ಅಗ್ನಿಸ್ತುತಿಃ

ಅಗ್ನಿಸ್ತುತಿಃ

ತೃತೀಯಃ ಪಂಚಭೂತಾನಾಂ ತೇಜೋsಭಿಮಾನಿದೇವತಾ |

ಋಗ್ವೇದೇ ಪ್ರಥಮೋ ದೇವೋ ವಿರಾಣ್ಮುಖೇ ಪ್ರಜಾಯತೇ ||೧||

ವಾಯವೋ ಜಾತಭೂತಶ್ಚ ಜಲಾದಪೀತಿ ಕಥ್ಯತೇ |

ವಿಧಾತೃಕೋಪಜಾತಶ್ಚ ಸ್ವಾಹಾದಕ್ಷಸುತಾಪತಿಃ ||೨||

ಸ್ಕನ್ದಪಿತಃ ಸುದರ್ಶನಾ|ಪತಿಃ ಸುದರ್ಶನಪ್ರಸೂಃ |

ಶ್ರೀಕೃಷ್ಣಸ್ಯ ತು ನಿರ್ದೇಶಾತ್ ಪಾರ್ಥಸ್ಯ ಸಹಕಾರತಃ ||೩||

ಖಾಣ್ಡವಾರಣ್ಯಮೈನ್ದ್ರಂ ವೈ| ದಗ್ಧ್ವಾಪ್ತಸುಖಮಾನಸಃ |

ದತ್ತವಾನರ್ಜುನಾಯಾಗ್ನಿಃ ಕಪಿಧ್ವಜರಥಂ ತಥಾ ||೪||

ಗಾಣ್ಡೀವಂ ಧನುರಕ್ಷಯ್ಯಾನ್ ತೂಣೀರಾನ್ ಮುದಿತಃ ಪ್ರಭುಃ |

ಚಕ್ರಾಯುಧಂ ಚ ಕೃಷ್ಣಾಯ ದಿವ್ಯಂ ನಾಮ ಸುದರ್ಶನಂ ||೫||

ವೃತ್ರಸ್ಯ ಹನನಾದಿನ್ದ್ರೋ ಬ್ರಹ್ಮಹತ್ಯಾಘಮಾಪ್ತವಾನ್ |

ತಸ್ಮಿನ್ನಗ್ನಿಸ್ತು ಪಾದಾಂಶಂ ಗೃಹೀತ್ವಾ ಸರ್ವಭಕ್ಷಕಃ ||೬||

ಸೀತಾದೇವೀಂ ಚ ನಿರ್ದೋಷಾಂ ಶ್ರೀರಾಮಾಯ ಚ ದತ್ತವಾನ್ |

ವಿಶ್ವನರಸ್ಯ ವಿಪ್ರಸ್ಯ ಶುಚಿಷ್ಮತ್ಯಾಶ್ಚ ಪುತ್ರಕಃ ||೭||

ಬಾಲಾರಿಷ್ಟವಿಮುಕ್ತ್ಯರ್ಥಂ ನಾರದೇನ ಹಿ ಚೋದಿತಃ |

ತಪೋದ್ವಾರಾ ಶಿವೇನಾಪ್ತ|ವಾನ್ ದಿಗೀಶತ್ವಮಾಗ್ನಿಕಮ್ ||೮||

ಅಮರತ್ವಂ ಚ ದೇವತ್ವಮಗ್ನಿಲೋಕಾಧಿತ್ಯಕಮ್ |

ಸ್ವಧಾಭರ್ತಾ ಮೇಷವಾಹಃ ಸಹದೇವಸ್ತುತಃ ಪುರಾ ||೯||

ಪಾಣ್ಡವಾನಾಂ ರಾಜಸೂಯ|ಕಾಲೇ ದಿಗ್ವಿಜಯಾಯ ವೈ |

ಆತ್ಮಹತ್ಯಾಭಯಾದಿನ್ದ್ರಂ ಮೋಚಯಾಮಾಸ ಮಾನದಃ ||೧೦||

ಅಙ್ಗಯನ್ತಿ ತಥಾಗ್ರ್ಯಂ ಚ ಜನ್ಮ ವೈ ಪ್ರಾಪಯನ್ತಿ ಚ |

