ನಿರ್ಋತಿ(/ನಿರೃತಿ)ಸ್ತುತಿಃ

ನಿರೃತಿಂ ನೈರೃತಾಧೀಶಂ ಯಮಪಶ್ಚಿಮಮಧ್ಯಗಮ್ |

ರಾಕ್ಷಸಾಧಿಪತಿಂ ವನ್ದೇ ದೇವಮಶನ್ನಿವೃತ್ತಯೇ || ೧ ||

ನಿರ್ಗತಾ ಋತಿರಸ್ಮಾತ್ತು ವಾऽಶುಭಂ ನಿರ್ಋತಿಃ ಸ್ಮೃತಃ |

ಋತಿಃ ಶುಭಂ ಚ ದದ್ಯಾನ್ನೋ ನಿರುಪದ್ರವಕಾರಕಃ || ೨ ||

ನೈರೃತೋ ಮಾರುತೋ ವರ್ಷಂ ದದಾತಿ ಭಾರತೇ ಯದಾ |

ವರ್ಷಾಕಾಲೇ ತು ಸಂಪ್ರಾಪ್ತೇ ಧಾನ್ಯವೃದ್ಧಿಂ ಕರೋತಿ ನಃ || ೩ ||

ಪೂರ್ವಸ್ಯಾಂ ತು ಸುಕಾನ್ತಸ್ಯ ರಕ್ಷಕೂಟಾಹ್ವಯೋ ಗಿರಿಃ |

ಯತ್ರಾऽऽಸ್ತೇ ಸತತಂ ದೇವೋ ನಿರ್-ಋತೀ ರಾಕ್ಷಸೇಶ್ವರಃ || ೪ ||

ಖಡ್ಗಹಸ್ತೋ ಮಹಾಕಾಯೋ ವಾಮೇ ಚರ್ಮಧರಸ್ತಥಾ |

ಜಟಾಜೂಟಸಮಾಯುಕ್ತಃ ಪ್ರಾಂಶುಕೃಷ್ಣಾಚಲೋಪಮಃ || ೫ ||

ದ್ವಿಭುಜಃ ಕೃಷ್ಣವಸ್ತ್ರಸ್ತು ಗರ್ದಭೋಪರಿಸಂಸ್ಥಿತಃ |

ಪ್ರಾನ್ತೋಪಾನ್ತೌ ಬಿನ್ದುಸರ್ಗಸಹಿತೌ ವಾದಿರೇವ ಚ || ೬ ||

ನೈರ್ಋತ್ಯಂ ಕಥಿತಂ ಬೀಜಂ ತೇನ ತಂ ಪರಿಪೂಜಯೇತ್ |

ರಕ್ಷಕೂಟಂ ಸಮಾರುಹ್ಯ ನಿರ್ಋತಿಂ ರಾಕ್ಷಸೇಶ್ವರಮ್ || ೭ ||

ಯಃ ಪೂಜಯೇದ್ವಿಧಾನೇನ ಚಣ್ಡಿಕಾಂ ರಾಕ್ಷಸೇಶ್ವರೀಮ್ |

ನ ತಸ್ಯ ರಾಕ್ಷಸೇಭ್ಯೋऽಸ್ತಿ ಭಯಂ ವಾऽಪಿ ಕದಾಚನ || ೮ ||

ರಾಕ್ಷಸಾಶ್ಚ ಪಿಶಾಚಾಶ್ಚ ವೇತಾಲಾ ಗಣನಾಯಕಾಃ |

ತಂ ದೃಷ್ಟ್ವಾ ಪುರುಷಂ ಹ್ಯೇತೇ ಸರ್ವದೈವ ಪ್ರಬಿಭ್ಯತಿ || ೯ ||

ಇತ್ಯುಕ್ತಂ ಕಾಲಿಕಾಯಾಂ ತು ಪುರಾಣೇ ನಿರ್ಋತಿಪ್ರಥಾಮ್ |

ಋಗ್ವೇದೇ ಕಥಿತೋ ಪಾಪ|ದೇವತೇತಿ ಹಿ ನಿರ್ಋತಿಃ || ೧೦ ||

ಸಙ್ಘಾತಃ ಕಾಲಸೂತ್ರಂ ಚೇ|ತ್ಯಾದ್ಯಾಃ ಸತ್ತ್ವಾಸ್ತು ನಾರಕಾಃ |

ಪ್ರೇತಾ ವೈತರಣೀ ಸಿನ್ಧುಃ ಸ್ಯಾದಲಕ್ಷ್ಮೀಸ್ತು ನಿರ್ಋತಿಃ || ೧೧ || (—ಅಮರಕೋಷೇ)

