ಯಮಸ್ತುತಿಃ
ಯಮಸ್ತುತಿಃ
ಯಮೋ ವೈವಸ್ವತೋ ರಾಜಾ ಶೈಮಿನೀಪತ್ತನಸ್ಯ ಚ |
ಧರ್ಮಾತ್ಮಾ ಕಾಲರೂಪಶ್ಚ ಕಠೋರನಿಯಮೀ ತಥಾ ||೧||
ದಕ್ಷಿಣಾಧಿಪತಿರ್ದೇವಃ ಸರ್ವಪ್ರಾಣಾಪಹಾರಕಃ |
ಯಮಪಾಶಸುಯೋಗೇನ ಪ್ರಾಣಿನಾಮಾಯುಷೋऽನ್ತಿಕೇ ||೨||
ಯಮೋ ಯಮವತಾಂ ಶ್ರೇಷ್ಠೋ ನಚಿಕೇತಗುರುಃ ಪುರಾ |
ಬ್ರಹ್ಮಜ್ಞೋ ಭಯಕೃಚ್ಚಿತ್ರ|ಗುಪ್ತೇಶೋ ಮತ್ತವಾಹನಃ ||೩||
ಪ್ರಾಣಿನಾಂ ಪುಣ್ಯಪಾಪಾನಾಂ ಕರ್ಮಣಾಂ ದಣ್ಡಧಾಯಕಃ |
ಈಶ್ವರೇಣ ತದರ್ಥಂ ವೈ ನಿಯುಕ್ತೋ ದಕ್ಷಿಣೇ ಸ್ಥಿತಃ || ೪ ||
ಭವಿಷ್ಯೇ ಚ ಪುರಾಣೇ ತು ಚತುರ್ದಶಯಮಾಃ ಸ್ಮೃತಾಃ |
ದಿಕ್ಪಾಲಾಸ್ತು ಹಿ ಭೇದತ್ವೇ ತಾನ್ಯಥಾವತ್ ಸ್ಮರಾಮ್ಯಹಮ್ || ೫ ||
ಯಮಾಯ ಧರ್ಮರಾಜಾಯ ಮೃತ್ಯವೇ ಚಾನ್ತಕಾಯ ಚ |
ವೈವಸ್ವತಾಯ ಕಾಲಾಯ ಸರ್ವಭೂತಕ್ಷಯಾಯ ಚ || ೬ ||
ಔದುಂಬರಾಯ ದಧ್ನಾಯ ನೀಲಾಯ ಪರಮೇಷ್ಠಿನೇ |
ವೃಕೋದರಾಯ ಚಿತ್ರಾಯ ಚಿತ್ರಗುಪ್ತಾಯ ವೈ ನಮಃ || ೭ ||
ಸಂಯಮಿನೀಪುರಾಧೀಶಃ ಸೂರ್ಯ-ಸಂಜ್ಞಾಸುತಃ ಪರಃ |
ಅಗ್ರಜೋ ಯಮುನಾಯಾಶ್ಚ ಶನೇರಪರಸೋದರಃ || ೮ ||
ಮಾಣ್ಡವ್ಯೋ ದಣ್ಡಿತಸ್ತೇನ ತಸ್ಮಾದ್ವಿದುರತಾಂ ಗತಃ |
ಯುಧಿಷ್ಠಿರಪಿತಾ ದೇವೋऽರ್ಜುನಾಯ ವರದಾಯಕಃ || ೯ ||
ಸಾವಿತ್ರ್ಯಾಸ್ತು ಪರಂ ಜ್ಞಾನಂ ವೀಕ್ಷ್ಯ ತತ್ಪತಿಮಾರ್ಪಯತ್ |
ಪರೀಕ್ಷ್ಯ ಯಕ್ಷರೂಪೇಣ ಯುಧಿಷ್ಠಿರಂ ವರಂ ದದೌ || ೧೦ ||
ಮಾರ್ಕಣ್ಡೇಯವಿಚಾರೇ ತು ಶಿವಕೋಪಮವಾಪ್ತವಾನ್ |
ರಾಮಾವತಾರಪೂರ್ಣತ್ವೇ ಬ್ರಹ್ಮಾಜ್ಞಾಪರತಃ ಪುನಃ |
ರಾಮಂ ಸುಜ್ಞಾಪಯಾಮಾಸಾ|ವತಾರಸುಸಮಾಪ್ತಿಕಮ್ || ೧೧ ||