ಹವಿಃ ಪ್ರಕ್ಷೇಪಣೇ ಷಟ್ಸು ಗಾರ್ಹಪತ್ಯೇ ತಥೈವ ಚ ||೧೧||

ಆಹವನೀಯಸಭ್ಯಯೋ|ರನ್ವಾಹಾರ್ಯೇ  ತಥಾಪಿ ವಾ |

ಆವಸಥ್ಯೇ ತಥೌಪಾಸ|ನಾದಕ್ಷಿಣಾಗ್ನಿಷು ದ್ರುತಮ್ ||೧೨||

ದ್ರವಿಣಂ ಪ್ರದದಾತು ತ್ವಂ ಧಿಯೋsಗ್ನಿರ್ಭೇಷಜಂ ತಥಾ |

ಹ್ರದಂ ದದಸ್ವ ಶೀತಂ ಚ ರಕ್ಷ ಪುತ್ರಾಂಶ್ಚ  ಮಾಂ ಸದಾ ||೧೩||

ಪಿಂಗಾಕ್ಷ ಲೋಹಿತಗ್ರೀವ ಕೃಷ್ಣವರ್ಣ ನಮೋsಸ್ತು ತೇ |

ಶತ್ರವೋ ನಿಧನಂ ಯಾನ್ತು ಜಯ ತ್ವಂ ಬ್ರಹ್ಮತೇಜಸಾ ||೧೪||

ಪಿಙ್ಗಜಟೀಮಶೇಷಾದ|ಮಗ್ನಿಂ ಪ್ರತ್ಯಕ್ಷದೈವತಮ್ |

ಗತೋsಸ್ಮಿ ಶರಣಂ ದೇವಂ ಮಮ ಪುತ್ರಾಂಶ್ಚ ರಕ್ಷತು ||೧೫||

ದುಃಖಿತಾಂಶ್ಚ ದ್ವಿಜಾಂಶ್ಚೈವ ಪ್ರಜಾನ್ ಪಶೂಂಶ್ಚ ಪಾಲಯ |

ಯಾವತ್ತಪತಿ ಸೂರ್ಯಶ್ಚ ಯಾವದ್ ಭ್ರಾಜತಿ ಚನ್ದ್ರಮಾಃ ||೧೬||

ಯಾವದ್ವಾತಿ ತು ವಾಯುಶ್ಚ ಸ್ಥಿರಸ್ತಾವದ್ಭವ ಪ್ರಭೋ |

ತಾವಜ್ಜೀವ ಜಯ ಪ್ರಾತಸ್ಸಾಯಂ ರಾತ್ರೌ ಸುಖಪ್ರದ ||೧೭||

ಧರ್ಮಸ್ಯ ವಸುಭಾರ್ಯಾಯಾಂ ಪ್ರಥಮೋऽಗ್ನಿರಜಾಯತ |

ಸ್ವಾಹಾಯಾಂ ಪಾವಕಸ್ತಸ್ಯ ಪವಮಾನಃ ಶುಚಿಃ ಸುತಾಃ ||೧೮||

ಚಾಕ್ಷುಷೇ ಮನ್ವನ್ತರೇ ಷ|ಷ್ಠೇ ತು ದ್ರವಿಣಕಾದಯಃ |

ವಸೋರ್ಧಾರಾಸುತಾ ಅಗ್ನೇ|ರೇಭ್ಯೋ ಜಾತಾಃ ಸುತಾಃ ಪುನಃ ||೧೯||

ಚತ್ವಾರಿಂಶತ್ತಥಾ ಪಞ್ಚಾ|ಗ್ನಯಸ್ತಸ್ಮಾತ್ಸಮನ್ತತಃ |

ನವಾಧಿಕಂ ಚ ಚತ್ವಾರಿಂ|ಶದ್ಭವನ್ತಿ ಪುರಾಣತಃ ||೨೦||

ವಿಶ್ವನರಸ್ಯ ಪುತ್ರಸ್ತು ವೈಶ್ವಾನರೇತಿ ಕಥ್ಯತೇ |

ವಹ್ನಿಶ್ಚ ವೀತಿಹೋತ್ರಃ ಕೃ|ಪೀಟಯೋನಿರ್ಧನಞ್ಜಯಃ ||೨೧||

ಜ್ವಲನೋ ಜಾತವೇದಾಶ್ಚ ತನೂನಪಾತ್ತನೂನಪಾಃ |

