ಲಕ್ಷ್ಮೀನಾರಾಯಣಪ್ರಪತ್ತಿ:

(ವಸಂತತಿಲಕಾವೃತ್ತಮ್)

ಲಕ್ಷ್ಮೀತರಂಗಯುತಸಾಗರರೂಪಧಾರಿನ್

ನಾರಾಯಣಾಚ್ಯುತಪದಸ್ಥಿತವಿಷ್ಣುರೂಪಿನ್ |

ವೇದಾಂತವೇದ್ಯ ನಿಖಿಲಾಗಮಶಾಸ್ತ್ರಸಾರ

ಲಕ್ಷ್ಮೀಪತೇ! ತವಪದಂ ಶರಣಂ ಪ್ರಪದ್ಯೇ ||೧||

ದೇವಾಧಿದೇವ ಮೃದುಪಂಕಜಪದ್ಮಪಾದ

ಕ್ಷೀರಾಬ್ಧಿವಾಸ ವಿಧಿಶಂಕರಪೂಜ್ಯಮೂರ್ತೇ |

ಹೇ ಶೇಷತಲ್ಪ ರಮಯಾರ್ಚಿತದಿವ್ಯದೇಹ

ಲಕ್ಷ್ಮೀಪತೇ! ತವಪದಂ ಶರಣಂ ಪ್ರಪದ್ಯೇ ||೨||

ಕೌಮೋದಕೀವರಗದಾಯುಧಚಾರುಗಾತ್ರ

ಹೇ ಪಾಂಚಜನ್ಯಕರ ಕೌಸ್ತುಭಹಾರಪಾತ್ರ |

ಹೇ ಚಕ್ರಧಾರಿ ಕಮಲಾಕರಪದ್ಮನೇತ್ರ

ಲಕ್ಷ್ಮೀಪತೇ! ತವಪದಂ ಶರಣಂ ಪ್ರಪದ್ಯೇ ||೩||

ಮತ್ಸ್ಯಾವತಾರ ನಿಗಮಾದಿಸುರಕ್ಷಣಾಂಗ

ಸತ್ಯವ್ರತಾಯಮನುಪಟ್ಟವರಪ್ರದೇಶ |

ವೇದಾಪಹಾರಕತಮಾಸುರಹಾ ರಮೇಶ

ಲಕ್ಷ್ಮೀಪತೇ! ತವಪದಂ ಶರಣಂ ಪ್ರಪದ್ಯೇ ||೪||

ಕೂರ್ಮಾವತಾರ ಗಿರಿಮಂದರಧಾರಣಾಂಗ

ಕ್ಷೀರಾಬ್ಧಿಜಾರಮಣ ವಾರುಣಪುತ್ರಿಭರ್ತ: |

ಶ್ರೀಕಚ್ಛಪೇಶ ದನುಜಾಂತಕ ಮೋಹನಾಂಗ

ಲಕ್ಷ್ಮೀಪತೇ! ತವಪದಂ ಶರಣಂ ಪ್ರಪದ್ಯೇ ||೫||

ಹೇ ಸೂಕರಾಕೃತಿ ವರಾಹ ಧರೋದ್ಧರಾಂಗ

ಹೇ ದೀನಪಾಲ ದಿತಿಜಾಂತಕ ಪೃಥ್ವಿಭರ್ತ: |

ಹೇ ಶ್ರೀಧರಾಧರ ಮಹಾದಶನಪ್ರತಾರ

ಲಕ್ಷ್ಮೀಪತೇ! ತವಪದಂ ಶರಣಂ ಪ್ರಪದ್ಯೇ ||೬||

ಲಕ್ಷ್ಮೀನೃಸಿಂಹ ಖಲಭಂಜನ ಕ್ರೂರರೂಪ

ಲಕ್ಷ್ಮೀಶ ತೀಕ್ಷ್ಣನಖದಂಷ್ಟ್ರಕರಾಲಕೋಪ |

ಭೀಭತ್ಸರೌದ್ರ ನತಭಕ್ತಸುಖಪ್ರತಾಪ

       ಲಕ್ಷ್ಮೀಪತೇ! ತವಪದಂ ಶರಣಂ ಪ್ರಪದ್ಯೇ ||೭||

ಹೇ ವಾಮನಾಖ್ಯ ಬಲಿಬಂಧನ ಬ್ರಹ್ಮಚಾರಿನ್

ತ್ರೈಲೋಕ್ಯದಿವ್ಯಪದಮಂಡಿತ ವಿಕ್ರಮಾಖ್ಯ |