ಯಮರಾಡ್ಧರ್ಮರಾಜಶ್ಚ ಸಮವರ್ತೀ ಪರೇತರಾಟ್ || ೧೨ ||
ಪಿತೃಪತಿಃ ಕೃತಾನ್ತಶ್ಚ ಶಮನೋ ದಣ್ಡಧಾರಕಃ |
ಶ್ರಾದ್ಧದೇವೋऽನ್ತಕೋ ಧರ್ಮೋ ಹರಿಃ ಕೀನಾಶ ಏವ ಚ || ೧೩ ||
ಜೀವಿತೇಶಸ್ತು ಜೀವಾನಾಂ ಯಮಯತಿ ಫಲಾಫಲಮ್ |
ಮಹಿಷಧ್ವಜರೂಪಶ್ಚ ಕಙ್ಕೋ ಮಹಿಷವಾಹನಃ || ೧೪ ||
ಕರ್ಮಕರಃ ಶೀರ್ಣಪಾದೋ ಪ್ರೇತೇಶೋ ಭೀಮಶಾಸನಃ |
ತದುತ್ಪತ್ತಿಕಥಾ ಪ್ರೋಕ್ತಾ ಮಾರ್ಕಣ್ಡೇಯಪುರಾಣಕೇ || ೧೫ ||
ಸಂಜ್ಞಾ ಚ ರವಿಣಾ ದೃಷ್ಟಾ ನಿಮೀಲಯತಿ ಲೋಚನೇ |
ಯತಸ್ತತಃ ಸರೋಷೋऽರ್ಕಃ ಸಂಜ್ಞಾಂ ನಿಷ್ಠುರಮಬ್ರವೀತ್ || ೧೬ ||
ಮಯಿ ದೃಷ್ಟೇ ಸದಾ ಯಸ್ಮಾತ್ ಕುರುಷೇ ನೇತ್ರಸಂಯಮಮ್ |
ತಸ್ಮಾಜ್ಜನಿಷ್ಯಸೇ ಮೂಢೇ ಪ್ರಜಾಸಂಯಮನಂ ಯಮಮ್ || ೧೭ ||
ಪಾದ್ಮೇ ಕ್ರಿಯಾಯಾಗಸಾರನಾಮದ್ವಾವಿಂಶಕೇ ತಥಾ |
ಅಧ್ಯಾಯೇ ವರ್ಣಿತಂ ರೂಪಂ ಮೃತ್ಯೋಃ ಪುಣ್ಯಾತ್ಮನಾಂ ಪ್ರತಿ || ೧೮ ||
ನಾನಾಗತಾಂಸ್ತತೋ ದೃಷ್ಟ್ವಾ ನರಾನ್ ಧರ್ಮಪರಾಯಣಾನ್ |
ಭಾಸ್ಕರಿಃ ಪ್ರೀತಿಮಾಸಾದ್ಯ ಸ್ವಯಂ ನಾರಾಯಣೋ ಭವೇತ್ || ೧೯ ||
ಚತುರ್ಬಾಹುಃ ಶ್ಯಾಮವರ್ಣಃ ಪ್ರಫುಲ್ಲಕಮಲೇಕ್ಷಣಃ |
ಶಂಖಚಕ್ರಗದಾಪದ್ಮಧಾರೀ ಗರುಡವಾಹನಃ || ೨೦ ||
ಸ್ವರ್ಣಯಜ್ಞೋಪವೀತೀ ಚ ಸ್ಮೇರಚಾರುತರಾನನಃ |
ಕಿರೀಟೀ ಕುಣ್ಡಲೀ ಚೈವ ವನಮಾಲಾವಿಭೂಷಿತಃ || ೨೧ ||
ಪಾಪಿನಾಂ ಪ್ರತಿ ಯದ್ರೂಪಂ ದರ್ಶ್ಯತೇ ಮೃತ್ಯುನಾ ಶ್ರುಣು |
ತ್ರಿಂಶದ್ಯೋಜನದೀರ್ಘಾಙ್ಗೋ ವಾಪೀಸದೃಶಲೋಚನಃ || ೨೨ ||
ಧೂಮ್ರವರ್ಣೋ ಮಹಾತೇಜಾಃ ಪ್ರಲಯಾಮ್ಭೋಧರಧ್ವನಿಃ |
ತೃಣಾಧಿರಾಜಲೋಮಾಂಶ್ಚ ಜ್ವಲದಗ್ನಿಶಿಖಾಗ್ರವತ್ || ೨೩ ||
ನಾಸಾರನ್ಧ್ರಸ್ಫುರಚ್ಛ್ವಾಸ|ಸ್ವನೈರ್ಜಿತಮಹಾನಿಲಃ |