ಬರ್ಹಿಃಶುಷ್ಮಾ ಕೃಷ್ಣವರ್ತ್ಮಾ ಬರ್ಹಿಃ ಶುಷ್ಮಾ ತಥೈವ ಚ ||೨೨||

ಆಶ್ರಯಾಶೋ ಬೃಹದ್ಭಾನುಃ ಶೋಚಿಷ್ಕೇಶ ಉಷರ್ಬುಧಃ |

ಆಶಯಾಶಃ ಕೃಶಾನುಶ್ಚ ರೋಹಿತಾಶ್ವೋऽನಲೋऽವತು ||೨೩||

ವಾಯುಸಖಾ ಶಿಖಾವಾಂಶ್ಚ ಪಾತು ವಾಯುಸಖಃ ಶಿಖೀ |

ಶುಕ್ರೋ ಹಿರಣ್ಯರೇತಾಶ್ಚ ಹವ್ಯಭುಗಾಶುಶುಕ್ಷಣಿಃ ||೨೪||

ಹುತಭುಗ್ದಹನಃ ಪಾತು ಹವ್ಯವಾಹನ ಏವ ಚ |

ಸಪ್ತಾರ್ಚಿರ್ದಮುನಾಃ ಪಾತು ಚಿತ್ರಭಾನುರ್ವಿಭಾವಸುಃ ||೨೫||

ವೃಷಾಕಪಿರ್ದಮೂನಾಶ್ಚಾ|ಪ್ಪಿತ್ತಂ ರಕ್ಷತು ನೋ ವಸುಃ |

ಜುಹೂವಾಲೋऽರಣಿಃ ಪಾತು ಕಪಿಲಃ ಪಿಙ್ಗಲೋऽಗಿರಃ ||೨೬||

ಪಾಚನಸ್ತ್ರಾತು ವಿಶ್ವಪ್ಸಾಃ ಕೃಷ್ಣಾರ್ಚಿಶ್ಛಾಗವಾಹನಃ |

ಜುಹೂವಾರ ಉದರ್ಚಿಶ್ಚ ಹಿಮಾರಾತಿಶ್ಚ ಭಾಸ್ಕರಃ ||೨೭||

ತಮೋನುತ್ ಸಪ್ತಜಿಹ್ವಶ್ಚ ಸುಶಿಖಶ್ಚಾಪಪಾರಿಕಃ |

ಸ್ತುತ್ಯಾನಯಾ ತು ಸುಪ್ರೀತಃ ಸರ್ವದೇವಮುಖೋऽವತು ||೨೮||

ಅಗಂ ನ ಗಮನಂ ಯಸ್ಯ ಪ್ರತಿ ತಂ ನಯತೀತಿ ವಾ |

ಶಾಶ್ವತಂ ಚ ಪರಬ್ರಹ್ಮ ತಸ್ಮಾದಗ್ನಿಸ್ತು ಮೋಕ್ಷದಃ ||೨೯||

ವಿವಿಧೇಷು ಚ ಕರ್ಮೇಷು ನಾಮಾನ್ತರಂ ಭವೇತ್ಪುನಃ |

ರೂಪಾನ್ತರಂ ಚ ತತ್ರಾಪಿ ಸಙ್ಗೃಹ್ಯಾತ್ರ ಸುಕೀರ್ತ್ಯತೇ ||೩೦||

ಲೌಕಿಕೇ ಪಾವಕೋ ಹ್ಯಗ್ನಿಃ ಪ್ರಥಮಃ ಪರಿಕೀರ್ತಿತಃ |

ನವಾಗಾರಪ್ರವೇಶಾದೌ ವೇದೋಕ್ತೇ ತು ಮನೀಷಿಭಿಃ ||೩೧||

ಪಶ್ಚಾತ್ತು ಮಾರುತೋ ನಾಮ ಗರ್ಭಾಧಾನೇ ವಿಧೀಯತೇ |

ಪುಂಸವನೇ ತು ಚನ್ದ್ರಾಖ್ಯಃ ಶುಙ್ಗಾಕರ್ಮಣಿ ಶೋಭನಃ ||೩೨||

ಸೀಮನ್ತೇ ಮಙ್ಗಲೋ ನಾಮ ಪ್ರಗಲ್ಮೋ ಜಾತಕರ್ಮಣಿ |