ಮೃತ್ಯುದೇವತಯಾ ಯುಕ್ತಾ ಭಯಮೃತ್ಯೋಶ್ಚ ಮಾತೃಕಾ |

ಮಹಾಭಯಸ್ಯ ಮಾತಾ ಚ ಹ್ಯಧರ್ಮಸ್ಯ ಸತೀ ತಥಾ || ೧೨ ||

(—ಮಹಾಭಾರತೇ)

ಅಧರ್ಮಹಿಂಸಯೋಃ ಪುತ್ರೀ ಭಯನರಕಯೋಃ ಪ್ರಸೂಃ | (—ಮಾರ್ಕಣ್ಡೇಯಪುರಾಣೇ)

ನಿರ್ಋತಿರ್ಭೂತಲಸ್ಥಾನಃ ಪ್ರಕೋಥಸ್ಯ ತಥೈವ ಚ || ೧೩ ||

ಮರಣಂ ಚ ತಥಾ ಪ್ರೋಕ್ತಸ್ತಥೈಕೋ ರುದ್ರ ಏವ ಚ |

ವಸೂನಾಮೇಕರೂಪಶ್ಚ ಹರಿವಂಶೇ ಪ್ರಕೀರ್ತಿತಃ || ೧೪ ||

ಅಧರ್ಮಯಮಲಾನ್ ಪುತ್ರಾನ್ ಆಜಗ್ರಾಹ ಹ್ಯಪುತ್ರಕಃ |

ಪಾರಿಜಾತಪ್ರಸಙ್ಗೇ ತು ಕೃಷ್ಣಾಚ್ಚೈವ ಪರಾಙ್ಮುಖಃ || ೧೫ ||

ಅರ್ಜುನೇನ ಪುರಾನ್ವಿಷ್ಟಂ ತತ್ಪುರಂ ವಿಪ್ರಪುತ್ರಯೇ |

ಮೃತಸ್ಸೋ ವೈ ತು ಸಂಪ್ರಾಪ್ತಃ ದಕ್ಷಿಣಾರೂಪಯಾ ಗುರೋಃ || ೧೬ ||

ಪುರಂಜನಪುರೀದ್ವಾರೇ|ಷ್ವೇಕೋ ಪಶ್ಚಿಮಭಾಗತಃ |

ತತ್ಪುರೀ ವೈಶಸಃ ಪ್ರೋಕ್ತೋ ಗುದೋऽಪೀತಿ ಹ್ಯುದೀರಿತಃ || ೧೭ ||

ಮುಹೂರ್ತ ಇತಿ ಚಾಪ್ಯುಕ್ತೋ ದಿನಸ್ಯ ನಿರ್ಋತಿಸ್ತಥಾ |

ಲಲಿತಾಯಾಃ ಪರೋ ಭಕ್ತೋ ನಿರ್ಋತಿರಿತಿ ಕೀರ್ತಿತಃ || ೧೮ ||

ಸುದೇವೀಧರ್ಮಪುತ್ರಶ್ಚ ವಸೂನಾಮೇಕ ಏವ ತು |

ನಿರ್ಋತಿರ್ದೇವಶೈಲಶ್ಚ ಬ್ರಹ್ಮಹತ್ಯಾಂ ವ್ಯಪೋಹತಿ || ೧೯ ||

ಜ್ಯೌತಿಷೇ ನೈರ್ಋತಂ ಪ್ರಾಹೂ ರಾಹುನಾಮ್ನಾ ದಿಶಾಧಿಪಮ್ || ೨೦ ||

ನೈರ್ಋತಃ ಕೌಣಪಃ ಕ್ರವ್ಯಾದ್ ಕ್ರವ್ಯಾದೋऽಸ್ರಪ ಏವ ಚ |

ರಾತ್ರಿಞ್ಚರೋऽऽಶರಶ್ಚೈವ ರಾತ್ರಿಚರಸ್ತು ಕರ್ಬುರಃ |

ಯಾತುಧಾನಃ ಪುಣ್ಯಜನೋ ಯಾತುಶ್ಚ ನಿಕಷಾತ್ಮಜಃ || ೨೧ || (—ಅಮರಕೋಷೇ)