ಸುದೀರ್ಘದಶನಶ್ರೇಣಿಃ ಸೂರ್ಪೋಪಮನಖಾವಲಿಃ || ೨೪ ||
ಪ್ರಚಣ್ಡಮಹಿಷಾರೂಢಃ ಸನ್ದಷ್ಟದವನಚ್ಛದಃ |
ದಣ್ಡಹಸ್ತಶ್ಚರ್ಮವಾಸಾ ಭ್ರುಕುಟೀಕುಟಿಲಾನನಃ || ೨೫ ||
ವ್ಯಾಸಭಾರತಮಧ್ಯೇ ಚ ಸಭಾಪರ್ವೇ ಯಮಸ್ಯ ತು |
ಯುಧಿಷ್ಠಿರಾಯ ಚಾಖ್ಯಾತಂ ನಾರದೇನ ಮಹಾಸಭಾ || ೨೬ ||
|| ನಾರದ ಉವಾಚ ||
ಕಥಯಿಷ್ಯೇ ಸಭಾಂ ದಿವ್ಯಾಂ ಯುಧಿಷ್ಠಿರ ನಿಬೋಧ ತಾಮ್ |
ವೈವಸ್ವತಸ್ಯ ಯಾಮರ್ಥೇ ವಿಶ್ವಕರ್ಮಾ ಚಕಾರ ಹ || ೨೭ ||
ತೈಜಸೀ ಸಾ ಸಭಾ ರಾಜನ್ ಬಭೂವ ಶತಯೋಜನಾ |
ವಿಸ್ತಾರಾಯಾಮಸಂಪನ್ನಾ ಭೂಯಸೀ ಚಾಪಿ ಪಾಣ್ಡವ || ೨೮ ||
ಅರ್ಕಪ್ರಕಾಶಾ ಭ್ರಾಜಿಷ್ಣುಃ ಸರ್ವತಃ ಕಾಮಚಾರಿಣೀ |
ನೈವಾತಿಶೀತಾ ನಾತ್ಯುಷ್ಣಾ ಮನಸಶ್ಚ ಪ್ರಹರ್ಷಿಣೀ || ೨೯ ||
ನ ಶೋಕೋ ನ ಜರಾ ತಸ್ಯಾಂ ಕ್ಷುತ್ಪಿಪಾಸೇ ನ ಚಾಪ್ರಿಯಮ್ |
ನ ಚ ದೈನ್ಯಂ ಕ್ಲಮೋ ವಾಪಿ ಪ್ರತಿಕೂಲಂ ನ ಚಾಪ್ಯುತ || ೩೦ ||
ಸರ್ವೇ ಕಾಮಾಃ ಸ್ಥಿತಾಸ್ತಸ್ಯಾಂ ಯೇ ದಿವ್ಯಾ ಯೇ ಚ ಮಾನುಷಾಃ |
ರಸವಚ್ಚ ಪ್ರಭೂತಂ ಚ ಭಕ್ಷ್ಯಭೋಜ್ಯಮರಿನ್ದಮ || ೩೧ ||
ಪುಣ್ಯಗನ್ಧಾಃ ಸ್ರಜಸ್ತತ್ರ ನಿತ್ಯಪುಷ್ಪಫಲದ್ರುಮಾಃ |
ರಸವನ್ತಿ ಚ ತೋಯಾನಿ ಶೀತಾನ್ಯುಷ್ಣಾನಿ ಚೈವ ಹ || ೩೨ ||
ತಸ್ಯಾಂ ರಾಜರ್ಷಯಃ ಪುಣ್ಯಾಸ್ತಥಾ ಬ್ರಹ್ಮರ್ಷಯೋऽಮಲಾಃ |
ಯಮಂ ವೈವಸ್ವತಂ ತಾತ ಪ್ರಹೃಷ್ಟಾಃ ಪರ್ಯುಪಾಸತೇ || ೩೩ ||
ಬ್ರಹ್ಮವೈವರ್ತಕೇ ಪುಣ್ಯೇ ಪುರಾಣೇ ಪ್ರಕೃತಿಖಂಡಕೇ |
ಅಷ್ಟಾವಿಂಶತಿಕೇऽಧ್ಯಾಯೇ ಯಮಾಷ್ಟಕಮುದೀರಿತಮ್ || ೩೪ ||
|| ಸಾವಿತ್ರ್ಯುವಾಚ ||
ತಪಸಾ ಧರ್ಮಮಾರಾಧ್ಯ ಪುಷ್ಕರೇ ಭಾಸ್ಕರಃ ಪುರಾ |