ಪಾರ್ಥಿವೋ ನಾಮಸಂಸ್ಕಾರೇ|ऽನ್ನಪ್ರಾಶನೇ ಶುಚಿಸ್ತಥಾ ||೩೩||

ಚೂಡಾಕರ್ಮಣಿ ಸತ್ಯೋऽಪ|ನಯನೇ ತು ಸಮುದ್ಭವಃ |

ಸೂರ್ಯಾಗ್ನಿಶ್ಚ ಗವಾಂ ದಾನೇ|ऽಗ್ನಿಃ ಸಮಾವರ್ತನೇ ತಥಾ ||೩೪||

ನಿತ್ಯಾಗ್ನ್ಯುಪಾಸನಾಯಾಂ ತು ವೈಶ್ವಾನರೇತಿ ಕಥ್ಯತೇ |

ವಿವಾಹೇ ಯೋಜಕಶ್ಚೈವ ಚತುರ್ಥ್ಯಾಂ ಪ್ರಥಿತಃ ಶಿಖೀ ||೩೫||

ಅಪರೇ ತು ಧೃತಿಶ್ಚಾಯಂ ಪ್ರಾಯಶ್ಚಿತ್ತೇ ವಿಧುಸ್ತಥಾ |

ಪಾಕಯಜ್ಞೇ ಸಾಹಸಾಗ್ನಿಃ ಶಂ ತನೋತು ಚ ಸರ್ವದಾ ||೩೬||

ಲಕ್ಷಹೋಮೇऽಭೀಷ್ಟದಃ ಸ್ಯಾತ್ ಕೋಟಿಹೋಮೇ ಮಹಾಶನಃ |

ಪೂರ್ಣಾಹುತ್ಯಾಂ ಮೃಡೋ ನಾಮ ಶಾನ್ತಿಕೇ ವರದಸ್ತಥಾ ||೩೭||

ಪೌಷ್ಟಿಕೇ ಬಲದಶ್ಚೈವ ಕ್ರೋಧಾಗ್ನಿಶ್ಚಾಭಿಚಾರಿಕೇ |

ವಶ್ಯಾರ್ಥೇ ವಶಕೃತ್ ಪ್ರೋಕ್ತೋ ವನದಾಹೇ ತು ಪೋಷಕಃ ||೩೮||

ಕೋಷ್ಠೇ ತು ಜಠರಾಗ್ನಿಶ್ಚ ಕ್ರವ್ಯಾದೋ ಶವಭಕ್ಷಣೇ |

ಏವಂ ಗೋಭಿಲಪುತ್ರೇಣ ಸಂಗೃಹೀತಾನ್ಯನೇಕಧಾ ||೩೯||

ಪಿಙ್ಗಭ್ರೂಶ್ಮಶ್ರುಕೇಶಾಕ್ಷಃ ಪೀನಾಙ್ಗಜಠರೋऽರುಣಃ |

ಛಾಗಸ್ಥಃ ಸಾಕ್ಷಸೂತ್ರೋऽಗ್ನಿಃ ಸಪ್ತಾರ್ಚಿಃ ಶಕ್ತಿಧಾರಕಃ ||

ಇತ್ಥಮಗ್ನೇಃ ಸ್ವರೂಪಂ ತ್ವಾ|ದಿತ್ಯನಾಮಪುರಾಣಕೇ ||೪೦||

(ಶಾರ್ದೂಲವಿಕ್ರೀಡಿತವೃತ್ತಮ್)

ಜ್ಞಾನಾಕ್ಷಿಸ್ತು ಲಲಾಟಚಕ್ಷುರನಲಶ್ಶಮ್ಭೋರಗಾಧಪ್ರಭಾ-

-ಯುಕ್ತಶ್ಚಾಮಿತಲೋಕನಾಶಚತುರೋऽಧ್ಯಾತ್ಮಪ್ರಭಾಸಂಯುತಃ |

ಆಜ್ಞಾಚಕ್ರಗತಃ ಸ್ಮರಪ್ರಮಥನಃ ಕ್ರೋಧಾಗ್ನಿರೂಪೋ ಮಹಾ-

-ನ್ನಿತ್ಯೇ ಮಙ್ಗಲಕಾರಕೋऽಮಿತಜಗನ್ನೈಮಿತ್ತಿಕೇ ನಾಶಕಃ ||೪೧||

(ಅನುಷ್ಟುಭ್ವೃತ್ತಮ್)