ಯಾಸ್ಕನಿರುಕ್ತಾಧೃತಮ್—

(ಇಮಾನ್ಯೇಕವಿಂಶತಿಃ ಪೃಥಿವೀನಾಮಧೇಯಾನ್ಯನುಕ್ರಾನ್ತಾನಿ | ತತ್ರ ನಿರ್ಋತಿರ್ನಿರಮಣಾದೃಚ್ಛತೇಃ ಕೃಚ್ಛ್ರಾಪತ್ತಿರಿತರಾ ಸಾ ಪೃಥಿವ್ಯಾ ಸಂದಿಹ್ಯತೇ | ತಯೋರ್ವಿಭಾಗಃ ||— ನಿ.೨.೭)

ನಿರ್ಋತಿಃ ಪೃಥಿವೀನಾಮ|ಸ್ವೇಕವಿಂಶತಿಷು ಸ್ಮೃತಾ |

ಅನುಕ್ರಮೇಷು ಚಾಸ್ತೀತಿ ಹ್ಯನುಕ್ರಾನ್ತೇಷು ಕಥ್ಯತೇ || ೨೨ ||

ತತ್ರ ನಿರ್ಋತಿರಿತ್ಯಸ್ಯ ನಿರಮಣಂ ನಿಶ್ಚಯೇನ ತು |

ಜಘನಂ ಜಂಭನಂ ಚೈವ ರತಿಃ ಕ್ರೀಡಾ ತಥಾ ವನಮ್ || ೨೩ ||

ಋಚ್ಛತೇರ್ಗಮನೇ ಮೋಹೇ ಮೂರ್ತೌ ಕಾಠಿನ್ಯಕಾಯಯೋಃ |

ಇತರಾಸು ತಥಾ ಕೃಚ್ಛ್ರಾ|ಪತ್ತಿಷು ಪೃಥಿವೀತಲೇ || ೨೪ ||

ನಿರಮಣಾತ್ತಥಾ ಚೈವ ಹ್ಯೃಚ್ಛತೇರಾಗತೇತರೈಃ |

ಕೃಚ್ಛ್ರಾಪತ್ತಿರಿತಿ ಖ್ಯಾತಾ ಪೃಥಿವ್ಯಾ ನಿರ್ಋತಿಃ ಸ್ಮೃತಾ || ೨೫ ||

ನಿರ್ಋತೇರಪ್ಯಪತ್ಯಂ ಚ ನೈರ್ಋತೇತಿ ಹಿ ಕಥ್ಯತೇ |

ಕಲ್ಪಭೇದೇ ಮೃತ್ಯುಭಾರ್ಯಾ ನೈರ್ಋತೇತಿ ಚ ಕೀರ್ತಿತಃ || ೨೬ ||

ಮೂಲನಕ್ಷತ್ರದೇವಶ್ಚ ಚಂದ್ರಲೋಕಸಮಾಶ್ರಿತಃ |

ರಾಕ್ಷಸಾನಾಂ ಚ ಸಂಬಂಧೀ ಕುಬೇರಾನುಗ ಏವ ಚ || ೨೭ ||

ದೇವರಾಕ್ಷಸ ಏವೇತಿ ಭಾರತೋತ್ತರಭಾಗಗಃ |

ಕೌರವಾನೀಕರಕ್ಷಾಯೈ ದಕ್ಷಿಣಾಯಾಂ ದಿಶಿ ಸ್ಥಿತಃ || ೨೮ ||

ವನ್ದೇऽಹಂ ನೈರ್ಋತಂ ದೇವಂ ನಿರ್ಋತಾತ್ಮಜಮೀಶ್ವರಮ್ |

ನೈರ್ಋತಸ್ಯಾ ದಿಶೋ ದೇವೀಂ ಸರ್ವಬಾಧಾನಿವೃತ್ತಯೇ || ೨೯ ||