ದೈತ್ಯಾಯಶಕ್ರಪದದಾಪಿತಭಕ್ತದಾಸ

ಲಕ್ಷ್ಮೀಪತೇ! ತವಪದಂ ಶರಣಂ ಪ್ರಪದ್ಯೇ ||೮||

ಹೇ ಪರ್ಶುರಾಮ ಜಮದಗ್ನಿಜ ಭಾರ್ಗವಾಖ್ಯ

ಹೇ ಕಾರ್ತವೀರ್ಯಖಲಮರ್ದನ ರುದ್ರಶಿಷ್ಯ |

ಹೇ ಕ್ಷತ್ರನಾಶಕ ಮಹೋಗ್ರಗುಣಪ್ರತಾಪಿನ್

ಲಕ್ಷ್ಮೀಪತೇ! ತವಪದಂ ಶರಣಂ ಪ್ರಪದ್ಯೇ ||೯||

ಶ್ರೀರಾಮಚಂದ್ರ ರವಿವಂಶಜ ಸುಂದರಾಂಗ

ಸೀತಾಪತೇ ದಶರಥಾತ್ಮಜ ಲಕ್ಷ್ಮಣಾಗ್ರ |

ಕೋದಂಡಪಾಣಿ ಖಲರಾವಣನಾಶಜನ್ಮ

ಲಕ್ಷ್ಮೀಪತೇ! ತವಪದಂ ಶರಣಂ ಪ್ರಪದ್ಯೇ ||೧೦||

ಶ್ರೀಕೃಷ್ಣ ಶೌರಿ ಯದುವಂಶಜ ದ್ವಾರಕೇಶ

ಗೋಲೋಕನಾಥ ಖಲಮರ್ದನ ವೇಣುಮೋದ |

ಪೂರ್ಣಾವತಾರ ನಿಜಗೀತಸುಬೋಧಮೂರ್ತೇ

ಲಕ್ಷ್ಮೀಪತೇ! ತವಪದಂ ಶರಣಂ ಪ್ರಪದ್ಯೇ ||೧೧||

ಹೇ ಬುದ್ಧರೂಪ ತ್ರಿಪುರಾಂತಕಮಿತ್ರ ದೇವ

ಪಾಖಂಡವಾದಿ ಖಲಮೋಹನ ದಿವ್ಯಶಕ್ತ |

ಕಾರುಣ್ಯಭಾವ ನಿರಪೇಕ್ಷ ನಿರೀಹ ನಿತ್ಯ

ಲಕ್ಷ್ಮೀಪತೇ! ತವಪದಂ ಶರಣಂ ಪ್ರಪದ್ಯೇ ||೧೨||

ಅಶ್ವಾಧಿರೂಢ ಕಲಿಹಂತಕಕರ್ಮಜನ್ಮ

ಕಲ್ಕ್ಯಾವತಾರ ವರಭಾರ್ಗವಶಿಷ್ಯಧರ್ಮ |

ಖಡ್ಗಾಯುಧಪ್ರಮಥನಪ್ರಥಮ್ಲೇಂಛನಾಶ

ಲಕ್ಷ್ಮೀಪತೇ! ತವಪದಂ ಶರಣಂ ಪ್ರಪದ್ಯೇ ||೧೩||

ಹೇ ವಾಸುದೇವ ಭವಭಂಜನ ದೀನಬಂಧೋ

ವೈಕುಂಠ ಕೇಶವ ಜನಾರ್ದನ ಹಸ್ತಿಬಂಧೋ |

ಹೇ ನಾರದಾದಿಮುನಿವಂದ್ಯ ದಯಾದಿಸಿಂಧೋ

ಲಕ್ಷ್ಮೀಪತೇ! ತವಪದಂ ಶರಣಂ ಪ್ರಪದ್ಯೇ ||೧೪||

ಇತಿ ಶ್ರೀಲಕ್ಷ್ಮೀನಾರಾಯಣಪ್ರೇರಣಯಾ ತತ್ಪ್ರೀತ್ಯರ್ಥಂ ಚ ದಂಬೆಕೃಷ್ಣಮೂರ್ತಿವಿರಚಿತಾ ಏಷಾ ಲಕ್ಷ್ಮೀನಾರಾಯಣಪ್ರಪತ್ತಿ: ಸದ್ಗುರುಚರಣಾರವಿಂದಯೋ: ಸಮರ್ಪಿತಾ ಅಸ್ತು ||

||ಹರೇ ರಾಮ||