ಅರ್ಚಿಷ್ಮಾನ್ ಪಿಣ್ಡಿತಶಿಖಃ ಸರ್ಪಿಃಕಾಞ್ಚನಸನ್ನಿಭಃ |

ಸ್ನಿಗ್ಧಃ ಪ್ರದಕ್ಷಿಣಶ್ಚೈವ ವಹ್ನಿಃ ಸ್ಯಾತ್ ಕಾರ್ಯಸಿದ್ಧಯೇ ||

ಇತಿ ವಾಯುಪುರಾಣೋಕ್ತಂ ಹೋಮೀಯಾಗ್ನೇಸ್ತು ಲಕ್ಷಣಮ್ ||೪೨||

ಅಥ ವೈದ್ಯಕಮತೇऽಗ್ನಿಸ್ತು ತ್ರಿಧೇತಿ ಚ ವಿಕಥ್ಯತೇ |

ಭೌಮೋ ದಿವ್ಯಸ್ತಥೋದರ್ಯ|ಸ್ತತ್ರಾದ್ಯಸ್ತು ಚ ಕಾಷ್ಠಜಃ ||

ಊರ್ಧ್ವಜ್ವಲನರೂಪಶ್ಚ ಪಚನಸ್ವೇದಕಾರಕಃ ||೪೩||

ದ್ವಿತೀಯೋऽದಕಜಶ್ಚೈವ ಪರ್ಯಗ್ಜ್ವಲನಶೀಲವಾನ್ |

ವಾಡವೇತಿ ಪ್ರಸಿದ್ಧಶ್ಚ ಜಲಾನ್ತರ್ಗತರೂಪವಾನ್ ||೪೪||

ಉಭಯೇಂಧನಜಾತಸ್ತು ತೃತೀಯೋ ವಿದ್ಯುದಾದಿಕಃ |

ಪರ್ಯಗ್ಜ್ವಲನಶೀಲಶ್ಚ ಭುಕ್ತಸ್ಯ ರಸದಾಯಕಃ ||೪೫||

ಮನ್ದಸ್ತೀಕ್ಷ್ಣೋऽಥ ವಿಷಮಃ ಸಮಶ್ಚೇತಿ ಚತುರ್ವಿಧಃ |

ಕಫಪಿತ್ತಾನಿಲಾಧಿಕ್ಯಾತ್ ತತ್ಸಾಮ್ಯಾಜ್ಜಾಠರೋऽನಲಃ ||೪೬||

ವಿಷಮೋ ವಾತಜಾನ್ ರೋಗಾನ್ ತೀಕ್ಷ್ಣಃ ಪಿತ್ತನಿಮಿತ್ತಜಾನ್ |

ಕರೋತ್ಯಗ್ನಿಸ್ತಥಾ ಮನ್ದೋ ವಿಕಾರಾನ್ ಕಫಸಮ್ಭವಾನ್ ||೪೭||

ಸಮಾಸಮಾಗ್ನೇರಶಿತಾ ಮಾತ್ರಾ ಸಮ್ಯಗ್ವಿಪಚ್ಯತೇ |

ಸ್ವಲ್ಪಾಪಿ ನೈವ ಮನ್ದಾಗ್ನೇರ್ವಿಷಮಾಗ್ನೇಸ್ತು ದೇಹಿನಃ ||೪೮||

ಕದಾಚಿತ್ ಪಚ್ಯತೇ ಸಮ್ಯಕ್ ಕದಾಚಿಚ್ಚ ನ ಪಚ್ಯತೇ |

ತೀಕ್ಷ್ಣಾಗ್ನಿರಿತಿ ತಂ ವಿದ್ಯಾತ್ ಸಮಾಗ್ನಿಃ ಶ್ರೇಷ್ಠ ಉಚ್ಯತೇ ||೪೯||

