಾಭಾಯೈ ನಮೋ ನಮ: |

ಪರಬ್ರಹ್ಮಮಹಿಷ್ಯೈ ಚ ಜಗನ್ಮಾತ್ರೇ ನಮೋ ನಮ: ||೨೭||

(ವಸಂತತಿಲಕಾ-ವೃತ್ತಮ್)

ಶ್ರೀದೇವಿ ದೇವಿ ದನುಜಾಂತಕಿ ದೇವಿ ದೇವಿ

ಶ್ರೀದೇವಿ ದೇವಿ ಭಯಹಾರಿಣಿ ದೇವಿ ದೇವಿ |

ಶ್ರೀದೇವಿ ದೇವಿ ಜನಪಾಲಿನಿ ದೇವಿ ದೇವಿ

ಶ್ರೀದೇವಿ ದೇವಿ ಶರಣಂ ಭವ ದೇವಿ ದೇವಿ ||೨೮||

ಶ್ರೀದೇವಿದಿವ್ಯಚರಣೌ ಮನಸಾ ಸ್ಮರಾಮಿ

ಶ್ರೀದೇವಿದಿವ್ಯಚರಣೌ ವಚಸಾ ಗೃಣಾಮಿ |

ಶ್ರೀದೇವಿದಿವ್ಯಚರಣೌ ಶಿರಸಾ ನಮಾಮಿ

ಶ್ರೀದೇವಿದಿವ್ಯಚರಣೌ ಶರಣಂ ಪ್ರಪದ್ಯೇ ||೨೯||

(ಶಾಲಿನೀ-ವೃತ್ತಮ್)

ಮಾತಾ ದೇವೀ ಮತ್ಪಿತಾ ಶಾರದಾ ಚ

ಸ್ವಾಮೀ ದೇವೀ ಮದ್ಬಲಂ ರುದ್ರಪತ್ನೀ |

ಸರ್ವಸ್ವಂ ಮೇ ವಿಷ್ಣುಪತ್ನೀ ದಯಾರ್ದ್ರಾ

ನಾನ್ಯಂ ಜಾನೇ ನೈವ ಜಾನೇ ನ ಜಾನೇ ||೩೦||

(ಇಂದ್ರವಜ್ರಾ-ವೃತ್ತಮ್)

ಲೋಕಪ್ರಸೂಂಶ್ಚಾಪ್ರತಿಮಪ್ರಭಾವಾಂ

ಪದ್ಮಾಯತಾಕ್ಷೀಂ ಸುರವಂಶಮೂಲಾಮ್ |

ಕಾರುಣ್ಯರೂಪಾಂ ಜಗದಾದಿಶಕ್ತಿಂ

ಬ್ರಹ್ಮಾಂಡನಾಥಾಂ ಶರಣಂ ಪ್ರಪದ್ಯೇ ||೩೧||

(ಅನುಷ್ಟುಭ್-ವೃತ್ತಮ್)

ಕೂಜಂತಂ ದೇವಿ ದೇವೀತಿ ಪವಿತ್ರಂ ಪ್ರಣವಾಕ್ಷರಮ್ |

ಭಾಗವತದ್ರುಮಮಾರುಹ್ಯ ವಂದೇ ಶ್ರೀವ್ಯಾಸಕೋಕಿಲಮ್ ||೩೨||

ದುರ್ಗದಾನವಹಂತ್ರೀಂ ತಾಂ ಸರ್ವದುರ್ಗತಿಹಾರಿಣೀಮ್ |

ದುರ್ಗಾಮಾದಿಪರಾಶಕ್ತಿಂ ಭೂಯೋ ಭೂಯೋ ನಮಾಮ್ಯಹಮ್ ||೩೩||

ತಾರಕಂ ಭವಮಗ್ನಾನಾಂ ಚಿದಾನಂದಪ್ರದಾಯಕಮ್ |

ಮಾರಕಂ ಯಮದೂತಾನಾಂ ದೇವಿ ದೇವೀತಿ ಗಾಯನಮ್ ||೩೪||

(ಶಾರ್ದೂಲವಿಕ್ರೀಡಿತವೃತ್ತಮ್)

ದೇವೀ ತ್ರಾತು ಮಹಾಭವಾನ್ನಿಗಮದಾ ದೇವೀಂ ಸ್ತುವೇ ಶ್ಯಾಮಲಾಂ

ದೇವ್ಯಾ ಸಂಸೃತಿಸಾಗರಾಚ್ಚ ತರಣಂ ದೇವ್ಯೈ ಚ ತಸ್ಯೈ ನಮ: |

ದೇವ್ಯಾಶ್ಚಾಶು ನಿವಾರಣಂ ಭವಭಯಂ ದೇವ್ಯಾಶ್ಚ ದಾಸೋऽಸ್ಮ್ಯಹಂ

ದೇವ್ಯಾಂ ಲೀಯತು ಚಿತ್ತಮೇವ ಸತತಂ ಹೇ ದೇವಿ ವಾಗೀಶ್ವರೀ ||೩೫||

(ಗಾಯತ್ರೀಚ್ಛಂದ:)

ಓಂ ವಾಗ್ದೇವ್ಯೈ ಚ ವಿದ್ಮಹೇ ವಿಧಿಪತ್ನ್ಯೈ   ಧೀಮಹಿ |

ತನ್ನೋ ಮಹಾಲಕ್ಷ್ಮೀ ಪ್ರಚೋದಪವ ಪ೫೬೭ಶಹ€ಯಾತ್ ||೩೭||

ಓಂ ಮಹಾಕಾಲ್ಯೈ ಚ ವಿದ್ಮಹೇ ಹೈಮವತ್ಯೈ ಚ ಧೀಮಹಿ |

ತನ್ನೋ ಮಹಾಗೌರೀ ಪ್ರಚೋದಯಾತ್ ||೩೮||

ಓಂ ವೇದಮಾತ್ರೇ ಚ ವಿದ್ಮಹೇ ಸಂಧ್ಯಾದೇವ್ಯೈ ಚ ಧೀಮಹಿ |

ತನ್ನೋ ಗಾಯತ್ರೀ ಪ್ರಚೋದಯಾತ್ ||೩೯||

ಓಂ ಆದಿಪರಾಶಕ್ತ್ಯೈ ವಿದ್ಮಹೇ ಮಹಾಮಾಯಾಯೈ ಧೀಮಹಿ |

ತನ್ನೋ ಜಗನ್ಮಾತಾ ಪ್ರಚೋದಯಾತ್ ||೪೦||

ಇತಿ ಶ್ರೀ ದೇವೀಮಹಿಷಮರ್ದಿನೀಪ್ರೇರಣಯಾ ಗುರೂಮಾಮಹೇಶ್ವರಕೃಪಯಾ ಚ ದಂಬೆಕೃಷ್ಣಮೂರ್ತಿವಿರಚಿತಮಿದಂ ದೇವೀರಕ್ಷಾಸ್ತೋತ್ರಂ ಸದ್ಗುರುಚರಣಯುಗಯೋ: ಸಮರ್ಪಿತಮಸ್ತು ||

||ಹರೇ ರಾಮ||