ಧರ್ಮಾಂಶಂ ಯಂ ಸುತಂ ಪ್ರಾಪ ಧರ್ಮರಾಜಂ ನಮಾಮ್ಯಹಮ್ || ೩೫ ||
ಸಮತಾ ಸರ್ವಭೂತೇಷು ಯಸ್ಯ ಸರ್ವಸ್ಯ ಸಾಕ್ಷಿಣಃ |
ಅತೋ ಯನ್ನಾಮ ಶಮನ|ಮಿತಿ ತಂ ಪ್ರಣಮಾಮ್ಯಹಮ್ || ೩೬ ||
ಯೇನಾನ್ತಶ್ಚ ಕೃತೋ ವಿಶ್ವೇ ಸರ್ವೇಷಾಂ ಜೀವಿನಾಂ ಪರಮ್ |
ಕರ್ಮಾನುರೂಪಕಾಲೇನ ತಂ ಕೃತಾನ್ತಂ ನಮಾಮ್ಯಹಮ್ || ೩೭ ||
ವಿಭರ್ತಿ ದಣ್ಡಂ ದಣ್ಡ್ಯಾಯ ಪಾಪಿನಾಂ ಶುದ್ಧಿಹೇತವೇ |
ನಮಾಮಿ ತಂ ದಣ್ಡಧರಂ ಯಃ ಶಾಸ್ತಾ ಸರ್ವಕರ್ಮಣಾಮ್ || ೩೮ ||
ವಿಶ್ವೇ ಯಃ ಕಲಯತ್ಯೇವ ಸರ್ವಾಯುಶ್ಚಾಪಿ ಸನ್ತತಮ್ |
ಅತೀವದುರ್ನಿವಾರ್ಯಂ ಚ ತಂ ಕಾಲಂ ಪ್ರಣಮಾಮ್ಯಹಮ್ || ೩೯ ||
ತಪಸ್ವೀ ವೈಷ್ಣವೋ ಧರ್ಮೀ ಸಂಯಮೀ ವಿಜಿತೇಂದ್ರಿಯಃ |
ಜೀವಿನಾಂ ಕರ್ಮಫಲದಂ ತಂ ಯಮಂ ಪ್ರಣಮಾಮ್ಯಹಮ್ || ೪೦ ||
ಸ್ವಾತ್ಮಾರಾಮಶ್ಚ ಸರ್ವಜ್ಞೋ ಮಿತ್ರಂ ಪುಣ್ಯಕೃತಾಂ ಭವೇತ್ |
ಪಾಪಿನಾಂ ಕ್ಲೇಶದೋ ಯಶ್ಚ ಪುಣ್ಯಂ ಮಿತ್ರಂ ನಮಾಮ್ಯಹಮ್ || ೪೧ ||
ಯಜ್ಜನ್ಮ ಬ್ರಹ್ಮಣೋ ವಂಶೇ ಜ್ವಲನ್ತಂ ಬ್ರಹ್ಮತೇಜಸಾ |
ಯೋ ಧ್ಯಾಯತಿ ಪರಂಬ್ರಹ್ಮ ಬ್ರಹ್ಮವಂಶಂ ನಮಾಮ್ಯಹಮ್ || ೪೨ ||
ಇತ್ಯುಕ್ತ್ವಾ ಸಾ ಚ ಸಾವಿತ್ರೀ ಪ್ರಣನಾಮ ಯಮಂ ಮುನೇ |
ಯಮಸ್ತಾಂ ವಿಷ್ಣುಭಜನಂ ಕರ್ಮಪಾಕಮುವಾಚ ಹ || ೪೩ ||
ಇದಂ ಯಮಾಷ್ಟಕಂ ನಿತ್ಯಂ ಪ್ರಾತರುತ್ಥಾಯ ಯಃ ಪಠೇತ್ |
ಯಮಾತ್ತಸ್ಯ ಭಯಂ ನಾಸ್ತಿ ಸರ್ವಪಾಪಾತ್ಪ್ರಮುಚ್ಯತೇ || ೪೪ ||
ಮಹಾಪಾಪೀ ಯದಿ ಪಠೇತ್ ನಿತ್ಯಂ ಭಕ್ತ್ಯಾ ಚ ನಾರದ |
ಯಮಃ ಕರೋತಿ ತಂ ಶುದ್ಧಂ ಕಾಯವ್ಯೂಹೇನ ನಿಶ್ಚಿತಮ್ || ೪೫ ||
Comments
Post a Comment