ಅತಿತೀಕ್ಷ್ಣಾನಲಸ್ತತ್ರ ಭಸ್ಮಕಾಗ್ನಿಃ ಪ್ರಚಕ್ಷತೇ |

ಪಾಚಯಿತ್ವಾ ಸ ರಕ್ತಾದೀ|ನಾಹಾರಾಭಾವಸಙ್ಕಟೇ ||

ಸರ್ವಾನ್ ಧಾತೂನಾಶು ವೈ ತಾನ್| ಮಾರಯಿಷ್ಯತಿ ಜಾಠರಃ ||೫೦||

ಸಙ್ಗೀತದರ್ಪಣೇ ದೇಹ|ಜನ್ಯಾಗ್ನಿರ್ನಾದಕಾರಣಮ್ |

ಕಥಂ ಭವತಿ ತನ್ನಾದ|ಮಿತ್ಯಾಖ್ಯಾತಂ ಮನೀಷಿಭಿಃ ||೫೧||

ಆತ್ಮನಾ ಪ್ರೇರಿತಂ ಚಿತ್ತಂ ವಹ್ನಿಮಾಹನ್ತಿ ದೇಹಜಮ್ |

ಬ್ರಹ್ಮಗ್ರನ್ಥಿಸ್ಥಿತಂ ಪ್ರಾಣಂ ಸ ಪ್ರೇರಯತಿ ಪಾವಕಃ ||೫೨||

ಪಾವಕಪ್ರೇರಿತಸ್ಸೋऽಥ ಕ್ರಮಾದೂರ್ಧ್ವಪಥೇ ಚರನ್ |

ಅತಿಸೂಕ್ಷ್ಮಧ್ವನಿಂ ನಾಭೌ ಹೃದಿ ಸೂಕ್ಷ್ಮಂ ಗಲೇ ಪುನಃ ||೫೩||

ಪುಷ್ಟಂ ಶೀರ್ಷೇ ತ್ವಪುಷ್ಟಞ್ಚ ಕೃತ್ರಿಮಂ ವದನೇ ತಥಾ |

ಆವಿರ್ಭಾವಯತೀತ್ಯೇವಂ ಪಞ್ಚಧಾ ಕೀರ್ತ್ಯತೇ ಬುಧೈಃ ||೫೪||

ನಕಾರಂ ಪ್ರಾಣನಾಮಾನಂ ದಕಾರಮನಲೋ ವಿದುಃ |

ಜಾತಃ ಪ್ರಾಣಾಗ್ನಿಸಂಯೋಗಾತ್ತೇನ ನಾದೋऽಭಿಧೀಯತೇ ||೫೫||

(ಶಾರ್ದೂಲವಿಕ್ರೀಡಿತವೃತ್ತಮ್)

ಆಕಾಶಾತ್ಪವನೋ ತತೋऽಗ್ನಿರನಲಾದಬ್ಜಾಯತೇತಿ ಶ್ರುತಿಃ

ಖಂಸ್ಥೈಃ ಸೂಕ್ಷ್ಮಕಣೈಸ್ತು ಮೂಲಘಟಕೈರಾಭೂಯತೇ ವಾಯವಃ |

ವಾಯೋರ್ಭಿನ್ನತರೈಶ್ಚ ಸಂಯುಗಗತೇರುತ್ಪದ್ಯತೇ ಪಾವಕ-

-ಸ್ತಸ್ಮಾತ್ಪ್ರಾಣಪವಾರಿಪಾಖ್ಯಘಟಕೈಸ್ಸಮ್ಪದ್ಯತೇ ತೋಯ ವೈ ||೫೬||

(ಅನುಷ್ಟುಭ್ವೃತ್ತಮ್)

ದ್ವಿವಿಧಸ್ತೇಜರೂಪಸ್ತು ಸೂಕ್ಷ್ಮಃ ಸ್ಥೂಲ ಇತೀರಿತಃ |

ಸೂಕ್ಷ್ಮಾಗ್ನಿಸ್ಸೂಕ್ಷ್ಮವಾಯೋಸ್ತು ಸ್ಥೂಲಃ ಪಞ್ಚೀಕೃತೇತಿ ಚ ||೫೭||

ಭೂತಾನ್ತರಾಷ್ಟಮೇನಾಂಶ|ಮಿಶ್ರಿತೇ ಸ್ವಾರ್ಧಭಾಗಕಮ್ |

ಪಞ್ಚೀಕೃತಮಿದಂ ಪ್ರೋಕ್ತಂ ಪಞ್ಚಭೂತವಿಸೃಷ್ಟಯೇ ||೫೮||

ಸ್ಥೂಲಾಗ್ನಿಸ್ತು ತ್ರಿಧಾ ಭೂತೋ ಭೌಮೋ ದಿವ್ಯಶ್ಚ ಜಾಠರಃ |

ಭೌಮಃ ಪಾರ್ಥಿವಕಾಷ್ಠಾದಿ|ಜನ್ಯೋ ಮಹಾನಸಾದಯಃ ||೫೯||

ಜಲವಾಯ್ವಾದಿಜನ್ಯಸ್ತು ದಿವ್ಯ ಉಲ್ಕಾದಿ ವಿದ್ಯುತಃ |

ಏತಾವುಭಾವಪಿ ಪ್ರೋಕ್ತಾ|ವೂರ್ಧ್ವಜ್ವಲನರೂಪಿಣೌ ||೬೦||

ಉದರೇ ಭವಸ್ತೃತೀಯಸ್ತು ಪಾಕದಾಹಪ್ರಕಾಶಕಾಃ |

ತ್ರಯೋऽಪ್ಯಮೀ ಚ ತ್ರೈಗುಣ್ಯಾಃ ಶಬ್ದಸ್ಪರ್ಶಸರೂಪಿಣಃ ||೬೧||

ಪಂಚೀಕರಣಭಾಗಸ್ತು ತ್ರಿವೃತ್ಕರಣಮುಚ್ಯತೇ |

ತತ್ಪಶ್ಚಾದನಲಸ್ಯ ತ್ರಿ|ರೂಪತ್ವಮಿತಿ ಕಥ್ಯತೇ ||೬೨||

ಛಾನ್ದೋಗ್ಯೇ ತು ಯದಗ್ನೇ ರೋ|ಹಿತಂ ತೈಜಸರೂಪಕಮ್ |

ಯಚ್ಛುಕ್ಲಂ ತದಪಾಂ ರೂಪಂ ಕೃಷ್ಣೋऽನ್ನಸ್ಯ ಚ ರೂಪಕಮ್ ||೬೩||

(ಇನ್ದ್ರವಜ್ರಾವೃತ್ತಮ್)

ನಾಭೇಸ್ತದೂರ್ಧ್ವಂ ಹೃದಯಾದಧಸ್ತಾ-

-ದಾಮಾಶಯಸ್ಥಂ ರವಿರೂಪತೇಜಃ |

ಕೌಕ್ಷೇಯಸಂಜ್ಞಾಂ ಪ್ರವದನ್ತಿ ಪಿತ್ತಂ

ಭುಕ್ತಂ ಪಚತ್ಯೇವ ಸುತೈಲಖಾದ್ಯಮ್ ||೬೪||

(ಅನುಷ್ಟುಭ್-ವೃತ್ತಮ್)

ಪುಣ್ಡರೀಕಾಕೃತೇರ್ಬ್ರಹ್ಮ|ಧ್ಯಾನಸ್ಥಾನಸ್ಯ ವೈ ಹೃದಃ |

ಸಮ್ಬನ್ಧಿನ್ಯಸ್ತು ನಾಡ್ಯೋ ಹೃ|ನ್ಮಾಂಸಪಿಣ್ಡಾಚ್ಚ ಸರ್ವತಃ ||೬೫||

(ವಂಶಸ್ಥವೃತ್ತಮ್)

ವಿನಿಃಸೃತಾ ಭಾಸ್ಕರಮಣ್ಡಲಾದಿವ

ಪ್ರಭಾತಕಾಲೀನಸುಮನ್ದರಶ್ಮಯಃ |

ಯಥಾ ತಥಾ ಪಿಙ್ಗಲವರ್ಣಕಾನ್ತಿನಾ

ಸುಶೋಭಿತಾಸ್ಸೂಕ್ಷ್ಮರಸೇನ ಪೂರ್ಣಾಃ ||೬೬||

(ಅನುಷ್ಟುಭ್-ವೃತ್ತಮ್)

ಸೌರೇನ ತೇಜಸಾ ತೇನ ಪಿತ್ತೇನಾಲ್ಪಕಫೇನ ಚ |

ಸಂಪರ್ಕಾತ್ ಪಿಙ್ಗಲೋ ವಾಯು|ಭೂಯಸ್ತ್ವಾನ್ನೀಲತಾಂ ಪುನಃ ||೬೭||

ತದೇವ ಕಫಭೂಯಸ್ತ್ವಾ|ಚ್ಛುಕ್ಲಂ ಪೀತಂ ಸಮೇನ ಚ |

ಶೋಣಿತಬಹುಲಾಯಾಂ ತು| ತಲ್ಲೋಹಿತಂ ಚ ಯಾತಿ ವೈ ||೬೮||

ತೇಜ ಏವ ಪಿಪಾಸಾಯಾಃ ಕಾರಣಂ ಶೋಷಣಾದಪಾಮ್ ||೬೯||

ಆದಿತ್ಯಾದಿಗ್ರಹಾಣಾಂ ಚ ಸಾಮ್ಪ್ರತಂ ಹ್ಯಗ್ನಿರುಚ್ಯತೇ |

ಆದಿತ್ಯೇ ಕಪಿಲೋ ನಾಮ ಪಿಙ್ಗಲಃ ಸೋಮ ಉಚ್ಯತೇ ||೭೦||

ಧೂಮಕೇತುಸ್ತಥಾ ಭೌಮೇ ಜಠರೋऽಗ್ನಿರ್ಬುಧೇ ಸ್ಮೃತಃ |

ಬೃಹಸ್ಪತೌ ಶಿಖೀ ನಾಮ ಶುಕ್ರೇ ಭವತಿ ಹಾಟಕಃ ||

ಶನೈಶ್ಚರೇ ಮಹಾತೇಜಾ ರಾಹೌ ಕೇತೌ ಹುತಾಶನಃ ||೭೧||

ರುದ್ರತೇಜಸಮುದ್ಭೂತಂ ದ್ವಿಮೂರ್ಧಾನಂ ದ್ವಿನಾಸಿಕಮ್ |

ಷಣ್ಣೇತ್ರಂ ಚ ಚತುಃಶ್ರೋತ್ರಂ ತ್ರಿಪಾದಂ ಸಪ್ತಹಸ್ತಕಮ್ ||೭೨||

ಯಾಮ್ಯಭಾಗೇ ಚತುರ್ಹಸ್ತಂ ಕೌಬೇರೇ ತು ತ್ರಿಹಸ್ತಕಮ್ |

ಸ್ರುವಂ ಸ್ರುಚಂ ಚ ಶಕ್ತಿಂ ಚ| ಅಕ್ಷಮಾಲಾಂ ಚ ದಕ್ಷಿಣೇ ||೭೩||

ತೋಮರಂ ವ್ಯಜನಂ ಚೈವ ಘೃತಪಾತ್ರಂ ತು ವಾಮಕೇ |

ಬಿಭ್ರತಂ ಸಪ್ತಭಿರ್ಹಸ್ತೈರ್ದ್ವಿಮುಖಂ ಸಪ್ತಜಿಹ್ವಕಮ್ ||೭೪||

ದಕ್ಷಿಣಂ ಚ ಚತುರ್ಜಿಹ್ವಂ ತ್ರಿಜಿಹ್ವಮುತ್ತರಂ ದಿಶಮ್ |

ದ್ವಾದಶಕೋಟಿಮೂರ್ತ್ಯಾಖ್ಯಂ ದ್ವಿಪಞ್ಚಾಶತ್ಕಲಾಯುತಮ್ ||೭೫||

ಸ್ವಾಹಾಸ್ವಧಾವಷಟ್ಕಾರೈರಙ್ಕಿತಂ ಮೇಷವಾಹನಮ್ |

ರಕ್ತಮಾಲ್ಯಾಮ್ಬರಧರಂ ರಕ್ತಂ ಪದ್ಮಾಸನಸ್ಥಿತಮ್ ||

ರೌದ್ರಂ ತು ವಹ್ನಿನಾಮಾನಂ ರೌದ್ರಕಲ್ಪೇ ಪ್ರವರ್ಣ್ಯತೇ ||೭೬||

ರಾಮಾಯಣೇ ಚ ವಾಲ್ಮೀಕೇಃ ಸೀತಯೇತ್ಥಂ ಸ ಪ್ರಾರ್ಥಿತಃ |

ತ್ವಮಗ್ನೇ ಸರ್ವದೇವಾನಾಂ ಶರೀರಾನ್ತರಗೋಚರಃ |

ತ್ವಂ ಸಾಕ್ಷೀ ಮಮ ದೇಹಸ್ಥಸ್ತ್ರಾಹಿ ಮಾಂ ದೇವಸತ್ತಮ ||೭೭||

ಇತ್ಥಂ ಪ್ರಕೀರ್ತಿತಂ ತ್ವಗ್ನೇರ್ಮಾಹಾತ್ಮ್ಯಂ ವೇದಸಂಮತಮ್ |

ಪುರಾಣಾಗಮಶಾಸ್ತ್ರೋಕ್ತಂ ಸಂಗೃಹೀತಂ ಮಯಾಧುನಾ ||೭೮||

ಸುಯತ್ನೇನ ಚ ಕಾಲೇನ ಸುದೀರ್ಘೇಣ ಹುತಾಶನ |

ಪುರುಷಾರ್ಥಾಂಶ್ಚ ಸರ್ವಾನ್ಮೇ ಲೋಕಶಾನ್ತಿಂ ಪ್ರಯಚ್ಛತು ||೭೯||

ಅಗ್ರೇ ಜಾತೋ ದೇವತಾನಾಮಗ್ನೇ ತ್ವಂ ದೇವತಾಮುಖಮ್ |

ಅವಿದ್ಯಾತಮಸೋऽಸ್ಮಾಂಸ್ತ್ವಂ ವಿದ್ಯಾಜ್ಯೋತಿಂ ನಯ ಪ್ರಭೋ ||೮೦||